San Juan 19:1-42
19 Rü yexguma ga Pirátu rü churaragüxü̃ namu nax Ngechuchuxü̃ nacua̱i̱xgüxü̃ca̱x.
2 Rü yema churaragü rü chuchuxü̃wa nanaxügü ga wüxi ga boxü̃, rü ñu̱xũchi Ngechuchueruwa nayanga̱xcuchigü. Rü wüxi ga máxü̃ ga naxchiru ga dauxcharaxü̃gu nayacu̱xẽẽgü.
3 Rü ñu̱xũchi naxca̱x naxĩ, rü nüxü̃ nacugüeãcüma ñanagürügü nüxü̃: —¡Namaxü̃, Pa Yudíugüarü Ãẽ̱xgacüx! —ñanagürügü. Rü nanapechiwegü.
4 Rü Pirátu rü wenaxarü düxétüwa naxũ, rü Yudíugüxü̃ ñanagürü: —¡Dücax! Nua pepe̱xewa chanaga nax nüxü̃ pecuáxü̃ca̱x nax taxuxü̃ma i chixexü̃ nawa chadauxü̃ —ñanagürü.
5 Rü yexguma ínaxũxũxgu ga Ngechuchu rü naeruwa nayexma ga yema nga̱xcueruxü̃ ga chuchuxü̃naxca̱x rü nagu nayacu̱xẽẽgü ga yema mámüxü̃ ga naxchiru ga daucharaxü̃. Rü yexguma ga Pirátu rü Yudíugüxü̃ ñanagürü: —Daa nixĩ ya yimá yatü —ñanagürü.
6 Natürü yexguma Ngechuchuxü̃ nadaugügu ga chacherdótegüarü ãẽ̱xgacügü rü Tupanapata ga taxü̃nearü purichíagü, rü inanaxügüe ga aita nax naxüexü̃. Rü ñanagürügü: —¡Curuchawa yapota! ¡Curuchawa yapota! —ñanagürügü. Rü Pirátu rü ñanagürü nüxü̃: —¡Ẽcü, peyaga rü pematama curuchawa peyapota! Erü choma rü taxuxü̃ma i chixexü̃xü̃ nawa chadau —ñanagürü.
7 Natürü ga yema Yudíugü rü Pirátuxü̃ nangãxü̃gü, rü ñanagürügü: —Toma toxü̃́ nangẽxma i wüxi i torü mu. Rü ngẽma torü mu toxü̃ nüxü̃ nacua̱xẽxẽ nax namexü̃ nax nayuxü̃ i ñaa yatü, yerü nüma rü nügü nixu nax Tupana Nane yixĩxü̃ —ñanagürügü.
8 Rü yexguma yemaxü̃ naxĩnügu ga Pirátu, rü yexera namuü̃.
9 Rü wena Ngechuchumaxã napatagu naxücu. Rü yéma Ngechuchuna nayaca, rü ñanagürü: —¿Nge̱xtácüã̱x quixĩ i cumax? —ñanagürü. Natürü ga Ngechuchu rü tama nanangãxü̃.
10 Rü yexguma ga Pirátu rü Ngechuchuxü̃ ñanagürü: —¿Ẽ̱xna taxũtáma choxü̃ cungãxü̃? ¿Taxṹ ẽ̱xna i nüxü̃ cucuáxü̃ nax cho̱xme̱xwa cungexmaxü̃ nax curuchawa cuxü̃ chipotaxü̃ rüe̱xna cuxü̃ nax íchanguxuchixẽẽxü̃? —ñanagürü.
11 Rü Ngechuchu nanangãxü̃, rü ñanagürü: —Taxũchima cuxme̱xwa changexma ega tama Tupana naxwa̱xegu. Rü ngẽmaca̱x i ngẽma cuxna choxü̃ muxü̃ rü curü yexera poraãcü napecaduã̱x —ñanagürü.
