Job 36:1-33
36 36:1-2 Rü wena nidexa ga Eriú rü ñanagürü: —¡Chomaxã yáxna naxĩnü! Rü choma rü tá cumaxã nüxü̃ chixu i togü i ore i namaxã Tupanaxü̃ íchapoxü̃xü̃.
2 Nüü̃ nadau 36:1
3 Rü choma rü aixcüma cua̱x choxü̃́ nangẽxma rü ngẽma chorü cua̱xmaxã tá cuxü̃ chanawe̱x nax tama ínatüxü̃ ya yimá choxü̃ ngo̱xẽẽcü.
4 Rü cumaxã nüxü̃ chixu rü taxũtáma ore i dora ixĩxü̃xü̃ cumaxã chixu. Erü cupe̱xewa cuxü̃́ nangẽxma i wüxi i yatü i aixcüma cua̱x nüxü̃́ ngẽxmaxü̃.
5 Rü Tupana rü naporaxüchi rü guxü̃xü̃ma nacua̱x. Rü tama tüxü̃ naxõõ̱x ya yíxema ngearü chixexü̃ãxẽ.
6 Rü nanadai i ngẽma chixexü̃arü üruü̃gü, natürü tüxü̃ narüngü̃xẽxẽ ya yíxema ngearü diẽruã̱xgüxe.
7 Rü guxü̃guma tüxna nadau ya yíxema mexü̃arü üruü̃gü. Rü ñu̱xũchi ãẽ̱xgacügüxü̃ narüngü̃xẽxẽ nax guxü̃guma duü̃xü̃gümaxã inacuáxü̃ca̱x.
8 36:8-9 Natürü ngẽxguma cadénamaxã yana̱i̱xgügu rü ngúxü̃ yangegügu rü Tupana rü tá nüxü̃ nanawe̱x i ngẽma chixexü̃ i naxügüxü̃ i ngẽxguma nügü yacua̱xüü̃gügu.
9 Nüü̃ nadau 36:8
10 Rü Tupana rü namaxã nidexa nax iyanawe̱xãchixẽẽgüãxü̃ca̱x rü namaxã nüxü̃ nixu nax nüxna yaxĩgachixü̃ca̱x i ngẽma chixexü̃.
11 Rü ngẽxguma naga naxĩnüegu, rü guxü̃gutáma namaxẽyane rü taãẽwa rü mexü̃wa nangẽxmagü.
12 Natürü ngẽxguma tama naga naxĩnüegu rü ngürüãchi tá nayue rü naxmaxü̃gu tá nayanucu.
13 Rü ngẽma chixexü̃ ügüxü̃ rü Tupanamaxã nanueama woo poxcuwa nax nangẽxmagüxü̃. Rü tama Tupanana ngü̃xẽẽca̱x nacagüe.
14 Rü nangextü̱xügutama nayue. Rü ngẽxguma nayuegu rü ãne yangegüãcüma nayue.
15 Rü yíxema ngúxü̃ ingegüxe, rü Tupana rü ngúxü̃ tingegüãcüma tüxü̃ ínanguxü̃xẽxẽ nawa i ngẽma ngúxü̃ i tingegüxü̃. Rü ngẽxguma tanaxĩ̱xãchiãẽgügu rü tüxü̃ nataãẽxẽxẽ.
16 Rü cuma rü ta, Pa Yox, rü curü ĩ̱xãchiãẽwa cuxü̃ ínanguxuchixẽxẽ. Rü muxü̃ma ga curü yemaxü̃gü cuxna naxã. Rü nanapá ga curü mecha namaxã ga õna ga chi̱xichixü̃.
17 Rü Tupana rü cuxü̃ napoxcu ñoma wüxi i chixexü̃gu maxü̃xü̃rüxü̃. Rü taxucürüwa naxcha̱xwa quiña i ngẽma poxcu i cumaxã naxueguxü̃.
18 Rü ngẽmaca̱x ¡mea cugüna nadau nax tama cuxü̃ nawomüxẽẽxü̃ca̱x i curü diẽru rü curü ngẽmaxü̃gü!
19 Rü guxü̃ma i ngẽma curü diẽru rü curü ngẽmaxü̃gü rü taxuwatáma cuxü̃́ name.
20 ¡Rü taxṹ i cunaxwa̱xexü̃ nax paxa nachütaxü̃! Rü ngẽma waanexü̃ rü taxũtáma cuxü̃ nicu̱x.
21 ¡Rü cugüna nadau nax tama wenaxarü naxca̱x cutaeguxü̃ i ngẽma chixexü̃! Erü ngẽma chixexü̃gagu nixĩ i ñu̱xmax ngúxü̃ quingexü̃.
22 ¡Rü nagu rüxĩnü nax ñuxãcü guxü̃étüwa nangẽxmaxü̃ ya Tupana! Rü nataxuma i ngu̱xẽẽtaeruxü̃ i namaxã wüxiguxü̃.
23 Rü taxúema tüxü̃́ nangẽxma i pora nax nüxü̃ tixuxü̃ca̱x nax nüma rü ínatüxü̃ rü nachixexü̃ i ngẽma nüma naxüxü̃.
24 Rü muxü̃ma i duü̃xü̃gü i guxü̃ i naanewa rü Tupanaxü̃ nicua̱xüü̃gü naxca̱x i ngẽma mexü̃gü i naxüxü̃. Rü name nax cuma rü ta nüxü̃ quicua̱xüüxü̃ naxca̱x i ngẽma naxüxü̃.
25 Rü guxü̃ma i duü̃xü̃gü rü nüxü̃ nadaugü i ngẽma mexü̃gü i naxüxü̃ woo yáxü̃wa yixĩxgu nax nüxü̃ nadaugüxü̃.
26 Rü ngẽma nax guxü̃arü yexera yixĩxü̃ ya Tupana rü taxucürüwa nüxü̃ tacua̱xéga nax ñuxãcü yixĩxü̃. Rü taxucürüwa tayaxugü nax ñuxre yixĩxü̃ i norü taunecü.
27 Nüma rü wüxiwa nanaxĩxẽxẽ i dexáarü churuxü̃ rü ñu̱xũchi pucüxü̃ nananguxuchixẽxẽ.
28 Rü yimá pucü rü caixanexü̃güwa nixĩ i ne naxũxü̃, rü ngéma nixĩ i duü̃xü̃güétügu napuxü̃.
29 ¿Rü texé nüxü̃ tacua̱x nax tü̱xcüü̃ yaxĩgütanücüüxü̃ i ngẽma caixanexü̃gü? ¿Rü texé nüxü̃ tacua̱x nax tü̱xcüü̃ dauxü̃guxü̃ i naanewa naxãgaxü̃ i ngẽma duruanexü̃?
30 Rü Tupana rü márétü nananguxẽxẽ i norü ãẽmacü rü norü ngóonexü̃ rü mártamagu nabáxi.
31 Rü Tupana rü namaxã inacua̱x i guxü̃ma i nachixü̃anegü rü meama nüxna nanaxã i muxü̃ma i õnagü.
32 Rü naxme̱xgu nayayaxu ya ãẽmacü rü ñu̱xũchi nüma ínanaxwa̱xexü̃wa nanamu.
33 Rü ngẽma duruanexü̃wa nüxü̃ tacua̱x nax buanecü ya tacü ínguxchaxü̃xü̃ rü yima buanecü nanaxunagü nax nanuxü̃ ya Tupana.
