San Juan 15:1-27
15 Rü ñanagürü ga Ngechuchu: —Choma nixĩ i ngẽma úbane i aixcüma ixĩxü̃. Rü Chaunatü nixĩ ya nüxna daucü i ngẽma úba.
2 Rü ngẽma úbachacüxü i tama choxü̃́ oxü̃, rü norü yora rü nayadae. Natürü ngẽma nachacüxü i oxü̃, rü mea nanamexẽẽtanü nax yexeraãcü poraãcü naxoxü̃ca̱x.
3 Pema rü marü pime, yerü naga pexĩnüe ga yema ore ga pemaxã nüxü̃ chixuxü̃.
4 Rü name nixĩ i guxü̃guma chowa peyaxũ̱xgü, ngẽma nax choma rü pewa chayaxṹxü̃rüxü̃. Erü wüxi i úbachacüxü rü tama nüxica naxo, ega tama nanewa yaxũxgux. Rü ngẽxgumarüxü̃ ta i pema rü taxuacüma ta̱xacü cha̱u̱xca̱x pexü, ega tama chowa peyaxũ̱xgüechagu.
5 Choma nixĩ i úbane, rü pema i nachacüügü. Rü yíxema chowa yaxṹẽchaxe rü choma i tümawa, rü aixcüma tá namu i norü o. Natürü ngẽxguma tama chowa peyaxũ̱xgüechagu, rü taxucürüwama ta̱xacü pexüe.
6 Rü texé ya tama chowa yaxṹẽchaxe rü tá ítata̱xüchi. Rü wüxi i úbachacüxü i daexü̃ rü ipaxü̃ rü üxüwa iguxü̃rüxü̃ tá tixĩ.
7 Rü ngẽxguma chowa peyaxũ̱xgüechagu rü taguma nüxü̃ ipeyarüngümaegu i ngẽma ore i pexü̃ changúexẽẽxü̃, rü marü name i naxca̱x ípeca i ta̱xacü i penaxwa̱xexü̃, rü choma rü tá pexna chanaxã.
8 Rü ngẽxguma muxü̃ i duü̃xü̃gü cha̱u̱xca̱x pegagügu, rü ngẽmawa tá nango̱x i Chaunatüarü pora. Rü ngẽmaãcü i pema rü aixcüma chorü ngúexü̃gü tá pixĩgü.
9 Choma rü pexü̃ changechaü̃ ngẽma Chaunatü choxü̃ ngechaü̃xü̃rüxü̃. Rü chanaxwa̱xe i aixcüma guxü̃guma choxü̃ pengechaxü̃ ngẽma pexü̃ changechaü̃xü̃rüxü̃
10 Choma rü naga chaxĩnü i Chaunatüarü mugü rü nüma rü guxü̃guma choxü̃ nangechaü̃. Rü ngẽxgumarüxü̃ ta ega naga pexĩnüegu i chorü mugü, rü guxü̃gutáma pexü̃ changechaü̃.
11 Choma rü pemaxã nüxü̃ chixu i ngẽma nax chauxrüxü̃ petaãẽgüxü̃ca̱x. Rü ngẽxguma i pema rü tá aixcüma petaãẽgü.
12 Rü choma pexü̃ chamu nax pemücügüxü̃ pengechaü̃güxü̃ca̱x, ngẽma choma nax pexü̃ changechaü̃xü̃rüxü̃.
13 Rü ngẽxguma wüxíe aixcüma tümamücüxü̃ ngechaü̃gu, rü woo tümaarü maxü̃ tümamücüca̱x itaxã. Rü nataxuma i to i ngechaü̃ i ngẽmaarü yexera ixĩxü̃.
14 Pema rü chomücügü pixĩgü i ngẽxguma chauga pexĩnüegu.
15 Choma rü marü tama chorü mugüruü̃ãcü pexü̃ chaxu. Erü wüxi i mugüruxü̃ rü tama nüxü̃ nacua̱x i ngẽma norü cori üxü̃. Natürü ñu̱xma rü chomücügümaxã pexü̃ chaxu, yerü pexü̃ nüxü̃ chacua̱xẽxẽ ga guxü̃ma ga ore ga Chaunatü chomaxã nüxü̃ ixuxü̃.
