Job 33:1-33
33 Rü nüma ga Eriú rü nidexachigüama rü ñanagürü: —Ngẽmaca̱x, Pa Yox, chanaxwa̱xe nax icurüxĩnüxü̃ i chorü ore. ¡Rü mea irüxĩnü i ngẽma ore i tá cumaxã nüxü̃ chixuxü̃!
2 Rü ñu̱xma rü marü choxü̃́ nangẽxma nax ta̱xacümaxã tá cuxü̃ changãxü̃xü̃.
3 Rü ore i aixcüma ixĩxü̃maxã tá chidexa. Rü aixcüma tá cumaxã nüxü̃ chixu i ngẽma nagu charüxĩnüxü̃.
4 Rü Tupana ya Guxãétüwa Ngẽxmacü nixĩ i choxü̃ ngo̱xẽẽcü rü choxü̃ maxẽẽcü.
5 Rü ngẽxguma chi nüxü̃ cucua̱xgu nax choxü̃ cungãxü̃xü̃ ¡rü ẽcü choxü̃ nangãxü̃!
6 Rü dücax, rü choma rü cuma rü Tupanape̱xewa rü tawüxigumare. Erü yixema i taxre rü waixü̃müwa tüxü̃ naxü.
7 Rü ngẽmaca̱x tama name i chomaxã cubaixãchi, erü taxũtáma ñoma wüxi i ãẽ̱xgacürüxü̃ cumaxã chixĩ.
8 33:8-9 Rü choma rü aixcüma chauchi̱xẽmaxã cuxü̃ chaxĩnü nax ñacuxü̃: “Tupanape̱xewa chame, rü nataxuma i chixexü̃ i chowa, rü taguma ta̱xacürü chixexü̃ chaxü. Natürü nüma ya Tupana rü naxca̱x nadau nax ta̱xacüca̱x choxü̃ ínaxuaxü̃xü̃. Rü ñoma wüxi i norü uanürüxü̃ chomaxã nixĩ”, ñacurügü.
9 Nüü̃ nadau 33:8
10 Rü ñacurügü: “Tupana rü ñoma chixexü̃ chaxüxü̃rüxü̃ choxü̃ nadau, rü ñoma norü uanü chixĩxü̃rüxü̃ chomaxã nixĩ.
11 Rü cadénamaxã choxü̃ nangãxü̃ rü ngẽxguma ta̱xacü chaxüxgu rü guxü̃guma choxü̃ nangugü”, ñacurügü.
12 Natürü tama aixcüma nawe̱xgu i ngẽma nüxü̃ quixuxü̃ erü ya Tupana rü guxãétüwa nangẽxma.
13 ¿Rü tü̱xcüü̃ nape̱xewatama Tupanana cunaxu nax tama cuxü̃ nangãxü̃xü̃ i curü ore i namaxã cugü ícupoxü̃xü̃?
14 Tupana rü naguxü̃raü̃ãcü tamaxã nidexa natürü i yixema rü tama nüxü̃ tacua̱x nax nüma yixĩxü̃ i tamaxã yadexaxü̃.
15 Ñuxguacü rü chütacü tamaxã nidexa i tanegüwa, rüe̱xna tüxü̃ nango̱xetüxẽxẽ i ngẽxguma yaxta tüxü̃ poragu rü ipeegu.
16 33:16-17 Rü Tupana rü nidexa naxmachixẽwa i duü̃xü̃gü rü nayaxucu̱xẽgü rü nanamuü̃exẽxẽ nax ngẽmaãcü nüxna yaxĩgachixü̃ca̱x i ngẽma nacüma i chixexü̃ rü tama nügü yacua̱xüü̃güxü̃ca̱x.
