Job 38:1-41
38 Rü Cori ya Tupana rü buanecü ya íxã̱ũ̱xẽmacüwa Yoxmaxã nidexa rü ñanagürü nüxü̃:
2 —¿Texé quixĩ i cumax rü ngẽmaca̱x tama cunayaxuxü̃ i ngẽma chorü ucu̱xẽgü? Rü curü dexawa nixĩ i nangóxü̃ nax cuxü̃́ nataxuxü̃ i curü cua̱x.
3 Rü ñu̱xma ega cugü ícurüporagu, rü chanaxwa̱xe i choxü̃ cunawe̱x nax tama cumuü̃xü̃ nax choxü̃ cungãxü̃xü̃ i ngẽma cuxna tá naxca̱x chacaxü̃.
4 ¿Rü ngextá cuyexmaxü̃ ga noxrix ñaa naane chango̱xẽẽgu? ¡Chomaxã nüxü̃ ixu ega aixcüma cua̱x cuxü̃́ ngẽxmagu!
5 ¿Nüxü̃ cucuáxü̃ nax texé tixĩxü̃ ga noxri nagu rüxĩnüxe nax nañuxraxü̃xü̃ tá nixĩ i norü ta ga ñoma ga naane? ¿Rü texé tixĩxü̃ ga guxema norü üruxü̃ ixĩxẽ?
6 38:6-7 ¿Rü ta̱xacüétügu nixĩ ga naxüxü̃ ga ñoma i naane? ¿Rü texé tayaxǘcuchi ga guma nüxíraü̃cü ga nuta ga naétügu naxücü ga ñoma i naane yexguma wüxigu nawiyaegügu ga gumá ẽxtagü, rü guxü̃ma ga chorü orearü ngeruü̃gü i dauxü̃cüã̱x taãẽmaxã aixta naxüegü?
7 Nüü̃ nadau 38:6
8 Rü yexguma naanearü aixepewa nagoxü̃chíügu ga dexá i márwa ngẽxmaxü̃ ¿rü texé tixĩxü̃ ga guxema wüxiwatama nayexmaxẽxẽ ga yema dexá?
9 Rü choma nixĩ ga caixanexü̃maxã chaxüxchiruxü̃ ga yema már. Rü choma nixĩ ga caixanexü̃ ga waemaxü̃maxã chayadüxétüxü̃.
10 Rü choma nixĩ ga yema márca̱x ichanaxüxü̃ ga norü üye. Rü ñu̱xũchi chanawãxtaxü̃ ga yema íyagoxü̃chíüxü̃wa.
11 Rü yema márxü̃ ñacharügü: “Rü nuxã tátama nixĩ i cuyacuáxü̃, rü nua rü taxũtáma cuxüpetü. Rü nuxã tátama nixĩ iyanapuxü̃chíüxü̃ ya curü yuapegü”, ñacharügü nüxü̃.
12 Rü ñu̱xma nax cumaxü̃xü̃gu ¿rü ñuxgu marü cunamuxü̃ ya üa̱xcü nax yéa ne nadexreemachigüxü̃ i noxri yangunegu?
13 ¿Rü ñuxgu marü cunamuxü̃ i ñoma i naane nax ngẽmaãcü nügüwa ínawoxü̃ãxü̃ca̱x i ngẽma duü̃xü̃gü i chixexü̃gu maxẽxü̃?
14 Rü ngẽxguma noxri yangunegu rü ngẽma ma̱xpǘnepechitagü rü meama nango̱x rü nadauema ñoma wüxi i naxchiru i daucharaxü̃rüxü̃.
15 Rü ngẽma chixexü̃gu maxẽxü̃ rü tama norü me nixĩ i ngẽma üa̱xcüarü ngóonexü̃, erü nagu nayanachixexẽxẽ i ngẽma chixexü̃ i nagu naxĩnüexü̃.
16 ¿Rü marü ñuxgu ícuyadauxü̃ i ngẽma ãxmaxü̃ i nawa inaxügüxü̃ i ngẽma már?
17 ¿Rü marü ñuxgu nüxü̃ cudauxü̃ i norü ĩã̱xgü i nawa ixücuxü̃ i ngẽma nachica i ãũcümaxü̃ rü waanexü̃ i yu nawa ngẽxmaxü̃?
18 ¿Rü nüxü̃ cucuáxü̃ nax ñuxre yixĩxü̃ i norü ta i ñoma i naane? ¡Rü chomaxã nüxü̃ ixu ega aixcüma guxü̃xü̃ma cucua̱xgu!
19 ¿Rü ngextá nangẽxmaxü̃ ya napata i ngẽma ngóonexü̃ rü ngextá nixĩ i ne naxũxü̃ i ngẽma waanexü̃?
20 Rü ngẽma ngóonexü̃, ¿rü nüxü̃ cucuáxü̃ nax ñuxãcü ñoma i naanearü gu̱xwa cunangu̱xẽxẽxü̃ rü ñu̱xũchi wenaxarü nachicaca̱x cunatáeguxẽxẽxü̃? Rü ngẽxgumarüxü̃ ta i ngẽma waanexü̃, ¿rü nüxü̃ cucuáxü̃ nax ñuxãcü ñoma i naanearü gu̱xwa cunanguxẽxẽxü̃, rü ñu̱xũchi wenaxarü nachicaca̱x cunatáeguxẽxẽxü̃?
21 Rü yexguma cuma rü cuxíramare cungo̱xgu naxü̃pa nax nangóxü̃ i ñoma i naane rü tá nüxü̃ cucua̱x nax meama choxü̃́ cunangãxü̃xü̃ i ngẽma naxca̱x cuxna chacaxü̃. ¿Ẽ̱xna ngẽmaãcü muxcüma ya taunecü nixĩ i cumaxü̃xü̃?