16 Pema rü tama pexíra cha̱u̱xca̱x pedaugü, natürü chaxíra nixĩ ga pexca̱x chadauxü̃ rü pexü̃ chamuxü̃ nax ngéma pexĩxü̃ca̱x rü nüxü̃ pixuxü̃ca̱x i chorü ore nax chauxü̃tawa penagagüxü̃ca̱x i muxü̃ma i duü̃xü̃gü, rü nümagü rü guxü̃guma choxü̃́ yaxõgüãxü̃ca̱x. Rü ñu̱xũchi Chaunatü ya Tupana tá pexna nanaxã i guxü̃ma i ta̱xacü i chauégagu nüxna naxca̱x pecaxü̃.
17 Rü ngẽma nixĩ i pexü̃ chamuxü̃ nax pemücügüxü̃ pengechaü̃güxü̃ca̱x.
Ñoma i naanecüã̱x i duü̃xü̃gü rü Ngechuchuchi rü norü ngúexü̃güchi naxaie
18 Ngẽxguma ñoma i naanecüã̱x i duü̃xü̃gü pexchi aiegu, rü ¡nüxna pecua̱xãchie nax chaxíra chauxchi naxaiexü̃!
19 Rü ngẽxguma chi ñoma i naanecüã̱x i duü̃xü̃gürüxü̃ pixĩgügu, rü ñoma i naanecüã̱x i duü̃xü̃gü rü chi pexü̃ nangechaü̃gü ngẽma natanüxü̃xü̃ nax nangechaü̃güxü̃rüxü̃. Natürü choma nixĩ ga pexca̱x chadauxü̃ natanüwa ga ñoma ga naanecüã̱x ga duü̃xü̃gü. Rü ngẽmaca̱x nixĩ i pexchi naxaiexü̃, erü marü tama naxrüxü̃ pixĩgü.
20 ¡Nüxna pecua̱xãchie ga pemaxã ñachagu: “Taxuxü̃ma i wüxi i coriarü duü̃xü̃ rü norü coriétüwa nügü nangẽxmaxẽxẽ”, ñachagu! Rü yema nax chauxchi nax naxaiexü̃, rü pexchi rü tá ta naxaie. Rü yexguma chi chauga naxĩnüegu rü ñu̱xma rü chi ta pega naxĩnüe.
21 Rü ngẽmaãcü ta chaugagu pexchi naxaie i ñoma i naanecüã̱x i duü̃xü̃gü erü tama nüxü̃ nacua̱xgü ya Chaunatü ga núma choxü̃ mucü.
22 Rü ngẽxguma chi choma tama namaxã chanango̱xẽẽgu nax chixri namaxẽxü̃, rü taxũchima nüxü̃ nacua̱xgü ga pecadu nax naxügüxü̃. Natürü ñu̱xma namaxã nüxü̃ nax chixuxü̃ nax chixri namaxẽxü̃, rü ngẽmaca̱x i ñu̱xma rü taxuacüma nüxü̃ nixugü nax yangearü pecaduã́xü̃.
23 Rü guxü̃ma i chauxchi aiexü̃ rü Chaunatüchi rü ta naxaie.
24 Rü ngẽxguma chi taxũchima ngẽma duü̃xü̃güpe̱xewa Tupanaarü poramaxã chanaxüxgu i ngẽma cua̱xruü̃gü i taguma texé ya togue üxü̃, rü taxũchima ninaguãchi nax yapecaduã́xü̃. Natürü marü nüxü̃ nadaugü i ngẽma cua̱xruü̃gü i Tupanaarü poramaxã chaxüxü̃, rü ngẽxguma rü ta chauxchi naxaieama rü Chaunatüchi rü ta naxaie.
25 Natürü ngẽma nangupetü nax yanguxü̃ca̱x i ngẽma ore i norü mugüpanegu ümatüxü̃ i ñaxü̃:“Chauxchi naxaie woo taxuxü̃ma i chixexü̃ chaxüxgu”,
ñaxü̃.
26 Natürü choma rü Chaunatüégagu tá pexca̱x núma chanamu i perü Ngü̃xẽẽruxü̃ ya Naãxẽ ya Üünecü i tá pexü̃ nüxü̃ cua̱xẽxẽxü̃ i ore i aixcüma ixĩxü̃. Rü ngẽxguma ínanguxgu rü nüma tá meama pemaxã nüxü̃ nixu i chauchiga.
27 Rü pema rü tá ta chauchigaxü̃ pixugüe, yerü noxri ichanaxügügu ga duü̃xü̃gümaxã nüxü̃ nax chixuxü̃ ga chorü ore, rü woetama marü chauxü̃tawa peyexmagü —ñanagürü ga Ngechuchu.
