Josué 8:1-35
8 Rü nüma ga Cori ya Tupana rü Yochuéxü̃ ñanagürü: —¡Taxuca̱xma cumuü̃ rü icurümaãchi! ¡Rü inaxũãchi naxca̱x ya yimá ĩane ya Ái, namaxã i guxü̃ma i curü churaragü! Erü choma rü tá pora cuxna chaxã nax yimá ĩane ya Áiarü ãẽ̱xgacüxü̃ rü norü duü̃xü̃güxü̃ curüporamaexü̃ca̱x. Rü yimá norü ĩane rü norü naane rü cuxrü tá nixĩ.
2 Rü guma Yericúmaxã rü norü ãẽ̱xgacümaxã cuxüxü̃rüxü̃ tátama cunaxü namaxã ya yima ĩane ya Ái rü norü ãẽ̱xgacü. Natürü i ñu̱xmagu rü marü name i pegüxü̃́ penade i norü ngẽmaxü̃gü rü naxü̃nagü. Rü tá ípenabaixgü, rü norü ĩaneca̱xwenaama tá pixĩĩchi —ñanagürü.
3 8:3-4 Rü yexguma ga Yochué rü nügü namexẽxẽ guxü̃ma ga norü churaragümaxã nax ĩane ya Áica̱x íyaxü̃ãchixü̃ca̱x. Rü nayadexechi ga 30,000 ga churaragü, rü chütacü yéma nanamugü. Rü nayaxucu̱xẽgü rü ñanagürü nüxü̃: —¡Mea iperüxĩnüe! ¡Rü ipexĩãchi rü norü ĩaneca̱xwe̱xgu peyarücu̱xgü! ¡Rü ípememaregü nax naxca̱x ípeyachoõchixü̃ca̱x ya yimá ĩane!
4 Nüü̃ nadau 8:3
5 Rü ngẽma togü i churaragü rü chomaxã tá yimá ĩaneca̱x ínayachoõchi. Rü ngẽxguma yimá ĩanecüã̱x toxca̱x yayixgux nax toxü̃ nada̱i̱xü̃ca̱x, rü toma rü tá tibuxmü ga to ga ngunexü̃gurüxü̃.
6 Rü ngẽxguma i nümagü rü tá towe nangẽgü erü tá nagu narüxĩnüe nax noxrirüxü̃ naxcha̱xwa ibuxmüxü̃ i yixema.
7 Rü ngẽxguma i pema rü tá peyayi i ngẽma ípicu̱xgüxü̃wa rü yima ĩanegu tá pichocu, erü Cori ya tórü Tupana rü pexme̱xgu tá nananguxẽxẽ ya yima ĩane.
8 Rü ngẽxguma marü nagu pichocu̱xgu, rü tá nawa penangĩxichi, ngẽma Cori ya Tupana nüxü̃ ixuxü̃rüxü̃. Rü ngẽmaãcü nixĩ i pexü̃ chamuxü̃ —ñanagürü ga Yochué.
9 Rü yexguma ga Yochué rü inanamuãchitanü ga yema churaragü. Rü nümagü rü inaxĩãchi rü Beté rü Áiarü ngaxü̃gu nicu̱xgü ga Áiarü oéstewaama. Natürü nüma ga Yochué rü yema ínapegüxü̃watama nanangupetüxẽxẽ ga chütaxü̃.
10 Rü moxü̃ãcü noxri yangunechaü̃gu rü ínarüda ga Yochué rü norü churaragüxü̃ nidaugü. Rü ñu̱xũchi nape̱xegu naxã namaxã ga Iraétanüxü̃arü ãẽ̱xgacügü. Rü ĩane ga Áica̱x ínayaxüãchi.
11 Rü guxü̃ma ga norü churaragü rü guma ĩanepe̱xewaama nüxü̃ ningaicaetanü. Rü wüxi ga doxonexü̃pechinüwa nayachaxãchitanü ga guma ĩanearü nórtewaama. Rü yema doxonexü̃ rü guma ĩanearü rü yema Yochuéarü churaragüarü ngaxü̃wa naxǘ.
12 Rü nüma ga Yochué rü ĩane ga Betéarü rü Áiarü ngaxü̃gu nayacu̱xgü ga to ga 5,000 ga yatügü ga guma ĩanearü oéstewaama.
