Josué 1:1-18
1 Rü yexguma nayuxguwena ga gumá Tupanaarü duü̃ ga Moiché, rü nüma ga Cori ya Tupana rü Moichéarü ngü̃xẽẽruxü̃ ga Yochué ga Núü̃ nanemaxã nidexa, rü ñanagürü nüxü̃:
2 —Ñu̱xma nax marü nayuxü̃ ya yimá chorü duü̃ ya Moiché, rü cuma tá nixĩ i guxü̃ma i ngẽma Iraétanüxü̃maxã quixüexü̃ nawa i ngẽma natü i Yudáü̃, nax nagu pichocuxü̃ca̱x i ngẽma naane i pexna chaxãxü̃.
3 Rü yema marü Moichémaxã nüxü̃ chixuxü̃rüxü̃, rü choma rü tá pexna chanaxã i guxü̃ma i ngẽma naane i nawa tá pengagüxü̃.
4 Rü ngẽma naane i tá pexna chaxãxü̃, rü ngẽma chianexü̃ i súrwaama ngẽxmaxü̃wa inaxügü rü ñu̱xmata Líbanuarü ma̱xpǘnewa nangu i nórtewaama. Rü ngẽma naane rü taxtü i Eufrátewa inaxügü i éstewaama rü Itítanüxü̃anemaxã tá nangau ñu̱xmata Már i Mediteráneuwa nangu i oéstewaama.
5 Rü guxü̃ma i ngunexü̃gü i nagu cumaxü̃xü̃gu rü taxuxü̃táma cuxü̃ narüporamae. Rü choma rü tá cuxü̃tawa changexma, yema Moichéxü̃tawa chayexmaxü̃rüxü̃. Rü tagutáma ngextá cuxü̃ chata̱x, rü tagutáma cuxü̃ chaxo.
6 ¡Rü cugü írüpora rü taxṹ i cugü cutaeguxü̃! Erü cuma tá nixĩ i nüxü̃ cuyanuxü̃ i norü naane i ñaa duü̃xü̃gü, yerü yema nixĩ ga perü o̱xigümaxã nüxü̃ chixuxü̃.
7 Rü wüxixicatama nixĩ i cumaxã nüxü̃ chixuxü̃, rü ngẽma nixĩ nax tama cumuü̃xü̃ rü aixcüma naga cuxĩnüxü̃ rü cuyanguxẽẽxü̃ i guxü̃ma i ngẽma mugü ga chorü duü̃ ga Moiché cuxna ãxü̃. ¡Rü ẽcü mea yanguxẽxẽ nax mea cuxü̃́ ínanguxuchixü̃ca̱x i guxü̃ i ta̱xacü ícuxüxü̃wa!
8 ¡Rü guxü̃gutáma nawa cungu̱x i ngẽma nüxü̃ chixuxü̃ i chorü mugüpanewa! Rü name nixĩ i cuma rü chütacü rü ngunecü rü nagu curüxĩnü i ngẽma chorü ore nax ngẽmaãcü mea cunaxüxü̃ca̱x i ngẽma cumaxã nüxü̃ chixuxü̃, rü mea cuxü̃́ ínanguxuchixü̃ca̱x i guxü̃ma i ta̱xacü ícuxüxü̃wa.
9 Rü choma nixĩ i cuxü̃ chamuxü̃ nax cugü cuporaxẽẽxü̃ca̱x Rü tama name i cumuü̃xü̃ rü icuyarümaãchi, erü choma ya curü Cori ya Tupana rü tá cuxü̃tawa changexma i ngextá cuma ícuxũxü̃wa —ñanagürü ga Tupana.
