Josué 11:1-23
11 11:1-3 Rü yexguma Yabíü̃ ga Achóxarü ãẽ̱xgacü nüxü̃ cuáchigagu ga yema nüxü̃ ngupetüxü̃ ga yema ĩanegü ga daiãcuxü̃, rü norü orearü ngeruü̃güxü̃ namuãchitanü naxca̱x ga yema togü ga ãẽ̱xgacügü nax nügü nangü̃xẽẽgüxü̃ca̱x. Rü yema ãẽ̱xgacügü ga naxca̱x yéma namugaxü̃ rü ñaagü nixĩ: Ĩane ga Madóü̃arü ãẽ̱xgacü ga Yobáx, rü Chimróü̃arü ãẽ̱xgacü, rü Axcháarü ãẽ̱xgacü, rü guxü̃ma ga ãẽ̱xgacügü ga ínamáxpü̱xanexü̃wa yexmagüxü̃ ga nórtewaama, rü guxü̃ma ga ãẽ̱xgacügü ga natü ga Yudáü̃arü Dóxraanewa yexmagüxü̃ ga naxtaxa ga Quinérexarü súrwaama ügüxü̃, rü yema ãẽ̱xgacügü ga Dóxarü Dóxraanewa yexmagüxü̃ ga oéstewaama, rü yema Cananéugü ga éstewaama rü oéstewaama yexmagüxü̃, rü yema Amoréutanüxü̃, rü Itítagü, rü Ferechéugü, rü Yebuchéugü ga ma̱xpǘneanegu ãchiü̃güxü̃, rü Ebéugü ga ma̱xpǘne ga Ermóü̃gu ãchiü̃güxü̃ ga Mispáarü naanewa yexmagüxü̃.
2 Nüü̃ nadau 11:1
3 Nüü̃ nadau 11:1
4 Rü guxü̃ma ga yema ãẽ̱xgacügü rü inaxĩãchi namaxã ga norü churaragü, rü norü cowarugü, rü naweü̃gü ga daiwa namaxã naxĩxü̃ne. Rü yema churaragü rü namuxũchi ñoma naxnücüte̱xe i márcutüwa ngẽxmacürüxü̃.
5 Rü guxü̃ma ga yema ãẽ̱xgacügü rü natü ga Merúü̃cutügu nangutaque̱xegü. Rü yexma nayapexgü nax yéma Iraétanüxü̃ca̱x íyaxü̃ãchixü̃ca̱x.
6 Natürü nüma ga Cori ya Tupana rü ñanagürü Yochuéxü̃: —¡Taxṹ i nüxü̃ cumuü̃xü̃ erü choma rü tá cuxü̃ charüngü̃xẽxẽ! Erü moxü̃arü ngunexü̃ i ñaatama oragu rü cuxme̱xgu tá chanayixẽxẽ rü guxü̃xü̃táma cudai. ¡Rü ngẽma norü cowarugü rü inapoepara, rü yima naweü̃gü ya daiwa namaxã naxĩxü̃ne rü ínagu! —ñanagürü.
7 Rü yexguma nüma ga Yochué rü guxü̃ma ga norü churaragümaxã naxca̱x ínayaxüãchi. Rü ínayabaixgü rü natü ga Merúü̃cutügu namaxã nügü nadai.
8 Rü nüma ga Cori ya Tupana rü nanaporamaexẽxẽ ga Iraétanüxü̃. Rü yemaca̱x norü uanügüxü̃ nibuxmüxẽxẽ rü nawe nangẽgü ñu̱xmata guma ĩane ga taxü̃ne ga Chidóü̃wa rü Mirepóx-maíü̃wa nangugü rü ñu̱xmata Mispáarü éstewaama yexmaxü̃ ga doxonexü̃wa nangugü. Rü bai ga wüxi ga maxü̃xü̃ ga íyaxüxü̃, rü guxü̃xü̃ma nadai.
9 Rü nüma ga Yochué rü nayanguxẽxẽ ga yema Cori ya Tupana namaxã nüxü̃ ixuxü̃. Rü inanapoepara ga norü uanüarü cowarugü rü ínanagu ga naweü̃gü.
10 11:10-11 Rü yemawena rü nüma ga Yochué rü nataegu rü nanapu ga guma ĩane ga Achóx. Yerü guma ĩanewa nixĩ ga norü uanügü nügümaxã inaxügagüxü̃ nax nügü nangü̃xẽẽgüxü̃ca̱x nax Iraétanüxü̃maxã nügü nada̱i̱xü̃ca̱x. Rü nayama̱x ga norü ãẽ̱xgacü ga guma ĩane rü nanadai ga guxü̃ma ga duü̃xü̃gü ga nagu ãchiü̃güxü̃. Rü guma ĩane rü nagu napogüe rü nayagugü.
