Job 3:1-26
3 Rü düxwa nidexa ga Yox rü chixexü̃ namaxã naxuegu ga yema ngunexü̃ ga nagu nabuxü̃.
2 3:2-3 Rü ñanagürü: —Nachixe ga yema chütaxü̃ ga chaunatü rü chaué nagu choxü̃ ngo̱xẽẽxü̃. Rü nachixe ga yema ngunexü̃ ga nagu chabuxü̃.
3 Nüü̃ nadau 3:2
4 Rü chierüx tama yangóonegu ga yema ngunexü̃ rü ẽanexü̃xü̃ yanguxuchigu. Rü chierüx nüxü̃ iyanangümagu ga Tupana nax yemaacü tama yangóonexü̃ca̱x ga yema ngunexü̃.
5 Rü chierüx wüxi ga waanexü̃ ga pamüemaxü̃ nawaanexẽẽgu, rüe̱xna wüxi ga caixanexü̃ nagu yangaixemagu, rüe̱xna wüxi ga waanexü̃ yadüpechitagu ga üa̱xcü.
6 Rü chierüx yematama chütaxü̃ ga nagu changóxü̃ rü waanexü̃gu yanatauxgu. Rü chierüx taxũchima yimá tauemacüarü ngunexü̃gütanüwa nango̱xgu ga yema ngunexü̃ ga nagu chabuxü̃. Rü chierüx taxũchima yimá taunecüarü tauemacügütanüwa nango̱xgu ga yema ngunexü̃.
7 Rü chierüx wüxi ga chütaxü̃ ga taxuxü̃ma nagu ngóxü̃ yixĩxgu rü wüxi ga chütaxü̃ ga taxúema nagu taãẽxü̃ yixĩxgu.
8 Rü ngẽma yuüxü̃gü ga Lebiatáü̃maxã icua̱xgüxü̃ rü chierüx chixexü̃ namaxã naxuegugügu ga yema ngunexü̃ ga nagu chabuxü̃.
9 Rü chierüx taxũchima yema pa̱xmama ẽxtagü ibáixgügu rü taxũchima üa̱xcü nangóonexẽẽgu rü taxũchima texé nüxü̃ da̱u̱xgu nax yangóonexü̃.
10 Rü nachixe ga yema chütaxü̃ ga nagu chabuxü̃ i ñu̱xma nagagu ngúxü̃ chingexü̃.
11 ¿Rü tü̱xcüü̃ tama wüxicana chaueanügutama chayuxü̃, rüe̱xna yexguma chaxíragutama chayuxü̃?
12 ¿Rü tü̱xcüü̃ nayexmaxü̃ ga chauéã́pü̱xü ga nagu choxü̃, rü ñu̱xũchi tümaníxü̃gü ga choxü̃ nawa tama̱i̱xü̃ne?
13 3:13-15 Rü yexguma chi noxri chabuxgu chayu̱xgu ga chomax, rü ñu̱xma rü taxũchima choxü̃́ nangẽxma i guxchaxü̃gü rü taãẽãcüma chi chape natanüwa ga yema ãẽ̱xgacügü rü norü ngü̃xẽẽruü̃gü ga nügüégagu naxügüxü̃ ga taxü̃ ga norü cua̱xãchixẽẽruü̃gü, rü nügüxü̃́ nangutaque̱xexü̃ i úirugü, rü napatagü ya mexẽchigüne rü diẽrumü namaxã yapaxẽẽgüne.
14 Nüü̃ nadau 3:13
15 Nüü̃ nadau 3:13
16 ¿Rü tü̱xcüü̃ tama yíxema tümaéanügu yuexü̃rüxü̃ choxü̃ inata̱xgü, ñoma buxe ya yuãcü íxraxerüxü̃?
17 Rü ngẽma chixexü̃arü üruü̃gü rü ngẽxguma nayuegu nixĩ i yacuáxü̃ nax chixexü̃ naxügüxü̃. Rü ngẽma ipaexü̃ rü ngẽxguma nayuegu nixĩ i nangü̃güxü̃.
18 Rü ngẽma poxcuexü̃ rü ngẽxguma nayuegu nixĩ i taãẽxü̃ yangaugüxü̃ rü marü tama nüxü̃ naxĩnüexü̃ i ngẽma namaxã inacua̱xgüxü̃ nax nuãcü nüxna nacagüexü̃.
19 Ngẽma yuexü̃tanüwa rü nawüxigumare i ngẽma diẽruã̱xgüxü̃ rü ñu̱xũchi ngẽma ngearü diẽruã̱xgüxü̃. Rü ngéma rü yíxema puracütanüxü̃ rü marü tama tümaarü corime̱xẽwa tangexma.
20 ¿Tü̱xcüü̃ ya Tupana i tüxü̃ nango̱xẽẽxü̃ ya yíxema ngúxü̃ ingexe? ¿Rü tü̱xcüü̃ i tüxü̃ namaxẽxẽxü̃ ya yíxema guxchaxü̃gü rü ngechaü̃gü tümaca̱x ínguxe?
21 ¿Rü tü̱xcüü̃ tama tayu ya yíxema yuca̱x dauxe rü woo poraãcü naxca̱x tada̱u̱xgu ñoma diẽru icúxü̃ca̱x idauxü̃rüxü̃?
22 Rü ngẽma taãxẽ i naxca̱x tadauxü̃ rü düxwa tüxna nangu i ngẽxguma tayu̱xgu rü tümamaxü̃gu tixücuchigu.
23 ¿Rü ta̱xacüca̱x nangóxü̃ ya wüxi ya yatü ega chi Tupana ngúxü̃wa rü guxchaxü̃wa namaxẽxẽãgu?
24 Rü ngẽma choxü̃́ nax nangúxü̃gagu rü tama chataiya rü ngẽma nax chaxaxuxü̃ rü chauxgüxü̃etü rü ñoma dexárüxü̃ nichuru.
25 Rü guxü̃ma ga yema guxchaxü̃gü ga naxca̱x chamuü̃xü̃ rü ñu̱xma rü choxna nangu.
26 Rü taguma icharüngü̃ rü taguma chataãxẽ, erü ngẽma guxchaxü̃gü rü choxna nangu, rü ngẽmagagu nataxu i chorü taãxẽ —ñanagürü ga Yox.
