Josué 2:1-24
2 Rü yexguma Chitíü̃wa nayexmagügu, rü nüma ga Yochué rü bexma inanamuãchitanü ga taxre ga ngugütaeruü̃gü, rü ñanagürü nüxü̃: —¡Ẽcü peyangugü i ngẽma naane i Yudáü̃arü tocutüwa ngẽxmaxü̃ rü ñu̱xmata yima ĩane ya Yericúwa pengugü! —ñanagürü. Rü nüma ga yema taxre rü inaxĩãchi, rü ngĩpatawa nangugü ga wüxi ga nge ga naxü̃nemaxã taxexü̃ ga Yericúgu ãpatacü. Rü Raá nixĩ ga ngĩéga. Rü ngĩma rü ngĩpatagu inapegüxẽxẽ ga yema chütaxü̃.
2 Natürü nayexmaama ga wüxi ga duü̃xü̃ ga Yericúarü ãẽ̱xgacümaxã nüxü̃ ixuxü̃, rü ñanagürü nüxü̃: —Ñuxre i Iraétanüxü̃ nua nangugü i ngewa̱xarü chütaxü̃gu nax yangugügüãxü̃ca̱x i ñaa naane —ñanagürü.
3 Rü yemaca̱x ga gumá ãẽ̱xgacü rü yema nge ga Raáxü̃tawa namuga rü ñanagürü: —¡Ínamuxü̃ i ngẽma yatügü i cuxü̃tawa ngugüxü̃ erü ngẽma rü ngugütaewa nua naxĩ! —ñanagürü.
4 Natürü ga ngĩma rü inangãxü̃ rü ngĩgürügü: —Aixcüma nixĩ i taxre i yatü i chauxü̃tawa nangugüxü̃, natürü tama nüxü̃ chacua̱x i ngextácüã̱x yixĩgüxü̃.
5 Rü marü noxri nachütagu nawoegu, erü ngẽma oragu nixĩ i nawãxtaxü̃ ya daa ĩanearü poxeguxü̃arü ĩã̱x, rü tama nüxü̃ chacua̱x i ngextá nax naxĩxü̃. Natürü ngẽxguma chi ñu̱xmatama nawe pengẽgügu rü chi nüxü̃ peyangaugü —ngĩgürügü.
6 Natürü ga ngĩma rü dauxnagu inaxĩgüxẽxẽ ga yema taxre, rü yexma pagüxü̃ ga línuchitüxü̃gu iyacu̱xgü.
7 Rü guma ĩanearü ãẽ̱xgacüarü churaragü rü yema taxre ga ngugütaeruü̃ca̱x nadaugü nagu ga yema nama ga natü ga Yudáü̃ ínuxtamaxü̃wa nadaxü̃. Rü yexguma yema churaragü íchoxü̃guwenatama, rü nanawãxtagü ga norü ĩã̱x ga guma ĩanearü poxeguxü̃.
8 Rü naxü̃pa ga nax napeexü̃ ga yema ngugütaeruü̃gü, rü ngĩma ga Raá rü nawe daxũ ixĩ, rü ngĩgürügü nüxü̃:
9 —Choma nüxü̃ chacua̱x rü Cori ya Tupana pexna nanaxã i ñaa naane, rü ngẽmaca̱x i toma rü poraãcü tamuü̃e. Rü ñu̱xma rü guxü̃ma i duü̃xü̃gü i daa ĩanecüã̱x rü poraãcü pexü̃ namuü̃e.
10 Rü nüxü̃ tacua̱x ga yexguma Equítuanewa ípenguxü̃gu, rü Tupana nixĩ ga yapayexẽẽxü̃ ga Már i Dauchíüxü̃ nax yéma pichoü̃xü̃ca̱x. Rü ngẽxgumarüxü̃ ta nüxü̃ tacua̱x nax ñuxãcü penadaixü̃ ga Chióü̃ rü Óx ga Amoréutanüxü̃arü ãẽ̱xgacügü ga natü ga Yudáü̃arü tocutüwa yexmagüxü̃.
11 Rü yexguma yemaxü̃ tacua̱xgügu rü poraãcü tamuü̃e, rü taxúema tügü ítarüpora nax pemaxã tügü tadaixü̃ca̱x. Erü yimá Cori ya perü Tupana rü guxãétüwa nangẽxma i daxũguxü̃ i naanewa rü ñoma i naanewa.
12 Rü ngẽmaca̱x pexna chaca rü ñu̱xmatama chanaxwa̱xe i Tupanaégagu chomaxã nüxü̃ pixu rü mea tá namaxã pechopetü i chautanüxü̃, ngẽxgumarüxü̃ i choma nax meama pexü̃ chayaxuxü̃rüxü̃. ¡Rü choxna penaxã i wüxi i cua̱xruxü̃ nax ngẽmawa nüxü̃ chacuáxü̃ca̱x nax aixcümaxü̃ chomaxã pixuxü̃!
