Job 34:1-37
34 34:1-2 Rü yexguma nüma ga Eriú rü wena nidexa rü ñanagürü: —Pemax nax cua̱x pexü̃́ ngẽxmaxü̃ rü peãẽxü̃ picuáxü̃ rü chanaxwa̱xe nax choxü̃́ iperüxĩnüexü̃.
2 Nüü̃ nadau 34:1
3 Rü taxmanaxã rü nüxü̃ nacua̱x i naaca i ta̱xacürü õna. Rü ngẽxgumarüxü̃ ta i taxmachixẽ rü nüxü̃ nacua̱x nax ta̱xacüchiga yixĩxü̃ i ngẽma dexa i nüxü̃ naxĩnüxü̃.
4 Rü ngẽmaca̱x name nax mea nangugüxü̃ i ñaa Yoxarü guxchaxü̃ nax ngẽmaãcü nüxü̃ icuáxü̃ca̱x nax ngexü̃rüüxü̃ yixĩxü̃ i ngẽma ore i wéxü̃.
5 Yerü nüma ga Yox rü ñanagürü: “Choma rü taxuxü̃ma i ta̱xacürü chixexü̃ chaxüchire̱x, natürü ya Tupana rü tama choxü̃ narüngü̃xẽẽchaü̃.
6 Rü choma rü wüxi i yatü i mexü̃arü üruxü̃ chixĩ rü taguma pecadu chaxü, natürü nüma ya Tupana rü ñoma wüxi i duü̃xü̃ i dorata̱xaxü̃ãcü choxü̃ nixĩxẽxẽ rü ngẽma taxü̃ i chorü guxchaxü̃ rü nüxü̃́ nataxuma i norü mexẽẽruxü̃”, ñanagürü ga Yox.
7 Rü tataxuma ya texé ya Yoxrüxü̃ Tupanagu idaucüraxü̃xe, ñoma dexá tauxchaãcü ixaxüxü̃rüxü̃.
8 Rü nüma rü norü me nixĩ nax namaxã naxãmücüxü̃ i ngẽma duü̃xü̃gü i chixexü̃ ügüxü̃ rü chixexü̃gu maxẽxü̃.
9 Rü ñu̱xmax rü Yox nüxü̃ nixu nax taxuwama duü̃xü̃axü̃́ namexü̃ nax Tupanaca̱x imaxü̃xü̃.
10 Natürü pemax, Pa Chomücügüx nax Peãẽxü̃ Pecuáxü̃x ¡rü choxü̃ iperüxĩnüe! ¡Rü taxṹ i nagu perüxĩnüexü̃ ya yimá Tupana ya Guxãétüwa Ngẽxmacü rü chixexü̃ naxüxü̃ rüe̱xna ínatüxü̃ i ngẽxguma texéxü̃ iyanawe̱xãchixẽẽgu!
11 Rü nüma ya Tupana rü ngẽma taxüxü̃ãcüma tüxü̃́ nanaxütanü ya wüxíechigü. Rü yíxema mexü̃ üxe rü mexü̃maxã tüxü̃́ nanaxütanü rü yíxema chixexü̃ üxe rü poxcumaxã tüxü̃́ nanaxütanü.
12 Rü nüma ya Tupana ya Guxãétüwa Ngẽxmacü rü aixcüma taguma chixexü̃ naxü rü taguma chixri duü̃xü̃gümaxã inacua̱x.
13 Rü nüma ya Tupana rü taxúexü̃tawama nanayaxu ga pora nax guxü̃ma i ñoma i naanemaxã inacuáxü̃ca̱x.
14 34:14-15 Rü ngẽxguma Tupana duü̃xü̃güna nayaxugu i norü maxü̃ rü guxü̃ma nayue rü wenaxarü waixü̃müxü̃ nixĩgü.
15 Nüü̃ nadau 34:14
16 Rü ngẽxguma cumax, Pa Yox, rü wüxi i duü̃xü̃ i cuãẽxü̃ cuáxü̃ quixĩxgu rü ¡ẽcü choxü̃ irüxĩnü i ñaa chorü dexa!
17 Rü ngẽxgumachi Tupana naxchi aiegu i ngẽma mexü̃ ¿rü ñuxãcü chi namaxã inacua̱x i guxü̃ma i naane? Rü nüma nax guxãarü yexera mecü yixĩxü̃ ¿rü ñuxãcü i cumax nüxü̃ quixuxü̃ nax chixexü̃ naxüxü̃?
18 Rü ngẽxguma chixexü̃ naxügügu i ngẽma nachixü̃anegüarü ãẽ̱xgacügü rü ngẽma diẽruã̱xgüxü̃, rü Tupana rü nananga.
19 Natürü nüma ya Tupana rü guxãxü̃ma wüxigu narüngü̃xẽxẽ. Rü woo ãẽ̱xgacü ixĩxẽ rü woo diẽruã̱xgüxe rü woo ngearü diẽruã̱xgüxe rü Tupana rü wüxigutama guxãxü̃ narüngü̃xẽxẽ. Erü nüma ya Tupana rü guxãxü̃ma nango̱xẽxẽ.