Yochué rü duü̃xü̃güxü̃ namu nax nügü namexẽxẽgüxü̃ca̱x nax yapugüãxü̃ca̱x i ngẽma naane i Cori ya Tupana tá nüxna ãxü̃
10 Rü yexguma ga nüma ga Yochué rü nanamu ga yema Iraétanüxü̃arü ãẽ̱xgacügü, rü ñanagürü nüxü̃:
11 —¡Guxü̃ma i duü̃xü̃gütanügu pixĩãgütanü, rü namaxã nüxü̃ pixu nax nanutaque̱xegüãxü̃ca̱x i õna! Erü tomaepü̱x i ngunexü̃wa nanguxgu rü tá tichoü̃ i natü i Yudáü̃ nax nayaxuxü̃ca̱x i ngẽma naane i tórü Cori ya Tupana tá tüxna ãxü̃ —ñanagürü ga Yochué.
12 Rü nüma ga Yochué rü namaxã nidexa ga yema Rubéü̃tanüxü̃ rü Gáxtanüxü̃ rü ngãxü̃tücumü ga Manachétanüxü̃ rü ñanagürü nüxü̃:
13 —¡Nüxna pecua̱xãchie ga yema pemaxã nüxü̃ yaxuxü̃ ga Moiché ga Cori ya Tupanaarü duü̃ ga yexguma ñaxgu: “Yimá perü Cori ya Tupana tá pexna nanaxã i ngẽma naane nax ngẽxma taãẽãcüma pexãchiü̃güxü̃ca̱x”, ñaxgu!
14 ¡Rü ngẽmaca̱x i ñu̱xma i pema Pa Rubéü̃tanüxü̃x rü Gáxtanüxü̃ rü ngãxü̃tücumü i Manachétanüxü̃x rü nuxãtama tüxü̃ pemugü ya pexma̱xgü, rü pexacügü, rü pexü̃nagü nagu i ñaa naane ga Moiché pemaxã ueguxü̃ i ñaa Yudáü̃cutü i nawa pengẽxmagüxü̃wa ngẽxmaxü̃! ¡Natürü guxü̃ma i perü yatügü i marü imexü̃ nax daiwa naxĩxü̃ rü nadeãx ya naxnegü, rü naenexẽgü i togü i Iraétanüxü̃pe̱xegu naxĩ nax ngẽmaãcü nüxü̃ nangü̃xẽẽgüxü̃ca̱x!
15 Rü ñu̱xmatáta nüma ya Cori ya Tupana peenexẽgüna naxã i norü naane i nagu tá taãẽãcüma naxãchiü̃güxü̃, yema pexna naxããgurüxü̃, rü ñu̱xmatáta nümagü rü norü yora yaxĩgüxü̃ i ngẽma naane i Cori ya Tupana tá nüxna ãxü̃, rü tá nüxü̃ perüngü̃xẽxẽ. Rü ngẽmawena i pemax rü tá naxca̱x pewoegu i ñaa perü naane i Yudáü̃cutüarü éstewaama üxü̃, nax ngẽmaãcü penayaxuchixü̃ca̱x i ñaa naane ga gumá Tupanaarü duü̃ ga Moiché pexna ãxü̃ —ñanagürü.
16 Rü nümagü rü Yochuéxü̃ nangãxü̃gü rü ñanagürügü: —Tomax rü tá tanaxü i guxü̃ma i ngẽma toxü̃ cumuxü̃ rü ngéma tá taxĩ i ngẽma toxü̃ ícumugüxü̃wa.
17 Rü guxü̃gutáma cuga taxĩnüe yema Moichéga taxĩnüexü̃rüxü̃. Rü wüxixicatama nixĩ i Cori ya Tupanana naxca̱x taca̱xaxü̃ rü ngẽma nixĩ nax cuxü̃ íyaxümücüxü̃ yema Moichéxü̃ íyaxümücüxü̃rüxü̃.
18 Rü guxãma ya yíxema tama cuga ĩnüxe i ngẽxguma toxü̃ cumu̱xgu rü tá tayu. Rü ngẽma cuxna naxca̱x taca̱xaxü̃xicatama nixĩ nax cuporaxü̃ rü taguma curümaãchixü̃ —ñanagürügü.