12 Rü yemawena rü Pirátu nagu narüxĩnü ga ñuxãcü Ngechuchuxü̃ nax ínanguxuchixẽẽxégaxü̃. Natürü yema Yudíugü rü poraãcü aita naxüe, rü ñanagürügü: —Ngẽxguma tá ícunanguxuchixẽẽ̱xgu rü tama curü ãẽ̱xgacü ya Chécharuxü̃ cungechaü̃. Erü ngexerüxe ya ãẽ̱xgacüxü̃ tügü ingucuchixẽẽ́xẽ, rü Rómacüã̱x ya ãẽ̱xgacü ya Chécharuarü uanü tixĩ —ñanagürügü.
13 Rü yexguma yemaxü̃ naxĩnügu ga Pirátu, rü churaragüxü̃ namu nax Ngechuchuxü̃ ínagaxüchigüxü̃. Rü nüma ga Pirátu rü norü toruxü̃wa narüto ga ngextá duü̃xü̃gü ga poxcuexü̃na naca̱xaxü̃. Rü yema nachica rü Yudíugügawa rü Gabatágu nixĩ ga naéga. Rü yema naéga rü “Nutagümaxã tüétüxü̃”, ñaxü̃chiga nixĩ.
14 Rü wüxi ga ngunexü̃ nataxu nax Üpetüchigaarü petawa nanguxü̃, rü marü tocuchiwa nangu. Rü Pirátu rü Yudíugüxü̃ ñanagürü: —¡Daa nixĩ ya yimá perü ãẽ̱xgacü! —ñanagürü.
15 Natürü ga nümagü rü aita naxüe, rü ñanagürügü: —Tanaxwa̱xe nax nayuxü̃. Rü ¡curuchawa yapota! —ñanagürügü. Rü Pirátu nüxna naca rü ñanagürü nüxü̃: —¿Ñuxãcü i choma rü ichanamu nax curuchawa yapotagüãxü̃ca̱x ya perü ãẽ̱xgacü? —ñanagürü. Natürü ga chacherdótegüarü ãẽ̱xgacügü rü Pirátuxü̃ nangãxü̃gü, rü ñanagürügü: —Yimá ãẽ̱xgacü ya Chécharu ya Rómawa ngẽxmacü rü yimá nixĩ ya torü ãẽ̱xgacü, rü nataxuma i to —ñanagürügü.
16 Rü yexguma ga Pirátu rü yema Yudíugüna Ngechuchuxü̃ namu nax curuchawa yapotagüãxü̃ca̱x. Rü nümagü rü nayagagü.
Curuchawa Ngechuchuxü̃ nipotagü
17 Rü ínaxũxü̃ ga Ngechuchu, rü norü curucha ngĩxü̃ ininge. Rü nachica ga “Duẽxẽerugu”, ãégaxü̃wa naxũ. Rü yema nachica rü Górguta nixĩ ga naéga ga Yudíugügawa.
18 Rü yéma curuchawa Ngechuchuxü̃ nayarüpotagü. Rü Ngechuchurüxü̃ curuchawa nayapotagü ga taxre ga to ga yatügü, rü wüxi ga norü tügünecüwawa rü to ga norü to̱xwecüwawa.
19 Rü Pirátu rü churaragüxü̃ namu nax Ngechuchuarü curuchatape̱xewa yapocuchigüãxü̃ca̱x ga wüxi ga mürapewaxacü ga ãégatachinüxü̃ ga ñaxü̃: “Ngechuchu ya Nacharétucüã̱x ya Yudíugüarü Ãẽ̱xgacü”, ñaxü̃.
20 Rü yema nachica ga Ngechuchuxü̃ curuchawa íyanapotagüxü̃, rü ĩanearü ngaicamana nayexma. Rü yemaca̱x muxü̃ma ga yema Yudíugü nüxü̃ nadaumatü ga yema namatü ga mürapewaxacügu üxü̃ ga Yudíugügawa rü Griégugügawa rü Rómacüã̱xgügawa.
