Josué 9:1-27
9 Rü gumá Itítanüxü̃arü ãẽ̱xgacü, rü Amoréutanüxü̃arü ãẽ̱xgacü, rü Canaáü̃tanüxü̃arü ãẽ̱xgacü, rü Ferechéutanüxü̃arü ãẽ̱xgacü, rü Ebéutanüxü̃arü ãẽ̱xgacü, rü Yebuchéutanüxü̃arü ãẽ̱xgacü, rü nüxü̃ nacuáchigagü ga yema Yericúwa rü Áiwa ngupetüxü̃. Rü yema ãẽ̱xgacügü rü natü ga Yudáü̃arü oéstegu nixĩ ga naxãchiü̃güxü̃, rü nümaxü̃ rü ínamáxpü̱xanexü̃gu rü togü rü ínametachinüanexü̃gu, rü togü rü Már i Mediteráneucutügu rü ñu̱xmata Líbanuarü naanewa nangu.
2 Rü yexguma ga guxü̃ma ga yema ãẽ̱xgacügü rü nügümaxã nagu narüxĩnüe nax nügü nangü̃xẽẽgüxü̃ca̱x, rü Yochuémaxã rü Iraétanüxü̃maxã nügü nada̱i̱xü̃ca̱x.
3 Natürü nüma ga Ebéutanüxü̃ ga ĩane ga Gabaóü̃gu ãchiü̃güxü̃ rü ta nüxü̃ nacuáchigagü ga yema Yochué üxü̃ namaxã ga gumá ĩanegü ga Yericú rü Ái.
4 9:4-5 Rü nagu narüxĩnüe nax ñuxãcü womüxẽẽãcüma nügü ínapoxü̃güxü̃. Rü yemaca̱x Yochuéxü̃tawa naxĩ ga ñuxre ga norü duü̃xü̃gü ga ingauxchiruxü̃, rü ingauarü chapatuã́xü̃, rü norü tochicaxü̃ ga búrutawa rü ningau. Rü norü bínuchíü rü marü ñuxgumaxü̃güxü̃ nixĩgü, rü norü paũ rü nichúe. Rü yemagu nügü nicu̱xgü nax ñoma yáxü̃wa ne naxĩxü̃rüxü̃ yixĩgüxü̃ca̱x.
5 Nüü̃ nadau 9:4
6 Rü yexguma yema nachica ga Iraétanüxü̃ ípegüxü̃ ga Guirigágu ãégaxü̃wa nangugügu, rü Yochuéxü̃ rü Iraétanüxü̃xü̃ ñanagürügü: —Yáxü̃guxü̃ i naanewa ne taxĩ rü tanaxwa̱xe nax tomaxã ipexügagüxü̃ nax tama yigü ida̱i̱xü̃ca̱x —ñanagürügü.
7 Rü nüma ga Iraétanüxü̃ rü Ebéutanüxü̃xü̃ nangãxü̃gü rü ñanagürügü: —Bexmana i pemax rü torü ngaicamagutama pipegü rü ñuxãcü tá i pemaxã mexü̃ i ĩnüwa tangugüxü̃ —ñanagürügü.
8 Natürü ga nümagü rü Yochuéxü̃ nangãxü̃gü rü ñanagürügü: —Toma rü tá pexme̱xwa togü tangexmagüxẽxẽ nax pexü̃́ tapuracüexü̃ca̱x —ñanagürügü. Rü nüma ga Yochué rü nüxna naca rü ñanagürü: —¿Texé pixĩgü i pemax? ¿Rü ngextá ne pexĩ? —ñanagürü.
9 9:9-10 Rü nümagü rü Yochuéxü̃ nangãxü̃gü rü ñanagürügü: —Yáxü̃wa ne taxĩ, erü nachigaxü̃ taxĩnüe ya Cori ya perü Tupana. Rü nüxü̃ tacuáchiga ga yema Equítuanewa naxüxü̃, rü ñuxãcü natü i Yudáü̃arü tocutüwa pexü̃ nangü̃xẽẽxü̃ nax penada̱i̱xü̃ca̱x ga yema taxre ga ãẽ̱xgacü ga Amoréutanüxü̃arü ga Chióü̃ ga Ebóü̃wa ãẽ̱xgacü ixĩcü, rü Óx ga Bacháü̃wa ãẽ̱xgacü ixĩcü ga Atarúgu maxü̃cü.
10 Nüü̃ nadau 9:9
11 Rü ngẽmaca̱x i torü ãẽ̱xgacügü rü tomücügü rü ñanagürügü toxü̃: “¡Pewemü tá ípinge i perü namawaxü̃ rü Iraétanüxü̃tanüwa ípeyadaugü, rü ñapegüxü̃ tá nüxü̃: ‘Rü pexme̱xwa togü tangexmagüxẽxẽ rü mexü̃ i ĩnüwa pemaxã tangugüchaü̃’, ñapegü ta!” ñanagürügü toxü̃.
12 Rü yexguma itaxĩãchigu nax pexca̱x tayadauxü̃ca̱x rü ga paũ rü nanai, natürü i ñu̱xma rü marü nichu̱x rü nipamare.
13 Rü yexgumarüxü̃ ta i ñaa naxcha̱xmüxü̃ ga úbachíümaxã tanaxüãcu rü nimexẽchichire̱x ga noxri itaxĩãchigu, natürü i ñu̱xma rü marü narügáugü. Rü ngẽxgumarüxü̃ ta namaxã nangupetü i toxchiru rü torü chapatugü, erü yáxü̃wama ne taxĩ —ñanagürügü.