13 Rü yemaacü ga Iraétanüxü̃arü churaragü rü taxregu niyauxyetücumü. Rü yema wüxitücumü rü ĩanearü oéstecüwagu nicu̱xgü, rü yema totücumü rü yema íyachaxãchitanüxü̃wa nayexmagü ga guma ĩanearü nórtewaama. Rü yema chütaxü̃gu ga Yochué rü nanaxũpe̱xe rü nüxíra yema doxonexü̃arü ngãxü̃wa nangu.
14 Rü yexguma Iraétanüxü̃xü̃ nada̱u̱xgu ga Áiarü ãẽ̱xgacü rü norü churaragümaxã paxa nayayi nax nügü nada̱i̱xü̃ca̱x namaxã ga yema Iraétanüxü̃ ga doxonexü̃arü tocutüwa yexmagüxü̃. Natürü tama nüxü̃ nacua̱x rü yema togü ga Iraétanüxü̃ nax bexma norü ĩaneca̱xwe̱xgu yacu̱xgüxü̃.
15 Rü nüma ga Yochué rü norü churaragümaxã nibuxmüneta. Rü yema nama ga chianexü̃wa nadaxü̃gu nixü naxcha̱xwa ga yema Áiarü churaragü.
16 Rü guxü̃ma ga churaragü ga guma ĩane ga Áicüã̱x ixĩgüxü̃ rü Yochuéwe nangẽgü. Rü yexguma Yochuéwe nangegügu rü yema norü ĩanena niyáxü̃etanü.
17 Rü guxü̃ma ga churaragü ga Áicüã̱x rü Betécüã̱x rü Iraétanüxü̃we nangẽgü, rü taxuxü̃ma ĩanewa nayaxǘ. Rü yema Iraétanüxü̃we nax nangegüxü̃gagu rü guma ĩane rü taxúema nüxna tadau rü nangeenümare ga norü ĩã̱x.
18 Rü yexguma ga nüma ga Cori ya Tupana rü Yochuéxü̃ ñanagürü: —¡Ẽcü, cua̱xruxü̃ nüxna naxã i ngẽma curü churaragü i ĩaneca̱xwe̱xgu icu̱xgüxü̃ nax nagu nachocuxü̃ca̱x ya yima ĩane ya Ái, erü tá cuxme̱xgu chananguxẽxẽ ya yima ĩane! —ñanagürü ga Tupana. Rü nüma ga Yochué rü cua̱xruxü̃ inaxã nax nagu nachocuxü̃ca̱x ga guma ĩane.
19 Rü yexguma ga yema icu̱xgüxü̃ ga churaragü rü paxãma ínaxüxü̃ rü gumá ĩanegu nachocu rü nawa nanangixichigü.
20 Rü yexguma nügü íyadaugügu ga yema churaragü ga Áicüã̱x rü nüxü̃ nadaugü ga nax ínatü̱xünagüétüxü̃ ga guma norü ĩane. Rü yemaca̱x taxuwama naxüéga, yerü nüma ga Iraétanüxü̃ ga noxri naxcha̱xwa chianexü̃wa buxmüchiréxü̃ rü nügü nawoegu nax nadaiaxü̃ca̱x.
21 Rü yexguma Yochué nüxü̃ da̱u̱xgux ga yema Iraétanüxü̃ ga icu̱xgüxü̃ rü marü guma ĩanegu nax nachocuxü̃ rü nawa nax nangixichigüãxü̃, rü nügü nawoegu rü Áicüã̱xmaxã nügü nadai.
22 Rü ñu̱xũchi ga yema Iraétanüxü̃arü churaragü ga ĩanegu chocuxü̃ rü ínachoxü̃. Rü yemaacü ga yema taxretücumü ga Iraétanüxü̃ rü nügüwa nanaxüxẽxẽ rü ínanayauxü̃. Rü guxü̃ma nadai.
23 Natürü tama nayama̱xgü ga gumá Áiarü ãẽ̱xgacü. Rü nayaya̱u̱xgümare rü Yochuéxü̃tawa nanagagü.
24 Rü yexguma taramaxã nadaiãgu ga guxü̃ma ga Áiarü churaragü ga Iraétanüxü̃we ngẽgüxü̃, rü nüma ga Iraétanüxü̃ rü Áiarü ĩaneca̱x nawoegu rü nanadai ga yema duü̃xü̃gü ga guma ĩanewa yaxǘgüxü̃.
25 Rü yema ga ngunexü̃gu rü nayue ga 12,000 ga duü̃xü̃gü ga Áicüã̱x ga iyatüxü̃ rü ngexü̃gü.
26 Rü nüma ga Yochué rü nanamuama ga norü churaragü nax iyadaxẽẽgüãxü̃ca̱x nax nadaiaxü̃ ga yema Áicüã̱x ñu̱xmata guxü̃xü̃ma nadai.
