Josué 20:1-9
20 20:1-2 Tupana rü Yochuémaxã nidexa rü ñanagürü: —¡Namaxã idexa i Iraétanüxü̃ rü namaxã nüxü̃ ixu nax nüxü̃ naxunetagüxü̃ca̱x ya ĩanegü ya cu̱xchicaxü̃ruxü̃gü ixĩgüne, yema Moichémaxã nüxü̃ chixuxü̃rüxü̃!
2 Nüü̃ nadau 20:1
3 Rü ngẽxguma wüxíe rü toguxexü̃ tima̱xcüraü̃gu rü tama ma̱xgu tümamaxã tarüxĩnügu, rü name nixĩ i tiña nax wüxi ya yima ĩane ya cu̱xchicaxü̃ruü̃wa tañaxü̃ca̱x rü ngẽxma tayarücúxü̃ca̱x, nax ngẽmaãcü tama tüxü̃ yama̱xgüxü̃ca̱x i ngẽma natanüxü̃ i ngẽma duü̃xü̃ i tima̱xcüraxü̃xü̃.
4 Rü yíxema nagu yarücúxe ya wüxi ya yima ĩanegü ya cu̱xchicaxü̃ruxü̃ ixĩgüne, rü ngẽxguma yima ĩanearü ĩã̱xwa tanguxgu, rü yima ĩanearü ãẽ̱xgacügümaxã tá tügü tixu. Rü ngẽxguma i nüma i ngẽma ãẽ̱xgacügü rü tá tüxü̃ nimucuchigü rü tá tüxna nanaxã i wüxi i tümachica i nagu tá taxãchiü̃xü̃.
5 Rü ngẽxguma ngéma tümawe nange̱xgu i natanüxü̃ i ngẽma tima̱xcüraü̃xü̃, rü yima ĩanearü ãẽ̱xgacügü rü taxũtáma nüxna tüxü̃ namugü ya yíxema ngẽxma rücúxe, erü tayama̱xcüraxü̃mare, rü tama naxchi taxaiãcüma tayama̱x.
6 Rü yíxema ngẽxma rücúxe rü tanaxwa̱xe nax yima ĩane ya cu̱xchicaxü̃ruü̃wa tangexmaechaxü̃, rü taxuacüma ítaxũxũ nawa ya yima ĩane ñu̱xmatáta guxü̃ma i duü̃xü̃güpe̱xewa taxũ nax tüxna nacagüxü̃ca̱x. Rü ngéma tá tangexmaecha ñu̱xmatáta nayu̱x i ngẽma chacherdótegüarü ãẽ̱xgacü ixĩxü̃ ga yexguma yema tüxü̃ ngupetügu. Rü ngẽxgumaxica tátama nixĩ i namexü̃ nax ítaxũxũxü̃ rü naxca̱x tataeguxü̃ ya tümapata ya tümaarü ĩanewa ngẽxmane —ñanagürü ga Tupana.
7 Rü ñu̱xũchi ga nüma ga Iraétanüxü̃ rü nüxü̃ naxunetagü ga tomaepü̱x ga ĩanegü nax cu̱xchicaxü̃ruü̃gü yaxĩgüxü̃ca̱x: Rü wüxi nixĩ ga Quédex ga Gariréawa ga Netaríarü ma̱xpǘneanewa yexmane, rü nai nixĩ ga Chiquéü̃ ga Efraíü̃arü ma̱xpǘneanewa yexmane, rü nai nixĩ ga Quiriáx-abá ga Yudáarü ma̱xpǘneanewa yexmane. (Rü guma ĩane rü to ga naéga rü Ebróü̃ nixĩ.)
8 Rü natü ga Yudáü̃arü tocutüwa ga metachinüxü̃ ga naxnücüane ga Yericúarü éstewaama rü nüxü̃ naxunetagü ga Béche ga Rubéü̃tanüxü̃arü naanewa yexmane. Rü Gáxtanüxü̃arü naanewa rü nüxü̃ naxuneta ga Ramóx ga Garaáxanewa yexmane. Rü Manachétanüxü̃arü naanewa rü nüxü̃ naxuneta ga Goráü̃ ga Bacháü̃anewa yexmane.
9 Rü gumagü nixĩ ga ĩanegü ga nüxü̃ naxunetagüne nax cu̱xchicaxü̃ruxü̃ yaxĩgüxü̃ca̱x naxca̱x ga guxü̃ma ga Iraétanüxü̃ rü yema duü̃xü̃gü ga to ga nachixü̃anecüã̱xgü ga yexma Iraétanüxü̃tanügu ãchiü̃güxü̃. Rü guma ĩanegü nixĩ ga mexü̃ne nax nagu yacúxü̃ ga yema toguxexü̃ ima̱xcüraxü̃xü̃, nax yemaacü tama yama̱xgüãxü̃ca̱x ga yema yuxü̃tanüxü̃ naxü̃pa nax duü̃xü̃güpe̱xewa nagagüãxü̃ nax nüxna nacagüxü̃ca̱x.
