Josué 7:1-26
7 Natürü wüxi ga Yudátanüxü̃ ga Acáü̃gu ãégaxü̃ ga Camí nane ga Chadítaxa rü Chérataxa ixĩxü̃, rü nanadeama ga ñuxre ga yemaxü̃gü ga Tupana chu̱xuxü̃. Rü yemaca̱x ga guxü̃ma ga Iraétanüxü̃ rü naxüétüü̃gü ga Cori ya Tupanape̱xewa yerü ga Acáü̃ rü nanade ga yema Tupana chu̱xuxü̃. Rü yemaca̱x ga Cori ya Tupana rü Iraétanüxü̃maxã nanu.
Acáü̃arü chixexü̃gagu rü Iraétanüxü̃xü̃ narüporamaegü ga ĩane ga Áiarü duü̃xü̃gü
2 Rü nüma ga Yochué rü Yericúwa inanamuãchitanü ga ñuxre ga yatügü nax ĩane ga Áiwa yangugütaegüxü̃ca̱x, rü nüxü̃́ natauxcha nax guma ĩane rü tá nagu nachocuxü̃ca̱x. Rü guma ĩane ga Ái rü ĩane ga Betéarü éstewaama nayexma ga Bex-abéü̃arü ngaicamana. Rü nümagü rü yéma naxĩ rü nayangugütaegü.
3 Rü yexguma nawoegugu, rü Yochuéxü̃ ñanagürügü: —Tama tanaxwa̱xe i guxü̃ i churaragümaxã naxca̱x ítayachoõchi ya yimá ĩane ya Ái, erü 2,000 rüe̱xna 3,000 i churaragümaxã nixĩ i marü yanguxü̃ nax yapu̱xü̃ ya yimá ĩane. ¡Rü taxũtáma guxü̃ i churaragü ngéma cumugü! Erü tama namu i ngẽma duü̃xü̃gü ya yimá ĩanena daugüxü̃ —ñanagürügü.
4 Rü 3,000 ga churaragü nixĩ ga Áica̱x íyaxüãchixü̃. Natürü nüma ga yema Áicüã̱x rü Iraétanüxü̃xü̃ narüporamaegü rü nayabuxmüxẽxẽ.
5 Rü 36 ga Iraétanüxü̃xü̃ nadai, rü yema togü rü nawe nangẽgü ñu̱xmata guma ĩanearü ĩxpemawa nangugü, rü yexma norü tuãchianexü̃gu nayadai. Rü yemaca̱x ga Iraétanüxü̃ rü narümaachitanü rü poraãcü namuü̃e.
6 Rü nüma ga Yochué rü yema Iraétanüxü̃arü ãẽ̱xgacügü rü norü ngechaü̃maxã nügüchirugu nagáugüe rü waixü̃müte̱xemaxã nügü nigügüeru. Rü ñu̱xmachi yema baú ga Tupanaarü mugüchixü̃pe̱xegu nanangücuchitanü ñu̱xmata nayáuane.
7 Rü nüma ga Yochué rü ñanagürü: —Pa Corix, ¿tü̱xcüü̃ cuyachoü̃xẽxẽ ga ñaa duü̃xü̃gü ga natü ga Yudáü̃wa? ¿Ẽ̱xna Amoréutanüxü̃me̱xẽgu toxü̃ cuyixẽxẽxü̃ca̱x nixĩ i nua toxü̃ cugagüxü̃ nax ngẽmaãcü toxü̃ nada̱i̱xü̃ca̱x? Rü narümemae chi nixĩ ga natü ga Yudáü̃arü tocutüwa chitama tangexmagüxü̃.
8 Pa Corix, ¿Ta̱xacü tá chaxüxü̃ i ñu̱xmax? Erü nüma i Iraétanüxü̃ rü marü norü uanücha̱xwa nibuxmü.
9 Rü nüma i Canaáü̃tanüxü̃ rü guxü̃ma i duü̃xü̃gü i ñaa naanegu pegüxü̃ rü tá nüxü̃ nacuáchigagü i ngẽma toxü̃ ngupetüxü̃. Rü nüma rü tá wüxigu toxca̱x ínayaxüãchi nax toxü̃ nada̱i̱xü̃ca̱x, rü taxúetama ítayaxǘ i totanüwa. ¿Rü texé tá cuxü̃ ticua̱xüxü̃ rü cuxü̃ tataxẽxẽ i ngẽxguma? —ñanagürü ga Yochué.
