Josué 13:1-33
13 Rü yexguma marü naya̱xgu ga Yochué rü Cori ya Tupana rü ñanagürü nüxü̃: —Cuma rü marü cuya rü muxü̃ma i naane ínayaxügüama nax penapuxü̃xü̃ca̱x.
2 13:2-3 Rü guxü̃ma i ngẽma naane i Firitéugüarü rü ínayaxü, rü ngẽxgumarüxü̃ ta i ngẽma naane i Guechuréugüarü rü ínayaxü. Rü ngẽma naane rü natü i Chióü̃wa inaxügü i Equítuanearü éstewaama, rü nida ñu̱xmata Ecróü̃arü üyeanewa nangu i nórtewaama. Rü ngẽma naane rü Cananéugüarü nixĩ rü nawa nangẽxmagü i 5 i ãẽ̱xgacügü i Firitéugü. Rü norü ĩanegü rü daagü nixĩ: Gácha, rü Adúx, rü Acharóü̃, rü Gáx, rü Ecróü̃. Rü ngẽxgumarüxü̃ ta ínayaxü i ngẽma naane i Abéugü nawa ngẽxmagüxü̃.
3 Nüü̃ nadau 13:2
4 Rü súrwaama nangẽxma ta i Cananéugüarü naane i íyaxüxü̃ nax penapuxü̃xü̃ca̱x. Rü Chidóü̃tanüxü̃arü ĩane ga Mexárawa inaxügü rü nida ñu̱xmata Aféxwa nangu i Amoréutanüxü̃arü üyeanewa.
5 Rü ngẽxgumarüxü̃ ta ínayaxü i Guebácüã̱xgüarü naane rü guxü̃ma i Líbanuarü naane i éstewaama. Rü ngẽma naane rü yima ma̱xpǘne ya Ermóü̃pechinüwa ngẽxmane i Baá-gáxwa inaxügü, rü nida ñu̱xmata ĩane i Amáca̱x íxücuxü̃wa nangu.
6 Rü Iraétanüxü̃pe̱xewa tá íchanawoxü̃ i Chidóü̃cüã̱xgü rü guxü̃ma i ngẽma duü̃xü̃gü i ngẽma máxpü̱xanexü̃gu ãchiü̃güxü̃. Rü Líbanuwa tá ichanaxügü nax íchanawoxü̃xü̃ ñu̱xmatáta Mirepóx-maíü̃wa nangu. Natürü i cuma rü tá ngẽma Iraétanüxü̃xü̃ cuyanu i ngẽma naane yema cumaxã nüxü̃ chixuxü̃ãcü.
7 ¡Rü yanu i ngẽma naane nüxü̃ i ngẽma 9 tücumü i Iraétanüxü̃, rü ñu̱xũchi ngẽma ngãxü̃tücumü i Manachétanüxü̃! —ñanagürü ga Tupana.
Naanegü ga Manachéarü, rü Rubéü̃arü rü Gáxarü
8 Rü yexguma Moiché namaxã nuegu ga yema naane ga Yudáü̃arü éstewaama yexmaxü̃ rü Rubéü̃arü duü̃xü̃gü rü Gáxarü duü̃xü̃gü, rü ngãxü̃tücumü ga Manachéarü duü̃xü̃gü rü marü nanayauxgü ga norü naane ga nüxna ixüchigüxü̃.
9 13:9-10 Rü yema naane ga nüxna üxü̃ rü inaxügü nawa ga guma ĩane ga Aroé ga natü ga Arnóü̃cutüwa yexmane. Rü namaxã nangau ga guma ĩane ga yema doxonexü̃arü ngãxü̃wa yexmane. Rü ma̱xpǘne ga Medebáarü metachinüxü̃wa nada ga yema naane ñu̱xmata ĩane ga Dibóü̃wa nangu. Rü namaxã nanangau ga guxü̃nema ga norü ĩanegü ga Chióü̃ ga Amoréutanüxü̃arü ãẽ̱xgacü ga Ebóü̃gu ãchiü̃cü. Rü yemaacü ga yema naane ga Iraétanüxü̃na üxü̃ rü Amóü̃tanüxü̃arü üyeanewa nangu.
