San Juan 14:1-31
14 Rü Ngechuchu rü ñanagürü: —¡Taxṹ i penaxĩ̱xãchiãẽgüxü̃ i pemax! ¡Tupanaaxü̃́ peyaxõgü rü choxü̃́ rü ta peyaxõgü!
2 Chaunatüpatawa nangẽxma i muxũchixü̃ma i ucapugü. Ngẽxguma chi nataxuxguma, rü taxũchima pemaxã nüxü̃ chixu. Rü ngéma tá chaxũ nax pexca̱x chayamexẽẽxü̃ i pechicagü.
3 Rü ngẽxguma ngéma chaxũxgu rü choxü̃́ namexgu i wüxi i pechica, rü wena táxarü núma chaxũ. Rü pexü̃ tá chayagagü nax ngẽma íchangexmaxü̃wa pengẽxmagüxü̃ca̱x.
4 Rü pema rü marü nüxü̃ pecua̱x i nama i ngẽma íchaxũxü̃wa nadaxü̃ —ñanagürü ga Ngechuchu.
5 Rü Tumáchi rü ñanagürü: —Pa Corix, tama nüxü̃ tacua̱x nax ngextá cuxũxü̃. ¿Rü ñuxãcü tá i nüxü̃ tacuáxü̃ i ngẽma nama? —ñanagürü.
6 Rü Ngechuchu nanangãxü̃, rü ñanagürü: —Choma nixĩ i nama i Chaunatüxü̃tawa nadaxü̃. Rü ngẽma nüxü̃ chixuxü̃ rü aixcüma nixĩ. Rü choma nixĩ i duü̃xü̃güxü̃ chamaxẽxẽẽxü̃. Rü chaugaguxicatama nixĩ i Chaunatüxü̃tawa nangugüxü̃ i duü̃xü̃gü.
7 Rü ñu̱xma nax choxü̃ pecuáxü̃, rü Chaunatüxü̃ rü ta pecua̱xgü. Rü ñu̱xmaü̃cüü nixĩ i Chaunatüxü̃ pecuáxü̃, erü marü nüxü̃ pedaugü —ñanagürü.
8 Rü yexguma ga Ferípe rü ñanagürü: —Pa Corix, ¡Toxü̃ nüxü̃ nadauxẽxẽ ya Cunatü! Rü ngexicatama nixĩ i tanaxwa̱xexü̃ —ñanagürü.
9 Rü Ngechuchu nanangãxü̃, rü ñanagürü: —Pa Ferípex, ¿ñuxre ya taunecü marü petanüwa changexma rü ñu̱xma rü ta tama choxü̃ cucuáxü̃? Yíxema choxü̃ dauxe rü Chaunatüxü̃ rü ta tadau. ¿Rü tü̱xcüü̃ i ngẽxguma rü ta cunaxwa̱xexü̃ i pexü̃ nüxü̃ nax chadauxẽẽxü̃ ya Chaunatü?
10 ¿Tama ẽ̱xna cuyaxõ nax choma rü Chaunatümaxã rü wüxitama tixĩgüxü̃? Rü guxü̃ma i ngẽma pemaxã nüxü̃ chixuxü̃ rü tama chauechama nüxü̃ chixu. Erü yimá Chaunatü ya wüxiwa chomaxã ngẽxmacü, rü yimá nixĩ ya chowa naxücü i guxü̃ma i noxrütama puracü.
11 Chanaxwa̱xe i choxü̃́ peyaxõgü nax choma rü Chaunatümaxã wüxitama tixĩgüxü̃. Natürü woo tama ngẽma pixõgügu rü chanaxwa̱xe nax choxü̃́ peyaxõgüxü̃ naxca̱x i ngẽma mexü̃gü i norü poramaxã chaxüxü̃.
12 Aixcüma pemaxã nüxü̃ chixu rü yíxema choxü̃́ yaxṍxe rü tá tanaxü i ngẽma choma chaxüxü̃. Rü ngẽma chaxüxü̃arü yexera tá taxü, erü choma rü tá Chaunatüxü̃tawa chaxũ.
13 Rü guxü̃ma i ta̱xacü i chauégagu Tupanaxü̃tawa naxca̱x ípecaxü̃ rü tá pexna chanaxã. Rü ngẽmaãcü tá chanaxü nax chaugagu nangóxü̃ca̱x i Chaunatüarü pora.
14 Rü choma tá chanaxü i guxü̃ma i ta̱xacü i chauégagu choxna naxca̱x pecaxü̃.
Ngechuchu rü norü ngúexü̃gümaxã nüxü̃ nixu nax naxca̱x tá namuaxü̃ i Naãxẽ ya Üünexü̃
15 Rü ngẽxguma aixcüma choxü̃ pengechaü̃gu, rü naga tá pexĩnüe i chorü mugü.
16 Rü choma tá Chaunatüna naxca̱x chaca nax núma pexca̱x namuaxü̃ca̱x i to i perü ngü̃xẽẽruxü̃ i Naãxẽ ya Üünexü̃, nax guxü̃gutáma petanüwa nangẽxmaxü̃ca̱x.
17 Rü nüma i Naãxẽ ya Üünexü̃ tá nixĩ i pexca̱x nango̱xẽẽãxü̃ i ore i aixcüma ixĩxü̃. Rü ñoma i naanecüã̱x i duü̃xü̃gü rü taxucürüwama nanayauxgü, erü tama nüxü̃ nadaugü rü tama nüxü̃ nacua̱xgü. Natürü i pema rü marü nüxü̃ pecua̱x, erü nüma rü petanüwa nangẽxma. Rü guxü̃gutáma pewa nangẽxma.
