Josué 10:1-43
10 10:1-2 Rü Adonichéde ga Yerucharéü̃arü ãẽ̱xgacü nüxü̃ naxĩnü nax ñuxãcü Yochué rü Áixü̃ yapu̱xü̃ rü yamáaxü̃ ga norü ãẽ̱xgacü rü yanaxoxẽẽãxü̃ ga norü ĩane. Rü yexgumarüxü̃ ta nüxü̃ naxĩnü nax ñuxãcü Yericúxü̃ yapu̱xü̃ rü yamáaxü̃ ga norü ãẽ̱xgacü. Rü ñu̱xũchi nüxü̃ nacuáchiga ga Gabaóü̃cüã̱xgü nax Iraétanüxü̃maxã mexü̃ ga ĩnüwa nangugüxü̃ nax tama namaxã nügü nada̱i̱xü̃ca̱x. Rü yemaca̱x ga nüma ga Yerucharéü̃arü ãẽ̱xgacü rü poraãcü namuü̃ yerü Gabaóü̃ rü wüxi ga ĩane ga taxü̃ne rü porane ga Áiarü yexera ixĩxü̃ne nixĩ, rü norü duü̃xü̃gü rü nipora rü tama namuü̃ewa̱xe.
2 Nüü̃ nadau 10:1
3 Rü yemaca̱x ga nüma ga Adonichéde rü yéma namuga naxca̱x ga Yoáü̃ ga ĩane ga Ebróü̃arü ãẽ̱xgacü, rü Piráü̃ ga ĩane ga Yamúxarü ãẽ̱xgacü, rü Yapía ga ĩane ga Láquiarü ãẽ̱xgacü, rü Debíx ga ĩane ga Egróü̃arü ãẽ̱xgacü.
4 Rü ñanagürü: —¡Nua pexĩ nax choxü̃ peyarüngü̃xẽxẽgüxü̃ca̱x nax Gabaóü̃cüã̱xgümaxã yigü ida̱i̱xü̃ca̱x! Yerü Yochuémaxã rü guxü̃ma i Iraétanüxü̃arü ãẽ̱xgacügümaxã mexü̃ i ĩnüwa nangugüe nax tama nügü nada̱i̱xü̃ca̱x —ñanagürü.
5 Rü yemaca̱x ga yema 5 ga ãẽ̱xgacügü ga Amoréutanüxü̃ rü wüxigu naxĩtaque̱xe. Rü yemagü nixĩ ga Yerucharéü̃arü ãẽ̱xgacü, rü Ebróü̃arü ãẽ̱xgacü, rü Yamúxarü ãẽ̱xgacü, rü Láquiarü ãẽ̱xgacü, rü Egróü̃arü ãẽ̱xgacü. Rü norü churaragümaxã Gabaóü̃arü ĩaneca̱x inaxĩãchi. Rü yexma nangugü nax namaxã nügü nada̱i̱xü̃ca̱x.
6 Rü yemaca̱x ga yema Gabaóü̃cüã̱xgü rü Guirigáwa ga Yochuéxü̃tawa namugagü, rü ñanagürügü: —¡Taxṹ ipexoexü̃ nax toxü̃ peyarüngü̃xẽxẽxü̃ i toma i perü puracütanüxü̃ nax tixĩgüxü̃! ¡Rü paxa nua pexĩ nax toxü̃ peyarüngü̃xẽxẽxü̃ca̱x rü toxü̃ ípepoxü̃xü̃ca̱x! Erü guxü̃ma i ngẽma ãẽ̱xgacügü i Amoréutanüxü̃ i ma̱xpǘneanecüã̱xgü rü wüxigu toxca̱x naxĩtaque̱xe nax toxü̃ nada̱i̱xü̃ca̱x —ñanagürügü.
7 Rü yexguma ga Yochué rü Guirigáwa inaxũãchi namaxã ga guxü̃ma ga norü churaragü ga tama muü̃exü̃.
8 Rü nüma ga Cori ya Tupana rü ñanagürü nüxü̃: —¡Taxṹ i nüxü̃ cumuü̃xü̃! Erü choma rü tá cuxme̱xgu chanayixẽxẽ i ngẽma Amoréutanüxü̃. Rü bai tá i wüxi i cuxü̃ rüporamaexü̃ —ñanagürü.
9 Rü Guirigáwa inaxũãchi ga Yochué namaxã ga norü churaragü, rü chütacü inixũ. Rü yemaacü Amoréutanüxü̃xü̃ ínayabaixgü rü nanadai.
