Josué 12:1-24
12 Rü nüma ga Iraétanüxü̃ rü taxre ga ãẽ̱xgacügüxü̃ narüporamae ga natü ga Yudáü̃arü éstewaama. Rü ñaagü nixĩ ga norü naane ga napugüxü̃: Rü natü ga Arnóü̃wa inaxügü ñu̱xmata ma̱xpǘne ga Ermóü̃wa nangu. Rü namaxã nanangauxẽxẽ ga yema naane ga Yudáü̃arü doxonexü̃ ga éstewaama yexmaxü̃.
2 12:2-3 Rü nüma ga Chióü̃ rü Amoréutanüxü̃arü ãẽ̱xgacü nixĩ rü Ebóü̃gu naxãchiü̃. Rü norü naane ga namaxã inacuáxü̃ rü Aroéwa inaxügü ñu̱xmata natü ga Arnóü̃cutüwa nangu. Rü yema natüarü doxonexü̃arü ngãxü̃wa inaxügü ñu̱xmata yema natü ga Yabóxcutüwa nangu. Rü yema nixĩ ga inaxügüxü̃ ga norü üyeane ga yema Amóü̃tanüxü̃. Rü yema naane ga namaxã inacuáxü̃ rü Garaáxarü naanearü ngãxü̃wa nangu. Rü yexgumarüxü̃ ta namaxã inacua̱x ga Yudáü̃arü doxonexü̃ ga éstewaama yexmaxü̃. Yema rü inaxügü ga nataxa ga Quinérexwa ñu̱xmata Már ya Ngearü Maxü̃ã́xü̃wa nangu ga Bex-yechimóxwaama, rü súrwaama nadaxüchi ñu̱xmata ma̱xpǘne ga Pichápechinüwa nangu.
3 Nüü̃ nadau 12:2
4 Rü yema to ga ãẽ̱xgacü rü Óx ga Bacháü̃arü ãẽ̱xgacü nixĩ rü nüxicatama nixĩ ga Refátanüxü̃wa íyaxüxü̃. Nüma rü namaxã inacua̱x ga ĩane ga Atarú rü Edréi.
5 Rü yema naane ga namaxã inacuáxü̃ ga Óx rü inaxügü ga ma̱xpǘne ga Ermóü̃wa rü Chacáwa, rü guxü̃ma ga Bacháü̃arü naanewa nada ñu̱xmata nawa nangu ga üyeane ga Guechúx rü Maacá. Rü yéma rü nadapetü ñu̱xmata Garaáxarü naanearü ngãxü̃wa nangu ga ngextá iyacuáxü̃wa ga yema naane ga gumá Ebóü̃arü ãẽ̱xgacü ga Chióü̃ namaxã icuáxü̃.
6 Rü nüma ga Moiché rü namaxã ga Iraétanüxü̃ rü yema taxre ga ãẽ̱xgacügüxü̃ narüporamae rü nanadai. Rü nüma ga Moiché rü yema naane rü Rubéü̃tanüxü̃na nanaxã, rü Gáxtanüxü̃na nanaxã, rü ngãxü̃tücumü ga Manachétanüxü̃na rü ta nanaxã.
Ãẽ̱xgacügü ga Yochué nüxü̃ rüporamaexü̃
7 Rü nüma ga Yochué namaxã ga yema Iraétanüxü̃ rü nanadai ga guxü̃ma ga yema ãẽ̱xgacügü ga Yudáü̃arü oéstewaama yexmagüxü̃. Rü ĩane ga Baá-gáxwa ga Líbanuarü doxonexü̃wa inaxügü rü guxü̃xü̃ma nadai ñu̱xmata guma ma̱xpǘne ga Aráxwa nangugü nax nadaiaxü̃. Rü guma ma̱xpǘne rü Cheíanearü ügüwa nayexma. Rü yema ãẽ̱xgacügü ga nada̱i̱xü̃arü naane nixĩ ga Yochué rü wüxichigü ga Iraétücumügüxü̃ yanuxü̃ nax noxrü yaxĩgüxü̃ca̱x.
8 Rü yema naane ga napuxü̃xü̃ rü ma̱xpǘxanexü̃ nixĩ, rü yema ma̱xpǘnegüarü doxonexü̃ nixĩ, rü natü ga Yudáü̃arü metachinüanexü̃ nixĩ, rü ma̱xpǘanepechinügü nixĩ, rü yema naxnücüanexü̃ ga súrwaama üxü̃ nixĩ, rü yema Négue nixĩ. Rü yema naanegü rü noxri rü Itítanüxü̃güarü, rü Amoréutanüxü̃güarü, rü Cananéugüarü, rü Ferechéugüarü, rü Ebéugüarü, rü Yebuchéugüarüchire̱x nixĩgü.
9 Rü yema ãẽ̱xgacügü ga Yochué rü Iraétanüxü̃ daixü̃ rü ñaagü nixĩ:
10 Ĩane ga Yericúarü ãẽ̱xgacü, rü Beténa ngaicamane ga ĩane ga Áiarü ãẽ̱xgacü, rü ĩane ga Yerucharéü̃arü ãẽ̱xgacü, rü ĩane ga Ebróü̃arü ãẽ̱xgacü, rü ĩane ga Yamúxarü
11 ãẽ̱xgacü, rü Láquiarü ãẽ̱xgacü, rü
12 Egróü̃arü ãẽ̱xgacü, rü Guéchearü ãẽ̱xgacü, rü
13 Debíxarü ãẽ̱xgacü, rü Yédexarü ãẽ̱xgacü, rü
14 Ormáarü ãẽ̱xgacü, rü Aráxarü ãẽ̱xgacü, rü
15 Lixnáarü ãẽ̱xgacü, rü Aduráü̃arü ãẽ̱xgacü, rü
16 Machedáarü ãẽ̱xgacü, rü Betéarü ãẽ̱xgacü, rü
17 Tapúaarü ãẽ̱xgacü, rü Éfearü ãẽ̱xgacü, rü
18 Aféxarü ãẽ̱xgacü, rü Charóü̃arü ãẽ̱xgacü, rü
19 Madóü̃arü ãẽ̱xgacü, rü Achóxarü ãẽ̱xgacü, rü
20 Chimróü̃-meróü̃arü ãẽ̱xgacü, rü Axcháarü ãẽ̱xgacü, rü
21 Taanáxarü ãẽ̱xgacü, rü Meguíduarü ãẽ̱xgacü, rü
22 Quédexarü ãẽ̱xgacü, rü ĩane ga Yoxneáü̃ ga Carméruarü ma̱xpǘnewa yexmanearü ãẽ̱xgacü, rü
23 ĩane ga Dóx ga Nafóx Dóxanewa yexmanearü ãẽ̱xgacü, rü ĩane ga Goíü̃ ga Guirigáanewa yexmaxnearü ãẽ̱xgacü, rü ĩane ga Tircháarü
24 ãẽ̱xgacü. Rü yema ãẽ̱xgacügü rü guxü̃wama 31 nixĩ.
