Josué 18:1-28
18 Rü yexguma Iraétanüxü̃ namaxã icua̱xgügu ga yema naane rü guxü̃ma ga nümagü ga Iraétanüxü̃ rü Chilógu nangutaque̱xe nax yexma inachitaü̃güxẽẽxü̃ca̱x ga Tupanapata.
2 Natürü nayexmaama ga 7 tücumü ga Iraétanüxü̃ ga taxũta norü naane yauxgüxü̃.
3 Rü yexguma ga Yochué rü yema Iraétanüxü̃xü̃ ñanagürü: —¿Ta̱xacü nixĩ i ípenanguxẽxẽxü̃ rü tama marü nagu pechocuxü̃ i ngẽma naane ga Cori ya perü o̱xigüarü Tupana pexna ãxü̃?
4 Rü ñu̱xma rü chanaxwa̱xe i wüxitücumüwachigü nüxü̃ pexuneta i tomaepü̱x i yatü nax choma chanamuãchitanüxü̃ca̱x nax yangugügüãxü̃ca̱x i ngẽma naane i tauxta inuxü̃. Rü ngẽxguma nawoegu̱xgu rü chanaxwa̱xe i chomaxã nüxü̃ nixugüe i ngẽma naanechiga nax ngẽmaãcü nüxü̃ chacuáxü̃ca̱x nax ñuxãcü tá ichayanuxü̃ i ngẽma naane.
5 Rü ngẽma yatügü rü chanaxwa̱xe i 7 gu nax yayauxyegüãxü̃ i ngẽma naane. Natürü taxũtáma namaxã nanangauxẽẽgü i ngẽma Yudátanüxü̃arü naane i súrwaama ngẽxmaxü̃ rü ngẽma Yúchetaagüarü naane i nórtewaama ngẽxmaxü̃.
6 Rü ngẽxguma marü 7 gu yayauxyegüãgu i ngẽma naane rü chanaxwa̱xe i chauxü̃tawa nanangegü i ngẽma 7 i naanegüchiga. Rü choma rü tá Tupanape̱xewa sortéuãcü ichayanu i ngẽma naane.
7 Natürü ngẽma Lebítanüxü̃ rü taxuxü̃táma naane nayauxgü, erü nümagü rü Tupana nayadexechi nax norü chacherdótegü yixĩgüxü̃ca̱x. Rü ngẽma Gáxarü duü̃xü̃gü, rü Rubéü̃arü duü̃xü̃gü, rü ngãxü̃tücumü i Manachéarü duü̃xü̃gü rü marü nanayauxgü i norü naane i natü i Yudáü̃arü éstewaama. Rü yema nixĩ ga naane ga Moiché ga Tupanaarü duü̃ nüxna ãxü̃ —ñanagürü.
8 Rü nüma ga yema yatügü ga nüxü̃ naxunetagüxü̃ nax ngugütaewa tá naxĩxü̃ rü marü nügü ínamexẽẽgü nax naxĩãchixü̃ca̱x. Rü nüma ga Yochué rü ñanagürü nüxü̃: —¡Nawa pexĩ i ngẽma naane rü meama peyayauxyeanechigü! ¡Rü pewoegu ega marü pexü̃́ nagu̱xgu nax peyayauxyeanexü̃! Rü nua Chilówa rü Cori ya Tupanape̱xewa tá sortéuãcü ichayanu i ngẽma naane —ñanagürü.
9 Rü nüma ga yema yatügü rü inaxĩãchi rü nawa naxĩ ga guxü̃ma ga yema naane. Rü yema Yochué namaxã nüxü̃ ixuxü̃rüxü̃ rü 7 gu nayayauxyegü ga yema naane, rü ñu̱xũchi poperagu nanaxümatügü. Rü yexgumarüxü̃ ta nanaxümatügü ga naégagü ga guma ĩanegü ga wüxichigü ga yema 7 ga naanewa yexmagüne. Rü yemawena rü Chilóca̱x nawoegu ga Yochué íyexmaxü̃wa.
10 Rü nüma ga Yochué rü yexguma Chilówa Tupanape̱xewa sortéuãcü inayanu ga yema naane nüxü̃ ga yema Iraétücumügü.
Bẽyamíü̃tanüxü̃na üxü̃ ga naane Yudáü̃
11 Rü yexguma sortéu naxü̱xgu rü Bẽyamíü̃tücumüna naxǘ ga naane ga Yudátanüxü̃ane rü Yúchetanüxü̃anearü ngãxü̃wa üxü̃.
12 Rü norü üyeane ga yema naane rü nórtewaama inaxügü ga natü ga Yudáü̃wa. Rü Yericúarü nórtewaama nada rü ínamáxpü̱xanexü̃gu nida ga oéstewaama. Rü naxnücüanexü̃ ga Bex-abéü̃wa nangu.
