Job 31:1-40
31 Rü nüma ga Yox rü nidexachigüama rü ñanagürü: —Choma rü meama chaugüna chayanuxü̃ nax tama choxü̃́ nangúchaü̃xü̃ca̱x i pacügü.
2 Rü yimá Tupana ya Guxü̃étüwa Ngẽxmacü ¿rü ta̱xacü yixĩxü̃ i norü natanü i dauxü̃wa naxca̱x ne namuxü̃ i wüxichigü i duü̃xü̃?
3 ¿Rü tama ẽ̱xna ngẽma duü̃xü̃gü i chixexü̃gu maxẽxü̃ rü ngẽma chixexü̃arü üruü̃güca̱x yixĩxü̃ i ngẽma guxchaxü̃gü?
4 ¿Rü tama ẽ̱xna Tupana nüxü̃ nadau i ngẽma chaxüxü̃? ¿Rü tama ẽ̱xna nanangugü ega ngextá chaxũxgu?
5 Rü aixcüma nüxü̃ chixu rü taguma chixexü̃gu charüxĩnüãcüma ta̱xacü chaxü, rü bai nagu charüxĩnü ga texéxü̃ nax chawomüxẽẽxü̃.
6 Rü chanaxwa̱xe nax Tupana meama choxü̃ ngugüxü̃, rü ngẽmawa tá nüxü̃ nacua̱x nax taguma chixexü̃ chaxüxü̃.
7 31:7-8 Rü ngẽxguma chi nüxna chixũgachigu i ngẽma nacüma i mexü̃, rü chi tama yáxna namaxã chaxĩnügu nax togüarü ngẽmaxü̃gü choxü̃ ngúchaü̃xü̃, rü chi ngürüãchi texéaxü̃́ naxca̱x changĩ̱xgu i ta̱xacü, rü marü name nax togü nangõ̱xgüxü̃ i ngẽma chorü nanetügüarü ogü rü nabe̱xgüaxü̃ i ngẽma choma ichatogüxü̃.
8 Nüü̃ nadau 31:7
9 31:9-10 Rü ngẽxguma chi nawe charüxũxgu i wüxi i ngexü̃ i cha̱u̱xca̱x ca̱xaxü̃ nax namaxã chamaxü̃xü̃ca̱x, rüe̱xna chi chopatacüwa pecü ya yatü naxma̱xmaxã chamaxü̱̃xgu, rü marü name nax yíxema cho̱xma̱x rü togüarü mugüruxü̃ tixĩxü̃ rü togü i yatügü tümamaxã maxẽxü̃.
10 Nüü̃ nadau 31:9
11 Rü ngẽxguma chi ngẽma chixexü̃ chaxüxgu rü wüxi i taxü̃ i chorü ãne chi nixĩ. Rü ngẽma nacüma rü naxca̱x tapoxcu.
12 Rü ngẽxguma chi ngẽma chixexü̃ chaxüxgu rü chi name nax noxtacüma wüxi i üxüema i taxüchixü̃ guxü̃ma i chorü ngẽmaxü̃gü yaxaexẽẽxü̃.
13 Rü yexguma ta̱xacüca̱x choxna nacagügu ga chorü puracütanüxü̃, rü choma rü nüxna chanaxã ga yema choxna naxca̱x nacagüxü̃.
14 ¿Rü ta̱xacüxü̃ tá chixu i ngẽxguma Tupanape̱xewa changexmagu? ¿Rü ta̱xacümaxã tá chanangãxü̃ i ngẽxguma choxna nacaxgu naxca̱x i ngẽma chaxüxü̃?
15 Rü yimátama ya Tupana ga chauéanüwa choxü̃ ngo̱xẽẽcü rü yimátama nixĩ ya chorü puracütanüxü̃xü̃ ngóexẽẽcü ga naégüanüwa.
16 Rü taguma tüxü̃ icharüngüma ga guxema ngearü diẽruã̱xgüxe nax tüxü̃ charüngü̃xẽẽxü̃, rü woo ga guxema yutegüxe rü taguma chanaxwa̱xe nax taiya tingegüxü̃.
17 Rü taguma chaxicatama chachibü, rü guxü̃guma tümamaxã changau ya guxema taxcutagü.
18 Rü guxü̃guma ñoma chaunegü tixĩgüxü̃rüxü̃ tümamaxã chixĩ ga guxema taxcutagü. Rü guxema yutegüxe rü guxü̃guma tüxü̃ charüngü̃xẽẽxü̃.
19 31:19-20 Rü yexguma nüxü̃ chada̱u̱xgu nax texé deyumaxã tayuxchaü̃xü̃ rüe̱xna wüxi ga ngearü diẽruã́xẽ ga taxumaama tügü idüxégaxe, rü choma rü chorü carnéruta̱xanaxca̱x ga naxchirumaxã tüxü̃ chaxüxchiru. Rü tüma rü moxẽ choxna taxã.