27 Rü nüma ga Iraétanüxü̃ rü nanade ga yema naxü̃nagü rü yemaxü̃gü ga guma ĩanewa yexmagüxü̃. Yerü yemaacü nixĩ ga Cori ya Tupana rü Yochuémaxã nüxü̃ yaxuxü̃.
28 Rü nüma ga Yochué rü nayagu ga guma ĩane ga Ái rü yemaacü nanaxoxẽxẽ. Rü nachitaxü̃xica yéma nayaxǘ. Rü ngẽmatama nixĩ i ñu̱xma nüxü̃ idauxü̃.
29 Rü nüma ga Yochué rü wüxi ga naixtanüwa nanatuxẽxẽ ga Áiarü ãẽ̱xgacü ñu̱xmata nayáuane. Rü yexguma marü üa̱xcü yarüxücuxgu rü norü churaragüxü̃ namu nax ínachü̱xüxüegüaxü̃ca̱x rü ĩanearü poxeguxü̃arü ĩã̱xgu naxügüã̱xü̃ca̱x rü ngéma nuta naétü nanugüxü̃ca̱x. Rü gumá nutagü ga naétü nugücü rü ñu̱xma rü ta ngéma nangẽxmagü.
Yochué rü ma̱xpǘne ga Ebáwa duü̃xü̃güca̱x nüxü̃ nadaumatü ga Tupanaarü mugü
30 8:30-31 Rü yexguma ga Yochué rü ma̱xpǘne ga Ebágu Cori ya Iraétanüxü̃arü Tupanaca̱x nanaxü ga wüxi ga ãmarearü guruxü̃, yema gumá Tupanaarü duü̃ ga Moiché Iraétanüxü̃maxã nüxü̃ ixuxü̃rüxü̃ ga yexguma naxümatüãgu ga ore ga ñaxü̃: “¡Ẽcü wüxi i ãmarearü guruxü̃ naxü nawa ya nuta ya tama imexẽxẽpütagücü!” ñaxü̃. Rü yexguma ga yema Iraétanüxü̃ rü yema guruü̃wa nayagu ga naxü̃nagü Tupanaarü ngüxmüxẽẽruxü̃.
31 Nüü̃ nadau 8:30
32 Rü yemawena ga nüma ga Yochué rü Iraétanüxü̃pe̱xewa gumá nutagü ga ãmare nawa ínagucüpǘtagu nanaxümatü ga Tupanaarü mugü ga Moiché nüxna ãxü̃.
33 Rü guxü̃ma ga Iraétanüxü̃ rü norü ãẽ̱xgacügü rü norü churaragüerugü rü ãẽ̱xgacügü ga guxchaxü̃arü mexẽẽruxü̃gü rü yema togü ga tama Iraétanüxü̃ ixĩgüxü̃ ga natanüwa maxẽxü̃maxã, rü yexma nachigü nape̱xegu ga yema chacherdótegü ga Lebítanüxü̃ ga naatügu yangegüxü̃ ga yema baú ga Tupanaarü mugüchixü̃. Rü yema nax mexü̃ namaxã naxuegugüxü̃ca̱x ga Iraétanüxü̃ rü norü ngãxü̃tücumü ga duü̃xü̃gü rü ma̱xpǘne ga Guerichíü̃ íyexmaxü̃guama nachigü rü yema totücumü rü ma̱xpǘne ga Ebá íyexmaxü̃guama nachigü yema Tupanaarü duü̃ ga Moiché ü̃pa namaxã nüxü̃ ixuxü̃rüxü̃ ga yexguma noxri mexü̃ namaxã naxuegugu ga yema Iraétanüxü̃.
34 Rü yemawena ga Yochué rü duü̃xü̃güca̱x tagaãcü nüxü̃ nadaumatü ga Tupanaarü mugü, rü ñuxãcü Tupana rü mexü̃ namaxã naxuegu i ngẽma duü̃xü̃gü i naga ĩnüexü̃, rü chixexü̃ namaxã naxuegu i ngẽma tama naga ĩnüexü̃.
35 Rü guxü̃ma ga yema mugü ga Moiché nüxna ãxü̃ rü Yochué nüxü̃ nadaumatü nape̱xewa ga guxü̃ma ga Iraétanüxü̃ ga iyatüxü̃, rü ingexü̃, rü buxü̃gü, rü yema togü ga tama Iraétanüxü̃ ixĩgüxü̃ ga natanüwa maxẽxü̃.