18 Rü taxũtáma núma pexü̃ chawogümare i chomax, erü wena táxarü pexca̱x chataegu, nax petanüwa changexmaxü̃ca̱x.
19 Rü paxa tá nixĩ nax taxũtáma choxü̃ nadaugüxü̃ i ñoma i naanecüã̱x i duü̃xü̃gü. Natürü i pema rü tá choxü̃ pedaugü. Rü choma rü chamaxü̃ rü ngẽmaca̱x tá pemaxẽ i pema.
20 Rü ngẽxguma yuwa ícharüdaxgu rü wena chamaxü̱̃xgu, rü ngẽxguma tá nüxü̃ picua̱xãchitanü nax choma rü Chaunatüwa changexmaxü̃ rü pema i chowa pengẽxmagüxü̃ rü choma i pewa changexmaxü̃.
21 Yíxema texé ya nüxü̃ cuáxe rü naga ĩnüxe i chorü mugü, rü tanango̱xẽxẽ nax aixcüma choxü̃ tangechaü̃xü̃. Rü Chaunatü tá tüxü̃ nangechaü̃ ya yíxema choxü̃ ngechaü̃xe, rü choma rü tá ta tüxü̃ changechaü̃. Rü chaugü tá tüxü̃ chawe̱x —ñanagürü ga Ngechuchu.
22 Rü yema to ga Ngechuchuarü ngúexü̃ ga Yúdagu ãégaxü̃ (tama Yúda ga Icharióte), rü Ngechuchuna naca rü ñanagürü: —Pa Corix, ¿tü̱xcüü̃ toxü̃ cugü cuwe̱x, rü tama ñoma i naanecüã̱x i duü̃xü̃güxü̃ cugü cuwe̱x? —ñanagürü.
23 Rü Ngechuchu nanangãxü̃, rü ñanagürü: —Yíxema choxü̃ ngechaü̃xe rü naga taxĩnü i ngẽma ore i tümamaxã nüxü̃ chixuxü̃. Rü Chaunatü tá tüxü̃ nangechaü̃. Rü choma rü Chaunatümaxã wüxigu tümaxü̃tawa tá tangexmagü.
24 Yíxema tama choxü̃ ngechaü̃xe rü tama naga taxĩnü i ngẽma chorü ore. Rü ngẽma ore i chauxü̃tawa nüxü̃ pexĩnüexü̃ rü tama chorü ore nixĩ, natürü yimá Chaunatü ya núma choxü̃ mucüarü ore nixĩ.
25 Ñoma rü ta petanüwa changexma rü ngẽmaca̱x pemaxã nüxü̃ chixu i guxü̃ma i ngẽma ore i nüxü̃ chixuxü̃.
26 Natürü Chaunatü rü tá chauégagu núma nanamu i Naãxẽ ya Üünexü̃ nax pexü̃ nangü̃xẽẽxü̃ca̱x. Rü nüma i Naãxẽ ya Üünexü̃ tá pexü̃ nangúexẽxẽ i guxü̃ma, rü tá nüxna pexü̃ nacua̱xãchixẽxẽ i guxü̃ma i ore ga pemaxã nüxü̃ chixuxü̃.
27 Rü ñu̱xma nax pexna íchixũxü̃, rü pexna chanaxã i taãxẽ. Natürü ngẽma taãxẽ i pexna chaxãxü̃, rü tama ñoma i naanecüã̱x pexna ãxü̃ i taãẽrüxü̃ nixĩ. Rü tama chanaxwa̱xe i penaxĩ̱xãchiãẽgü rü pemuü̃e.
28 Marü pemaxã nüxü̃ chixu nax pexna tá íchixũxü̃ rü wena táxarü pexca̱x chataeguxü̃ nax pemaxã changexmaxü̃ca̱x. Rü choxü̃ pexĩnüe ga yexguma yema ñachagu. Rü ngẽxguma aixcüma choxü̃ pengechaü̃gu rü tá petaãẽgü i ngẽxguma nüxü̃ pecua̱xgu nax Chaunatüca̱x chataeguxü̃, erü Chaunatü rü chorü yexera nixĩ.
29 Rü naxü̃pa nax ínanguxü̃ i ngẽma tá ngupetüxü̃, rü pemaxã nüxü̃ chixu nax choxü̃́ peyaxõgüxü̃ca̱x i ngẽxguma ínanguxgu.
30 Marü taxũtáma muxü̃ i orexü̃ pemaxã chixu, erü marü paxa tá ínangu i Chataná i ñoma i naanemaxã icuáxü̃. Natürü nüma rü taxuwama choxü̃ narüyexera.
31 Natürü ngẽma tá choxü̃ ngupetüxü̃, rü ngẽmaãcü tá nixĩ nax guxü̃ma i ñoma i naanecüã̱x i duü̃xü̃gü nüxü̃ nacuáxü̃ca̱x nax choma rü Chaunatüxü̃ changechaü̃xü̃, rü chanaxüxü̃ i ngẽma nüma choxü̃ namuxü̃. ¡Rü ipechigü, rü ngĩxã ítixĩ! —ñanagürü ga Ngechuchu.
