Job 30:1-31
30 Natürü i ñu̱xmax, rü choxü̃ nacugüe i ngẽma ngextü̱xüxü̃gü ga ü̃pa guxema nanatügü rü taxũchima tüxna chanaxã ga puracü woo nax namaxã itacua̱xgüxü̃ca̱x ga chorü airugü ga chorü carnérugüarü dauruü̃gü.
2 Rü yexguma chi chorü puracütanüxü̃xü̃ tüxü̃ chadexgu ga guxema nanatügü ¿rü taxuwachima choxü̃́ time? Yerü tümagü rü marü tiyaeüchi rü tingearü poraã̱x.
3 Rü tümagü rü ngúxü̃ rü taiya tingegü. Rü chütaxü̃ rü chianexü̃gu naixchuma̱xã tangõ̱xgü.
4 Rü chuchuxü̃necügu tixĩgüetanü, rü tananutaque̱xegü i üxüxü̃ i maxẽgü rü chuchuxü̃chuma̱xã tangõ̱xgü.
5 Rü ĩanewa rü duü̃xü̃gü tüxü̃ naxoe rü nuãcü tüxü̃ ínawoxü̃ ñoma ngĩ́ta̱xagüxü̃xü̃ naxoo̱xgüxü̃rüxü̃.
6 Rü yemaca̱x natüxacügüarü ngatexü̃wa, rü nutagüarü ngü̃́xtexü̃güwa rü ãxmaxü̃güwa nixĩ i tamaxẽxü̃.
7 Rü deyuxü̃maxã ticagüxü̃ rü yemaca̱x chuchuxü̃tüü̃wa tügüna tanapa̱xgü.
8 Rü tümagü rü duü̃xü̃gü i taxuwama mexü̃ tixĩgü, rü yemaca̱x nixĩ ga tüxü̃ ínawoxü̃xü̃ ga nachixü̃anewa.
9 Natürü i ñu̱xmax i ngẽma tümanegü rü chaugu nidauxcüraxü̃gü rü choxü̃ nacugüe
10 Rü chowa naxãũã̱xgüãcü choxna nixĩgachitanü rü ñu̱xmata chauchiwewa nacua̱i̱xgü.
11 Rü ñu̱xmax nax Tupana choxna nayaxuxü̃ i chorü pora, rü duü̃xü̃güpe̱xewa choxü̃ naxãnexẽẽxü̃ rü ngẽmaca̱x taxúema choxü̃ tangechaü̃.
12 Rü ngẽma máetatanüxü̃ rü cha̱u̱xca̱x ínayaxüãchi rü choxü̃ inañagü nax choxü̃ yama̱xgüxü̃ca̱x.
13 Rü choxü̃ nipoxyepe̱xegü nax ngẽmaãcü choxü̃ yama̱xgüxü̃ca̱x. Rü taxúema choxü̃ ítapoxü̃.
14 Rü ñoma churaragü i wüxi ya ĩane ya pugüxü̃ rü norü poxeguxü̃tápü̱xwa chocuxü̃rüxü̃ nixĩ nax tagaãcü choxna nayu̱xgüxü̃.
15 Rü poraãcü chamuü̃, rü yema nax duü̃xü̃gü chomaxã taãẽgüxü̃ rü ñoma buanecürüxü̃ choxna niña. Rü yema mexü̃ ga nawa chayexmaxü̃ rü narüxo ñoma caixanexü̃ rüxoxü̃rüxü̃.
16 Rü ngẽma ĩ̱xãchiãxẽ rü cha̱u̱xca̱x ínangu rü ngẽmaca̱x düxwa tama maxü̃gu charüxĩnü.
17 Rü ngẽma ngúxü̃ i chingexü̃ rü chauxchina̱xãgüwa nangu. Rü chütacü rü taguma choxü̃́ narüna.
18 Rü Tupana rü choxü̃ nanuxnaxã, rü chauxchirumaxã choxü̃ nawẽxnaxã.
19 Rü ãcharaxü̃gu choxü̃ naña ñoma wüxi i waixü̃müte̱xe rüe̱xna tanimaca ngẽxma iñaxü̃rüxü̃.
20 Pa Chorü Tupanax, ñu̱xma nax ngü̃xẽẽca̱x cuxna chacaxü̃ rü cuma rü tama choxü̃ cungãxü̃. Rü cupe̱xegu chachichire̱x, natürü i cuma rü íxrarüwatama choxü̃ cudawenü.
21 Rü chomaxã cuchixecüma, rü yimá cuchacüxü ya poraxüchinemaxã choxü̃ quima̱x.
22 Rü cunamu i curü buanecü nax choxü̃ nachü̱xüxnagüxü̃ca̱x. Rü yimá tacü ya buanecügu choxü̃ cuña.
23 Rü choma rü meama nüxü̃ chacua̱x nax yuwa choxü̃ cugaxchaü̃xü̃ nawa i ngẽma nachica i nawa naxĩxü̃ i guxü̃ma i ta̱xacü i maxẽxü̃.
24 Rü yexguma guxema ngearü diẽruã́xẽ ngü̃xẽẽca̱x choxna caxgux ¿rü tama ẽ̱xna ga tüxü̃ charüngü̃xẽxẽxü̃?
25 ¿Rü tama ẽ̱xna tümaca̱x chaxaxu ga guxema ngúxü̃ ingexe? ¿Rü tama ẽ̱xna choxü̃́ taxãũxãchitümüxü̃ ga guxema ngearü diẽruã́xẽ?
26 Rü choma íchayangu̱xẽxẽ ga taãxẽ, natürü cha̱u̱xca̱x ínangu ga guxchaxü̃gü. Rü íchayangu̱xẽxẽ ga ngóonexü̃ natürü cha̱u̱xca̱x ínangu ga waanexü̃.
27 Rü guxü̃ i ngunexü̃ rü chanaxĩ̱xãchiãxẽ. Rü ngúxü̃xicatama nixĩ i cha̱u̱xca̱x ínguxü̃.
28 Rü ñoma waanexü̃wa changexmaxü̃rüxü̃ poraãcü changechaü̃. Rü guxü̃ i duü̃xü̃güpe̱xewa ngü̃xẽẽca̱x íchaca, natürü taxuxü̃ma choxü̃ narüngü̃xẽxẽ.
29 Rü ñu̱xma i ngẽma airugü i dauxchitacüã̱x rü ñoma chauenexẽgürüxü̃ nixĩgü. Rü ngẽma abetrúgü rü ñoma chomücügürüxü̃ nixĩgü.
30 Rü cha̱u̱xcha̱xmüxü̃ rü nanawaãchi rü chauxune rü niyauca namaxã i axüne
31 Rü ñu̱xma nax ngúxü̃ chingexü̃ rü chorü árpaga rü chorü woweruga rü taxü̃ i ngechaü̃ choxna naxã —ñanagürü ga Yox.