20 Nüü̃ nadau 31:19
21 Rü woochire̱x ãẽ̱xgacügü ga guxchaxü̃arü mexẽẽruü̃gümaxã nax chaxãmücüxü̃ rü taguma nape̱xewa tümagu chidauxcüraü̃ ga wüxi ga taxcuta.
22 Rü ngẽxguma chi tama aixcüma yixĩxgu i ngẽma rü marü name nax Tupana büyechacüümaxã rü boãchiãtümaxã choxü̃ poxcuxü̃.
23 Rü choma rü nüxü̃ chamuü̃ ga yema Tupanaarü poxcu, yerü nüma rü guxü̃étüwa nangẽxma rü taxũchima yáxna namaxã chaxĩnü ga yema norü poxcu.
24 Rü taguma chorü ngẽmaxü̃güna charüyoe.
25 Rü ngẽma chorü taãxẽ rü taguma yema muxü̃ ga chorü yemaxü̃wa nayexma rü bai ga yema mucüma ga chorü diẽruwa nayexma.
26 31:26-27 Rü woo nüxü̃ chadau nax poraãcü inabáxixü̃ ya üa̱xcü rü norü ngóonexü̃maxã iyanagoxü̃ ya tauemacü, natürü i chomax rü taguma bexma nüxü̃ chicua̱xü̃xü̃ rü taguma cho̱xme̱xmaxã nüxü̃ chachúxu.
27 Nüü̃ nadau 31:26
28 Rü ngẽxguma chi ngẽma chaxüxgu rü nüxü̃ chaxoxgu ya Tupana ya daxũgucü, rü chi name nax ngẽmaca̱x choxü̃ napoxcuxü̃.
29 Rü yexguma guxchaxü̃ naxca̱x ínguxgu ga yema chorü uanü rü taguma yemaca̱x chataãxẽ.
30 Rü taguma naxca̱x íchaca nax chixexü̃ nüxü̃ ngupetüxü̃ca̱x rüe̱xna nax nayuxü̃ca̱x.
31 Rü guxü̃ma ga yema duü̃xü̃gü ga chopatawa yexmagüxü̃ rü meama nachibüe rü nanangõ̱xgü ga maixcuraxü̃.
32 Rü yexguma chopatawa nanguxgu ga wüxi ga duü̃xü̃ ga to ga ĩanewa ne ũxü̃ rü choma rü chopatagu chanapexẽxẽ. Rü taguma düxétügu napemare.
33 Rü taguma togürüxü̃ ichayacu̱x ga yema chixexü̃ ga chaxüxü̃ rü taguma chayacúchigü nax duü̃xü̃gü tama nüxü̃ cuáxü̃ca̱x.
34 Rü taguma chautanüxü̃pe̱xewa ichayacu̱x i chorü chixexü̃ nax yemaacü tama nüxü̃ nacua̱xgüxü̃ca̱x rü choxü̃ naxoexü̃ca̱x.
35 Rü chierüx chanaxwa̱xe nax choxü̃ naxĩnüxü̃ ya Tupana. Rü ngẽma nüxü̃ chixuxü̃ rü aixcüma nixĩ rü ngẽmaca̱x chauéga nagu chaxümatü. Rü chanaxwa̱xe nax yimá Guxü̃étüwa Ngẽxmacü choxü̃ ngãxü̃xü̃. Rü yimá choxü̃ íxuaxü̃cü rü chanaxwa̱xe nax poperagu naxümatüaxü̃ i ngẽma namaxã choxü̃ ínaxuaxü̃xü̃.
36 Rü ngẽma namatü i namaxã choxü̃ ínaxuaxü̃xü̃ rü tá chauãtügu chayange. Rü chorü nga̱xcueruxü̃ tá chayaxĩxẽxẽ.
37 Rü taxuca̱xma chamuü̃ãcüma tá Tupanape̱xewa changu. Rü meama tá namaxã nüxü̃ chixu i guxü̃ma i ngẽma chaxüxü̃.
38 31:38-40 Rü ngẽxguma chi chauanegü rü choxü̃ ínaxuaxü̃gügu, rü chi guxü̃ma i norü aimüanegü rü ĩ̱xãchiãẽmaxã naxauxegu, rü ngẽxguma chi tama tüxü̃́ chanaxütanüãcüma toguxearü nanetü chíbugügu rüe̱xna chixri chorü puracütanüxü̃axü̃́ chaxütanügu, rü ñu̱xũchi marü name nax chauanewa triguchicüxü naxügüxü̃ i chuxchuxü̃gü rü chebádachicüxü naxügüxü̃ i chixexü̃ i maxẽ —ñanagürü. Rü yemaacü nixĩ ga yagúexü̃ ga norü ore ga namaxã nügü ínapoxü̃xü̃ ga Yox.
39 Nüü̃ nadau 31:38
40 Nüü̃ nadau 31:38
