Job 40:1-24
40 Rü nüma ga Cori ya Tupana rü nayadaxẽxẽ nax yadexaxü̃ rü Yoxü̃ ñanagürü:
2 —Rü ñu̱xma i choma nax guxãétüwa changexmaxü̃ rü cuxna chaca i cumax nax chomaxã curüxutagaxü̃ rü ¿ẽ̱xna tá quidexachigüamaxü̃ nax choxü̃ cungãxü̃xü̃? —ñanagürü.
3 Rü yexguma ga nüma ga Yox rü Tupanaxü̃ nangãxü̃ rü ñanagürü:
4 —Choma rü taxumaama cuxü̃ changãxü̃, Pa Tupanax, erü choma rü taxuwama chame i cupe̱xewa. Rü narümemae nixĩ i noxtacüma ichayarüngea̱x.
5 Rü marü poraãcü chidexa rü ngẽmaca̱x taxuxü̃ma i ta̱xacürü to i orexü̃ chixu —ñanagürü ga Yox.
Tupana rü wena Yoxmaxã nidexa
6 Rü Cori ya Tupana rü wenaxarü buanecü ya íxã̱ũ̱xẽmacüwa Yoxmaxã nidexa rü ñanagürü nüxü̃:
7 —¡Ẽcü choxü̃ nawe̱x nax tama cumuü̃xü̃! ¡Rü choxü̃ nangãxü̃ i ñaa tá cuxna naxca̱x chacaxü̃!
8 ¿Ẽ̱xna chomaxã nagu curüxĩnü nax choma rü wüxi i dorata̱xáxü̃ chixĩxü̃ rü chaugagu yixĩxü̃ nax guxchaxü̃ cuxca̱x ínguxü̃ nax ngẽmaãcü i cuma rü cugü quixuxü̃ca̱x nax taxuxü̃ma i chixexü̃ cuxüxü̃?
9 ¿Ẽ̱xna cugü cucua̱xgu rü chauxrüxü̃ cuporaxüchi, rü ngẽma cuga rü ñoma chauga i duruanexü̃rüxü̃ nixĩ?
10 Rü ngẽxguma ngẽmaãcü yixĩxgu ¡rü ẽcü choxü̃ nawe̱x nax guxü̃arü yexera cuporaxüchixü̃, rü guxü̃ i ãẽ̱xgacügüétüwa nax cuxüxü̃! ¡Rü choxü̃ nawe̱x nax guxü̃arü yexera cutachigaxü̃ rü guxü̃arü yexera taxü̃ i mexü̃wa cungexmaxü̃!
11 40:11-12 ¡Rü nüxü̃ nadau i ngẽma nügü írütagüxü̃ rü curü numaxã naxãneexẽxẽ! ¡Rü nüxü̃ nadau i ngẽma chixexü̃arü üruü̃gü rü yanaxoxẽxẽ i ngextá ínangexmagüxü̃wa!
12 Nüü̃ nadau 40:11
13 ¡Rü guxü̃ma i ngẽmagü rü waixü̃mütüü̃gu nata̱xgü! ¡Rü ngẽma yuexü̃ ípoxcuexü̃gu nanawãxtaü̃gü!
14 Rü ngẽxguma ngẽmaãcü cunaxü̱xgu rü chomatama tá nüxü̃ chacua̱x nax aixcüma curü tügünechacüüarü poramaxãtama yixĩxü̃ nax nüxü̃ curüporamaexü̃ i ngẽma chixexü̃gu maxẽxü̃.
15 ¡Dücax, nangugü i ngẽma naeü̃ i taxüchixü̃ i ipopútamu i choma chango̱xẽxẽxü̃ ngẽma cuxü̃ chango̱xẽxẽxü̃rüxü̃! Rü nüma rü maxẽ nanangõ̱x ñoma wocagürüxü̃.
16 ¡Rü dücax i ngẽma naxca̱xwe̱x rü ñuxãcü naporaxüchi rü ngẽma namachi rü natai!
17 Rü yima narexü̃ rü ñoma wüxi ya ocayiwarüxü̃ natai. Rü yima naparaarü tarumagü rü nipora.
18 Rü yima naxchina̱xãgü rü ñoma bróũchemena̱xãgürüxü̃ rü fierumena̱xãgürüxü̃ nixĩgü.
19 Rü guxü̃ma i ngẽma naeü̃gü i chaxüxü̃tanüwa rü ngẽma ipopútamu nixĩ i yexeraãcü rüporamaexü̃. Rü choma i norü üruü̃xicatama nixĩ i nüxü̃ charüporamaexü̃.
20 Nüma rü ngẽma máxpü̱xanearü maxẽmaxã naxãwemü i ngextá ínaxĩnüca̱xwe̱xegüxü̃wa i ngẽma naeü̃gü i idüraexü̃.
21 Rü ngẽma naigü i taxü̃tüü̃gu nacagü, rü ngẽma dexápechinüwa rüxügüxü̃ i dexnenecügu nicu̱xgü.
22 Rü ngẽma naigü i taetaxü̃tüü̃arü gáuxchipetaxü̃gu nacagü. Rü ngẽma taxü̃ i nai i natüpechinüwa rüxügüxü̃tüü̃wa nixĩ i namaxẽxü̃.
23 Rü ngẽxguma nabaixgu i natü i Yudáü̃ rü tama naba̱i̱xãchi, rü woo naraü̃wa nanguxgu i ngẽma dexá rü nataãẽama.
24 ¿Rü texé tüxü̃́ natauxcha nax tayayaxuxü̃, rü ñu̱xũchi tanacaxü̃etüxü̃, rüe̱xna wüxi i ãnütaxü̃maxã tayawe̱xraü̃xü̃? —ñanagürü ga Tupana.