10 Rü nüma ga Cori ya Tupana rü Yochuéxü̃ nangãxü̃ rü ñanagürü: —¡Inachi! ¿Ta̱xacü ngéma cuxü i ñaxtüanegu cunangücuchixü̃?
11 Rü nüma i Iraétanüxü̃ rü chixexü̃ naxügü. Erü nümagü rü tama nayanguxẽxẽ i ngẽma mugü ga namaxã nüxü̃ chixuxü̃. Rü nanayauxgüama i ngẽma ngẽmaxü̃gü i nüxna chachu̱xuxü̃. Rü meama nüxü̃ nacua̱xgüãcüma naxca̱x nangĩ̱xgü i ngẽma choxrü ixĩxü̃, rü norü ngẽmaxü̃gütanügu nayacu̱xgü.
12 Rü ngẽmaca̱x i pemax i Iraétanüxü̃ rü taxucürüwama nüxü̃ perüporamae i perü uanügü. Rü naxcha̱xwa tá pibuxmü rü pegagutama nixĩ i namexü̃ i noxtacüma peyuexü̃. Rü ngẽxguma i pema i ñu̱xma rü tama paxa ípenaguxgu i ngẽma pexna chachu̱xuxü̃, rü marü taxũtáma petanüwa changexma.
13 ¡Rü ñu̱xma rü inachi, rü nangutaque̱xexẽxẽ i duü̃xü̃gü! ¡Rü namaxã nüxü̃ ixu nax nügü yamexẽxẽgüxü̃ca̱x nax ngẽmaãcü moxü̃ chope̱xewa nangugüxü̃ca̱x! Erü choma i Cori ya perü Tupana rü pemaxã nüxü̃ chixu rü pemax, Pa Iraétanüxü̃x, rü penayaxu i ngẽma pexna chachu̱xuxü̃. Rü ngẽxguma taxũtáma ípenaguxgu rü pegüwa nüxü̃ pexoo̱xgux i ngẽma chixexü̃, rü taxucürüwatama perü uanügüxü̃ perüporamae.
14 Rü moxü̃ pa̱xmama rü chanaxwa̱xe i natücumümaxãchigü chope̱xewa naxĩ i guxü̃ma i Iraétanüxü̃. Rü choma i perü Tupana nax chixĩxü̃ rü tá nüxü̃ chaxuneta i ngẽma natücumü i nawa naxüxü̃ i ngẽma yatü i chixexü̃ üxü̃. Rü ñu̱xũchi ngẽma natücumü rü tá chope̱xewa naxĩ. Rü tá nüxü̃ chaxuneta i ngẽma natanüxü̃tücumü i nawa nangẽxmaxü̃ i ngẽma chixexü̃ üxü̃. Rü ngẽma natanüxü̃tücumü rü tá chope̱xewa naxĩ. Rü choma rü tá nüxü̃ chaxuneta ya yima ĩpata ya nawa nangẽxmane i ngẽma yatü i chixexü̃ üxü̃. Rü yima ĩpatacüã̱x rü tá chope̱xewa naxĩ. Rü ñu̱xũchi yimá ĩpatacüã̱xtanüwa rü tá nüxü̃ chaxuneta i ngẽma yatü i chixexü̃ üxü̃.
15 Rü yíxema tümaxü̃tagu nüxü̃ iyangaugüxe i ngẽma ngẽmaxü̃gü ga chachu̱xuxü̃, rü tá tüxü̃ nigugü namaxã i tümaxacügü rü guxü̃ma i tümaarü ngẽmaxü̃gü, erü tümagagu chixexü̃ naxca̱x ínangu i Iraétanüxü̃, erü tama naga taxĩnü i chorü mu —ñanagürü ga Tupana.
Acáü̃arü poxcuchiga
16 Rü moxü̃ãcü ga Yochué rü pa̱xmamaxü̃chi ínarüda rü duü̃xü̃güxü̃ namu nax natücumümaxãchigü Tupanape̱xewa naxĩxü̃. Rü nüma ga Cori ya Tupana rü Yudátücumüxü̃ naxuneta.
