Josué 14:1-15
14 Rü nüma ga Yochué rü gumá chacherdóte ga Ereachá, rü ñu̱xũchi yema Iraétanüxü̃arü ãẽ̱xgacügü nixĩ ga nüxü̃ yanuxü̃ ga yema Canaáü̃arü naane.
2 Rü yema naane rü sortéuãcü nixĩ ga nüxü̃ yanuaxü̃ ga yema 9 tücumü ga Iraétanüxü̃ rü yema ngãxü̃tücumü ga Manachétanüxü̃, yerü yemaacü nixĩ ga Cori ya Tupana ga Moichémaxã nüxü̃ yaxuxü̃.
3 Natürü nüma ga Moiché rü natü ga Yudáü̃arü tocutüwa rü marü ü̃pa nüxíra nüxü̃ nayanu ga norü naane ga Rubéü̃tücumü rü Gáxtücumü rü ngãxü̃tücumü ga Manachétanüxü̃. Natürü ga Lebítanüxü̃ rü taxuxü̃ma ga naane nüxna naxã.
4 Rü yema Yúchetaagü rü taxretücumü nixĩ, rü yema nixĩ ga Manachétanüxü̃ rü Efraíü̃tanüxü̃. Natürü ga Lebítanüxü̃ rü taxuxü̃ma ga naane nüxna naxã. Rü ĩanegüxica nüxna naxãgü nax nawa namaxẽxü̃ca̱x. Rü guma ĩanegü rü nüxü̃́ nayexmagü ga norü naanegü nax nawa nayaexẽẽãxü̃ca̱x ga norü wocagü rü carnérugü.
5 Rü yemaacü nixĩ ga Yochué iyanuãxü̃ ga yema naane nüxü̃ ga Iraétanüxü̃. Yerü yemaacü nixĩ ga Cori ya Tupana ga Moichémaxã nüxü̃ yaxuxü̃.
Caréxtanüxü̃na üxü̃ ga naane
6 Rü yema Iraétanüxü̃ ga Yudátanüxü̃wa ügüxü̃ rü Guirigáwa naxĩ nax Yochuémaxã yanadexagüxü̃ca̱x. Rü nüma ga Caréx ga Quenétanüwa ücü ga Yeponé nane, rü Yochuéxü̃ ñanagürü: —¡Nüxna nacua̱xãchi ga yema ore ga Cori ya Tupana norü duü̃ ga Moichémaxã nüxü̃ ixuxü̃ ga tachiga ga chianexü̃ ga Cadé-banéawa!
7 Rü choma rü 40 ga taunecü choxü̃́ nayexma ga yexguma Moiché Cadé-banéawa choxü̃ imuãchigu nax chayangugüxü̃ca̱x ga ñoma Canaáü̃ane. Rü yexguma chataegugu rü meama namaxã nüxü̃ chixu rü name nax ngẽma naanegu ichocuxü̃.
8 Natürü ga yema togü ga chomücügü rü nüxü̃ nixu nax naxãũcümaxü̃, rü yemaacü duü̃xü̃güxü̃ namuü̃exẽxẽ, rü yemaca̱x ínayaxoetanüãchi ga nagu nax nachocuxü̃ ga ñaa naane. Natürü ga choma rü tama nüxü̃ icharüngüma ga Tupanaarü uneta rü nagu charüxĩnüecha.
9 Rü yexguma ga nüma ga Moiché rü meama chomaxã naxüga rü ñanagürü choxü̃: “Ngẽma naane ga nawa cunguxü̃ rü cuxrütátama nixĩ rü cutaagüarü tá nixĩ, erü aixcüma naga cuxĩnü ya tórü Cori ya Tupana”, ñanagürü.
10 Rü ñu̱xma rü marü 45 ga taunecü nangupetü nax Cori ya Tupana rü Moichémaxã nüxü̃ yaxuxü̃ ga yema ore ga yexguma Iraétanüxü̃ ínachianexü̃wa iyexmagügu. Rü yema chomaxã inaxunetaxü̃ca̱x rü ñu̱xma rü ta chamaxü̃ woo 85 ya taunecü choxü̃́ ngẽxmaxü̃.
11 Rü ñu̱xma rü ta chapora yexguma Moiché ñaa naanearü ngugüwa choxü̃ muxü̃rüü̃tama, rü yexgumarüü̃tama choxü̃́ natauxcha i ñu̱xma nax ichaxũãchixü̃ nax daiwa chaxũxü̃.
12 Rü ngẽmaca̱x i ñu̱xmax rü cuxna naxca̱x chaca nax choxna cunaxãxü̃ca̱x i ngẽma naane i ma̱xpǘneã́xü̃ ga nümatama ga Cori ya Tupana chomaxã namaxã ixunetaxü̃ nax choxna naxããxü̃ca̱x. Rü cumax, Pa Yochuéx, rü meama nüxü̃ cucua̱x nax ñu̱xma rü ta nangẽxmagüxü̃ i ngẽma nataagü ga gumá Anáx ga taxüchicü rü máchanexü̃chicütanüxü̃. Rü ngẽma norü ĩanegü rü nita rü meama ínapoxegugü. Natürü i chomax rü nüxü̃ chacua̱x nax Cori ya Tupana rü tá choxü̃ nangü̃xẽẽxü̃ nax ngéma ínawoxü̃ãxü̃ca̱x, yema chomaxã nüxü̃ yaxuxü̃rüü̃tama —ñanagürü ga Caréx.
13 Rü yexguma ga nüma ga Yochué rü Tupanaégagu mexü̃ Caréxmaxã naxuegu. Rü nüxna nanaxã ga Ebróü̃arü naane nax noxrü yixĩxü̃ca̱x rü nataagüarü yixĩxü̃ca̱x.
14 Rü yemaacü nixĩ ga Ebróü̃arü naane ga Caréxarü yixĩxü̃, rü ñu̱xma rü ta rü nataagüarü yixĩxü̃. Yerü nüma ga Caréx rü aixcüma Cori ya Iraétanüxü̃arü Tupanaga naxĩnü.
15 Rü yema nüxíraxü̃xü̃ ga naéga ga guma ma̱xpǘne ga Ebróü̃ rü Quiriáx-abá nixĩ; yerü nüma ga Abá rü Anáxtanüxü̃tanüwa itaégacüüxü̃ nixĩ. Rü yemawena rü marü tama nügü nadai ga yema naanewa.
