Josué 23:1-16
23 Rü mucüma ga taunecü marü ningegü nax Tupana rü Iraétanüxü̃xü̃ nangü̃xẽẽxü̃ nax norü uanügümaxã nangüxmüexü̃ca̱x. Rü nüma ga Yochué rü marü naya.
2 Rü nüma ga Yochué rü guxü̃ma ga Iraétanüxü̃arü ãẽ̱xgacügüca̱x nangema. Rü yema wüxitücumüchigüarü ãẽ̱xgacügüca̱x nangema, rü yema ãẽ̱xgacügü ga guxchaxü̃güarü mexẽẽruü̃ca̱x nangema, rü yema churaragüerugüca̱x rü ta nangema. Rü ñanagürü nüxü̃: —Marü chipa erü marü chaya.
3 Pema rü marü nüxü̃ pedau ga yema naxüxü̃ ga Cori ya Tupana ga yexguma nadaiãgu ga yema duü̃xü̃gü ga perü uanügü ixĩgüxü̃. Yerü nüma ga Cori ya Tupana rü peétüwa naxü.
4 Choma rü wüxitücumüchigüna chanaxã ga yema naane ga nagu pinguchigüxü̃. Rü tama yema naane ga marü penapu̱xuxü̃xica nixĩ ga pexü̃ chinuxü̃, natürü namaxã chanangauxẽxẽ i ngẽma naane i taxũta penapuxü̃ i natü i Yudáü̃wa naxügü i éstewa, rü ñu̱xmata már i Mediteráneuwa nangu i oéstewaama.
5 Rü ngẽma duü̃xü̃gü i ñu̱xma ngẽma naanegu ãchiü̃güxü̃, rü Cori ya Tupana rü tá nawa ínanawoxü̃. Rü pema rü tá pegüxü̃́ penayaxu ngẽma Cori ya Tupana nüxü̃ ixuxü̃rüxü̃.
6 ¡Rü mea peyangu̱xẽxẽ i ngẽma mugü i Moichéarü poperagu ümatüxü̃! ¡Rü ngẽma naxümatüxü̃ãcü nagu pemaxẽ!
7 ¡Rü taxũtáma namaxã pixãxma̱xgü rü pixãtegü i ngẽma togü i duü̃xü̃gü i ñu̱xma rü ta petanügu ãchiü̃güxü̃! ¡Rü taxũtáma norü tupanaxü̃ picua̱xüü̃gü, rü bai tá i naga pexĩnüe, rü bai tá i norü tupanaéga penaxuxuchi, rü bai tá i norü tupanaégagu mexü̃ pexuegu!
8 ¡Rü ñu̱xmarüü̃tama rü guxü̃gutáma Cori ya perü Tupanawe perüxĩ!
9 Rü nüma ga Cori ya Tupana rü marü pepe̱xewa ínanawoxü̃ãcu ga ĩanegü ga itaxü̃ne rü iporane. Rü ñu̱xmata ñoma i ngunexü̃wa nangu rü taxúema pexü̃ tarüporamae.
10 Rü wüxíetama i pema rü pexü̃́ natauxcha nax 1,000 i duü̃xü̃güxü̃ pixüxẽẽxü̃, erü Cori ya perü Tupana rü peétüwa naxǘ rü pexca̱x nügü namaxã nadai, yema nümatama pemaxã inaxunetaxü̃rüxü̃.
11 ¡Rü pexuãxẽgü rü pegüna pedaugü nax tama nüxü̃ íperüngümaexü̃ca̱x! ¡Rü nüxü̃ pengechaü̃gü ya perü Cori ya Tupana!
12 23:12-13 Rü choma rü chanaxwa̱xe i nüxü̃ nax pecuáxü̃ rü ngẽxguma tá Tupanana pixĩgachigu rü ñaa duü̃xü̃gü i petanüwa ngẽxmagüxü̃maxã pexãmücügu, rü namaxã pixãxma̱xgügu, rü pixãtegügu, rü nüma ya Cori ya perü Tupana rü taxũtáma pexü̃ narüngü̃xẽxẽ nax ípenawoxü̃xü̃ca̱x i ngẽma duü̃xü̃gü i petanüwa ngẽxmagüxü̃. Rü nüma ya Tupana rü perü guxchaxü̃ruxü̃ tá nayaxĩgüxẽxẽ i ngẽma duü̃xü̃gü nax ngẽmaãcü naxme̱xgu peyi̱xixü̃ca̱x. Rü ngẽmaãcü ñoma texé pexca̱xwena nacua̱i̱xcaxü̃rüxü̃ tá nixĩ ñu̱xmatáta taxúetama petanüwa íyaxü nawa i ñaa mexü̃ i naane ya tórü Cori ya Tupana pexna ãxü̃.
13 Nüü̃ nadau 23:12
14 Choma rü marü paxa tá chayu. Natürü naxü̃pa nax chayuxü̃ rü chanaxwa̱xe i aixcüma guxü̃guma nagu perüxĩnüe rü Cori ya Tupana rü marü nayanguxẽẽãxü̃ ga guxü̃ma ga yema pemaxã nüxü̃ yaxuxü̃. Rü bai ga wüxi ga yema norü uneta ga tama yanguxẽẽxü̃.
15 23:15-16 Natürü ngẽxgumarüxü̃ marü nax yangu̱xẽẽãxü̃ i guxü̃ma i ngẽma mexü̃ ga pemaxã inaxunetaxü̃, rü ngẽxgumarüxü̃ tá ta pexca̱x ínanangu̱xẽxẽ i naguxü̃raü̃xü̃ i guxchaxü̃ i ngẽxguma tama aixcüma naga pexĩnüegu ga yema norü uneta ga pemaxã nüxü̃ yaxuxü̃. Rü ngẽxguma ta̱xacürü tupananetagu perüxĩnüegu rü naxca̱x pemaxẽgu, rü nüma ya Cori ya Tupana rü tá pemaxã nanu, rü paxaxüchi tá pexü̃ inayarüxoxẽxẽ nawa i ñaa naane i mexü̃ i nüma pexna naxãxü̃. Rü bai tá ya wüxíe ípeyaxüxü̃ —ñanagürü ga Yochué.
16 Nüü̃ nadau 23:15
