Josué 6:1-27
6 Rü taxucürüwama texé Yericúarü ĩanegu taxücu rüe̱xna ítaxũxũ, yerü ga norü poxeguxü̃arü ĩã̱xgü rü narüwãxtagü nax yemaacü taxuwama nachocuxü̃ca̱x ga Iraétanüxü̃.
2 Natürü nüma ga Cori ya Tupana rü Yochuéxü̃ ñanagürü: —Choma rü marü cuxna chanaxã ya Yericú norü ãẽ̱xgacümaxã rü norü churaragümaxã.
3 Rü cuma rü curü churaragü i Iraétanüxü̃maxã rü 6 i ngunexü̃ tá yima ĩanexü̃ ípeyachoegu. Rü wüxichigü i ngunexü̃gu rü wüxi i choegu tá pexügü.
4 Rü ngẽma baú i chorü mugü nawa ngẽxmaxü̃pe̱xegu tá naxĩ i 7 i chacherdótegü i carnéruchata̱xcuxremaxã icornétaã́xü̃. Rü ngẽxguma norü 7 i ngunexü̃wa nanguxgu, rü 7 e̱xpü̱xcüna tá yima ĩanexü̃ ípeyachoegu. Rü ngẽxguma tá nixĩ i ngẽma chacherdótegü rü tá norü carnéruchatacu̱xregu yacuegüxü̃.
5 Rü ngẽxguma nüxü̃ pexĩnüegu nax poraãcü yacuegüãxü̃ ya carnéruchatacu̱xregü rü tá tagaãcü aita pexüe. Rü ngẽxguma i norü poxeguxü̃ ya yima ĩane rü tá nangĩãchi. Rü ngẽxgumayane rü wüxichigü i pemax rü tá nagu pichocu ya yima ĩane —ñanagürü ga Tupana.
6 Rü yexguma ga nüma ga Yochué rü chacherdótegüca̱x naca rü ñanagürü nüxü̃: —¡Peyange i ngẽma baú i Cori ya Tupanaarü mugüchixü̃! Rü 7 i pemax rü ngẽma baúpe̱xegu tá pexĩ namaxã ya perü carnéruchatacu̱xregü —ñanagürü.
7 Rü nüma ga Yochué rü duü̃xü̃güxü̃ ñanagürü: —¡Ẽcü ipexĩãchi rü nüxü̃ ípeyachoegu ya yimá ĩane! Rü pemax i churaragü rü ngẽma baú i Cori ya Tupanaarü mugüchixü̃pe̱xegu tá pexĩ —ñanagürü.
8 Rü guxü̃ma ga duü̃xü̃gü rü yema Yochué namaxã nüxü̃ ixuxü̃ãcü nanaxügü. Rü yema 7 ga chacherdótegü rü norü carnéruchatacu̱xregügu yacuegüãcüma yema baú ga Cori ya Tupanaarü mugüchixü̃pe̱xegu naxĩ. Rü yema baú rü yema 7 ga chacherdótegüwe namaxã nixãxü̃tanü.
9 Rü yema churaragü rü chacherdótegüpe̱xegu naxĩ, rü yema togü ga churaragü ga baúarü dauruxü̃ rü wixweama naxãgü. Rü nüma ga chacherdótegü rü norü carnéruchatacu̱xregügu nicuegü rü taguma inarüchianegü.
10 Rü nüma ga Yochué rü Iraétanüxü̃na naxãga nax yanachianegüxü̃ca̱x rü bexmamare inaxĩxü̃ca̱x ñu̱xmatáta nüma namua nax guxü̃ma wüxigu poraãcü aita naxüexü̃ca̱x.
Iraétanüxü̃ nanapugü ga Yericú
11 Rü nüma ga Yochué rü nanamu nax wüxíepü̱xcüna gumá ĩanexü̃ íyachoeguxü̃ namaxã ga yema baú ga Cori ya Tupanaarü mugüchixü̃. Rü yemawena ga duü̃xü̃gü rü nawoegu naxca̱x ga yema ínapegüxü̃wa. Rü yexma nanangupetüxẽẽgü ga chütaxü̃.
12 Rü moxü̃ãcü ga nüma ga Yochué rü pa̱xmamaxü̃chi ínarüda, rü nüma ga chacherdótegü rü nanangenagütaü̃gü ga yema baú ga Cori ya Tupanaarü mugüchixü̃.
13 Rü yema 7 ga chacherdótegü rü baú ga Cori ya Tupanaarü mugüchixü̃pe̱xegu naxĩ rü nagu yacuegüãcüma ga yema norü carnéruchatacu̱xregü. Rü yema churaragü rü wixpe̱xegu naxĩ, rü yema togü ga churaragü rü yema baúweama naxãgü. Rü yema norü carnéruchatacu̱xregü rü nagu nicuegü rü taguma inarüchianegü.
14 Rü moxü̃ãcü rü wena guma ĩanexü̃ ínayachoegu, rü ñu̱xmachi yema ínapegüxü̃ca̱x nawoegu. Rü 6 ga ngunexü̃ nixĩ ga yemaacü naxügüãxü̃.
15 Rü yema norü 7 ga ngunexü̃gu, rü ngunetüxü̃ ínarüdagü. Rü guma ĩanegu ínayachoegu yema nüxíra naxügüãxgurüxü̃. Natürü yema ngunexü̃gu rü 7 e̱xpü̱xcüna nüxü̃ ínayachoegu.
