Job 6:1-30
6 6:1-3 Rü nüma ga Yox rü nanangãxü̃ rü ñanagürü: —Ngẽxguma chi guxü̃ma i chorü ngechaü̃gü rü chorü guxchaxü̃gü rü wüxi i yáxü̃arü ngugüruxü̃wa inayaxgu, rü naxnücü ya márwa ngẽxmagücüarü yexera chi nayá. Rü ngẽma ngúxü̃ nax chingexü̃gagu nixĩ nax düxwa ore i tama mexü̃maxã chachonagüxü̃.
2 Nüü̃ nadau 6:1
3 Nüü̃ nadau 6:1
4 Rü nüma ya Yimá Guxãétüwa Ngẽxmacü rü chowa nayanawa̱xẽẽgü ya yima naxnegü, rü ngẽma norü naguchatagü rü chaxunegu nixũ. Rü ngẽma ãũcümaxü̃ i norü nu ya Tupana rü marü chowa nangu.
5 ¿Ẽ̱xna yacaxü̃ i ngẽma búru i dauxchitacüã̱x ega ngẽxguma naxãbügu? ¿Ẽ̱xna yaca̱xaxü̃ i ngẽma woca i yatüxü̃ ega ngẽxguma maxẽ nüxü̃́ ngẽxmagu?
6 ¿Rü texé nangṍxü̃ i wüxi i õna i oegamarexü̃ i ngearü yucüraã́xü̃? ¿Rü ta̱xacürü chi̱x nüxü̃́ nangẽxma i wüxi i õna i ngeacamarexü̃?
7 Rü ngẽma taguma changṍxchaü̃xü̃ nixĩ i ñu̱xma chauwemü ixĩxü̃.
8 Chierüna Tupana noxtacüma choxna naxãxgu i ngẽma nüxna naxca̱x chacaxü̃. Chierüna choxna naxãxgu i ngẽma chanaxwa̱xexü̃.
9 Rü chierüna wüxicana choxü̃ yagaxgu ya Tupana nax ngẽxma nagúxü̃ca̱x i chorü maxü̃.
10 Rü woo nax ngúxü̃ chingexü̃ rü chorü taãxẽ nixĩ nax guxü̃guma naga chaxĩnüamaxü̃ i ngẽma norü mugü ya Tupana ya üünecü.
11 Rü ñu̱xma rü chagúarü poraã̱x rü marü tama yáxna namaxã chaxĩnü i ngẽma guxchaxü̃gü. Rü marü taxuca̱xma tü̱xcüü̃ nua chamaxecha.
12 Rü chorü maxü̃ rü tama wüxi ya nutarüxü̃ natai. Rü chaxune rü tama wüxi i bróũcherüxü̃ natai.
13 Rü ngẽmaca̱x taxucürüwa chaugünatama pora chaxã. Rü taxúema texé choxü̃ taporaxẽxẽ.
14 Rü wüxi i tamücü i ngúxü̃ ingexü̃ rü nüxü̃ tangechaxü̃ woo tama yimá Guxãétüwa Ngẽxmacümaxã yaxaixcümagu.
15 Natürü i pemax, Pa Chomücügüx, rü tama chomaxã pixaixcümagü. Rü ñoma wüxi i natüxacü i paxü̃rüxü̃ pixĩgü.
16 6:16-17 Rü ngẽxguma ngẽma gáuxü̃ i máxpü̱xanexü̃wa ngẽxmaxü̃ rü üa̱xcüarü naianexü̃maxã nadexegu rü ngẽma dexá rü naporaxüchixü̃ rü nabuxchíü. Natürü ngẽxguma nangupetügu nax nadexexü̃ i ngẽma gáuxü̃ rü taunecüwa nanguxgu rü ngẽma natüxacügü rü nipagü.
17 Nüü̃ nadau 6:16
18 Rü ngẽmaca̱x i ngẽma duü̃xü̃gü i yáxü̃wa ne ĩxü̃ rü norü namawa taxuxü̃ma i dexáxü̃ inayangau. Rü ngẽmaca̱x nüxna ínachocu i nama nax dexáca̱x nadaugüxü̃ca̱x rü ínachianexü̃waama naxĩ rü ngẽxma nayue.
19 Rü ngẽma duü̃xü̃gütücumügü i Temáwa ne ĩxü̃ rü naxca̱x nadaugü ga yema natügüarü dexá. Rü ngẽxgumarüxü̃ ta i ngẽma Chabáwa ne ĩxü̃ i duü̃xü̃gütücumügü rü nagu narüxĩnüe nax nüxü̃ yangaugüxü̃ i ngẽma natügüarü dexá.
20 Natürü yexguma yéma nangugügu rü narümaachitanü rü yexma nagu nayarüchixe ga yema norü taãẽgü.
21 Rü pema rü ngẽmaãcü cha̱u̱xca̱x pixĩgü. Rü nüxü̃ pedaugü i ñaa taxü̃ i chorü guxchaxü̃gü, natürü peba̱i̱xãchiãxẽ rü pemuü̃e.
22 Natürü i choma rü taxuca̱xma pexna chaca, rü bai nax diẽruca̱x pexna chacaxü̃ nax ñaa ngúxü̃wa choxü̃ ípenguxuchixẽẽxü̃ca̱x.
23 Rü bai nax pexna naxca̱x chaca̱xaxü̃ nax wüxi i uanüme̱xẽwa choxü̃ ípenguxuchixẽẽxü̃ca̱x, rü bai pexna naxca̱x chaca̱xaxü̃ nax máetagüxü̃me̱xẽwa choxü̃ penapu̱xuxü̃ca̱x.
24 ¡Chomaxã nüxü̃ pixu nax ngextá íchatüxü̃ rü chixexü̃ chaxüxü̃! Rü ngẽxguma i choma rü tá charüngea̱xmare.
25 Rü taxúema nüxü̃ taxo i wüxi i ore i aixcüma ixĩxü̃, natürü i pema rü taxuxü̃ma i chixexü̃ chaxüãcüma rü choxü̃ pixugü.
26 Pema rü choxü̃ pixuchigagü naxca̱x i ngẽma chorü dexagü. Rü pexca̱x rü chorü oregü rü taxuwama name, rü ñoma oregü i buanecü ingegüxü̃rüxü̃ nixĩgü.
27 Pemax rü pexü̃́ natauxcha nax namaxã petaxexü̃ i wüxi i taxcuxü̃, rü woo wüxi i pemücü rü namaxã petaxexü̃.
28 Ñu̱xma rü chanaxwa̱xe i chauchiwe perüdaunü, rü chomaxã nüxü̃ pixu ega chidoragu.
29 Rü chanaxwa̱xe i iperüchianegü namaxã i ngẽma ore i chauchiga nüxü̃ pixuxü̃. ¡Rü taxṹ i pidorata̱xa̱güxü̃! ¡Rü penayaxu i ngẽma ore i nüxü̃ chixuxü̃ nax aixcüma yixĩxü̃!
30 ¿Ẽ̱xna pema nüxü̃ pecua̱xgu i choma rü wüxi i dorata̱xáxü̃ chixĩ? ¿Ẽ̱xna nagu perüxĩnüegu rü tama nüxü̃ chacuáxü̃ nax ngexü̃rüüxü̃ nax yixĩxü̃ i ngẽma ore i mexü̃ rü ngexü̃rüüxü̃ nax yixĩxü̃ i ngẽma ore i chixexü̃?
