Job 35:1-16
35 35:1-2 Rü wena nidexa ga Eriú rü ñanagürü: —Pa Yox, ¿ẽ̱xna cuma nagu curüxĩnügu rü name i ngẽma cuxüxü̃? Erü nüxü̃ quixu nax taguma Tupanape̱xewa ta̱xacürü chixexü̃ cuxüxü̃.
2 Nüü̃ nadau 35:1
3 Rü cuma rü Tupanaxü̃ ñacurügü: “¿Tü̱xcüü̃ nagu curüxĩnü ega pecadu chaxüxgu? ¿Rü ta̱xacüwa cuxü̃́ name ega tama pecadu chaxüxgu?” ñacurügü nüxü̃ ya Tupana.
4 Natürü i choma rü tá cuxü̃ rü cumücügüxü̃ changãxü̃ i ñu̱xma.
5 Rü dücax, ¡daxũgu nadawenü rü nüxü̃ nadau i ngẽma caixanexü̃ i cuétüwa ngẽxmagüxü̃!
6 Rü woo chi pecadugu cumaxü̃gu rü tama Tupanaarü guxchaxü̃ nixĩ. Rü woo namuxũchigu i curü chixexü̃gü rü tama cunachixexẽxẽ ya Tupana.
7 Rü woo ega mexü̃ cuxü̱xgu ¿rü ta̱xacürü mexü̃ nixĩ i Tupanana cuxãxü̃? ¿Rü ta̱xacürü mexü̃ cuwa nayaxuxü̃ ya Tupana?
8 Rü ngẽma pecadu i cuxüxü̃ rü ngẽma curüxü̃ duü̃xü̃gü ixĩgüxü̃xü̃ nixĩ i nachixexẽẽxü̃. Rü ngẽma mexü̃ i cuxüxü̃ rü ngẽma curüxü̃ duü̃xü̃gü ixĩgüxü̃xü̃ nixĩ i nataãẽxẽẽxü̃.
9 Rü ngẽxguma wüxi i ãẽ̱xgacü norü duü̃xü̃gümaxã chixri icua̱xgu, rü nüma i duü̃xü̃gü rü aita naxüe rü naxca̱x nadaugü nax texé naxme̱xwa ínanguxü̃xẽẽxü̃ i ngẽma nügü írüporaexü̃.
10 Natürü ngẽma duü̃xü̃gü rü ngẽxguma taxü̃ i guxchaxü̃wa nangẽxmagügu rü tama naxca̱x nadaugü ya yimá Tupana ga nango̱xẽẽcü rü pora nüxna ãcü.
11 Rü nüxü̃ narüngümae ya yimá Tupana ya cua̱x tüxna ãcü rü tüxü̃ nguxẽẽcü nax naeü̃gü rü werigüarü yexera cua̱x tüxü̃́ ngẽxmaxü̃ca̱x.
12 Rü ngẽma duü̃xü̃gü rü düxwa Tupanaca̱x aita naxüe, natürü nüma rü tama nanangãxü̃ erü nümagü rü duü̃xü̃gü i chixexü̃ rü nügü icua̱xüü̃güxü̃ nixĩgü.
13 Rü yimá Tupana ya Guxãétüwa Ngẽxmacü rü tama naga naxĩnü i norü yumüxẽ i taxuwama mexü̃.
14 Rü woo tama Tupanaxü̃ cuda̱u̱xgu, ¡natürü íyangu̱xẽxẽ! Erü nüma rü marü nüxü̃ nacua̱x i ngẽma curü guxchaxü̃.
15 Rü cuma rü nüxü̃ quixu nax Tupana rü taguma nanuxü̃ rü tama tüxü̃ napoxcuxü̃ rü tama nagu naxĩnüxü̃ i pecadugü.
16 Natürü i cumax, Pa Yox, rü cuechita quidexamare. Rü muxü̃ma i orexü̃ quixu natürü tama nüxü̃ cucua̱x nax ta̱xacüxü̃ quixuxü̃ —ñanagürü ga Eriú.
