Job 9:1-35
9 Rü yexguma ga Yox rü Biridáxü̃ nangãxü̃ rü ñanagürü:
2 —Choma rü meama nüxü̃ chacua̱x i guxü̃ma i ngẽma nüxü̃ quixuxü̃. Rü aixcüma nixĩ nax Tupanape̱xewa rü nataxuxü̃ ya yatü ya ngearü chixexü̃ã́cü.
3 Rü ngẽxguma chi wüxi ya yatü rü Tupanape̱xewa nügü ínapoxü̃chaü̃gu, rü woo 1,000 i oremaxã nügü ínapoxü̃gu, rü bai i wüxi rü ningu nax nügü namaxã ínapoxü̃xü̃.
4 Rü nüma ya Cori ya Tupana rü naporaxüchi rü ñu̱xũchi nüxü̃ nacua̱xüchi. ¿Rü texé chi Tupanaxü̃ nüxü̃ tarücua̱xmae nax ngẽmaãcü tama tüxna naca̱xaxü̃ca̱x naxca̱x i tümaarü chixexü̃?
5 Rü ngẽxguma nanuxgu ya Tupana rü nachicawa nayaxĩgachixẽẽgü ya ma̱xpǘnegü. Natürü taxúema nüxü̃ tacua̱x nax ta̱xacüca̱x nabuxü̃.
6 Rü núma ya Tupana rü nayaxĩã̱xcüüxẽxẽ i ñoma i naane rü nayadu̱xruxẽxẽ i ngẽma natüxü̃wa ngẽxmaxü̃.
7 Rü nüma nixĩ i namuaxü̃ ya üa̱xcü nax tama inabaxixü̃ca̱x rü ñu̱xũchi ẽxtagü nax tama yana̱i̱xgüxü̃ca̱x.
8 Rü taxúearü ngü̃xẽẽmaxã nixĩ ga Tupana ga yangeechiãxü̃ ga dauxü̃guxü̃ ga naane. Rü nüma rü namaxã inacua̱x i ngẽma már arü yuapegü.
9 Rü nüma nixĩ ga naxüaxü̃ ga yimá ẽxtagütücumü i Ócha i Taxü̃gu ãégaxü̃ rü yimá ẽxtagütücumü i Orióü̃gu ãégaxü̃ rü yimá ẽxtagütücumü i Préyadegu ãégaxü̃, rü ñu̱xũchi yimá ẽxtagütücumü i súrwaama ngẽxmagüxü̃.
10 Rü nüma ya Tupana rü nanaxü i muxü̃ma i taxü̃gü i mexü̃gü i taxúema nüxü̃ cuáxü̃ nax ñuxre yixĩxü̃.
11 Rü ngẽxguma chi Cori ya Tupana chauxü̃tawa üpetügu rü taxũchima nüxü̃ chadau. Rü ngẽxguma chi chauxü̃tawa naxüpetügu rü taxũchima nüxü̃ chacua̱x nax ñuxguacü chauxü̃tawa naxüpetüxü̃.
12 Rü ngẽxguma chi ta̱xacü nayaxu̱xgu nax noxrü yixĩxü̃ca̱x, ¿rü texé tá ítayachaxãchixẽxẽ? ¿Rü texé tá nüxna taca naxca̱x i ngẽma naxüxü̃?
13 Rü ngẽxguma nanuxgu ya Cori ya Tupana rü tama nixĩ i tauxchaãcüma nangüxmüxü̃. Rü nape̱xegu nixĩ i nacaxã́pü̱xügüxü̃ i ngẽma ngo̱xo i Raá rü norü ngü̃xẽẽruü̃gü.
14 ¿Rü ñuxãcü tá nüxü̃ ichayangau i wüxi i ore i Cori ya Tupanape̱xewa chaugü namaxã íchapoxü̃xü̃?
15 Rü woo chi changearü chixexü̃ã̱xgu, rü taxucürüwama chanangãxü̃ erü nüma nixĩ i chorü maxü̃xü̃ nangugüxü̃. Rü ngẽma nax nüxü̃́ changechaü̃tümüü̃xicatama nixĩ i choxü̃́ tauxchaxü̃ nax naxca̱x íchacaxaxü̃.
16 Rü ngẽxguma chi nüxna naxca̱x chacaxgu nax choxü̃́ namexẽẽãxü̃ca̱x i chorü guxchaxü̃ rü woo chi choxü̃ nayaxu̱xgu, natürü taxũchima choxü̃́ irüxĩnü ega ngẽxguma chidexagu.
17 Rü wüxi i taxü̃ i guxchaxü̃ chi cha̱u̱xca̱x ínanguxẽxẽ, rü yexeraãcü chi nanamuxẽxẽ i ngẽma chorü o̱xrigü woo taxuxü̃ma i chixexü̃ chaxüxgu.