10 Nüü̃ nadau 13:9
11 13:11-12 Rü nanayauxgü ta ga Garaáxane, rü Guechuréuane, rü Maacáane, rü naétü ga guma ma̱xpǘne ga Ermóü̃, rü guxü̃ma ga Bacháü̃ane ñu̱xmata Chacáwa nangu. Rü namaxã nangau ga yema naanegü ga Bacháü̃anearü ãẽ̱xgacü ga Óx namaxã icuáxü̃. Rü nüma ga Óx rü Atarúwa rü Edréiwa ãẽ̱xgacü nixĩ. Rü yexguma Moiché yema Refátanüxü̃xü̃ rüporamaegu rü ínawoxü̃ãgu ga yema naanewa rü nüma ga Óx nixĩ ga Refátanüxü̃ ga nawa iyacuáxü̃.
12 Nüü̃ nadau 13:11
13 Natürü yema Guechúxanecüã̱xgü rü Maacáanecüã̱xgü rü tama ínawoxü̃ nawa ga yema naane, rü Iraétanüwatama namaxẽ. Rü ñu̱xma rü ta Iraétanüwatama nangẽxmagü.
14 Rü yema Lebítanüxü̃, rü nüma ga Moiché rü taxuxü̃ma ga naane nüxna naxã, yerü nüxna naxü ga yema ãmaregü ga Iraétanüxü̃ Tupanaca̱x íguxü̃. Yerü yemaacü nixĩ ga Tupana namaxã naxueguxü̃.
15 Rü nüma ga Moiché rü Rubéü̃tücumüxü̃ nayanu ga norü naane nae̱xpü̱x nax ñuxre yixĩxü̃ ga norü mu.
16 13:16-17 Rü yema norü naane rü inaxügü nawa ga guma ĩane ga Aroé ga natü ga Arnóü̃cutüwa yexmane. Rü namaxã nanangauxẽxẽ ga guma ĩane ga yema doxonexü̃arü ngãxü̃wa yexmane. Rü yema naane rü nawa nada ga yema doxonexü̃ ga ĩane ga Medebá nawa yexmaxü̃ ñu̱xmata ĩane ga Ebóü̃wa nangu. Rü namaxã nanangauxẽxẽ ga guxü̃nema ga guma ĩanegü ga yema doxonexü̃wa yexmagüne ga Dibóü̃, rü Bamóx-baá, rü Bex-baá-meóü̃,
17 Nüü̃ nadau 13:16
18 13:18-19 rü Yaácha, rü Caremóx, rü Mepáax, rü Quiriaxtaíü̃, rü Chibá, rü Chérex-cháax ga yema doxonexü̃arü ma̱xpǘnewa yexmagüne,
19 Nüü̃ nadau 13:18
20 13:20-21 rü Bex-peúx, rü Bex-yechimóx, rü yema naanegü ga ma̱xpǘne ga Pichápechinüwa yexmagüne, rü guma ĩanegü ga yema doxonexü̃wa yexmagüne, rü guxü̃ma ga yema naanegü ga Amoréugüarü ãẽ̱xgacü ga Chióü̃ ga Ebóü̃cüã̱x namaxã icuáxü̃. Rü nüma ga Moiché rü Chióü̃xü̃ rü Madiáü̃güarü ãẽ̱xgacügüxü̃ narüporamae. Rü yemagü rü Éwi, rü Requéü̃, rü Chú, rü Úru, rü Réba nixĩgü.
21 Nüü̃ nadau 13:20
22 Rü nüma ga Iraétanüxü̃ rü nayama̱xgü ta ga gumá Balaáü̃ ga Beúx nane ga nüxü̃ cuáxcü ga yema tá ngupetüxü̃. Rü nanadai ga muxü̃ma ga togü.
23 Rü yema naane ga Rubéü̃tücumüna naxãxü̃ rü Rubéü̃tanüxü̃xü̃ nayanu nae̱xpü̱x ga ñuxre yixĩxü̃ ga norü mu. Rü yexgumarüxü̃ ta nüxü̃ nayanu ga guxü̃nema ga guma ĩanegü ga itaxü̃ne rü ĩanexacügü ñu̱xmata natü ga Yudáü̃wa nangu.
