Josué 22:1-34
22 22:1-2 Nawena nax Yochué yanuxü̃ ga naanegü, rü naxca̱x nangema ga Rubéü̃tanüxü̃, rü Gáxtanüxü̃ rü ngãxü̃tücumü ga Manachétanüxü̃, rü ñanagürü nüxü̃: —Pemax rü marü peyangu̱xẽxẽ ga guxü̃ma ga yema Moiché ga Cori ya Tupanaarü duü̃ pexü̃ muxü̃ rü naga pexĩnüe ga guxü̃ma ga yema pexü̃ chamuxü̃.
2 Nüü̃ nadau 22:1
3 Rü ñu̱xma rü ta taguma nüxna pixĩgachi i peenexẽgü, rü aixcüma peyangu̱xẽxẽ i guxü̃ma i norü mugü ya Cori ya perü Tupana.
4 Rü ngẽmaca̱x i ñu̱xma nax Tupana marü yanguxẽẽxü̃ i norü uneta rü ngẽma peenexẽgü rü marü taxuxü̃ma i guxchaxü̃wa nangẽxmagü, rü marü name nax naxca̱x pewoeguxü̃ i pepatagü rü perü naanegü ga Moiché ga Tupanaarü duü̃ pexna ãxü̃ ga natü ga Yudáü̃arü éstewaama.
5 Natürü ngẽma pexna naxca̱x chacaxü̃xicatama nixĩ nax aixcüma peyanguxẽẽxü̃ i ngẽma Tupanaarü mugü ga norü duü̃ ga Moiché pemaxã nüxü̃ ixuxü̃ ga ñaxü̃: “¡Nüxü̃ pengechaxü̃ ya perü Cori ya Tupana rü penaxü̱x i ngẽma nüma nanaxwa̱exü̃! ¡Rü naga pexĩnüe i guxü̃ma i norü mugü, rü guxü̃guma naxca̱x pemaxẽ guxü̃ma i perü maxü̃maxã rü perü poramaxã!” —ñanagürü.
6 Rü yemawena ga Yochué rü mexü̃ namaxã naxuegu, rü ínayamugü. Rü nümagü rü napataca̱x nawoegu.
7 Rü yema ngãxü̃tücumü ga Manachétanüxü̃ rü Moiché rü Bacháü̃anewa nüxna nanaxã ga norü naane. Rü yema to ga ngãxü̃tücumü ga Manachétanüxü̃ rü Yochué rü norü naane nüxna naxã natanüwa ga yema Iraétanüxü̃ ga natü ga Yudáü̃arü oéstewaama yexmagüxü̃. Rü yema Manachétanüxü̃ ga nüxíra naane Moiché nüxna ãxü̃ rü Yochué rü mexü̃ namaxã naxuegu rü yemaacü ínayamugü.
8 Rü ñu̱xũchi ñanagürü nüxü̃: —Pema i ñu̱xma rü perü naanegüca̱x pewoegu namaxã i muxü̃ma i ngẽmaxü̃gü, rü muxü̃ma i naxü̃nagü, rü úirugü, rü diẽrugü, rü bróũchegü, rü fierugü, rü muxü̃ma i naxchirugü. ¡Rü peenexẽgümaxã penga̱u̱x i ñaa ngẽmaxü̃gü i perü uanügüna pepuxü̃xü̃! —ñanagürü.
9 Rü yemaacü ga Rubéü̃tanüxü̃, rü Gáxtanüxü̃, rü yema ngãxü̃tücumü ga Manachétanüxü̃ rü nüxna nixĩgachitanü ga yema togü ga Iraétanüxü̃ ga Chilówa ga Canaáü̃anewa yexmagüxü̃. Rü yemaacü naxca̱x nawoegu ga napatagü rü naanegü ga Garaáxarü naanewa yexmagüxü̃, yema Cori ya Tupana Moichémaxã nüxü̃ ixuxü̃rüxü̃.