18 Rü oegaãẽmaxã chi choxü̃ nanapaxẽxẽ rü choxü̃́ nanaguxchaxẽxẽ nax chingü̃ãcüüxü̃ca̱x.
19 ¿Rü texé nagu tarüxĩnü nax tümaarü poramaxã tá nüxü̃ tarüporamaexü̃? Erü nüxicatama nixĩ i aixcüma naporaxü̃. ¿Rü texé tá nüxna taca i norü maxü̃chiga? ¿Rü texé tapora nax ãẽ̱xgacüpe̱xewa naxca̱x tangemaxü̃?
20 Rü ngẽxguma chi chaugü chixuxgu nax mea chamaxü̃xü̃ rü taxuxü̃ma i chixexü̃ chowa ngẽxmaxü̃, natürü nüma rü tá nüxü̃ nixuama nax chixexü̃ chaxüxü̃ rü chachixecümaxü̃.
21 Choma rü taxuxü̃ma i chixexü̃ chaxü, natürü choxü̃ nanataxuraü̃ma nax chamexü̃. Rü marü chipa nax chamaxü̃xü̃ i ñoma i naanewa.
22 Rü ñaa nixĩ i nagu charüxĩnüxü̃. Rü guxãma rü Tupanape̱xewa rü tawüxigumare. Erü nüma ya Cori ya Tupana rü tüxü̃ nima̱x ya yíxema chixexü̃ üxe rü ngẽxgumarüxü̃ ta tüxü̃ nima̱x ya yixema taxuxü̃ma i chixexü̃ üxe. Rü ngẽma nixĩ i nagu charüxĩnüxü̃.
23 Rü ngẽxguma chi da̱xaweanemaxã nayu̱xgu i wüxi i duü̃xü̃ i taxuxü̃ma i chixexü̃ üxü̃ rü nagu charüxĩnü nax Tupana nüxü̃ cugüxü̃ nax naxĩ̱xãchiãẽxü̃.
24 Rü ngẽxguma wüxi i chixexü̃gu maxü̃xü̃ nayaxu̱xgu i wüxi i naane, rü nüma ya Tupana rü nayangexetü i ngẽma ãẽ̱xgacügü i guxchaxü̃güarü mexẽẽruü̃gü nax tama nüxü̃ nadaugüxü̃ca̱x i ngẽma chixexü̃. Rü ngẽxguma tama Tupana ngẽmaãcü naxü̱xgu i ngẽma ¿rü texé tixĩ ya yíxema naxǘxe?
25 Rü ngẽma chorü ngunexü̃gü rü paxãma inaxĩ, taxuxü̃ma i taãẽxü̃ ichayangauyane.
26 Rü ñoma wapuru i poraxüchixü̃rüxü̃ paxãma inaxĩ i chorü ngunexü̃gü. Rü ñoma wüxi i ĩyü i nawemüwe ngexü̃rüüxü̃ paxãma inaxĩ.
27 9:27-28 Rü ngẽxguma nagu charüxĩnügu nax nüxü̃ charüngümaxü̃ca̱x i ngẽma ngúxü̃ i chingexü̃ nax ngẽmaãcü chataãẽxü̃ca̱x, rü wenaxarü choxü̃ ínaba̱i̱xgü i ngẽma ngúxü̃ i chingexü̃. Rü meama nüxü̃ chacua̱x nax pema rü tama choxü̃́ peyaxõgüxü̃ nax taxuxü̃ma i chixexü̃ chaxüxü̃.
28 Nüü̃ nadau 9:27
29 Rü ñu̱xma nax nagu perüxĩnüexü̃ nax chixexü̃ chaxüxü̃ ¿rü ta̱xacüwa choxü̃́ name nax pora chaxüxü̃ nax pemaxã nüxü̃ chixuxü̃ nax taguma chixexü̃ chaxüxü̃?
30 9:30-31 Rü woo chi chaũmaxã chaugü chayauxme̱xgu rü chaugü chayauxunegu, natürü cumax, Pa Tupanax, rü ãcharaxü̃gu chi choxü̃ curücu̱x rü woo ngẽma chauxchiru rü chi chowa naxã̱ũ̱ã̱x.
31 Nüü̃ nadau 9:30
32 Tupana rü tama chaurüxü̃ duü̃xü̃ nixĩ rü ngẽmaca̱x taxucürüwa ta̱xacürü ãẽ̱xgacüpe̱xewa chanaga nax chorü guxchaxü̃ namaxã chamexẽẽxü̃ca̱x.
33 9:33-34 Rü nataxuma i wüxi i ãẽ̱xgacü i guxchaxü̃arü mexẽẽruxü̃ i Tupanamaxã rü chomaxã icuáxü̃. Rü tataxuma ya texé ya chauétüwa chogüxe nax tama choxü̃ napoxcuxü̃ca̱x rü choxü̃ yamuü̃xẽẽchigüxü̃ca̱x ya Tupana.
34 Nüü̃ nadau 9:33
35 Rü ngẽxguma chi tangexmagu ya texé ya chauétüwa chogüxe rü choma rü taxũchima chamuü̃ãcüma namaxã chidexa, erü nüxü̃ chacua̱x rü taxuxü̃ma i chixexü̃ nape̱xewa chaxü.