13 Rü chanaxwa̱xe i guxü̃ma i tümaarü ngẽmaxü̃gümaxã tüxü̃ pengechaü̃ ya chorü papa, rü chorü mama, rü chauenexẽgü, rü chaueya̱xgü. ¡Rü taxṹ i toxü̃ pedaixü̃! —ngĩgürügü.
14 Rü nümagü rü ngĩxü̃ nangãxü̃gü rü ñanagürügü ngĩxü̃: —Toma tátama pexü̃ ítapoxü̃ rü pexna tadau nax taxuxü̃ma pexü̃ üpetüxü̃ca̱x, ega cuma rü tama toxü̃ quixuxgu. Rü ngẽxguma Cori ya Tupana toxna naxãxgu i ñaa naane rü aixcüma tá mea cuxna tadau —ñanagürügü.
15 Rü ngĩma ga Raá rü wüxi ga ĩ ga ĩanearü poxeguxü̃wa yaxũxü̃negu ipe. Rü yema poxeguxü̃arü beü̃tánawa wüxi ga napana̱xãmaxã íinachü̱xüxüegü ga yema taxre ga ngugütaeruü̃gü.
16 Rü ngĩgürügü nüxü̃: —¡Ẽcü ma̱xpǘneanewa pexĩ rü ngẽxma peyarücu̱xgü nax tama pexü̃ yayaugüxü̃ca̱x i ngẽma pexca̱x daugüxü̃! ¡Rü tomaepü̱x i ngunexü̃ tá ngẽxma picu̱xgü, rü ñu̱xmatáta ĩaneca̱x nawoegu i ngẽma pexca̱x daugüxü̃! Rü ngẽmawena rü marü name i ípixĩ —ngĩgürügü.
17 Rü nümagü rü ngĩxü̃ nangãxü̃gü rü ñanagürügü: —Toma rü tá tayanguxẽxẽ i ngẽma Tupanaégagu toxna naxca̱x cucaxü̃.
18 Natürü ngẽxguma marü ñaa naanegu tachocu̱xgu, rü ñaa beü̃tána ga nawa toxü̃ ícurüchü̱xegüxü̃wa tá cunatunütaxẽxẽ i ñaa napana̱xã i daunütaxü̃. Rü daa cupatagu tá tüxü̃ cunutaque̱xe ya cunatü rü cué rü cuenexẽgü rü guxãma ya cunatütanüxü̃.
19 Natürü ngẽxguma chi ngexerüxüxe cuchiü̃wa íxũxũ̱xgu rü tümagagutátama nixĩ ega tayu̱xgux, rü marü taxũtáma togagu nixĩ. Natürü ngẽxguma chi ngexerüxüxe cuchiü̃wa ngẽxmaxexü̃ yama̱xgügu, rü ngẽxguma rü tá togagu nixĩ.
20 Natürü ngẽxguma chi toxü̃ quixuxgux, rü taxuca̱xma tayanguxẽxẽ i ngẽma Tupanaégagu cumaxã nüxü̃ tixuxü̃ —ñanagürügü.
21 Rü ngĩma rü inangãxü̃, rü: —Marü name —ngĩgürügü. Rü yexguma ga ngĩma rü nüxü̃ irümoxẽ, rü nümagü rü ngĩxna nawoegu. Rü yemawena rü yema beü̃tánawa iyana̱i̱x ga napana̱xã ga daunütaxü̃.
22 Rü yema taxre ga ngugütaeruü̃gü rü ínama̱xpǘneanexü̃wa naxĩ rü tomaepü̱x ga ngunexü̃ yexma narücu̱xgü. Rü yoxni ga churaragü rü guxü̃anegu naxca̱x nadaugü rü taxuguma nüxü̃ nayangaugü, rü düxwa Yericúarü ĩaneca̱x nawoegumare.
23 Rü yexguma ga nüma ga yema taxre ga ngugütaeruü̃gü rü ma̱xpǘneanewa narüchoü̃ rü natü ga Yudáü̃arü tocutüwa naxĩ ga Yochué íyexmaxü̃wa. Rü namaxã nüxü̃ nixugüe ga guxü̃ma ga nüxü̃ ngupetüxü̃.
24 Rü ñanagürügü: —Nüma ya Cori ya Tupana rü marü tüxna nanaxã i guxü̃ma i ngẽma naane. Rü ngẽmaca̱x i guxü̃ma i ngẽma nachixü̃anecüã̱x i duü̃xü̃gü rü poraãcü tüxü̃ namuü̃e —ñanagürügü.