22 38:22-23 ¿Rü marü ícuyadauxü̃ i ngẽma nachica i nagu namaxã changuxü̃xü̃ i ngẽma gáuxü̃te̱xe rü gáuxü̃pütagü i tá ngéma chamugüxü̃ i ngẽxguma guxchaxü̃gü ínguxgu rü nachixü̃anegü nügü daixgu?
23 Nüü̃ nadau 38:22
24 ¿Rü ngextá nixĩ i nachica i nawa ne naxũxü̃ i ngẽma ngóonexü̃ nax ñoma i naanegu nabáxixü̃ca̱x? ¿Rü yimá buanecü i éstewaama ne ũcü rü ñuxãcü nixĩ i guxü̃wama i ñoma i naanewa nanguxü̃?
25 38:25-27 ¿Rü texé tixĩ ya pucü iwãxnaxü̃xẽ rü naxümaxü̃xẽ ya tacü ya buanecü nax ngẽmaãcü ya yimá pucü rü ínachianexü̃gu napuxü̃ca̱x i ngextá taxúema íxãpataxü̃wa, rü nachicagü i taxúema imaxü̃xü̃wa nax ngẽmaãcü yawaixü̃ca̱x i ngẽma waixü̃mü i paxü̃ rü naxügüxü̃ca̱x ya maxẽ?
26 Nüü̃ nadau 38:25
27 Nüü̃ nadau 38:25
28 ¿Rü texé tixĩ ya nanatü ixĩxẽ ya yimá pucü rü cherena?
29 ¿Rü texé tixĩ ya naé i ngẽma gáuxü̃ i taixü̃ rü ñu̱xũchi ngẽma gáuxü̃te̱xe?
30 ¿Rü texé dexá ítanataixãchixẽxẽ ñoma nutarüxü̃? ¿Rü texé ítanataixãchixẽxẽ i ngẽma már i mátamaxü̃arü dexá i düxétüwa üxü̃?
31 ¿Rü ẽ̱xna cuma yixĩxü̃ i wüxiwa cunangexmagüxẽxẽxü̃ ya ẽxtagü? Rü ngẽma ẽxtagütücumü i Préyadegu ãégagüxü̃ ¿rü cuma yixĩxü̃ nax wüxiwa cunangexmagüxẽẽchaü̃ nax tama nügü nawoonexü̃ca̱x? Rü ngẽma ẽxtagütücumü i Orióü̃gu ãégagüxü̃ ¿rü cuma yixĩxü̃ nax nachicawatama cunangexmagüxẽẽechaxü̃ i wüxichigü nax tama nügüca̱x naxĩxü̃ca̱x?
32 ¿Rü cuma yixĩxü̃ i meama norü oragu cunango̱xẽẽxü̃ ya yimá woramacuri ya ngunetüxü̃ rüxũcü? ¿Rü cuma yixĩxü̃ i namaxã icucuáxü̃ ya yimá ẽxtagütücumü i Ócha i Taxü̃gü ãégagüxü̃ rü yimá ẽxtagütücumü i Ócha i Íxraxü̃gu ãégagüxü̃?
33 ¿Ẽ̱xna cuma yixĩxü̃ i cunango̱xẽẽxü̃ i ngẽma mugü i daxũguxü̃ i naanemaxã icuáxü̃? ¿Ẽ̱xna cuma yixĩxü̃ i cuxü̃́ natauxchaxü̃ nax ñoma i naanemaxã icucuáxü̃?
34 ¿Ẽ̱xna cuma yixĩxü̃ i nüxü̃ cucuáxü̃ nax cunamuxü̃ i ngẽma caixanexü̃gü nax poraãcü napuxü̃ca̱x?
35 ¿Ẽ̱xna cuma yixĩxü̃ i ãẽmacümaxã nüxü̃ quixuxü̃ nax ngextá yañaxü̃? ¿Ẽ̱xna ngẽma duruane rü cuxü̃ nangãxü̃ rü ñanagürü cuxü̃: “Marü íchamemare nax chanaxüxü̃ca̱x i curü ngúchaü̃”, ñanagürü?
36 ¿Rü texé tixĩ ga cua̱x nüxna ãxẽ i ngẽma cówa rü ngẽma otá i yatüxü̃?
37 38:37-38 ¿Rü texé tixĩ ya nüxü̃ cuáxe nax ñuxre i caixanexü̃ ngẽxmagüxü̃? ¿Rü texé tüxü̃́ natauxcha nax ítanabaãcugüxü̃ nax napuxü̃ca̱x, nax ngẽmaãcü i ngẽma waixü̃müte̱xe rü naxãcharaxü̃ca̱x, rü ngẽma waixü̃müpǘtagü nügüna yaxũxgüxü̃ca̱x?
38 Nüü̃ nadau 38:37
39 38:39-40 ¿Rü ẽ̱xna cuma yixĩxü̃ i nawemüca̱x cudauxü̃ i ngẽma leónarü ngexü̃gü nax naxacügü chibüexü̃ca̱x ñu̱xmata nangãxcharaü̃gü i ngẽxguma naxmaü̃wa nangẽxmagügu, rü ẽ̱xna maxẽchapa̱xagu yacu̱xgügu?
40 Nüü̃ nadau 38:39
41 ¿Rü texé tixĩ i õna nüxna ãgüxe i ngẽma ngurucugü i ngẽxguma naxacügü õnaca̱x tadaugügu rü tarüdoxeãcüma choxna tacagügu?