20 Rü duü̃xü̃gü rü chütacü ngürüãchimare nayue. Rü nanue rü nügü nadai rü ngẽxma nayue. Rü ngẽma nügü írüporaxü̃ rü nayu woo tama duü̃xü̃gü yama̱xgu.
21 Rü guxü̃ma i ngẽma naxüxü̃ i wüxichigü i duü̃xü̃ rü Tupana rü nanangugü. Rü nüxü̃ nacua̱x nax ta̱xacü naxüxü̃ i ngexta ínaxũxü̃wa.
22 Rü nataxuma i ta̱xacü i waanexü̃ i Tupanacha̱xwa yadüxüxü̃ i wüxi i duü̃xü̃ i chixexü̃arü üruxü̃.
23 Rü Tupana rü tama duü̃xü̃gümaxã nüxü̃ nixu nax ñuxgu tá nayuxü̃ rü nape̱xewa naxũxü̃ nax nüxna naca̱xaxü̃ca̱x.
24 Rü Tupana rü taxúenama naca nax ínawoxü̃ãxü̃ca̱x i ngẽma nügü írüporaexü̃ rü ñu̱xũchi togüna nax naxããxü̃ca̱x i nachica.
25 Rü nüma ya Tupana rü nüxü̃ nacua̱x i ngẽma chixexü̃ i naxügüxü̃ i ngẽma nügü írüporaexü̃, rü chütacü rü ínanawoxü̃. Rü ngẽxma narüxo i norü pora.
26 Rü nüma ya Tupana rü guxãpe̱xegu nanapoxcu ñoma máetaxü̃gürüxü̃.
27 Erü tama Tupanaga naxĩnüechaü̃, rü tama nanayauxgüchaü̃ i norü mugü rü norü ngu̱xẽẽtaegü.
28 Rü chixri tümamaxã inacua̱xgü ya yíxema ngearü diẽruã̱xgüxe. Rü ngẽmaca̱x nüma ya Tupana rü nüxü̃ naxĩnü nax aita taxüexü̃ rü ngü̃xẽẽca̱x ítacagüxü̃ ya yíxema ngearü diẽruã̱xgüxe.
29 34:29-30 Rü ngẽxguma chi Tupana rüchianegu ¿rü texé tá nüxü̃ tixu nax chixexü̃ taxüxü̃? Rü ngẽxguma duü̃xü̃gücha̱xwa nügü yacu̱xgu ¿rü texé tá nüxü̃ tadauama? Rü nüma nixĩ i nüxna nadauxü̃ ya ĩanegü rü duü̃xü̃gü nax tama namaxã inacua̱xgüxü̃ca̱x i ngẽma ãẽ̱xgacügü i chixexü̃ i duü̃xü̃güxü̃ womüxẽẽxü̃.
30 Nüü̃ nadau 34:29
31 ¿Rü tü̱xcüü̃ i cumax, Pa Yox, tama Tupanamaxã nüxü̃ quixuxü̃ i curü chixexü̃, rü ñacuxü̃: “Chixexü̃ chaxü natürü tá nüxü̃ charüxo i ngẽma chixexü̃”, ñacurügü?
32 ¿Rü tü̱xcüü̃ i tama Tupanaxü̃ ñacuxü̃: “¡Ẽcü choxü̃ nawe̱x i ngẽma chixexü̃ i chaxüxü̃! Rü ngẽxguma chi marü chixexü̃ chaxüxgu rü tá nüxü̃ charüxo”, ñacuxü̃?
33 ¿Ẽ̱xna cumax, Pa Yox, rü nagu curüxĩnügu rü Tupana rü tá cunaxwa̱xexü̃ãcüma cuxü̃́ nanaxütanü woo cuma rü tama naga nax cuxĩnüxü̃? Rü ñu̱xma rü cuxna chaca ¿rü ñuxũ ñaxü̃gu curüxĩnüxü̃ i ñu̱xma nax ngẽma orexü̃ cumaxã chixuxü̃? Rü chanaxwa̱xe i toxü̃ cungãxü̃ga.
34 Rü pema i yatügü ya nüxü̃ cua̱xüchigüxe rü peãẽxü̃ cuáxe rü choxü̃ ĩnüexe, ¿rü ñuxũ ñapegüxü̃ i pema?
35 Erü Yox rü tama nüxü̃ nacuáãcüma nidexamare, rü ñoma wüxi i duü̃xü̃ i tama naãxẽxü̃ cuáxü̃rüxü̃ nidexa.
36 Rü name i pema rü meama Yoxü̃ pengugü, erü ñoma wüxi i duü̃xü̃ i chixexü̃arü üruü̃ãcü tüxü̃ nangãxü̃.
37 Rü tama chixexü̃xicatama naxü i Yox natürü naétü tama Tupanaga naxĩnü. Rü tape̱xewa rü Tupanagu nidauxcüraxü̃ rü namaxã nügü tachoxü̃gagü —ñanagürü ga Eriú.
