Job 41:1-34
41 Rü nüma ga Tupana rü ñanagürü ta: —Ngẽma yewaxe ¿rü cuxca̱x rü wüxi i poxwamaxã icuyayaxuxü̃? ¿Rü cuxü̃́ natauxchaxü̃ nax wüxi i naxĩnütamaxã cunawẽxarü conüã́xü̃?
2 ¿Rü cuxü̃́ natauxchaxü̃ nax wüxi i naxĩnütamaxã cuyawe̱xraü̃xü̃ rüe̱xna wüxi i choruü̃maxã cuyawe̱xchicüraxü̃?
3 ¿Rü cuma nagu curüxĩnügu rü ngẽma yewaxe rü ngechaü̃ãcü tá cuxna nayaca nax cuxü̃́ nangechaxü̃tümüxü̃xü̃ca̱x?
4 ¿Ẽ̱xna cumaxã tá nüxü̃ nayarüxu nax nüma rü guxü̃gutáma curü puracütanüxü̃ yixĩxü̃ ñu̱xmata nayu̱x?
5 ¿Rü cuxca̱x rü ñoma wüxi i werirüxü̃ tá namaxã cuxĩnüca̱xwa̱xexü̃? ¿Rü cuxca̱x rü tá cuxütüxüxü̃ nax cuxacügü namaxã ĩnüca̱xwa̱xegüxü̃ca̱x?
6 ¿Rü ngẽma choxnietanüxü̃ rü nüxü̃́ natauxchaxü̃ yixĩxü̃ nax namaxã nataxegüxü̃ i ngẽma yewaxe, ñoma ta̱xacümaxã nataxegüxü̃rüxü̃? ¿Rü nüxü̃́ natauxchaxü̃ yixĩxü̃ nax íraxü̃gu nachexü̃güãxü̃ nax namaxã nataxegüxü̃ca̱x?
7 ¿Rü cuxü̃́ natauxchaxü̃ nax chuxchimaxã cuyangupetüxẽxẽxü̃ i naxcha̱xmüxü̃ rüe̱xna arapóũmaxã cuyangupetüxẽxẽxü̃ i naeru?
8 Rü ngẽxguma cuxme̱xmaxã cuyayauxchaü̃gu i ngẽma yewaxe rü poraãcü tá cugümaxã quixãũxãchi rü tagutáma nüxü̃ curüngü̃ma i ngẽma cumaxã naxüxü̃. Rü tagutáma wena namaxã cugü cudaixchaü̃, erü nüma rü naporaxüchi.
9 Rü ngẽxguma texé nüxü̃ daumaregu i ngẽma yewaxe, rü poraãcü tá namaxã taba̱i̱xãchi rü muü̃maxã tá tiyuãchi.
10 Rü ngẽxguma texé nachixewegu rü nüma rü nanu. Rü taxúema tapora nax naxca̱x tixũamaxü̃.
11 ¿Rü yíxema naxca̱x ixũamáxe, ẽ̱xna tamaxü̃xü̃ yixĩxü̃? Rü taxúema i ñoma i naanewa tapora nax namaxã tügü tadaixü̃.
12 Rü tá nüxü̃ chixuama ya yima nacutügü, rü ñu̱xũchi ngẽma norü pora i taxuxü̃maama wüxiguxü̃.
13 ¿Texé tüxü̃́ natauxcha nax tanacauxcha̱xmüxü̃ rüe̱xna tayacapetüxü̃ i ngẽma naxcha̱xmüxü̃ i norü poxü̃ruxü̃ i natanecawa ngẽxmaxü̃?
14 ¿Texé tüxü̃́ natauxcha nax tayachoxẽxẽxü̃ nax nüxü̃ tadauxü̃ca̱x ya napütagü ya ãũcümane?
15 Rü naca̱xwe̱xwa nüxü̃́ nangẽxma i norü poxü̃ruü̃gü i nachipa̱xgü i ñoma nutarüxü̃ itaixichixü̃ i nügüna yaxũxgüxü̃.
16 Rü ngẽma nax meama nügüwa yaxũxgüxü̃ i ngẽma nachipa̱x rü woo i buanecü rü tama naxmachate̱xewa nagopetüema.
17 Rü ngẽma nax mea nügüwa yaxũxgüxü̃, rü taxúema tüxü̃́ natauxcha nax nügüna tayaxĩgachixẽẽxü̃.
18 Rü ngẽxguma nangáixchuxgu rü ñoma ba̱i̱xbeanegürüxü̃ nixĩ. Rü yima naxetügü rü ñoma üa̱xcü ya noxri yangunegu ibáxichigurüxü̃ nixĩ.
