Job 39:1-30
39 ¿Rü nüxü̃ cucuáxü̃ yixĩxü̃ nax ñuxgu naxíxraxacügüxü̃ i ngẽma naixnecücüã̱x i chíbugü? ¿Rü ñuxgu yixĩxü̃ i nüxü̃ cudauxü̃ i ngẽma cowü ega naxíxraxacügu?
2 ¿Rü nüxü̃ cucuáxü̃ yixĩxü̃ nax ñuxre ya tauemacü nanaxwa̱xexü̃ nax naxíxraxacüxü̃?
3 Rü ngẽxguma naxíxraxacügügu rü pora naxü rü nanapüãchigü. Rü ngẽxguma rü taxíxrae ya naxacüxegü.
4 Rü ngẽxguma marü nayaegu rü naporae i ngẽma naxacügü rü woema naxĩgü rü taguma nawoegu.
5 ¿Rü texé tixĩ i yange̱xgüxe nax naxĩaneãxü̃ca̱x i ngẽma búrugü i tama íyapuexü̃? ¿Rü texé tixĩ ya wẽxü̃güxe nax naxĩgüxü̃ca̱x i ngẽma búrugü?
6 Rü choma nixĩ ga naxca̱x chanaxüxü̃ ga yema naane ga taxúema nagu ãpataxü̃ nax yémawa namaxẽxü̃ca̱x.
7 Erü nümagü i búrugü i tama íyapuexü̃ rü tama norü me nixĩ i ngẽma ĩanearü cuxcuanexü̃. Rü tama norü me nixĩ nax texé yaxãxü̃tanüxü̃.
8 Rü ngẽmaãcü ma̱xpǘnegügu nanaxĩane rü maxẽ rü nawemüta nadaugü.
9 ¿Rü cuma nüxü̃ cucua̱xgu rü wüxi i búfalo i tama íyapuxü̃ rü tá cuxü̃́ natauxchaxü̃ nax curü puracüruxü̃ cuyaxĩxẽxẽxü̃? ¿Rü nagu curüxĩnügu rü tá cuxü̃́ name nax curü naxpüü̃gu cupexẽxẽxü̃?
10 ¿Rü cuma nüxü̃ cucua̱xgu rü tá cuxü̃́ natauxchaxü̃ nax cunaxütü̱xüxü̃ nax cuxü̃́ naxaimüaneaxü̃ca̱x? ¿Rü nagu curüxĩnügu rü tá cuwe naxũxü̃ nax waixü̃müarü mexẽxẽwa napuracüxü̃ca̱x?
11 ¿Rü cuma nagu curüxĩnügu rü ngẽma nax naporaxüchixü̃ca̱x rü nüma tá yixĩxü̃ i cuxü̃́ naxüaxü̃ i ngẽma curü puracü?
12 ¿Rü cuma nüxü̃ cucua̱xgu rü ngẽma woca i yatüxü̃ i tama íyapuxü̃ rü tá nüxü̃́ name nax ícunapúxü̃wa nanaaxü̃ i ngẽma curü trigu?
13 Rü ngẽma abetrú rü norü taãẽmaxã napaãpe̱xátü natürü yima naxpe̱xatü rü tama cówape̱xátürüxü̃ nixĩ.
14 Rü nüma i abetrú rü naxnücüte̱xewa nanawogü ya nacharaü̃ nax ngéma nachuexü̃ca̱x üa̱xcüarü naixü̃maxã.
15 Rü ngéma nanawogü, rü tama nagu narüxĩnü nax ngürüãchi ta̱xacürü naeü̃ tá nawa ngãxü̃ ya yima nacharaü̃gü.
16 Rü chixri naxacügümaxã inacua̱x ñoma tama naxacügü tixĩgüxü̃rüxü̃. Rü nüxü̃́ nanataxuraü̃ma ega woo tayuegu.
17 Rü ngẽmaãcü nixĩ i ngẽma abetrú erü tama nüxna chanaxã ga cua̱x nax naãẽxü̃ nacuáxü̃ca̱x.
18 Natürü ngẽxguma inañaachigu rü cowaruxü̃ narüporamae.
19 ¿Rü cuma yixĩxü̃ ga pora nüxna cuxãxü̃ ga cowaru, rü cunama̱xyaenaãxü̃?
20 ¿Rü cuma yixĩxü̃ ga nüxna cunaxãxü̃ ga pora nax nayuxnagüxü̃ca̱x ñoma munügürüxü̃? ¿Rü cuma yixĩxü̃ ga nüxna cunaxãxü̃ i ngẽma nagamaráxü̃ i namaxã tüxü̃ ínaba̱i̱xgüxü̃?
21 Rü ngẽma cowaru rü nuãcü waixü̃müwa nicuxnecüü rü tama namuü̃ãcü daica̱x inañaãchi.
22 Rü taxuxü̃ma namuü̃ rü tama naba̱i̱xãchi ega woo taraxü̃ nada̱u̱xgu.
23 Rü woo naxãgatanügu ya naxnegü rü yayauratanücüügu ya wocaegü rü taragü rü tama namuü̃.
24 Rü ngẽxguma cornétagaxü̃ naxĩnügu nax daiwa naxũxü̃ca̱x rü guxü̃ma i norü poramaxã inañaãchi rü taxúema ítayachaxãchixẽxẽ.
25 Rü ngẽxguma nagu yacuegügu ya cornétagü nax nügü nada̱i̱xü̃ca̱x rü ngẽma cowaru rü nanugamaraü̃. Rü yáxü̃gu nüxü̃ napa i naema i ngẽma dai, rü nüxü̃ naxĩnü i churaragüerugü nax tagaãcü norü churaragüxü̃ namuxü̃ nax nügü nada̱i̱xü̃ca̱x.
26 ¿Pa Yox, cuma ẽ̱xna yixĩxü̃ i cuxü̃́ nangẽxmaxü̃ i cua̱x nax cunangu̱xẽxẽxü̃ i ngẽma ĩyü nax yagoexü̃ rü súrwaama nañaxü̃?
27 ¿Rü cuma yixĩxü̃ ga cunamuxü̃ i ngẽma ĩyü nax ma̱xpǘnetape̱xegu naxüxchiãü̃xü̃ca̱x?
28 Rü nüma i ngẽma ĩyü rü ngunecü rü chütacü rü ngéma ma̱xpǘnetape̱xearü nutatanüwa namaxü̃.
29 Rü ngéma ma̱xpǘnetape̱xewa yáxü̃gu nadawenü rü nangugütae nax yayauxãxü̃ca̱x i nawemü.
30 Rü ngẽma naxacügü rü namachi i ãgüxü̃maxã naxãwemügü. Rü ngextá nangẽxma i ta̱xacü i yuxü̃ rü ngẽma ĩyü rü ngéma nangẽxma —ñanagürü ga Tupana.
