Josué 5:1-15
5 Rü guxü̃ma ga norü ãẽ̱xgacügü ga Amoréugü ga natü ga Yudáü̃cutüarü éstewaama yexmagüxü̃, rü norü ãẽ̱xgacügü ga Cananéugü ga Már ga Mediteráneuarü ngaicamana yexmagüxü̃ rü nüxü̃ nacuáchigagü ga Cori ya Tupana rü nayapayetamaxẽẽãxü̃ ga natü ga Yudáü̃ nax yachoü̃xü̃ca̱x ga Iraétanüxü̃. Rü nümagü ga yema ãẽ̱xgacügü rü poraãcü namuü̃e ga yemaxü̃ nacuáchigagügu, rü yemaca̱x tama Iraétanüxü̃maxã nügü nadaixchaü̃.
2 Rü nüma ga Cori ya Tupana rü Yochuémaxã nidexa rü ñanagürü nüxü̃: —Ẽcü ñuxre i cüxchi i nutangĩxca̱x ngĩxü̃ naxü rü ngẽmamaxã ínawiü̃cha̱xmüü̃pe̱xechiraü̃gü i ngẽma Iraétanüxü̃ i tauta íwiü̃cha̱xmüü̃pe̱xechiraü̃güxü̃! —ñanagürü.
3 Rü nüma ga Yochué rü ngĩxü̃ naxü ga cüxchigü rü ínanawíü̃cha̱xmüü̃pe̱xechiraü̃gü ga Iraétanüxü̃ nawa ga guma ma̱xpǘne ga Araró.
4 Rü nüma ga Yochué rü ínanawíü̃cha̱xmüü̃pe̱xechiraü̃gü yerü guxü̃ma ga yema iyatüxü̃ ga churarawa imexü̃ ga yexguma Equítuanewa ínachoxü̃gu rü marü namagu nayue ga ínachianexü̃wa.
5 Rü woo guxü̃ma ga yema Iraétanüxü̃ ga Equítuanewa íchoxü̃xü̃ rü marü ínawiü̃cha̱xmüü̃pe̱xechiraü̃gü. Natürü yema nanegü ga namagu ga ínachianexü̃gu ibuetanüxü̃ rü tama ínawiü̃cha̱xmüü̃pe̱xechiraü̃gü.
6 Yema Iraétanüxü̃ ga Equítuanewa íchoxü̃xü̃ rü 40 ga taunecü nixĩ ga yema ínachianexü̃gu naxĩxü̃. Rü guxü̃ma ga yema iyatüxü̃ ga marü churarawa imexü̃ ga yexguma Equítuanewa ínachoxü̃gu rü namagu nixĩ ga nayuexü̃. Rü yema duü̃xü̃gü rü tama Cori ya Tupanaga naxĩnüechaü̃, rü yemaca̱x nüma ga Tupana rü namaxã nanaxuegu nax taxũtáma nüxü̃ nadaugüxü̃ ga yema naane ga norü o̱xigümaxã naxueguxü̃ i ngextá lechi rü berure taguma ítaxuxü̃wa ñoma dexá iyaxü̃rüxü̃.
7 Rü yemaca̱x nixĩ ga Yochué ga ínawiü̃cha̱xmüü̃pe̱xechiraü̃axü̃ ga yema nanegü ga yema Iraétanüxü̃ ga chianexü̃gu yuexü̃. Yerü nüma ga nanegü rü tama ínawiü̃cha̱xmüü̃pe̱xechiraü̃gü, yerü namagu nibuetanü.
8 Yexguma marü guxü̃ma íwiü̃cha̱xmüü̃pe̱xechiraü̃gu rü yema ínapegüxü̃gu narüngü̃e ñu̱xmata naxca̱x yataanegü.
9 Rü yexguma nüma ga Cori ga Tupana rü Yochuéxü̃ ñanagürü: —Rü ñaa wíü̃cha̱xmüü̃pe̱xechiraü̃maxã rü marü pexna chanayaxu i perü ãne ga noxri pexü̃́ yexmaxü̃ ga yexguma Equítuanecüã̱xme̱xẽwa peyexmagügu —ñanagürü. Rü ngẽmaca̱x i ngẽma nachica rü ñu̱xma rü ta Guirigátama nixĩ i naéga.
10 Rü nüma ga Iraétanüxü̃ rü Guirigágu napegü. Rü meama guma tauemacüarü 14 arü yáuanecü inanaxügüe ga nax naxüchigagüãxü̃ ga Üpetüchiga ga Yericúarü doxonexü̃wa.
11 Rü yematama ngunexü̃gu rü nanangõ̱xgü ga paũ ga ngearü pu̱xẽẽruü̃ã́xü̃ rü tríguarü goxte̱xexü̃. Natürü yemaarü moxü̃ãcü rü marü nanangõ̱xgü ga yema naanewa nayauxgüxü̃ ga nabü.
12 Rü yexgumawena rü marü nataxuma ga maná. Rü yemaca̱x ga Iraétanüxü̃ rü gumá taunecügu naxãwemü namaxã ga yema nabü ga Canaáü̃anewa yexmaxü̃.
Cori ya Tupanaarü churaragüerupe̱xewa nayexma ga Yochué
13 Rü wüxi ga ngunexü̃gu ga Yochué rü ĩane ga Yericúarü ngaicamagu nayachi. Rü nüxü̃ nadau ga wüxi ga yatü ga yexma chíxü̃ ga norü tara ngĩxü̃ ngexü̃. Rü Yochué rü naxca̱x nixũ rü nüxna naca rü ñanagürü: —¿Cumax rü totanüxü̃ quixĩ rüe̱xna torü uanü quixĩ? —ñanagürü.
14 Rü nüma ga yema yatü ga yexma chíxü̃ rü Yochuéxü̃ nangãxü̃ rü ñanagürü: —Choma rü taxúetanüxü̃ chixĩ. Nua chaxũ nax Cori ya Tupanaarü churaragüeru chixĩxü̃ca̱x —ñanagürü. Rü yexguma ga nüma ga Yochué rü nape̱xegu waixü̃müanegu nayangücuchi. Rü nüxna naca rü ñanagürü: —Pa Corix, choma i curü duü̃xü̃ nax chixĩxü̃ ¿rü ta̱xacü nixĩ i chomaxã nüxü̃ quixuxchaü̃xü̃? —ñanagürü.
15 Rü nüma ga yema Cori ya Tupanaarü churaragüeru rü Yochuéxü̃ nangãxü̃ rü ñanagürü: —¡Ẽcü ínacua̱xichi i curü chapatu erü ñaa nachica i nawa cungexmaxü̃ rü naxüüne! —ñanagürü. Rü nüma ga Yochué rü naga naxĩnü rü ínacua̱xichiarü chapatuã̱x.