10 Rü nüma ga Cori ya Tupana rü poraãcü yema Amoréutanüxü̃xü̃ namuü̃exẽxẽ nape̱xewa ga Iraétanüxü̃. Rü yemaca̱x ga Yochuéarü churaragü rü ĩane ga Gabaóü̃gu nanadai ga muxü̃ma. Rü ñu̱xũchi nawe nangẽgü nagu ga yema nama ga Bex-oróü̃wa nadaxü̃. Rü nayadaietanü ga yema Amoréutanüxü̃ ñu̱xmata ĩanegü ga Achecá rü Machedáwa nangugü.
11 Rü yexguma Iraétanüxü̃cha̱xwa nabuxmügu ga yema Amoréutanüxü̃ nagu ga yema Bex-oróü̃arü tuãchixü̃, rü nüma ga Cori ya Tupana rü gáuxü̃ ga itapütaxü̃ naétügu nayixẽxẽ. Rü Iraétanüxü̃ daixü̃arü yexera yema gáuxü̃maxã nayue ga Amoréutanüxü̃.
12 Rü yexguma nüma ga Cori ya Tupana rü Iraétanüxü̃me̱xẽgu nayixẽẽãgu ga yema Amoréutanüxü̃. Rü nüma ga Yochué rü duü̃xü̃güpe̱xewa Cori ya Tupanamaxã nidexa rü ñanagürü:—Pa Tupanax, chanaxwa̱xe i ícuyachaxãchixẽẽxü̃ ya üa̱xcü Gabaóü̃étüwa.¡Rü ngẽxgumarüxü̃ ta ya tauemacü rü íyachaxãchixẽxẽ naétüwa i Ayaróü̃arü doxonexü̃!
—ñanagürü.
13 Rü gumá üa̱xcü rü gumá tauemacü rü yéma nayachaxãchigü ñu̱xmata ga Iraétanüxü̃ norü uanügüxü̃ nadai. Rü ngẽmaca̱x ngẽma popera i Yachéx ümatüxü̃wa rü ñanagürü:—Yimá üa̱xcü rü wixgutaa̱x 24 ora ninge ga nax tama yanaxücuxü̃
—ñanagürü.
14 Rü yemaacü Tupana ínayachaxãchixẽxẽ ga üa̱xcü rü tauemacü nagagu ga wüxi ga yatüarü yumüxẽ. Rü ü̃paacü rü taguma yemaacü nangupetü, rü woo yemawena rü taguma yemaacü nangupetü, yerü woetama Iraétanüxü̃étüwa naxü ga Tupana.
15 Rü yemawena nüma ga Yochué rü norü churaragü ga Iraétanüxü̃maxã naxca̱x nawoegu ga guma ĩane ga nagu napegüne ga Guirigá.
16 Rü yema 5 ga ãẽ̱xgacügü ga Amoréutanüxü̃ rü nibuxmü rü wüxi ga nutaarü ãxmaxü̃gu narücu̱xgü ga Machedáwa.
17 Natürü yixcamaxü̃ra rü nüxü̃ inayangaugüama nagu ga yema nutaarü ãxmaxü̃ rü Yochuémaxã nüxü̃ nixugüe.
18 Rü nüma ga Yochué rü Iraétanüxü̃na naxãga rü ñanagürü nüxü̃: —¡Nuta ngéma pedixgü rü yimagümaxã penanguta i ngẽma ãxmaxü̃, rü dauruü̃gü ngẽxma pemugü nax ngéma nüxna nadaugüxü̃ca̱x!
19 ¡Natürü i pemax, rü taxũtáma ngéma peyachaxãchitanü! ¡Rü nawe pengẽgü i ngẽma tórü uanügü rü naweama ne pexĩ! ¡Rü taxṹ i norü ĩaneca̱x penawoeguxẽxẽxü̃! Erü nüma ya Cori ya perü Tupana rü marü pexme̱xgu nanayixẽxẽ —ñanagürü.
20 Rü nüma ga Yochué rü Iraétanüxü̃arü churaragümaxã Amoréutanüxü̃xü̃ narüporamae rü nanadai ga muxũchixü̃ma. Rü yemawena rü yema Amoréutanüxü̃ ga ibuxmüxü̃ rü norü ĩanegu narücu̱xgü.
