Job 37:1-24
37 Rü ngẽxguma nüxü̃ chada̱u̱xgu ya yimá buanecü ya taxüchicü rü chamuü̃ rü yimá chorü maxü̃ne rü poraãcü niyuxnecüxü.
2 ¡Nüxü̃ pexĩnüe i ngẽma Tupanaga i naã̱xwa ixũxũxü̃ i ñoma iduruanexü̃rüxü̃ tagaxü̃!
3 Rü nüma ya Tupana rü nanamu i norü ãẽmacü i guxü̃anewama ngóxü̃.
4 Rü ngẽmawena nida i naga i tagaxü̃. Rü ngẽxguma nüxü̃ ixĩnüegu i naga i duruanexü̃rüxü̃ ixĩxü̃, rü tama ínayachaxãchi nax yaba̱i̱xbeanexü̃ i daxũwa.
5 Rü ngẽxguma Tupana taxü̃ i nagaxü̃ tüxü̃ naxĩnüxẽẽgu, rü nanaxü i mexü̃gü i taxúema nüxü̃ cuáxü̃.
6 Rü gauxü̃te̱xexü̃ namu nax ñoma i naanegu nanguxü̃ca̱x rü ñu̱xũchi tacü ya pucüxü̃ nanguxuchixü̃ca̱x.
7 Rü yimá tacü ya pucü rü napatawa nanangexmagüxẽxẽ i duü̃xü̃gü. Rü ngẽmaãcü guxü̃ma i duü̃xü̃gü nüxü̃ nicua̱xãchitanü nax Tupana yixĩxü̃ i naxüxü̃ i ngẽma.
8 Rü ngẽma naeü̃gü rü yimá pucücha̱xwa naxmaxü̃gu nayachocu rü ngẽxma nicu̱xgü.
9 Rü súrwaama ne naxũ ya taxüchicü ya buanecü rü nórtewaama ne naxũ i gáuanexü̃.
10 Rü ngẽxguma Tupana nüxü̃ cuexgu i dexá rü nayaga̱u̱xãchichíxü. Rü ngẽma taxü̃ i dexágü rü nitaigü rü gáuxü̃xü̃ nixũ.
11 Rü nüma ya Tupana rü pucümaxã nanapáxẽxẽ i ngẽma caixanexü̃gü. Rü ngẽma caixanexü̃wa nixĩ i ne namuaxü̃ i ba̱i̱xbeanexü̃.
12 Rü ngẽma ba̱i̱xbeanexü̃ rü guxü̃wama nangu i ñoma i naanewa nax ngẽmaãcü yanguxẽẽãxü̃ca̱x i Tupanaarü mugü.
13 Rü guxü̃ma i ngẽmawa Tupana tüxü̃ nüxü̃ nadauxẽxẽ i norü pora. Rü tacü ya buanecü rü pucü núma namu nax namaxã duü̃xü̃güxü̃ yanawe̱xãchixẽẽxü̃ca̱x. Rü yimáwatama tüxü̃ nanawe̱x nax nüxü̃́ ingechaü̃tümüxü̃güxü̃.
14 Pa Yox ¡yáxna naxĩnü, rü irüxĩnü, rü nagu rüxĩnü i ngẽma taxü̃gü i mexü̃gü ya Tupana ngo̱xẽxẽxü̃!
15 ¿Rü nüxü̃ cucuáxü̃ nax ñuxãcü Tupana mea namaxã inacuáxü̃ rü mea nachicagu nanuãxü̃ i guxü̃ma i ngẽma dauxü̃wa nüxü̃ idauxü̃? ¿Rü nüxü̃ cucuáxü̃ nax ñuxãcü caixanexü̃güwa yaya̱xauracüüxẽẽãxü̃ ya yimá ãẽmacü?
16 ¿Rü nüxü̃ cucuáxü̃ nax ñuxãcü daxũwa nangẽxmaxẽxẽãxü̃ i ngẽma caixanexü̃? Rü ngẽma nixĩ i norü cua̱xruxü̃ nax guxü̃xü̃ma nacuáxü̃ ya Tupana.
17 Rü ngẽxguma yimá buanecü ya súrwaama ne ũcü nanaianexẽẽgu rü cuma rü cuxchirugümaxã cugü quibunüxü̃ne.
18 ¿Ẽ̱xna cuma nüxü̃ cucua̱x nax ñuxãcü Tupanaxü̃ curüngü̃xẽxẽxü̃ nax nüxü̃ natanetaxü̃ca̱x i dauxü̃wa nax wüxi i bróũchetachinürüxü̃ nataixü̃ca̱x?
19 ¡Rü tomaxã nüxü̃ ixu nax ta̱xacümaxã tá Tupanaxü̃ tangãxü̃xü̃! Erü toma rü toxü̃́ nataxuma i cua̱x nax tanangãxü̃xü̃ca̱x.
20 Rü choma rü chamuü̃ nax namaxã nüxü̃ chixuxü̃ nax namaxã chidexachaü̃xü̃. Erü ngẽxguma chi namaxã chidexagu rü ngürüãchi choxü̃ nima̱x.
21 Rü taxucürüwa üa̱xcüemaxü̃ tadau ega caixanexü̃ nawa nguxgu. Natürü ngẽxguma buanecü ixũũchigu rü meama nangóone i dauxü̃wa.
22 Rü ngẽxguma ínanguxgu ya Tupana norü pora i ãũcümaxü̃maxã rü nórtewaama nango̱x i dexemaxü̃ i dauxü̃wa.
23 Rü tama nüxü̃ tacua̱x i norü ĩnü ya yimá Guxü̃étüwa Ngẽxmacü ya Tupana. Erü nüma rü guxü̃arü yexera naporaxüchi rü nixaixcüma. Rü norü ĩnü rü meama niwe̱x, rü taguma chixri texémaxã inacua̱x.
24 Rü ngẽmaca̱x guxü̃ma i duü̃xü̃gü nüxü̃ namuü̃e. Rü Tupanape̱xewa rü woo ngẽma duü̃xü̃gü i nüxü̃ icua̱xüchixü̃ rü taxuxü̃ma nixĩgü —ñanagürü ga Eriú.
