Job 5:1-27
5 ¡Rü aita naxü, Pa Yox, rü texé tá cuxü̃ ngãxü̃! ¿Rü ta̱xacürü Tupanaarü orearü ngeruxü̃ i daxũcüã̱xna tá cuca nax cuxü̃ nangü̃xẽxẽxü̃ca̱x?
2 Rü ngẽma naechita maxẽxü̃ rü ngẽma norü nu rü norü ngúchaü̃ düxwa yuwa nanagagü.
3 Rü nüxü̃ chadau i ngẽma naechitamare maxü̃xü̃ nax ngexwaca yamuarü ngẽmaxü̃ã́xü̃, natürü ngẽma norü ngẽmaxü̃gü rü paxãma inarütaxu.
4 Rü ngẽma nanegü rü naxacügü rü taxúema nüxü̃ tarüngü̃xẽxẽ. Rü ãẽ̱xgacügüpe̱xewa rü chixri namaxã nixĩgü rü nataxuma nax texe ínapoxü̃xü̃.
5 Rü ngẽma naechita maxü̃xü̃arü naanewa rü ngẽma taiyaexü̃ rü tuxugütanüwa nanade i ngẽma nanetügüarü o nax nangõ̱xgüãxü̃ca̱x. Rü ngẽma nüxü̃́ ngúchaü̃xü̃ i ngẽma naechita maxü̃xü̃arü ngẽmaxü̃gü rü nanayauxgü.
6 Rü ngẽma chixexü̃ rü tama nixĩ i waixü̃müanewa ne naxũxü̃. Rü ñu̱xũchi ngẽma guxchaxü̃gü rü tama nixĩ i waixü̃müwa nangóxü̃.
7 Rü ngẽma guxchaxü̃gü rü duü̃xü̃gü nixĩ i nango̱xẽẽxü̃ ñoma üxüxü̃́pa i nexgütanücüüxü̃rüxü̃.
8 Rü ngẽxguma chi choma rü cuxrüxü̃ chixĩxgu, Pa Yox, rü Cori ya Tupanaca̱x chi chataegu, rü namaxã chi nüxü̃ chixu i chorü guxchaxü̃gü.
9 Erü nüma ya Cori ya Tupana rü muxü̃ma i taxü̃ i mexü̃gü naxü. Rü yixema rü tama nüxü̃ tacua̱x nax ñuxãcü naxüaxü̃ i ngẽma.
10 Rü nüma nixĩ i ñoma i naanegu napuxẽẽãxü̃, rü yimá pucümaxã nixĩ i yaxaiyagüaxü̃ i naanegü.
11 Nüma rü tüxü̃ narüngü̃xẽxẽ ya yixema ngearü diẽruã̱xgüxe, rü ñu̱xũchi tüxü̃ ínapoxü̃ ya yixema naxĩ̱xãchiãẽgüxe.
12 Nüma rü ngẽma womüxẽẽxü̃ cua̱xgüxüchixü̃arü ĩnügu nayanachixexẽxẽ. Rü ngẽmaãcü inayanaxoxẽxẽ i ngẽma nagu naxĩnüexü̃ i ngẽma womüxẽẽxü̃ cua̱xgüxüchixü̃.
13 Nüma ya Cori ya Tupana rü norü chixexü̃gutama nanayixẽxẽ i ngẽma dorata̱a̱xgüxü̃. Rü ñu̱xũchi nagu nayanachixexẽxẽ i norü ĩnügü i chixexü̃ i nagu naxĩnüexü̃.
14 Rü ngunecü rü ñoma naxẽanegurüxü̃ nixĩ, erü naxca̱x nawaanegü ñoma nachütaxü̃rüxü̃.
15 Rü yíxema ngearü diẽruã̱xgüxe rü Cori ya Tupana tüxü̃ narüngü̃xẽxẽ rü tüxü̃ ínapoxü̃ naxme̱xwa i ngẽma diẽruã̱xü̃chixü̃ i chixri tümamaxã icuáxü̃.
16 Nüma nixĩ i tüxü̃ nangü̃xẽẽxü̃ ya yíxema taxucürüwa tügü ípoxü̃güxe. Rü nüma nixĩ i yanangẽã̱xgüxẽẽãxü̃ i ngẽma chixri tümamaxã icua̱xgüxü̃.
17 Rü nataãxẽ ya yimá yatü ya Tupana ucu̱xẽcü. ¡Rü taxṹ i nüxü̃ cuxoxü̃ ya yimá Guxãétüwa Ngẽxmacüarü ucu̱xẽ!
18 Rü ngẽxguma chi Tupana cuxü̃ yapi̱xẽẽgu rü chi cuxü̃́ nayana̱i̱x i curü o̱xri. Rü ngẽxguma chi cuxna nacua̱i̱xcaãgu rü chi cuxü̃ nananaxẽxẽ.
19 Nüma rü 6 i guxchaxü̃wa tá cuxü̃ ínanguxuchixẽxẽ, rü ngẽma norü 7 i guxchaxü̃ rü marü taxũtáma cuxna nangu.
20 Rü ngẽxguma taiya inguxgu rü yuwa tá cuxü̃ ínanguxuchixẽxẽ. Rü ngẽxguma dai ínguxgu rü nüma rü tá tarawa cuxü̃ ínapoxü̃.
21 Rü woo chixexü̃ cumaxã yaxugüegu rü nüma rü tá cuxna nadau. Rü taxũtáma cumuü̃ ega ngẽxguma guxchaxü̃ cuxca̱x ínguxgu.
22 Rü tá nüxü̃ cucugü i ngẽma taiya rü ngẽma taxü̃ i guxchaxü̃gü. Rü taxũtáma nüxü̃ cumuü̃ i ngẽma naeü̃gü i idüraexü̃.
23 Rü yimá nutagü rü cuanewa rü taxũtáma curü guxcharuü̃gü nixĩgü. Rü ngẽma naeü̃gü i idüraexü̃ rü cumücügü tá nixĩgü.
24 Rü cupatawa rü guxü̃táma mea nixũ. Rü ngẽxguma cuyaxugügu i curü wocagü rü guxü̃táma nangẽxmagü.
25 Rü tá nimu i cutaagü ñoma maxẽ i naanewa rüxügüxü̃rüxü̃.
26 Rü ngẽxguma o̱xiwa cunguxgu rü tá cuporaama rü ñoma wüxi i triguya̱xa i natanüwa dauxü̃rüxü̃ tá quixĩ.
27 Rü ngẽma ta̱xacü i imáxyane tüxü̃ ngupetüxü̃ nixĩ i tüxü̃ ngúexẽẽxü̃ nax aixcüma yixĩxü̃ i chorü ore. ¡Rü nüxü̃ naxĩnü i ngẽma cumaxã nüxü̃ chixuxü̃ rü cumatama nüxü̃ naxü rü aixcüma yixĩ! —ñanagürü ga Erifá.