21 Natürü nüma ga Iraétanüxü̃ rü taxuxü̃ma nüxü̃ nangupetü, rü mea nawoegu naxca̱x ga Machedá ga ínapegüxü̃wa ga Yochué íyexmaxü̃wa. Rü taxúema tügü taporaxẽxẽ nax chixri nachiga tidexaxü̃ ga Iraétanüxü̃.
22 Rü nüma ga Yochué rü Iraétanüxü̃xü̃ namu rü ñanagürü: —¡Ípenanugü ya yimá nutagü i ngẽma ãxmaxü̃ namaxã rüngũxtagücü! ¡Rü ípenamuxü̱̃x i ngẽma 5 i ãẽ̱xgacügü! —ñanagürü.
23 Rü nüma ga Iraétanüxü̃ rü ínanamuxü̃ ga yema ãẽ̱xgacügü ga Yerucharéü̃arü ãẽ̱xgacü, rü Ebróü̃arü ãẽ̱xgacü, rü Yamúxarü ãẽ̱xgacü, rü Láquiarü ãẽ̱xgacü, rü Egróü̃arü ãẽ̱xgacü.
24 Rü yexguma Yochuépe̱xewa nagagüã̱xgu rü nüma ga Yochué rü naxca̱x naca ga guxü̃ma ga Iraétanüxü̃ ga iyatüxü̃ rü yema churaragüerugü ga naxü̃tawa yexmagüxü̃ rü ñanagürü nüxü̃: —¡Nua pexĩ rü nanaxãwa pengagü i ñaa ãẽ̱xgacügü! —ñanagürü. Rü nüma ga yema churaragüerugü rü yemaacü nanaxügü.
25 Rü nüma ga Yochué rü ñanagürü nüxü̃ ga norü churaragüerugü: —¡Taxṹ i pemuü̃exü̃ rü peyarümaxãchitanüxü̃! ¡Rü pegü peporaexẽxẽ! Erü ngẽma ñu̱xma ñaa ãẽ̱xgacügümaxã pexü̃xü̃, rü ngẽma tátama nixĩ i guxü̃ma i togü i perü uanügümaxã naxüxü̃ ya Tupana —ñanagürü.
26 Rü yema ñaxguwena ga Yochué rü nanadai ga yema ãẽ̱xgacügü. Rü norü churaragüxü̃ namu nax wüxichigü naixtanüwa natuxẽẽgüaxü̃. Rü yéma nanayexmagüxẽxẽ ñu̱xmata nayáuane.
27 Rü yexguma marü üa̱xcü yarüxücuxgu rü nüma ga Yochué rü norü churaragüxü̃ namu nax nawãĩxü̃ãxü̃ca̱x ga yema ãẽ̱xgacügü. Rü yema nutaarü ãxmaxü̃ ga nagu yacu̱xgüxü̃gutama nayanucu ga naxü̃negü. Rü ñu̱xũchi tacü ga nutagümaxã nanangũxtagü ga yema ãxmaxü̃. Rü ñu̱xma rü ta yima nutagü ga yema ãxmaxü̃ namaxã rüngũxtacü rü nangẽxmagü.
Yochué rü naigü ga ĩanegü napuxü̃
28 Rü yematama ngunexü̃gu rü nüma ga Yochué rü norü churaragümaxã nayapu ga guma ĩane ga Machedá rü nagu napogüe rü guxü̃ma ga naãcu rü taramaxã nanadai. Rü yema Yericúarü ãẽ̱xgacüxü̃ yamáxü̃rüü̃ãcütama Machedáarü ãẽ̱xgacüxü̃ nima̱x.
29 Rü yéma inaxũãchi ga Yochué namaxã ga Iraétanüxü̃ rü ĩane ga Lixnáwa naxĩ rü naxca̱x ínayaxüãchi.
30 Rü nüma ga Cori ya Tupana rü Iraétanüxü̃me̱xẽgu nananguxẽxẽ ga guma ĩane namaxã ga norü ãẽ̱xgacü. Rü taxuxü̃ma ga ta̱xacü yéma nayaxüxẽẽgü rü taxúema texé tamaxü̃ ga naãcu. Rü yema Yericúarü ãẽ̱xgacüxü̃ yamáxü̃rüü̃ãcütama Lixnáarü ãẽ̱xgacüxü̃ nima̱x.
31 Rü yemawena nüma ga Yochué rü ga Iraétanüxü̃ rü inaxĩãchi ga Lixnáwa, rü Láquiarü ngaicamagu nayapexgü. Rü yéma naxca̱x ínayaxüãchi ga guma ĩane.