13 Rü yéma rü inida rü ĩane ga Lúxarü súrwaama nadapetü. (Rü guma ĩane rü Beté nixĩ ga to ga naéga.) Rü yéma rü narüdae, rü ñu̱xmata Atarú-adáxwa nangu. Rü yéma narüdae ñu̱xmata nawa nangu ga guma ma̱xpǘne ga ĩane ga Bex-oróü̃arü súrwaama yexmane. Rü guma ĩane ga Bex-oróü̃ rü guma ma̱xpǘnepechinüwa nayexma.
14 Rü yéma rü guma ma̱xpǘnecüwaarü oéstegu ínadaegu. Rü súrwaama nada ñu̱xmata Quiriáx-baá ga to ga naéga nixĩ ga Quiriáx-yearíü̃wa nangu. Rü guma ĩane rü Yudátücumüna naxǘ. Rü yema nixĩ ga norü üyeane ga oéstecüwawaama.
15 Rü yema norü üyeane ga súrwaama üxü̃ rü Quiriáx-yearíü̃wa inaxügü rü oéstewaama nada ñu̱xmata natüxacü ga Netóawa nangu.
16 Rü yéma rü narüdae rü ñu̱xmata guma ma̱xpǘnearü tuãchixü̃wa nangu ga doxonexü̃ ga Ben-inóü̃arü to̱xma̱xtawa.* Rü yéma narüdae ga yema üyeane ñu̱xmata Inóü̃arü doxonexü̃wa nangu. Rü Yebúarü tuãchixü̃arü súrwa nadapetü ñu̱xmata natüacü ga En-roguéxwa nangu.
17 Rü yéma rü nórtewaama nadaxüchi rü En-cheméwa nangu. Rü yéma rü nida ñu̱xmata Yerirúxwa nangu. Rü yema Yeriróx rü Adumíü̃arü tuãchianexü̃arü to̱xma̱xtawa nayexma. Rü yéma narüdae ñu̱xmata gumá nuta ga tacü ga Rubéü̃ nane ga Boáü̃gu ãégacüwa nangu.
18 Rü yéma rü nadapetü rü yema tuãchixü̃arü nórtecüwawaama nada. Rü yema tuãchixü̃ rü natü ga Yudáü̃arü doxonexü̃arü to̱xma̱xtawa nayexma. Rü yéma narüdae rü ñu̱xmata natü ga Yudáü̃wa nangu.
19 Rü Bex-oráarü nórtewaama nadapetü, rü Már i Ngearü Maxü̃ã́xü̃arü nórtewa yexmaxü̃ ga axcuchixü̃gu nayagu̱x. Rü ngéma nixĩ i iyanagoxchineexü̃ i ngẽma natü ga Yudáü̃. Yema nixĩ ga norü üyeane ga súrwaama üxü̃.
20 Rü natü ga Yudáü̃ nixĩ ga norü üyeane ga éstewaama. Rü yemagü nixĩ ga norü üyeanegü ga yema naane ga Bẽyamíü̃tanüxü̃na naxãxü̃.
21 18:21-24 Rü guma ĩanegü ga Bẽyamíü̃tanüxü̃na ügüne rü daagü nixĩ: Yericú, Bex-orá, rü Eme-quéchi, rü Bex-arabá, rü Chemaraíü̃, rü Beté, rü Abíü̃, rü Pará, rü Ofá, rü Quéfa-aamuní, rü Oxní, rü Guéba. Rü guxü̃wama rü 12 ga ĩanegü nixĩ rü naétü ga norü ĩanexacügü.
22 Nüü̃ nadau 18:21
23 Nüü̃ nadau 18:21
24 Nüü̃ nadau 18:21
25 18:25-28 Rü naétü nüxna naxǘ ga daa ĩanegü: Gabaóü̃, rü Ramá, rü Beerúx, rü Mispá, rü Quefirá rü Mochá, rü Requéü̃, rü Ipeé, rü Tarará, rü Cherá, rü Érex, rü Yebú (Rü to ga naéga rü Yerucharéü̃ nixĩ), rü Guibeá, rü Quiriáx. Rü guxü̃wama rü 14 ga ĩanegü nixĩ rü naétü ga norü ĩanexacügü. Rü yema nixĩ ga yema naane ga Bẽyamíü̃tücumüna üxü̃ naxẽ̱xpü̱x nax ñuxre yixĩxü̃ ga natanüxü̃.
26 Nüü̃ nadau 18:25
27 Nüü̃ nadau 18:25
28 Nüü̃ nadau 18:25
Notas
^ 18:16 Rü yema doxonexü̃ rü Refaíü̃arü doxonexü̃arü nórtewaama nayexma.
