San Juan 17:1-26
17 Rü yema ñaxguwena rü Ngechuchu daxũgu nadawenü, rü ñanagürü: —Pa Chaunatüx, marü nawa nangu i ngunexü̃ nax duü̃xü̃güarü pecaduca̱x chayuxü̃. Rü chanaxwa̱xe nax duü̃xü̃güxü̃ nüxü̃ cucua̱xẽẽxü̃ nax choma rü aixcüma Cune chixĩxü̃. Rü ngẽmaãcü i choma rü tá nüxü̃ nüxü̃ chacua̱xẽxẽ nax cuma rü aixcüma Tupana nax quixĩxü̃.
2 Erü marü choxna cuxãga nax guxü̃ma i duü̃xü̃gümaxã ichacuáxü̃ca̱x rü nax chanamaxẽxẽẽxü̃ca̱x i guxü̃ma i duü̃xü̃gü i choxna cumugüxü̃.
3 Rü ngẽma duü̃xü̃gü tá nüxü̃́ nangẽxma i maxü̃ i taguma gúxü̃ ega cuxü̃́ yaxõgüãgu nax cuxicatama Tupana nax quixĩxü̃, rü choxü̃́ yaxõgüãgu nax choma rü Cristu ga núma choxü̃ cumucü nax chixĩxü̃.
4 Choma rü ñoma i naanewa marü duü̃xü̃güxü̃ nüxü̃ chadauxẽxẽ nax cuma rü Tupana ya poraxüchicü quixĩxü̃, rü chayanguxẽxẽ i guxü̃ma i puracü ga nawa choxü̃ cumuxü̃.
5 Rü ñu̱xma Pa Chaunatüx, rü chanaxwa̱xe i cugüxü̃tawa choxü̃ cungexmaxẽxẽ nax choxü̃́ nangẽxmaxü̃ca̱x ga yematama pora ga cumaxã choxü̃́ yexmaxü̃ ga noxri tauta naane uxgu.
6 Rü yema duü̃xü̃gü ga cuma quidexechixü̃ ga ñoma ga naanewa nax choxna cumugüxü̃ca̱x rü marü namaxã nüxü̃ chixu nax texé quixĩxü̃ i cumax. Rü ngẽma duü̃xü̃gü rü woetama cuxrügü nixĩgü rü cuma nixĩ ga choxna cunamugüxü̃. Rü nüma rü marü naga naxĩnüe i curü ore.
7 Rü ñu̱xma rü marü nüxü̃ nacua̱x rü guxü̃ma i ngẽma choxna cuxãxü̃, rü aixcüma cuxü̃tawa ne naxũ.
8 Rü choma rü marü namaxã nüxü̃ chixu ga curü ore ga chomaxã nüxü̃ quixuxü̃. Rü nüma rü marü nayaxõgü i ngẽma ore. Rü nüxü̃ nicua̱xãchitanü nax aixcüma cuxü̃tawa ne chaxũxü̃ i chomax. Rü nayaxõgü nax cuma núma choxü̃ cumuxü̃.
9 Rü ngẽmaca̱x cuxna chaca nax nüxü̃ curüngü̃xẽẽxü̃ca̱x. Rü tama cuxna chaca nax nüxü̃ curüngü̃xẽẽxü̃ca̱x i ñoma i naanecüã̱x i duü̃xü̃gü, natürü cuxna chaca nax nüxü̃ curüngü̃xẽẽxü̃ca̱x i ngẽma choxna cumugüxü̃, erü curü duü̃xü̃gü nixĩgü.
10 Rü guxü̃ma i choxrü ixĩgüxü̃ rü cuxrü nixĩgü. Rü ngẽma cuxrü ixĩgüxü̃ rü choxrü nixĩgü. Rü ngẽmagagu duü̃xü̃gü choxü̃ nicua̱xüü̃gü.
11 Choma rü marü taxũtáma ñoma i naanewa changexmaecha, natürü nümagü rü ñoma i naanewa tá nangẽxmagü i ngẽxguma cuxü̃tawa chaxũyane. Pa Chaunatü ya Üünecüx, rü chanaxwa̱xe nax curü pora ga choxna cuxãxü̃maxã nüxna cudauxü̃ i ngẽma choxna cumugüxü̃, nax ngẽmaãcü wüxitama yaxĩgüxü̃ca̱x ngẽma cuma rü choma nax wüxitama ixĩgüxü̃rüxü̃.
12 Rü yexguma ñoma ga naanewa natanüwa chayexmagu, rü curü pora ga choxna cuxãxü̃maxã nüxna chadau rü íchanapoxü̃. Rü taxuxü̃ma inarütaxu. Rü yema woetama marü irütaxuxü̃xicatama inarütaxu nax yanguxü̃ca̱x i curü ore i ümatüxü̃.
13 Rü ñu̱xma rü cuxü̃tawa chaxũ. Natürü ñoma i naanewa changexmayane rü nüxü̃ chixu i ñaa curü ore nax nümagü rü ta nüxü̃́ nangẽxmaxü̃ca̱x i ngẽma taãxẽ i aixcüma ixĩxü̃ i choxü̃́ ngẽxmaxü̃.