Ãmarearü guruxü̃ ga natü ga Yudáü̃arü ngaicamana yexmaxü̃
10 Rü yema Rubéü̃arü duü̃xü̃gü, rü Gáxarü duü̃xü̃gü, rü ngãxü̃tücumü ga Manachéarü duü̃xü̃gü rü yexguma natü ga Yudáü̃cutüwa nangugügu rü yexma nanaxügü ga wüxi ãmarearü guruxü̃ ga taxü̃. Rü Cananéugüarü naanegu nixĩ ga naxügüãxü̃.
11 Rü yema togü ga Iraétanüxü̃ ga Canaáü̃anewa yexmagüxü̃ rü nüxü̃ nacuáchigagü nax yema Rubéü̃tanüxü̃ rü Gáxtanüxü̃ rü yema ngãxü̃tücumü ga Manachétanüxü̃ rü Canaáü̃anegu naxügüãxü̃ ga wüxi ga ãmarearü guruxü̃ ga taxü̃ ga natü ga Yudáü̃cutügu.
12 Rü yexguma marü nüxü̃ nacua̱xgügu ga yema togü ga Iraétanüxü̃ rü Chilógu nangutaque̱xegü nax Rubéü̃tanüxü̃maxã, rü Gáxtanüxü̃maxã, rü yema ngãxü̃tücumü ga Manachétanüxü̃maxã nügü nada̱i̱xü̃ca̱x.
13 Natürü naxü̃pa nax yéma naxĩxü̃, rü yéma nanamugü ga Fineéx ga chacherdóte ga Ereachá nane nax Garaáxwa naxũxü̃ca̱x nax namaxã yanadexaxü̃ca̱x ga yema Rubéü̃tanüxü̃, rü Gáxtanüxü̃, rü ngãxü̃tücumü ga Manachétanüxü̃.
14 Rü ínayaxümücügü ga 10 ga ãẽ̱xgacügü ga wüxichigü ga yema 10 ga Iraétücumügüarü ãẽ̱xgacügü ixĩgüxü̃.
15 22:15-16 Rü guxü̃ma ga yemagü rü Garaáxarü naanewa naxĩ ga Rubéü̃tanüxü̃ rü Gáxtanüxü̃ rü yema ngãxü̃tücumü ga Manachétanüxü̃ íyexmagüxü̃wa. Rü ñanagürügü nüxü̃: —Toma rü Cori ya Tupanaarü duü̃xü̃güégagu pexna taca: ¿Rü tü̱xcüü̃ guxchaxü̃ca̱x pedau nape̱xewa ya yimá Iraétanüxü̃arü Tupana? ¿Rü tü̱xcüü̃ nüxna pixĩgachi rü penaxü i ngẽma ãmarearü guruxü̃ rü ngẽmaãcü tama naga pexĩnüe?
16 Nüü̃ nadau 22:15
17 ¿Rü tama ẽ̱xna nüxna pecua̱xãchie ga yema pecadu ga ma̱xpǘne ga Peúwa ixügüxü̃, rü yemagagu poraxü̃ ga da̱xaweanemaxã Tupana tüxü̃ poxcuexü̃ rü ñuxre ga tatanüxü̃ rü nayue? Rü ñu̱xma rü ta rü yema pecadugagu ngúxü̃ tingegü.
18 ¿Rü tü̱xcüü̃ i ñu̱xma rü nüxna pixĩgachichaü̃xü̃ ya Cori ya Tupana? Rü ngẽxguma namaxã penuegu i ñu̱xma rü moxü̃arü ngunexü̃gu rü nüma ya Cori ya Tupana rü tá nanapoxcue i guxü̃ma i Iraétanüxü̃.
19 Rü ngẽxguma ngẽma naane i pexna üxü̃ tama pexca̱x namexgux nax ngéma Tupanaxü̃ picua̱xüü̃güxü̃, rü name i torü naanewa pexĩ i Tupanapata íngẽxmaxü̃wa. ¡Rü naxca̱x peda̱u̱x i wüxi i nachica i torü naanewa nax ngéma pemaxẽxü̃ca̱x, natürü taxṹ i Cori ya Tupanamaxã penuexü̃! Rü ngẽxguma tá nüxna pixĩgachigu rü toma rü táta nitoguãchi. Rü ngẽmaca̱x tama name nax penaxüxü̃ i to i ãmarearü guruxü̃ naétü i ngẽma tórü Cori ya Tupanaarü ãmarearü guruxü̃.
