Job 7:1-21
7 Rü ñoma i naanewa i yixema rü ñoma wüxi i puracütanüxü̃ i norü puracütanü ínanguxẽẽxü̃rüxü̃ tixĩgü.
2 Rü ñoma wüxi i mugüruxü̃ i ga̱u̱xetüxü̃wa yáxna rüngü̱̃xü̃rüxü̃ tixĩgü. Rü ñoma wüxi i puracütanüxü̃ i norü puracütanü i diẽru ínanguxẽẽxü̃rüxü̃ tixĩgü.
3 Rü ñuxre ya tauemacü rü guxchaxü̃wa changexma rü taxuxü̃ma chaxü. Rü guxü̃ i chütaxü̃ rü poraãcü ngúxü̃ chingeecha.
4 Rü ngẽxguma nachütagu rü chorü ngürücaregu chacaxgu nax chapexü̃ rü cha̱u̱xca̱x rü nama̱x i ngẽma chütaxü̃. Rü düxwa chipamare nax chanadixegucücaxü̃ ñu̱xmata yangunemare. Rü nagu charüxĩnü rü chaugüna chaca rü ñachagürü: “¿Ñuxgura tá yangunexü̃?” ñachagürü.
5 Rü ngẽma chaxune rü õxmigümaxã nanapa. Rü ngẽma o̱xrigü i chaxunewa yarüyixü̃ rü nixãxü̃chíü.
6 Rü ñoma ta̱xacü paxãma ixũxü̃rüxü̃ nixĩ i ngẽma chorü maxü̃, rü paxãma inixũ nax norü gu̱xwa nanguxü̃, rü taxucürüwama íchayachaxãchixẽxẽ.
7 ¡Rü nüxna nacua̱xãchi, Pa Tupanax, nax ñoma yáxna rüngü̱̃xü̃rüxü̃ yixĩxü̃ i ngẽma choxrü maxü̃, rü tagutáma wena taãxẽ choxü̃́ ngẽxmaxü̃!
8 Rü ngẽxguma chayu̱xgu rü choxü̃ nata̱xgu rü marü tagutáma texé choxü̃ tadau. Rü cuma rü tá choxü̃ cudau natürü i choma rü marü tá chataxu.
9 7:9-10 Rü ñoma caixanexü̃ i üpetüemaxü̃ rü iyarütaxuxü̃rüxü̃ tixĩ ya yíxema yuxe ega ngẽxguma tüxü̃ yata̱xgügu. Rü tagutáma tümapataca̱x tataegu, rü ngẽma tümatanüxü̃ rü tagutáma wena tüxü̃ nadaugü.
10 Nüü̃ nadau 7:9
11 Rü ngẽmaca̱x i ñu̱xma rü taxũtáma changeã̱xmare. Rü ngẽma ngúxü̃ i chingexü̃gagu rü ngẽma nax chanuxü̃gagu rü tá chidexa rü tá cumaxã nüxü̃ chixu i ngẽma nagu charüxĩnüxü̃.
12 ¿Ẽ̱xna, Pa Tupanax, cuxca̱x rü ñoma wüxi i ngo̱xo i taxü̃ i márwa ngẽxmaxü̃ chixĩ, rü ngẽmaca̱x choxna cudaxuchi?
13 7:13-14 Rü ngẽxguma nagu charüxĩnügu rü chorü pechicagu tá nüxü̃ chayangau i taãxẽ rü ngẽxguma chapexgu rü tá nüxü̃ charüngüma i ngẽma ngúxü̃ i chingexü̃, natürü i cumax, Pa Tupanax, rü chaunegüwa rü ãũcümaxü̃ choxü̃ cuwe̱x rü poraãcü choxü̃ cumuü̃xẽxẽ.
14 Nüü̃ nadau 7:13
15 Rü narümemae nixĩ nax choxü̃ cuwẽxnaxãxü̃. Rü chanaxwa̱xe nax wüxicana iyanaxoxü̃ i ñaa chorü maxü̃.
16 Rü tama marü yáxna chaxĩnü. Rü tama marü chanaxwa̱xe nax chamaxü̃xü̃. ¡Rü taxṹ i choxü̃ cuchixeãẽxü̃! Erü ngẽma chorü maxü̃ rü ñoma yáxna rüngü̱̃xü̃rüxü̃ nixĩ.
17 ¿Rü ta̱xacüwa name ya yima yatü rü ngẽmaca̱x cuma rü nagu curüxĩnüxü̃? ¿Rü tü̱xcüü̃ naxca̱x cuxoegaãẽxü̃?
18 ¿Rü tü̱xcüü̃ guxü̃ i ngunexü̃gu cunangugü ya yima yatü rü guxü̃ i oragu nüxü̃ cuxüxü̃?
19 ¿Rü tü̱xcüü̃ tama choxna quidaugachichaxü̃ nax ngẽmaãcü íchagabü̱a̱xgüxü̃ca̱x?
20 Rü ngẽxguma chixexü̃ chaxüxgu ¿rü ta̱xacürü chixexü̃ ẽ̱xna cumaxã chaxü, Pa Yatügüarü Ngugüruxü̃x? ¿Rü tü̱xcüü̃ wüxi i cuxnemaxã choxü̃ cuchuxchaü̃xü̃ choxü̃ quixĩxẽxẽ? ¿Ẽ̱xna cuxca̱x rü wüxi i curü guxcharuxü̃ chixĩ?
21 ¿Rü ẽ̱xna taxucürüwama choxü̃́ nüxü̃ curüngü̃ma i ngẽma chorü chixexü̃? ¿Rü taxucürüwa ẽ̱xna nüxü̃ curüngü̃ma ga yema chixexü̃ ga chaxüxü̃? Rü paxa tá chayu rü waixü̃mütüü̃wa tá changexma. Rü cha̱u̱xca̱x tá cudau natürü i choma rü marü tá chataxu —ñanagürü ga Yox.