14 Choma rü marü namaxã nüxü̃ chixu i curü ore. Natürü ñoma i naanecüã̱x i duü̃xü̃gü rü naxchi naxaie, erü tama naxrüxü̃ nixĩgü, ngẽxgumarüxü̃ i choma rü tama ñoma i naanecüã̱xrüxü̃ chixĩ.
15 Tama cuxna naxca̱x chaca nax cuyagagüxü̃ca̱x i ñoma i naanewa. Natürü cuxna chaca nax ícunapoxü̃xü̃ca̱x nüxna i ngo̱xo i Chataná.
16 Choma rü tama ñoma i naanecüã̱x chixĩ. Rü nümagü rü ta chauxrüxü̃ tama ñoma i naanecüã̱x nixĩgü.
17 Curü ore rü aixcüma nixĩ. Rü chanaxwa̱xe i curü oremaxã cuyamexẽxẽ i ngẽma choxna cumugüxü̃ nax aixcüma cupe̱xewa yaxüünexü̃ca̱x.
18 Rü yexgumarüxü̃ ga ñoma ga naanecüã̱x ga duü̃xü̃gütanüwa choxü̃ nax cumuxü̃, rü ngẽxgumarüxü̃ ta i choma rü ñoma i naanecüã̱x i duü̃xü̃gütanüwa chanamugü i ngẽma choxna cumugüxü̃.
19 Rü ngẽma choxna cumugüxü̃ca̱x chaugü ichaxã nax nümagü rü ta curü ore i aixcüma ixĩxü̃ca̱x nügü inaxãgüxü̃.
20 Rü tama ñaa choxna cumugüxü̃ca̱xicatama cuxü̃ chaca̱a̱xü̃. Natürü cuxü̃ chaca̱a̱xü̃ naxca̱x i ngẽma yixcüra tá choxü̃́ yaxõgüxü̃ i ngẽxguma nüxü̃ naxĩnüegu i chorü ore naxü̃tawa i ngẽma choxna cumugüxü̃.
21 Rü cuxna chaca nax guxü̃ma i ngẽma choxna cumugüxü̃ rü wüxitama yaxĩgüxü̃ca̱x ngẽma cuma rü choma nax wüxitama ixĩgüxü̃rüxü̃. Rü ngẽxgumarüxü̃ ta cuxna chaca nax nümagü rü wüxitama tamaxã yaxĩgüxü̃ nax ngẽmaãcü i ñoma i naanecüã̱x i duü̃xü̃gü yaxõgüxü̃ca̱x nax cuma núma choxü̃ cumuxü̃.
22 Rü choma rü marü nüxna chanaxã i ngẽmatama pora i cuma choxna cuxãxü̃ nax ngẽmaãcü wüxitama yaxĩgüxü̃ca̱x ngẽma cuma rü choma nax wüxitama ixĩgüxü̃rüxü̃.
23 Rü chanaxwa̱xe nax ngẽma choxna cumugüxü̃wa changexmaxü̃ rü cuma i chowa nax cungexmaxü̃ nax ngẽmaãcü aixcüma wüxitama ixĩgüxü̃ca̱x i yixema. Rü ngẽmaãcü i ñoma i naanecüã̱x i duü̃xü̃gü rü tá nüxü̃ nicua̱xãchitanü nax cuma núma choxü̃ cumuxü̃. Rü tá nüxü̃ nicua̱xãchitanü nax cuma nüxü̃ cungechaü̃xü̃ i ngẽma choxna cumugüxü̃ ngẽma choxü̃ cungechaü̃xü̃rüxü̃.
24 Pa Chaunatüx, cuma choxna cunamugü i ñaa ngúexü̃gü. Rü chanaxwa̱xe i chauxü̃tawa nangẽxmagü i ngéma tá íchangexmaxü̃wa, nax nüxü̃ nadaugüxü̃ca̱x i chorü pora ga choxna cuxãxü̃. Yerü choxü̃ cungechaü̃ ga yexguma tauta naane ixügügumama.
25 Pa Chaunatü ya Aixcümacüx, ñoma i naanecüã̱x i duü̃xü̃gü rü tama cuxü̃ nacua̱xgü. Natürü choma rü cuxü̃ chacua̱x. Rü ngẽma choxna cumugüxü̃ rü ta marü nüxü̃ nacua̱xgü nax cuma núma choxü̃ cumuxü̃.
26 Rü ngẽma choxna cumugüxü̃maxã marü cuxü̃ chixu nax texé quixĩxü̃. Rü guxü̃gutáma namaxã cuxü̃ chixuecha nax ngẽma ngechaü̃ i namaxã choxü̃ cungechaxü̃xü̃ rü nawa nangẽxmaxü̃ca̱x rü choma rü nawa nax changexmaxü̃ca̱x —ñanagürü ga Ngechuchu.