19 Rü naraü̃wa rü yáuxraemaxü̃ ínaxũxũ. Rü ngẽmawa rü ninexgütanücüxü i íxraxü̃ i yáuxraemaxü̃.
20 Rü naxmaraü̃wa rü caxixü̃ ínaxũxũ ñoma dexá i naichiüxü̃ rücaxixü̃rüxü̃.
21 Rü ngẽma norü ngü̃ãcümaxã nayanaixẽxẽ ya üxü. Rü naã̱xwa ínaxũxũ i yáuxraemaxü̃.
22 Rü ngẽma nax naporanaxãxüchixü̃ rü guxãma nüxü̃ tamuü̃e.
23 Rü ngẽma ínaxãmachixü̃wa i naxü̃newa rü nataixichi. Rü taxuxü̃ma nawa ningaxi ñoma wüxi i fieru i itaixichixü̃rüxü̃.
24 Rü yima norü maxü̃ne rü ñoma nutapütarüxü̃ nataixichi, ñoma nuta ya camütaeruü̃rüxü̃.
25 Rü ngẽxguma nügü nango̱xẽẽgu i ngẽma yewaxe rü namaxã naba̱i̱xãchie i ngẽma duü̃xü̃gü i poraexü̃ rü muü̃maxã nibuxmü.
26 Rü woo tara, rüe̱xna arapóũ, rüe̱xna chuxchi, rüe̱xna ochagu rü nüxü̃́ nayataxuraü̃ma ega namaxã yama̱xgu.
27 Rü wüxi i fierumena̱xã i ãmaguxü̃ rü ngẽma yewaxeca̱x rü ñoma maxẽ i paxü̃rüxü̃ nixĩ. Rü wüxi i bróũchemena̱xã i ãmaguxü̃ rü yewaxeca̱x rü ñoma naixmena̱xã i ngauxü̃rüxü̃ nixĩ.
28 Rü nüma rü tama niña naxcha̱xwa ya yima chuxchigü. Rü ngẽxguma nutapütagü yewaexü̃ iñaxgu rü naxca̱x rü ñoma maxẽ i paxü̃ i nüxü̃ íñaxü̃rüü̃mare nixĩ.
29 Rü ngẽxguma poruxü̃ i taxü̃maxã cunapoxgu rü ñoma dexnemena̱xãmaxã nüxna cunacua̱i̱xcaxü̃rüxü̃ nixĩ. Rü nüxü̃́ naxãũmare ega wocaegümaxã nachuxgüchaü̃ãgu.
30 Rü naxtanecawa rü naxãchipa̱x. Rü ngẽxguma ãcharaxü̃gu nügü yatúxgu rü nanaxümaxü̃ ñoma ta̱xacümaxã naxüma̱xü̃rüxü̃.
31 Rü ngẽma yewaxe rü nayabürütamaxẽxẽ i már i mátamaxü̃ ñoma buetarewa dexá ídocaxü̃rüxü̃. Rü nayaxĩã̱xchíü i már ñoma buetarewa chíxü̃ idocaxü̃rüxü̃.
32 Rü ngẽxguma yaxũxgu i ngẽma yewaxe rü naporaxüchi. Rü yimá norü yuape ya naweama ücü rü nacómü rü nibáixacüxü ñoma nayae i chóxü̃rüxü̃.
33 Rü ñoma i naanewa rü nataxuma i ta̱xacü i namaxã wüxiguxü̃. Rü choma ya Tupana rü chanango̱xẽxẽ nax taxuxü̃ma namuü̃xü̃ca̱x.
34 Rü ngẽma yewaxe rü tümamaxã nanuãxẽ ya guxãma ya yíxema tügü írüporagüxe. Rü nüma nixĩ i guxü̃ma i ngo̱xogümaxã inacuáxü̃ —ñanagürü ga Tupana.