24 Rü nüma ga Moiché rü yexgumarüxü̃ ta Gáxtücumüxü̃ nayanu ga norü naane nae̱xpü̱x nax ñuxre yixĩxü̃ ga norü mu ga natanüxü̃ ga Gáx.
25 13:25-26 Rü yema naane ga Gáxarü duü̃xü̃güna üxü̃ rü Yachéxwa inaxügü, rü namaxã nanangauxẽxẽ ga guxü̃nema ga ĩanegü ga Garaáxanewa yexmagüne. Rü naétü nüxna nanaxã ga ngãxü̃gu ga Amóü̃tanüxü̃arü naane rü ñu̱xmata nawa nangu ga guma ĩane ga Aroé ga Rabáarü to̱xma̱xtawa yexmane. Rü naétü nüxna nanaxã ga yema naane ga Ebóü̃, rü Ramáx-mispé, rü Betoníü̃arü ngãxü̃wa yexmaxü̃. Rü yexgumarüxü̃ ta nüxna nanaxã ga yema naane ga Maanaíü̃ rü Debíxwa yexmaxü̃ ga üyeanearü ngãxü̃wa.
26 Nüü̃ nadau 13:25
27 Rü yema ínadoxonexü̃wa rü nüxna naxü ta ga ĩanegü ga Bex-aráü̃, rü Bex-nimrá, rü Chucóx, rü Chafóü̃. Rü yexgumarüxü̃ ta nüxna nanaxã ga yema naane ga íyaxüxü̃ ga yexguma yamáagu ga Chióü̃ ga Ebóü̃arü ãẽ̱xgacü. Rü yemaacü ga yema Gáxarü naane rü Yudáü̃arü éstewaama nayexma ñu̱xmata naxtaxa ga Quinérexarü súrwa nangu.
28 Rü gumagü nixĩ ga ĩanegü ga itaxü̃ne rü ixíxrane ga nüxna üxü̃ne ga Gáxtücumü nae̱xpü̱x nax ñuxre yixĩxü̃ ga norü mu ga natanüxü̃ ga Gáx.
29 Rü nüma ga Moiché rü yexgumarüxü̃ ta yema ngãxü̃ ga Manachétücumügü rü nüxü̃ nayanu ga norü naane nae̱xpü̱x ga ñuxre nax yixĩxü̃ ga norü mu ga natanüxü̃ ga Manaché.
30 13:30-31 Rü yema naane ga nüxna üxü̃ ga yema ngãxü̃ ga Manachétücumü, rü yema nixĩ ga naane ga ü̃pa Bacháü̃arü ãẽ̱xgacü ga Óxarü ixĩxü̃. Rü yema nixĩ ga guxü̃ma ga Bacháü̃ane ga Maanaíü̃wa ixügüxü̃. Rü namaxã nanangauxẽxẽ ga guma 60 ga ĩanegü ga Yaíxme̱xẽwa yexmagüne, rü ngãxü̃ ga Garaáxane rü ñu̱xũchi guma ĩanegü ga Atarú rü Edréi. Rü guxü̃ma ga yema naanegü rü yema ngãxü̃tücumü ga Manaché nane ga Maquítaagüna nanaxã. Rü Moiché nüxü̃ nayanu nae̱xpü̱x ga ñuxre nax yixĩxü̃ ga natanüxü̃arü mu ga Maquí.
31 Nüü̃ nadau 13:30
32 Rü yemaacü nixĩ ga Moiché ga iyanuãxü̃ ga Moáarü naane ga natü ga Yudáü̃arü éstewaama yexmaxü̃ ga Yericúarü to̱xma̱xtawa.
33 Natürü yema Lebítücumü rü taxuxü̃ma ga naane nüxna naxã, rü ñanagürümare nüxü̃: —Yimá Cori ya Iraétanüxü̃arü Tupana, rü yimá nixĩ ya perü ngü̃xẽẽruxü̃ ixĩcü —ñanagürü nüxü̃.
