Job 28:1-28
28 Rü Yox rü ñanagürü: —Nangẽxma i nachicagü i ngextá nayaxuxü̃ i diẽrumü. Rü ngẽxgumarüxü̃ ta nangẽxma i nachicagü i nawa úiruchara imuxraxü̃.
2 Rü waixü̃mütüü̃wa nixĩ i nayaxuxü̃ i fieru. Rü ngẽxguma nutagü nadexẽẽgu rü cobre nixĩ i nawa ínguxuchixü̃.
3 Rü ngẽxguma yatügü rü nutagü i ngã̱xãẽruü̃güca̱x nadaugügu rü ãxmaxü̃ i máxmaxü̃gu nachocu rü taxuruü̃ma nüxü̃́ nixĩ i ngẽma waanexü̃, erü nümagü rü norü omümaxã naxca̱x nabáixgü ya yimá nutagü ya ngã̱xãẽruü̃gü.
4 Rü nümagü rü nügü naxücúnügüãcüma ãxmaxü̃ i úiru nawa ngẽxmagüxü̃gu nachocu i ngextá taxúema nawa nguxü̃.
5 Rü waixü̃müanearü düxétüwa narüxügü i trigu Natürü waixü̃müanetüxü̃wa i aixepewa rü nangẽxma ya üxü ya iya̱u̱xrane.
6 Rü ngẽxma nixĩ i nüxü̃ yarüngauxü̃ ya nutagü ya ngã̱xãẽruü̃gü ya chafírugü, rü waixü̃mütüü̃wa nixĩ i nüxü̃ yarüngauxü̃ i úiru.
7 Rü ngẽma ãxmaxü̃ i máxmaxü̃güxü̃ rü bai i ñuxgu nüxü̃ nadaugüxü̃ i ĩyügü rüe̱xna ẽxchagü.
8 Rü ngẽma naeü̃gü i düraexü̃, rü bai i leóü̃gü rü nagu nachocu i ngẽma ãxmaxü̃gü.
9 Rü yimá yatü nixĩ ya nutatanügu aigücü, rü ngẽmaãcü nanango̱xẽxẽ i ngẽma ma̱xpǘnegüarü aixepewa ngẽxmagüxü̃.
10 Rü ma̱xpǘnegüwa rü nanaxümáane. Rü ngẽmaãcü nüxü̃ inayangau i naguxü̃raü̃xü̃ i ngẽmaxü̃gü i tatanüxü̃ i ngéma ngẽxmagüxü̃.
11 Rü natügütape̱xegu naxca̱x nadaugü i mexü̃gü, rü ngẽxma nüxü̃ inayangaugü i ta̱xacü i tatanüxü̃ i taguma texé nüxü̃ dauxü̃.
12 ¿Natürü ngextá nixĩ i ne naxũxü̃ i ngẽma cua̱x? ¿Rü ngextá nixĩ i nangẽxmaxü̃ i ngẽma cua̱x i taãẽxü̃ tüxü̃ cua̱xẽxẽxü̃?
13 Rü nüma i duü̃xü̃ rü tama nüxü̃ nacua̱x nax poraãcü namexü̃ i ngẽma cua̱x. Rü tama ñoma i naanegu nixĩ i nüxü̃ iyarünga̱u̱xü̃ i ngẽma cua̱x.
14 Rü ngẽma már i mátamaxü̃ rü nidexa rü ñanagürü: “Nua chaxũtawa rü nataxuma i ngẽma cua̱x”, ñanagürü. Rü ngẽma to i már rü ta nidexa rü ñanagürü: “Choxü̃́ nataxuma i ngẽma cua̱x”, ñanagürü.
15 Rü woo úiru i mexẽchixü̃maxã rü tama naxca̱x tataxe i ngẽma cua̱x, rü bai i diẽrumaxã rü taxucürüwama naxca̱x tataxe i ngẽma cua̱x.
16 Rü ngẽma úiru i poraãcü mexü̃maxã rü taxucürüwa naxca̱x tataxe i ngẽma cua̱x. Rü bai i nutagü i nga̱xãẽruxü̃ i cornalinamaxã, rüe̱xna Chafírumaxã ningutanü i ngẽma cua̱x.
17 Rü ngẽma cua̱x rü úiruarü yexera rüe̱xna ta̱xacü i chipetüxü̃arü yexera namexẽchi. Rü taxucürüwama wüxi i ngẽmaxü̃ i úiru i mexẽchixü̃naxca̱xmaxã tanaxüchicüxü i ngẽma cua̱x.
18 Rü ngẽma cua̱x rü corálarü yexera narümemaexü̃chi, rü ñu̱xũchi nutagü i chipetügüxü̃, rü perlagüxü̃ rü ta narümemaexü̃chi.
19 Rü ngẽma crichólitu i Etiopíaanecüã̱x rü tama ngẽma cua̱xmaxã nawüxigu. Rü woo ngẽma úiru i guxü̃arü yexera rümemaexü̃maxã rü tama ningutanü nax naxca̱x itaxexü̃.
20 ¿Rü ngextá ẽ̱xna nixĩ i ne naxũxü̃ i ngẽma cua̱x? ¿Rü ngextá nixĩ i nangẽxmaxü̃ i ngẽma cua̱x i taãxẽxü̃ tüxü̃ cua̱xẽxẽxü̃?
21 Rü ngẽma cua̱x rü naeü̃gü i düraexü̃cha̱xwa rü inicu̱x. Rü ngẽma werigücha̱xwa rü ta inicu̱x.
22 Rü ngẽma yu rü ngẽma nachica i nawa nangugüxü̃ i ngẽma yuexü̃, rü ñanagürügü: “Marü nüxü̃ taxĩnüechiga i ngẽma cua̱x natürü tama nüxü̃ tacua̱x nax ngextá nangẽxmaxü̃”, ñanagürügü.
23 Natürü Tupana nixĩ ya nüxü̃ cuácü i ngẽma nama i cua̱xwa nadaxü̃. Rü nüma ya Tupanaxicatama nixĩ i nüxü̃ nacuáxü̃ nax ñuxãcü nüxü̃ iyarünga̱u̱xü̃.
24 Erü nüxicatama nixĩ i nüxü̃ nadauxü̃ i guxü̃ma i ñoma i naanewa ngẽxmagüxü̃ ñu̱xmata ñoma i naane iyacuáxü̃wa nangu. Rü nüxü̃ nadau i guxü̃ma i dauxü̃guxü̃ i naanetüü̃wa ngẽxmagüxü̃.
25 28:25-27 Rü yexguma Tupana pora nüxna ãxgu ga buanecü rü yatoxyepe̱xeãgu ga már arü dexá, rü yexguma nüxü̃ naxunetagu ga ñuxgu tá napuxü̃, rü ngextá tá yaxũxü̃ ga tacü ga buanecü, rü yexguma nixĩ ga Tupana nüxü̃ nadauxü̃ ga yema cua̱x nax aixcüma namexü̃. Rü nüxü̃ naxü rü nanangugü nax aixcüma namexü̃ i ngẽma cua̱x.
26 Nüü̃ nadau 28:25
27 Nüü̃ nadau 28:25
28 Rü Tupana rü duü̃xü̃güxü̃ ñanagürü: “Rü yíxema chauga ĩnüxe rü cua̱x tüxü̃́ nangẽxma. Rü yíxema nüxü̃ rüxoxe i chixexü̃gü rü aixcüma tümaãẽxü̃ tacua̱x”, ñanagürü ga Tupana —ñanagürü ga Yox.
