Job 42:1-17
42 Rü yexguma ga nüma ga Yox rü Tupanaxü̃ nangãxü̃, rü ñanagürü:
2 —Nüxü̃ chacua̱x nax guxü̃ma cuxü̃́ tauxchaxü̃, rü nataxuma i ta̱xacü i cuxü̃́ guxchaxü̃ nax cunaxüxü̃.
3 ¿Rü cupe̱xewa rü ta̱xacü chixĩ i choma rü ngẽmaca̱x tama cuxü̃́ chanayaxuxü̃ i ngẽma curü ucu̱xẽgü? Rü ngẽmaãcü chanango̱xẽẽxü̃ nax taxuxü̃ma chacuáxü̃. Rü choma rü nachiga chidexa i ta̱xacü i ãũcümaxü̃ i tama nüxü̃ chacuáxü̃ i cuxicatama nüxü̃ cucuáxü̃.
4 Cuma rü ñacurügü choxü̃: “¡Choxü̃́ rüxĩnü rü cumaxã chidexachaü̃! ¡Rü choxü̃ nangãxü̃ nax cuxna chacaxü̃!” ñacurügü choxü̃.
5 Noxri rü yema cuxü̃ chaxĩnüchigaxü̃waxica nixĩ i cuxü̃ chacuáxü̃. Natürü i ñu̱xma rü daa chauxetümaxã cuxü̃ chadau.
6 Rü ngẽmaca̱x i ñu̱xma rü marü nüxü̃ charüxo ga yema noxri cumaxã nagu charüxĩnüxü̃. Rü ngẽmaca̱x nua waixü̃müte̱xewa rü tanimacate̱xewa charüto —ñanagürü ga Yox.
Tupana rü wena Yoxü̃ narüngü̃xẽxẽ
7 Rü yexguma Yoxmaxã yadexa̱xguwena ga Tupana rü ñu̱xũchi Erifáxü̃ ñanagürü: —Yimá chorü duü̃ ya Yox rü aixcümaxü̃ nixu ga chauchiga. Natürü poraãcü cumaxã chanu rü namaxã chanu i ngẽma cumücügü yerü tama Yoxrüxü̃ aixcümaxü̃ pixu ga chauchiga.
8 ¡Rü ẽcü i ñu̱xma rü 7 i woca i iyatüxü̃ piyauxgü rü 7 i carnérugü rü chorü duü̃ ya Yoxü̃tawa penagagü! ¡Rü yimápe̱xewa perü maxü̃ca̱x penadai rü ípeyagu i ngẽma naxü̃nagü! Rü nüma ya yimá chorü duü̃ ya Yox rü tá pexca̱x nayumüxẽ. Rü choma rü tá nüxü̃́ nüxü̃ chaxĩnü i norü yumüxẽ rü taxuxü̃táma chixexü̃ pemaxã chaxü woo nax namexü̃ nax pexü̃ chapoxcuexü̃ nagagu nax tama aixcümaxü̃ pixuxü̃ ga chauchiga yimá chorü duü̃ ga Yox nüxü̃ ixuxü̃rüxü̃ —ñanagürü ga Tupana.
9 Rü nüma ga Erifá rü Biridá rü Chofá rü inaxĩãchi rü nanaxügü ga yema Cori ya Tupana namaxã nüxü̃ ixuxü̃. Rü nüma ga Cori ya Tupana rü nüxü̃ naxĩnü rü nanayaxu ga yema Yox namaxã nüxü̃ ixuxü̃ norü yumüxẽwa.
10 Rü yexguma Yox namücügüca̱x yumüxẽguwena rü Tupana Yoxü̃ narüngü̃xẽxẽ. Rü yema noxri nüxü̃́ yexmaxü̃arü yexera nüxna nanaxã ga norü yemaxü̃gü.
11 Rü yexgumawena rü guxü̃ma ga naenexẽgü rü naeya̱xgü rü namücügü rü guxü̃ma ga yema duü̃xü̃gü ga ü̃paacü nüxü̃ cua̱xgüxü̃ rü Yoxü̃tawa naxĩ. Rü nachiü̃wa rü namaxã nanaxügü ga wüxi ga taxü̃ ga õna. Rü wüxigu nanataãẽgüxẽxẽ nax tama nagu naxĩnüxü̃ ga yema ngúxü̃ rü guxchaxü̃gü ga Tupana nüxü̃ ingexẽẽxü̃. Rü wüxichigü ga nüma ga yema namücügü rü nüxna ngĩxü̃ nixãchigü ga ñuxre ga diẽru rü wüxi ga ãnera ga úirungixca̱x.
12 Rü Tupana rü poraãcü noxriarü yexera Yoxü̃ narüngü̃xẽxẽ ga yexguma marü naya̱xgu. Rü yexguma rü 14,000 wa nangu ga norü carnérugü, rü 6,000 wa ga norü caméyugü, rü 1,000 chimüxü̃wa ga norü wocagü ga puracüruxü̃ ixĩgüxü̃, rü 1,000 wa ga norü búru ga ingexü̃.
13 Rü yexgumarüxü̃ ta wenaxarü naxãxacü rü nüxü̃́ nayexma ga 14 ga nanegü rü tomaepü̱x ga naxacügü.
14 Rü guxema yáxe rü Yemimágu tüxü̃ naxüéga, rü guxema norü taxrewa üxe rü Quechiá tixĩ, rü guxema norü tomaepü̱xwa üxe rü Queréü̃-apux tixĩ.
15 Rü guxü̃ma ga yema nachixü̃anewa rü nataxuma ga ngexü̃gü ga Yóxacügürüxü̃ imexẽchixü̃. Rü yexguma Yox nanegüna naxãxgu ga yema norü yemaxü̃güwa nüxna ügüxü̃ rü yexgumarüxü̃ ta naxacügüna nanaxã ga yema ngĩxna ügüxü̃.
16 42:16-17 Rü yexgumawena ga Yox rü namaxü̃ ga 140 ga taunecü rü nüxü̃ nadau ga nataagü rü nataaxacügü. Rü yema nataaxacügüacügüxü̃ rü ta nadau. Rü yemaacü nama̱x ga norü maxü̃ rü marü nayaxüchiãcüma nayu.
17 Nüü̃ nadau 42:16
