Job 4:1-21
4 Rü nüma ga Erifá ga Temáü̃cüã̱x rü Yoxna naca rü ñanagürü nüxü̃:
2 —Ngẽxguma chi texé cumaxã idexagu ¿rü taxũchima cuxü̃́ nawa̱xtümüü̃xü̃? Erü taxucürüwama charüchianemare nax tama cumaxã chidexaxü̃.
3 4:3-5 Rü cuma nax tüxü̃ cungúexẽẽxü̃ ga guxema muxẽma ga guxchaxü̃ tüxü̃ ngupetügüxe, rü tüxü̃ cuporaxẽẽxü̃ ga guxema turaxe, rü tüxü̃́ cunangúchaü̃xẽẽxü̃ nax ítarüdaxü̃ca̱x ga guxema rünguxe, rü tümamaxã cuporaxü̃ ga guxema rünguxchaü̃xẽ, natürü i ñu̱xma nax guxchaxü̃gü cuxca̱x ínguxü̃, rü cuma rü cungearü poraã̱x rü cumuü̃.
4 Nüü̃ nadau 4:3
5 Nüü̃ nadau 4:3
6 Rü cuma nax aixcüma Tupanaaxü̃́ cupuracüxü̃ rü mecü ya norü duü̃ quixĩxü̃ ¿rü ñuxãcü i tama aixcüma nüxna curüyoexü̃ ya yimá curü Tupana?
7 ¡Rü mea nagu rüxĩnü! ¿Wüxi ya duü̃ ya aixcüma mexü̃ ücü rü taguma chixexü̃ ücü, rü marü ñuxgu nüxü̃ cudauxü̃ nax ngürümare Tupana napoxcuxü̃?
8 Rü yema nüxü̃ chadauxü̃wa rü nüxü̃ chacua̱x nax yíxema máetaxe rü chixexü̃ üxe rü nagutátama tanguxü̃ ga yema ü̃paacü taxüxü̃ ga chixexü̃.
9 Rü nüma ya Cori ya Tupana rü norü numaxã wüxiarü cue ñaxü̃maxãtama nixĩ i nadaiaxü̃ i ngẽma chixexü̃ ügüxü̃.
10 Rü woo ñoma leóü̃gürüxü̃ yaxü̃xchapütagügu rü yanginetanücüügu, natürü Cori ya Tupana rü tá ínanayipütaxẽxẽ rü ngẽmaãcü tá nanangea̱xẽxẽgü.
11 Rü ñoma leóü̃gü i taxuxü̃ma i nawemü nüxü̃ yangaugüxü̃rüxü̃ tá nayue. Rü ngẽma nanegü rü tá nawoonemare.
12 Rü bexma chowa nangu ga wüxi ga ore ga mexẽchixü̃ ga ígaãcü nüxü̃ chaxĩnüxü̃.
13 Rü ngewa̱x chütacü ega ngẽxguma guxü̃ma i duü̃xü̃gü peegu rü chixexü̃gu chaxãnegü rü chaturaxü̃ne.
14 Rü ngẽma chixexü̃ i nagu chaxãnegüxü̃ rü poraãcü choxü̃ namuü̃xẽxẽ rü guxü̃nema ya chauxchina̱xãgü rü nidu̱xruxe.
15 Rü yexguma rü wüxi ga buanecüema chauchametüwa nagopetüema rü icharütogüta̱xaxü̃ne.
16 Rü nüxü̃ chadau nax wüxi ga duü̃xü̃ yexmaxü̃, yerü nüxü̃ chadau ga naxchipeta, natürü tama nüxü̃ chadau nax nañuxraü̃xü̃. Rü yexguma nachianemare. Rü yemawena rü nüxü̃ chaxĩnü ga wüxi ga naga ga ñaxü̃:
17 ¿Rü ñuxãcü i wüxi i yatü rü namexü̃ i Cori ya Tupanape̱xewa? ¿Rü ñuxãcü i aixcüma namearü maxü̃ã́xü̃ naxpe̱xewa ya yimá nango̱xẽẽcü?
18 Rü nüma ya Cori ya Tupana rü tama nüxü̃́ nayaxõ i woo ngẽma norü orearü ngeruü̃gü i daxũcüã̱xgü, erü woo nümagü rü ta ñuxguacü rü ínatüe.
19 Rü yexeraãcü ínatüe i duü̃xü̃gü i ñoma wüxi ya ĩpata ya waixü̃münaxca̱x ya waixü̃müte̱xegu üxü̃nerüxü̃ turaxü̃. Rü duü̃xü̃gü rü ñoma naweane i ngẽxma napocuchixü̃rüxü̃ nixĩ nax naturaexü̃.
20 Rü yima yatü rü ẽxü̃wa namaxü̃, natürü yáuanecü rü marü nayu rü tagutáma wena namaxü̃ rü taxúema naxca̱x taxoegaãxẽ.
21 Rü ngẽma norü maxü̃ rü ñoma wüxi ya tünüta ya iyoyexü̃rüxü̃ nixĩ. Rü nayu naxü̃pa nax cua̱xwa nanguxü̃.