32 Rü moxü̃ãcü rü nüma ga Cori ya Tupana rü Iraétanüxü̃me̱xẽgu nananguxẽxẽ ga guma ĩane ga Láqui, rü guma ĩane ga Lixnárüü̃tama. Rü nüma ga Iraétanüxü̃ rü taramaxã nanadai ga guxü̃ma ga duü̃xü̃gü, rü naxü̃nagü ga yéma maxẽxü̃.
33 Rü nüma ga Oráü̃ ga Guéchearü ãẽ̱xgacü rü norü churaragümaxã ĩane ga Láquiétüwa nayuxu. Natürü nüma ga Yochué rü nüxü̃ narüporamae rü guxü̃xü̃ma nadaiama, rü bai ga wüxi ga maxü̃xü̃ ga íyaxüxü̃.
34 Rü yexguma Láquixü̃ nadaiãcuxguwena rü nüma ga Yochué rü ga Iraétanüxü̃ rü ĩane ga Egróü̃arü ngaicamagu nayapexgü rü yéma naxca̱x ínayaxüãchi.
35 Rü yematama ga ngunexü̃gu rü nayapugü rü taramaxã nanadaiãcu ga guma ĩane rü nagu napogüe, guma ĩane ga Láquimaxã naxügüxü̃rüü̃tama.
36 Rü guma ĩane ga Egróü̃wa inaxĩãchi rü ĩane ga Ebróü̃wa naxĩ rü naxca̱x ínayaxüãchi.
37 Rü yexguma marü yapugüãgu ga guma ĩane ga Ebróü̃ rü nagu napogüe rü taramaxã nayama̱xgü ga norü ãẽ̱xgacü. Rü taramaxã nanadai ga guxü̃ma ga duü̃xü̃gü rü naxü̃nagü ga yéma maxẽxü̃. Rü naigü ga ĩanegü ga norü ngaicamana yexmagüne rü nanadaiãcu yematama Egróü̃maxã naxügüxü̃rüxü̃.
38 10:38-39 Rü yéma inaxũãchi ga Yochué namaxã ga Iraétanüxü̃. Rü ĩane ga Debíxwa naxĩ rü naxca̱x ínayaxüãchi. Rü taramaxã nayama̱xgü ga norü ãẽ̱xgacü. Rü yexgumarüxü̃ ta nanadaiãcu ga guma ĩanexacügü ga Debíxna ngaicamagüne. Rü bai ga wüxi ga duü̃xü̃ ga guma ĩane ga Debíxcüã̱x ga maxü̃xü̃. Rü guxü̃ma nayue yematama Ebróü̃maxã, rü Lixnámaxã rü norü ãẽ̱xgacügümaxã naxügüxü̃rüxü̃.
39 Nüü̃ nadau 10:38
40 Rü Yochué rü norü churaragümaxã nanadaiãcu ga guxü̃ma ga yema ĩanegü ga yema naanewa yexmagüxü̃. Rü nüxü̃ narüporamae ga yema ãẽ̱xgacügü ga máxpü̱xanexü̃wa yexmagüxü̃, rü yema naxnücüane ga Néguewa yexmagüxü̃, rü yema ínadoxonexü̃wa yexmagüxü̃, rü yema ma̱xpǘnepechinü̃güwa yexmagüxü̃. Rü yemaacü nanadai ga guxü̃ma ga yema ãẽ̱xgacügü namaxã ga norü duü̃xü̃gü. Rü bai ga wüxi ga íyaxüxü̃ yema Cori ya Iraétanüxü̃arü Tupana namaxã nüxü̃ ixuxü̃rüxü̃.
41 10:41-42 Rü yemaacü wüxicana guxü̃ma ga yema ãẽ̱xgacügüxü̃ nadai rü nanapu ga guxü̃ma ga norü naanegü ga Cadé-banéawa inaxügü rü ñu̱xmata Gáchawa nangu, rü Gochéü̃wa inaxügü rü ñu̱xmata Gabaóü̃wa nangu. Yerü woetama Iraétanüxü̃étüwa naxü ga Tupana.
42 Nüü̃ nadau 10:41
43 Rü yemawena ga Yochué rü guxü̃ma ga Iraétanüxü̃arü churaragümaxã Guirigáca̱x nawoegu ga ínapegüxü̃wa.