20 ¡Rü nüxna pecua̱xãchi ga yema Acáü̃ ga Chéra nanexü̃ ngupetüxü̃! Rü nüma rü nanayaxu ga yemaxü̃gü ga Tupana namaxã naxueguxü̃ nax ínaguxü̃, rü yemagagu nanu ga Cori ya Tupana namaxã ga guxü̃ma ga Iraétanüxü̃. Rü tama Acáü̃icatama nayu nagagu ga yema pecadu —ñanagürügü.
21 Rü yexguma ga yema Rubéü̃tanüxü̃, rü Gáxtanüxü̃, rü yema ngãxü̃tücumü ga Manachétanüxü̃ rü yema Iraétanüxü̃xü̃ nangãxü̃gü, rü ñanagürügü:
22 22:22-23 —Cori ya Tupana ya gúxü̃ i tupananetagüarü Tupana ixĩcü rü nüxü̃ nacua̱x nax tama namaxã tanuexü̃ca̱x rüe̱xna nüxna tixĩgachixü̃ca̱x nixĩ i tanaxüxü̃ i ñaa ãmarearü guruxü̃. Rü tanaxwa̱xe nax guxãma i pema rü ta nüxü̃ pecuáxü̃ i ngẽma. Rü ngẽxguma chi tama Tupanaga taxĩnüexü̃ca̱x, rüe̱xna nüxna tixĩgachitanüxü̃ca̱x tanaxü̱xgu i ñaa ãmarearü guruxü̃, rü ẽcü toxü̃ pedai. Rü toxü̃ napoxcu ya Cori ya Tupana ega tóxrütama ãmarearü guruxü̃ taxü̱xgu nax ngéma naxca̱x tayaguxü̃ca̱x i ãmaregü.
23 Nüü̃ nadau 22:22
24 22:24-25 Natürü tanaxü i ñaa ãmarearü guruxü̃, erü tama tanaxwa̱xe nax wüxi i ngunexü̃gu i ngẽma penegü rü tonegüxü̃ ñagüxü̃: “Pema rü tama perü Tupana nixĩ ya Cori ya Iraétanüxü̃arü Tupana. Rü Cori ya Tupana rü nanaxuegu nax natü i Yudáü̃ rü tórü üyeane yixĩxü̃ca̱x i toma rü pema nax Rubéü̃tanüxü̃ rü Gáxtanüxü̃ pixĩgüxü̃, rü ngẽmaca̱x Cori ya Tupana rü tama perü Tupana nixĩ”, ñagüxü̃ i penegü. Rü ngẽmaãcü i penegü rü tá ngürüãchi Cori ya Tupanana nayaxĩgachixẽxẽ i tonegü rü taxũtáma nüxü̃ nicua̱xü̃gü.
25 Nüü̃ nadau 22:24
26 Rü ngẽmaca̱x nagu tarüxĩnüe nax tanaxüxü̃ i ñaa ãmarearü guruxü̃. Rü tama tanaxü nax Tupanaarü ãmare ngéma tiguxü̃ca̱x, rü tama ta̱xacü i tomare i ãmarearü guruxü̃ yixĩxü̃ca̱x.
27 Natürü tanaxü nax wüxi i cua̱xruxü̃ yixĩxü̃ca̱x i pexca̱x, rü toxca̱x, rü totaagüca̱x, rü ngẽmaãcü i ngẽma toxocügü rü nüxü̃ nacua̱xgüxü̃ca̱x nax tomagü rü ta Tupanaarü duü̃xü̃gü tixĩgüxü̃, rü namexü̃ nax nape̱xewa tananaxü̃ca̱x i torü ãmaregü i torü pecaduarü ütanüruxü̃ nax tomaxã iyanangüxmüxü̃ca̱x. Rü ngẽmaãcü i ngẽma penegü rü taxuacütáma tonegüxü̃ ñanagürügü: “Pema rü tama perü Tupana nixĩ ya Cori ya Tupana”, ñanagürügü.