14 Rü nüma ga Iraétanüxü̃ rü yema Gabaóü̃cüã̱xwemüxü̃ nangõ̱xnetagü, natürü tama Cori ya Tupanana nacagüexíra ga ta̱xacü tá namaxã naxüexü̃ ga yema duü̃xü̃gü.
15 Rü yexguma ga Yochué rü yema Gabaóü̃cüã̱xmaxã mexü̃ ga ĩnüwa nangu, rü namaxã nüxü̃ nixu nax taxũtáma nadaiaxü̃. Rü yema togü ga Iraétanüxü̃arü ãẽ̱xgacügü rü Tupanaégagu Yochuérüü̃tama mexü̃gu yema Gabaóü̃cüã̱xmaxã narüxĩnüe.
16 Rü tomaepü̱x ga ngunexü̃ ngupetü̱xguwena rü nüma ga Iraétanüxü̃ rü nüxü̃ nacua̱xgü nax norü ngaicamagutama naxãchiü̃güxü̃ ga yema Gabaóü̃cüã̱x.
17 Rü yexguma ga ñuxre ga Iraétanüxü̃arü churaragü rü inaxĩãchi nax yema Gabaóü̃cüã̱xgüarü ĩanegüca̱x yadaugüxü̃ca̱x. Rü tomaepü̱x ga ngunexü̃gu norü ĩanegüwa nangugü. Rü gumá norü ĩanegü rü Gabaóü̃ nixĩ, rü Quefirá nixĩ, rü Beerúx nixĩ rü Quiriáx-yearíü̃ nixĩ.
18 Natürü nüma ga Iraétanüxü̃ rü tama yema Gabaóü̃cüã̱xgüxü̃ nadai yerü yema norü ãẽ̱xgacügü rü Cori ya Iraétanüxü̃arü Tupanaégagu nüxü̃ nixugüe nax taxũtáma nadaiaxü̃. Rü yemaca̱x ga Iraétanüxü̃ rü tama norü ãẽ̱xgacügümaxã nataãẽgü, rü nachigagu nidexagü.
19 Natürü nümagü ga yema ãẽ̱xgacügü rü ñanagürügü: —Toma rü Cori ya Iraétanüxü̃arü Tupanaégagu namaxã nüxü̃ tixu nax taxũtáma tanada̱i̱xü̃. Rü ngẽmaca̱x i ñu̱xma rü taxucürüwa tanadai.
20 Rü nüe namaxẽ, erü ngẽxguma chi taxũchima tayanguxẽẽgu i ngẽma Gabaóü̃cüã̱xgümaxã nüxü̃ tixuxü̃ rü nüma ya Tupana rü tomaxã chi nanu —ñanagürügü.
21 Rü yemaacü ga yema ãẽ̱xgacügü ga Iraétanüxü̃ rü norü duü̃xü̃gümaxã nüxü̃ nixu nax tama nadaiaxü̃ca̱x ga yema Gabaóü̃cüã̱x. Natürü nüma ga Iraétanüxü̃ rü norü dexáarü tooxü̃wa rü üxüarü tooxü̃wa nanapuracüexẽxẽ. Rü yemaacü tama nanadai ga yema Gabaóü̃cüã̱x.
22 Rü nüma ga Yochué rü naxca̱x naca ga yema Gabaóü̃cüã̱xgü, rü nüxna naca rü ñanagürü: —¿Tü̱xcüü̃ toxü̃ pewomüxẽxẽ nax pema rü nüxü̃ pixuxü̃ nax yáxü̃wa ne pixĩxü̃? Erü pema rü númacüã̱xgütama pixĩgü.
23 Rü ñu̱xma i pemax rü tá chixexü̃wa pengẽxmagü rü guxü̃gutáma puracütanüxü̃ pixĩgü, rü üxüarü yaxuwa rü dexáarü yaxuwa tá pepuracüe naxca̱x ya yimá chorü Tupanapata —ñanagürü.
24 Rü nümagü rü Yochuéxü̃ nangãxü̃gü rü ñanagürügü: —Rü ngẽmaãcü pemaxã nüxü̃ tixu erü poraãcü pexü̃ tamuü̃e erü nagu tarüxĩnüe nax toxü̃ pedaixü̃. Yerü nüxü̃ tacuáchigagü ya yimá perü Cori ya Tupana rü norü duü̃ ga Moichéxü̃ namu nax pexna naxããxü̃ i guxü̃ma i ñaa naane rü nadaiaxü̃ i guxü̃ma i duü̃xü̃gü i ñaa naanegu ãchiü̃güxü̃.
25 Natürü i ñu̱xma rü marü pexme̱xwa tangexmagü rü cuma i nüxü̃ cucuáxü̃ nax ta̱xacü tá tomaxã cuxüxü̃ —ñanagürügü.
26 Rü nüma ga Yochué rü tama nanaxwa̱xe nax Gabaóü̃cüã̱xgüxü̃ nada̱i̱xü̃ ga Iraétanüxü̃.
27 Rü yema ngunexü̃gu rü nüma ga Yochué rü Gabaóü̃cüã̱xmaxã nanaxuegu nax üxüarü yaxuwa rü dexáarü yaxuwa napuracüexü̃ naxca̱x ga Iraétanüxü̃ rü Tupanaarü ãmarearü guruxü̃. Rü ñu̱xma rü ta ngẽma Gabaóü̃cüã̱x rü ngẽmatama nixĩ i norü puracü i ngextá Tupana ínamaxẽxẽẽxü̃wa.