17 Rü yexguma ga Yochué rü Yudátücumümaxã nüxü̃ nixu nax nügütanüxü̃tücumüãcü rü Tupanape̱xewa nax naxĩxü̃. Rü Tupana rü Chératanüxü̃xü̃ naxuneta. Rü yema Chératanüxü̃wa rü guma Chadípatacüã̱xü̃ naxuneta.
18 Rü yema yatüxü̃gü ga Chadípatacüã̱x rü Tupanape̱xewa naxĩ. Rü Tupana nüxü̃ naxuneta ga Acáü̃ ga Camí nane ga Chadítaxa ga Yudátanüxü̃ ixĩcü. Rü Chadínatü rü Chéra nixĩ.
19 Rü yexguma ga Yochué rü Acáü̃xü̃ ñanagürü: —Pa Chaunex, name nixĩ i cunataxẽxẽ rü nüxü̃ quicua̱xüxü̃ ya Cori ya Iraétanüxü̃arü Tupana. ¡Rü chomaxã nüxü̃ ixu i ta̱xacü nax cuxüxü̃! ¡Rü taxṹ icuyacúxü̃! —ñanagürü.
20 Rü Acáü̃ nanangãxü̃ rü ñanagürü: —Aixcüma nüxü̃ chixu, rü chixexü̃ chaxü namaxã ya Cori ya Iraétanüxü̃arü Tupana. Rü ñaa nixĩ i ngẽma chaxüxü̃.
21 Rü Yericúwa nüxü̃ chadau ga wüxi ga mexẽchixü̃ ga naxchiru ga Babiróniacüã̱xarü ü rü 200 tachinü ga diẽru, rü wüximena̱xã ga úiru ga ngãxü̃ ga quíruarü yexera yaxü̃. Rü choxü̃́ nangúchaü̃ ga yema yemaxü̃gü, rü yemaca̱x chaugüxü̃́ chanade, rü chauchiü̃machiãgu chanata̱xgü. Rü ngẽma diẽrutachinügü rü aixepeguama chananu —ñanagürü.
22 Rü yexgumatama ga Yochué rü Acáü̃chiü̃wa nanamugü ga ñuxre ga yatügü, rü yexma nüxü̃ nayangaugü ga yema yemaxü̃gü ga yexma icu̱xgüxü̃ namaxã ga yema diẽru ga natüü̃guama nuxü̃.
23 Rü nanade ga yema yemaxü̃gü rü Yochuépe̱xewa nanana nape̱xewa ga guxü̃ma ga Iraétanüxü̃. Rü nümagü ga Iraétanüxü̃ rü Tupanape̱xegu nayanu.
24 Rü yemawena rü Acóxarü doxonexü̃wa Acáü̃xü̃ nagagü namaxã ga yema diẽrutachinügü, rü yema naxchiru, rü yema úirumena̱xã, rü nanegümaxã, rü naxacügümaxã, rü norü wocagümaxã, rü norü búrugümaxã, rü norü carnérugümaxã, rü napatamaxã, rü guxü̃ma ga ta̱xacü nüxü̃́ yexmaxü̃maxã.
25 Rü Yochué rü Acáü̃xü̃ ñanagürü: —¿Tü̱xcüü̃ chixexü̃ tatanüwa ícunguxẽxẽ? Rü ñu̱xma ya Cori ya Tupana rü ngẽma chixexü̃ tátama nixĩ i cuxna nanguxẽẽxü̃ —ñanagürü. Rü yema ñaxgu ga Yochué, rü guxü̃ma ga Iraétanüxü̃ rü nutamaxã Acáü̃xü̃ rü natanüxü̃xü̃ nadai. Rü ñu̱xũchi natanüwa nanangixichi.
26 Rü yemawena rü nutagü naétüwa nanawogü. Rü gumá nutagü rü ñu̱xma rü ta ngẽxma naxãũxchita. Rü ngẽmaca̱x i ñu̱xmax i ngẽma nachica rü Acóxarü doxonexü̃gu naxãéga. Rü yemaacü Iraétanüxü̃maxã narüngüxmü ga Cori ya Tupana.
