Job 29:1-25
29 29:1-2 Rü nüma ga Yox rü nidexachigüama, rü ñanagürü: —¡Chierüx ü̃pa Tupana choxna da̱u̱xgurüxü̃ choxna nada̱u̱xgu i ñu̱xmax!
2 Nüü̃ nadau 29:1
3 Rü yexguma nüma norü omümaxã choxü̃ yabáixmaxü̃gu rü ngóonexü̃gu chixũ woo naxẽanegu.
4 Rü yexguma changextü̱xügu, rü chaporagu, rü nüma ga Tupana rü choxü̃ narüngü̃xẽxẽ rü chopatawa toxna nadau.
5 Rü yexguma chaucüwawa nayexmagu ga Tupana ya Guxãétüwa Ngẽxmacü, rü guxü̃ma ga chaunegü rü chauxacügü rü chauxü̃tawa wüxiwa nayexmagü.
6 Rü yexguma ga lechi rü taguma nataxu ga chopatawa, rü chorü oribugü i nutatanügu togüxü̃wa ne naxũ ga taxü̃ ga chíxü̃.
7 Rü yexguma ĩanearü ãẽ̱xgacügütücumüwa chaxüxgu, rü nayexma ga chorü tochicaxü̃ i ĩanearü ngutaque̱xechicawa.
8 Rü yexguma choxü̃ nadaugügu ga ngextü̱xüxü̃gü nax yéma ne chaxũxü̃ rü choxü̃ naxüchicagü nax chaxüpetüxü̃ca̱x. Rü duü̃xü̃gü ga iyaxü̃ rü inachigü nax choxü̃ namoxẽgüxü̃ca̱x.
9 Rü woo ga yema yatügü ga itachigaxü̃ rü yexguma íchanguxgu rü inarüchianegü nax nügümaxã yadexagüxü̃, rü naxme̱xmaxã nügümaxã nüxü̃ nixugüe nax nachianetanüxü̃ca̱x.
10 Rü yema ãẽ̱xgacügü rü ígaxãcü nidexagü, rü norü conügü rü naxmanaxãwa yaxũ̱xgü.
11 Rü yexguma choxü̃ nadaugügu ga duü̃xü̃gü rüe̱xna namaxã chidexagügu, rü chomaxã nataãẽgü rü mexü̃ ga chauchiga nügümaxã nixugü.
12 Yerü choma rü tüxü̃ charüngü̃xẽẽxü̃ ga taxcutagü rü duü̃xẽgü ga ingearü diẽruã̱xgüe rü ñu̱xũchi duü̃xẽgü ga taxúema texé tüxü̃ rüngü̃xẽẽgüxe.
13 Rü guxema yutegüe rü duü̃xẽgü ga ingearü diẽruã̱xgüe, rü tüxü̃ charüngü̃xẽẽxü̃. Rü yema ngü̃xẽxẽ ga tümaca̱x chaxüxü̃ rü namaxã tataãẽgü.
14 Rü choma rü guxü̃guma mea duü̃xẽgümaxã ichacua̱x rü taguma changĩ̱x. Rü yema nixĩ ga chaucüma ga guxü̃ma ga ngunexü̃gu nagu chixũxü̃ ñoma chauxchiru ga guxü̃ ga ngunexü̃ nagu chicúxü̃rüxü̃.
15 Rü choma rü ñoma tümaxetügürüxü̃ chixĩ tümaca̱x ga guxema ingexetüxe, rü ñoma tümacutügürüxü̃ chixĩ tümaca̱x ga guxema ichixeparaxe.
16 Rü choma rü ñoma tümanatürüxü̃ chixĩ tümaca̱x ga guxema ngearü diẽruxã̱xgüe. Rü tümarü poxü̃ruxü̃ chixĩ tümaca̱x ga guxema to ga nachixü̃anewa ne ĩxẽ.
17 Rü choma nixĩ ga íchayachaxãchixẽẽxü̃ ga yema duü̃xü̃gü ga chixexü̃arü üruü̃gü. Rü choma nixĩ ga naxme̱xwa tüxü̃ chanapuxü̃ ga guxema tümagu yadauxcüraxü̃xẽ.
18 Rü choma rü chaugümaxã ñacharügü: “Chorü ngunexü̃gü rü tá namuxũchi ñoma naxnecüte̱xerüxü̃, rü tá yamaxãmare mea chopatagu chayu.
19 Rü choma rü ñoma wüxi i nai i natüpechinüwa rüxüxü̃ rü chütacü meama cherenamaxã iwaiátüxü̃rüxü̃ chixĩ.
20 Rü guxü̃ma i duü̃xü̃gü rü guxü̃gutáma mea chauchiga nidexagü rü tagutáma ínarüxĩ i chorü pora”, chaugümaxã ñacharügü.
21 Rü guxü̃ma ga duü̃xü̃gü rü mea chauga naxĩnüe, rü inarüchianegü nax chorü ucu̱xẽxü̃ naxĩnüexü̃ca̱x.
22 Rü nawena nax chidexaxü̃ rü taxúema namaxã tarüxutaga. Rü nüma ga duü̃xü̃gü rü meama nanayauxgü ga chorü ucu̱xẽgü.
23 Yerü ga duü̃xü̃gü rü naxca̱x nañu̱xãẽgü nax nüxü̃ naxĩnüechaü̃xü̃ ga chorü ucu̱xẽgü ñoma pucü ínangu̱xẽẽgügurüxü̃ i ngẽxguma nanaianegu.
24 Rü yexguma nüxü̃ changienügu ga duü̃xü̃gü rü wixgutaa̱x tama nayaxõgü erü chorü ngienümaxã chanataãẽxẽxẽ. Rü chorü taãẽchiwegu narüdaunüecha, rü yemaacü chanaporaãchitanüxẽxẽ.
25 Rü choma nixĩ ga duü̃xü̃gümaxã ichacuáxü̃ rü namaxã nüxü̃ chixuxü̃ ga ta̱xacü tá nanaxügüxü̃ ñoma wüxi i nachixü̃anearü ãẽ̱xgacü i norü churaragümaxã icuáxü̃rüxü̃. Rü yexguma nangechaü̃gügu rü choma nixĩ ga chanataãẽxẽẽgüxü̃.