17 Nüü̃ nadau 33:16
18 Rü ngẽmaãcü ya Tupana rü ínanapoxü̃ i duü̃xü̃gü nax tama nayuexü̃ca̱x rü tama tauquegu yata̱xgüxü̃ca̱x.
19 Rü ñuxguacü ya Tupana rü duü̃xü̃güca̱x ínanangu̱xẽxẽ i da̱xaweane rü ngúxü̃ nüxü̃ ningexẽxẽ nax ngẽmamaxã iyanawe̱xãchixẽẽãxü̃ca̱x.
20 Rü ngẽxguma yada̱xawexgu rü nawa nangu nax marü tama nüxü̃ nachi̱xégaxü̃ woo ta̱xacürü õna i chi̱xichixü̃.
21 Rü nawa nangu nax ngẽma namachi rü yanachigüxü̃ ñu̱xmata naxchina̱xãrica íyaxǘ.
22 Rü ngẽmaãcü marü nüxü̃ ningaica nax nayuxü̃ rü naxmaxü̃xü̃tawa nangegüãxü̃.
23 33:23-25 Natürü ngẽxguma chi nangẽxmagu i wüxi i daxũcüã̱x i Tupanaarü duü̃xü̃ i nüxü̃ ngechaü̃xü̃ rü naétüwa idexaxü̃, rü chi Tupanamaxã nüxü̃ yaxuxgu nax nüma rü taguma ta̱xacürü chixexü̃ naxüxü̃, rü chi Tupanaxü̃ ñaxgu: “Pa Tupanax, ¡yuwa ínanguxuchixẽxẽ rü taxṹ i cunayuxẽẽxü̃ erü marü choxü̃́ nangẽxma i natanü i norü maxü̃”, ñaxgu! Rü ngẽxguma rü tá naxca̱x nitaane, rü tá napora ñoma wüxi ya ngextü̱xücürüxü̃.
24 Nüü̃ nadau 33:23
25 Nüü̃ nadau 33:23
26 Rü ngẽxguma yumüxẽwa Tupanana naca̱xgu rü nüma ya Tupana rü tá nanangãxü̃. Rü nüma i ngẽma duü̃xü̃ rü taãẽãcü tá Tupanaxü̃ nadau. Rü nüma ya Tupana rü noxrirüxü̃ tá namaxã nataãxẽ.
27 Rü ngẽxguma i nümax i ngẽma duü̃xü̃ rü duü̃xü̃güpe̱xewa tá ñanarügü: “Woo pecadu chaxü, natürü Tupana choxü̃́ nüxü̃ narüngüma rü tama ngẽma choxna üxü̃maxã choxü̃ napoxcu.
28 Rü nawa choxü̃ ínanguxuchixẽẽãma i ngẽma yu. Rü ngẽmaca̱x i ñu̱xmax rü ngóonexü̃wa changexma”, ñanagürü.
29 33:29-30 Rü Tupana rü muẽ̱xpü̱xcüna ngẽmaãcü duü̃xü̃gümaxã nanaxü nax ínapoxü̃ãxü̃ca̱x nüxna i yu rü ngẽmaãcü ñoma i naanearü ngóonexü̃wa namaxẽamaxü̃ca̱x.
30 Nüü̃ nadau 33:29
31 Pa Yox, chanaxwa̱xe nax choxü̃́ icurüxĩnüxü̃. ¡Rü nachianemare i ngẽxguma choma chidexagu!
32 Natürü ngẽxguma cuxü̃́ nangẽxmagu nax ta̱xacüxü̃ quixuxchaxü̃xü̃ rü marü name nax nüxü̃ quixuxü̃. Rü choma rü tá taãẽãcüma cuxü̃́ chanayaxu.
33 Rü ngẽxguma marü nataxuxguma i ta̱xacü i nüxü̃ quixuxchaü̃xü̃ rü chanaxwa̱xe nax mea choxü̃́ icurüxĩnüxü̃. Rü choma rü tá cuxü̃ changu̱xẽxẽ nax ñuxãcü tá cua̱x cuxü̃́ ngẽxmaxü̃ —ñanagürü ga Eriú.