28 Rü ngẽmaca̱x nagu tarüxĩnüe, rü ngẽxguma chi texé toxü̃ ngẽma ñagügu rüe̱xna totaagüxü̃ ngẽma ñagügu, rü toma rü tá tanangãxü̃: “Rü dücax torü o̱xigü rü nanaxügü ga ñaa ãmarearü guruxü̃ naxca̱x ga Cori ya Tupana nax wüxi i cua̱xruxü̃ yixĩxü̃ca̱x pexca̱x rü toxca̱x nax toma rü ta Tupanaarü duü̃xü̃gü tixĩgüxü̃. Rü tama tanaxü nax ãmare nawa tiguxü̃ca̱x”, ñatarügügü tá.
29 Rü tama nax Tupanamaxã tanuexü̃ca̱x rüe̱xna nüxna tixĩgachixü̃ca̱x nixĩ i tanaxüxü̃ i ñaa ãmarearü guruxü̃. Rü tama nixĩ i ngẽmawa ãmare ítaguxü̃ca̱x yixĩxü̃ i tanaxüxü̃. Rü tama tanaxü nax nüxü̃ taxoxü̃ca̱x i ngẽma Chilówa ngẽxmaxü̃ i Tupanaarü ãmarearü guruxü̃ —ñanagürügü.
30 Rü nüma ga chacherdóte ga Fineéx, rü yema Iraétücumügüarü ãẽ̱xgacügü, rü yexguma nüxü̃ naxĩnüegu ga yema Rubéü̃tanüxü̃ rü Gáxtanüxü̃, rü ngãxü̃tücumü ga Manachétanüxü̃arü ore, rü naxca̱x name ga yema nüxü̃ ixuxü̃.
31 Rü nüma ga Fineéx ga chacherdóte ga Ereachá nane rü ñanagürü: —Ñu̱xma rü marü nüxü̃ tacua̱x nax tatanüwa nangẽxmaxü̃ ya Tupana, rü tama namaxã penuexü̃ rü ngẽmaca̱x marü taxũtáma toxü̃ napoxcue ya Tupana —ñanagürü.
32 Rü yemawena rü nüma ga Fineéx rü yema íyaxümücügüxü̃, rü Rubéü̃tanüxü̃xü̃ rü Gáxtanüxü̃xü̃ narümoxẽgü, rü nawoegu ga Garaáxanewa. Rü norü naane ga Canaáü̃wa naxĩ ga natanüxü̃ ga Iraétanüxü̃ íyexmagüxü̃wa. Rü yema Canaáü̃anewa yexmagüxü̃maxã nüxü̃ nixugüe ga yema Rubéü̃tanüxü̃arü rü yema Gáxtanüxü̃arü rü yema ngãxü̃tücumü ga Manachéarü ore.
33 Rü nüma ga Iraétanüxü̃ rü namaxã nataãxẽ ga yema ore ga nüxü̃ yaxugüexü̃, rü Tupanaxü̃ nicua̱xü̃gü. Rü marü tama Rubéü̃tanüxü̃maxã rü Gáxtanüxü̃maxã daigu narüxĩnüe. Rü marü tama nagu narüxĩnüe nax yagugüãxü̃ ga yema norü naanegü.
34 Rü nüma ga Rubéü̃tanüxü̃, rü Gáxtanüxü̃ rü “Cua̱xruxü̃gu”, nanaxüégagü ga yema ãmarearü guruxü̃. Yerü ñanagürügü: —Ñaa ãmarearü guruxü̃ rü wüxi i tórü cua̱xruxü̃ tá nixĩ nax Cori ya Tupana rü tóxrü Tupana yixĩxü̃ —ñanagürügü.