16 Rü yexguma yema chacherdótegü marü 7 e̱xpü̱xcüna norü carnéruchatacu̱xregügu yacuegügu, rü nüma ga Yochué rü yema duü̃xü̃güxü̃ namu rü ñanagürü: —¡Aita pexüe! Rü nüma ya Cori ya Tupana rü marü pexme̱xgu nananguxẽxẽ ya daa ĩane.
17 Rü tá peyanaxoxẽxẽ i daa ĩane namaxã i guxü̃ma i ta̱xacü i nawa ngẽxmaxü̃, erü ngẽmaãcü nixĩ i Cori ya Tupana nüxü̃ ixuxü̃. Rü ngẽma Raá i naxü̃nemaxã taxexü̃xica tátama iyixĩ i taxũtáma ngĩxü̃ pima̱xcü rü woo i ngẽma duü̃xü̃gü i ngĩpatawa ngẽxmagüxü̃. Yerü ngĩma nixĩ ga iyacu̱xgüãxü̃ ga yema taxre ga yatügü ga ngugütaewa yéma imugüxü̃.
18 ¡Rü ñu̱xma i pemax rü pegüna pedaugü nax tama penayaxuxü̃ i ta̱xacü i norü ngẽmaxü̃ ya yimá ĩanewa ngẽxmaxü̃! Erü nüma ya Cori ya Tupana rü namaxã nanaxuegu ya daa ĩane nax peyanaxoxẽẽxü̃ca̱x rü penadaiãcuxü̃ca̱x. Rü ngẽxguma taxũtáma ngẽmaãcü penaxü̱xgux, rü nüma ya Tupana rü tá chixexü̃ tamaxã naxuegu rü tá chixexü̃ taxca̱x ínangu̱xẽxẽ.
19 Natürü ngẽma úiru rü diẽrumü rü guxü̃ma i ngẽmaxü̃gü i bróũchenaxca̱x rü fierunaxca̱x, rü Cori ya Tupanaarü tá nixĩ rü norü ngẽmaxü̃gütanügu tá penanu —ñanagürü ga Yochué.
20 Rü yexguma ga nüma ga yema duü̃xü̃gü rü aita naxüe rü ga carnéruchatacu̱xregü rü naxãgatanüãchi. Rü yexguma guma carnéruchatacu̱xregügaxü̃ naxĩnüegu ga nüma ga Iraétanüxü̃ rü inanaxügüe nax poraãcü aita naxüexü̃. Rü yexguma ga guma ĩanearü poxeguxü̃ rü niwa̱xtapü̱x. Rü yexguma ga nüma ga Iraétanüxü̃ rü yexma nachocu rü namaxã inacua̱xgü.
21 Rü taramaxã nanadai ga guxü̃ma ga iyatüxe, rü ngexü̃gü, rü buxü̃gü, rü yaxguã̱xgü. Rü yexgumarüxü̃ ta nanadai ga guxü̃ma ga wocagü, rü carnérugü, rü búrugü.
22 Rü nüma ga Yochué rü yema taxre ga ngugütaewa ĩxü̃maxã nüxü̃ nixu rü ñanagürü: —¡Ẽcü ngĩpatawa pexĩ i ngẽma nge i Raá i naxü̃nemaxã taxexü̃ rü guxü̃ma i ngĩtanüxü̃maxã nua ngĩxü̃ pega, yema ngĩmaxã ipexunetaxü̃rüxü̃! —ñanagürü.
23 Rü nümagü rü ngĩchiü̃gu nachocu. Rü Raáxü̃ ínagaxüchigü tümamaxã ya ngĩnatü, rü ngĩé, rü ngĩenexẽgü, rü guxü̃ma ga ngĩtanüxü̃. Rü wüxi ga nachica ga tama ínaxãũcümaxü̃gu ga Iraétanüxü̃ ípegüxü̃arü düxétüguama ngĩxü̃ nayamugü.
24 Rü yemawena rü nüma ga Iraétanüxü̃ rü nayagugü ga guma ĩane namaxã ga norü yemaxü̃gü. Rü yema íyaxüxẽẽgüxü̃ nixĩ ga diẽrumü, rü úiru, rü yemaxü̃gü ga bróũchenaxca̱x, rü fierunaxca̱x. Rü yema rü Cori ya Tupanaarü yemaxü̃ inuxü̃gu nayanu.
25 Natürü nüma ga Yochué rü tama ngĩxü̃ nima̱x ga Raá, rü ñu̱xũchi ngĩtanüxü̃ rü tama nanadai, yerü ngĩma nixĩ ga iyacu̱xgüãxü̃ ga yema Iraétanüxü̃ ga Yochué Yericúwa mugüxü̃ nax ngugütaewa naxĩxü̃ca̱x. Rü yexgumaü̃cüxü nixĩ ga yema ngĩtanüxü̃ ga Raá rü Iraétanüxü̃tanüwa namaxẽxü̃.
26 Rü yemawena nüma ga Yochué rü nanaxuegu ga ñaa dexa rü ñanagürü: —Tupanape̱xewa rü chixexü̃ tá tüxü̃ nangupetü ya yíxema wena inaxügüxe nax ítanadaxẽẽxü̃ ya yimá ĩane ya Yericú. Rü ngẽxguma ítanaxügügu nax wena ítanadaxẽẽxü̃ ya yimá ĩane rü tümane ya yamaxecüca̱x tá ínangu i yu. Rü ngẽxguma nanucugu i naxtapü̱xarü ĩã̱xgü rü tümane ya rübumaecüca̱x tá ínangu i yu —ñanagürü.
27 Rü nüma ga Cori ya Tupana rü Yochuéxü̃ narüngü̃xẽxẽ, rü yemaca̱x guxü̃ma ga yema nachixü̃anecüã̱xgüwa nanguchiga.