11 Nüü̃ nadau 11:10
12 Rü yemaacü nanadaiãcu ga guxü̃nema ga guma ĩanegü ga Iraétanüxü̃ca̱x nügü nutaque̱xegüne. Rü nanadai ga norü ãẽ̱xgacügü rü nagu napogüe ga norü ĩanegü, yerü yemaacü nixĩ ga Yochuéxü̃ namuxü̃ ga gumá Tupanaarü duü̃ ga Moiché.
13 Natürü nüma ga Iraétanüxü̃ rü tama ínanagu ga guma ĩanegü ga ma̱xpǘnewa yexmagüne. Natürü guma ĩane ga Achóxü̃xicatama nigugü.
14 Rü taramaxã nanadai ga guxü̃ma ga yema duü̃xü̃gü ga guma ĩanegügu ãchiü̃güxü̃ rü bai ga wüxi ga maxü̃xü̃. Rü yema naxü̃nagü rü ínanayauxü̃ rü guxü̃ma ga norü yemaxü̃gü rü nanade.
Nüma ga Yochué rü nayanguxẽxẽ ga yema Moiché namaxã nüxü̃ ixuxü̃
15 Rü nüma ga Cori ya Tupana rü Moichéxü̃ namu nax nadaiaxü̃ ga yema duü̃xü̃gü, rü nüma ga Moiché rü Yochuémaxã nüxü̃ nixu ga yema Tupanaarü mu. Rü nüma ga Yochué rü meama nayanguxẽxẽ ga guxü̃ma ga yema Tupana Moichémaxã nüxü̃ ixuxü̃.
16 Rü nüma ga Yochué rü nayapu ga guxü̃ma ga yema naane ga máxpü̱xanexü̃ rü guxü̃ma ga yema naane ga Négue, rü guxü̃ma ga yema naane ga Gochéü̃, rü yema naane ga natü ga Yudáü̃arü metachinüxü̃. Rü yemaacü nayapu ga guxü̃ma ga yema máxpü̱xanexü̃, rü yema doxonexü̃ nax Iraétanüxü̃arü yixĩxüca̱x.
17 11:17-18 Rü yema norü naane ga Iraétanüxü̃, rü inaxügü ga ma̱xpǘne ga Aráxwa rü ínadaãchi ga Cheíwaama rü ñu̱xmata Baá-gáxwa nangu ga Líbanuarü doxonexü̃wa ga ma̱xpǘne ga Ermóü̃pechinüwa. Rü mucü ga taunecü ningegü nax nügü nada̱i̱xü̃ namaxã ga yema ãẽ̱xgacügü ga yema naanewa yexmagüxü̃. Rü nüma ga Yochué rü düxwa nüxü̃ narüporamae rü ínanayauxü̃ rü nanadai ga guxü̃ma ga yema ãẽ̱xgacügü.
18 Nüü̃ nadau 11:17
19 Rü yema duü̃xü̃gü ga ĩane ga Gabaóü̃cüã̱x ga Ebéutanüxü̃xicatama nixĩ ga Iraétanüxü̃maxã nügümaxã namexẽẽgüxü̃ nax tama nügü nada̱i̱xü̃ca̱x. Rü nüma ga Iraétanüxü̃ rü daiwa guxü̃ma ga yema togü ga duü̃xü̃güxü̃ narüporamae.
20 Rü nüma ga Cori ya Tupana rü nananuexẽxẽ ga yema uanügü nax Iraétanüxü̃maxã nügü nada̱i̱xü̃ca̱x. Rü yemaca̱x Iraétanüxü̃axü̃́ nanatauxchaxẽxẽ nax nadaiaxü̃ca̱x ga guxü̃ma ga yema duü̃xü̃gü rü taxuxü̃ma nüxü̃́ ngechaxü̃tümüxü̃güxü̃ yerü yemaacü nixĩ ga Cori ya Tupana ga Moichémaxã nüxü̃ yaxuxü̃.
21 Rü yexguma nixĩ ga Yochué ga nadaiãcuãxü̃ ga norü ĩanegü ga Anátanüxü̃ ga ma̱xpǘne ga Ebróü̃gu ãchiü̃güxü̃ rü Debíxgu rü Anáxgu ãchiü̃güxü̃, rü guxü̃nema ga guma ma̱xpǘnegü ga Yudáanewa yexmagünegu, rü Iraéanewa yexmagünegu ãchiü̃güxü̃.
22 Rü yemaacü bai ga wüxi ga Anátanüxü̃ ga íyaxüxü̃ ga Iraétanüxü̃arü naanewa. Rü Gáchaarü naanewa, rü Gáxarü naanewa rü Adúxarü naanewaxicatama nixĩ ga íyaxüxü̃ ga Anátanüxü̃.
23 Rü yemaacü nixĩ ga Yochué ga napuxü̃ãxü̃ ga yema naanegü yema Cori ya Tupana Moichémaxã nüxü̃ ixuxü̃rüxü̃. Rü ñu̱xũchi yema Iraétücumügüxü̃ nayanu ga yema naane nax wüxitücumüchigü nüxü̃́ yexmaxü̃ca̱x ga noxrütama naane. Rü yemawena rü marü nataxuma ga dai ga yema naanewa.