21 Rü yemaca̱x ga yema Yudíugüarü chacherdótegüarü ãẽ̱xgacügü rü Pirátuxü̃ ñanagürügü: —Toma rü tama tanaxwa̱xe i cunaxümatü i “Yudíugüarü Ãẽ̱xgacü”, ñaxü̃. Rü narümemae nixĩ i cunaxümatü rü ñacurügü: “Nügü ixucü nax Yudíugüarü Ãẽ̱xgacü yixĩxü̃” —ñacurügü.
22 Natürü Pirátu nanangãxü̃ rü ñanagürü: —Ngẽma chaxümatüxü̃ rü marü ngẽxma naxümatü —ñanagürü.
23 Rü nawena nax curuchawa Ngechuchuxü̃ yapotagüxü̃, rü nüma ga churaragü, rü nanade ga Ngechuchuchiru. Rü yema ãgümücü ga churaragü rü nügümaxã nayatoye ga naxchiru. Rü nanayauxgü ta ga norü gáuxü̃chiru ga máxü̃. Natürü taxuwama narünga̱i̱xte, yerü woetama yemaacü naxü.
24 Rü yemaca̱x ga yema churaragü rü nügümaxã ñanagürügü: —¡Taxũtáma nagu tagáugüe! Rü narümemae naxca̱x ngĩxü̃ tañanagügü i wüxi i diẽru nax ngẽmawa nüxü̃ icua̱xgüxü̃ca̱x nax texéarü tá yixĩxü̃ —ñanagürügü. Rü yemaacü ningu ga Tupanaarü ore ga ümatüxü̃ ga ñaxü̃:“Nügümaxã nayatoye i chauxchiru,rü naxca̱x ngĩxü̃ tanañanagügü i wüxi i diẽru”,
ñaxü̃. Rü aixcüma yemaacü nixĩ ga naxügüãxü̃ ga churaragü.
25 Rü Ngechuchuarü curuchapünewa iyexma ga naé ga María, rü ngĩeya̱x, rü María ga Creofáx naxma̱x, rü María ga Madarénacüã̱x.
26 Rü yexguma Ngechuchu naéü̃ da̱u̱xgu nax ngĩxü̃tagu nachixü̃ ga yema norü ngúexü̃ ga poraãcü nüxü̃ nangechaxü̃xü̃, rü ñanagürü ngĩxü̃: —Pa Mamax, yimá nixĩ ya cune —ñanagürü.
27 Rü yemawena, rü ñanagürü nüxü̃ ga yema ngúexü̃: —Ngẽma iyixĩ i cué —ñanagürü. Rü yemawena napatawa ngĩxü̃ nayaxu. Rü naxü̃tawa iyexmaecha.
Nayu ga Ngechuchu
28 Rü Ngechuchu nüxü̃ nacua̱x nax marü yangu̱xẽẽãxü̃ ga guxü̃ma ga yema Nanatü namaxã nüxü̃ ixuxü̃. Rü yema Tupanaarü ore ga ümatüxü̃ nax yanguxẽẽxü̃ca̱x, rü ñanagürü: —Chita̱xawa —ñanagürü.
29 Rü yéma iyexma ga wüxi ga baepáxü̃ ga bínu ga marü üxchiücümaxã ããcuxü̃. Rü wüxi ga tüa̱xmü gumá bínumaxã niwaixẽẽgü, rü wüxi ga dexnemena̱xãwa nayana̱i̱x. Rü yemamaxã naã̱xgu nanawe̱xgü.
30 Rü Ngechuchu nayaxaxü ga gumá bínu ga üxchíücü rü ñanagürü: —Marü ningu i guxü̃ma —ñanagürü. Rü ñu̱xũchi inayarümaxãchi, rü nayu.
Wüxi ga churara rü wocaemaxã Ngechuchuxü̃ nacanapacütüxü̃
31 Natürü ga yema Yudíugü rü tama nanaxwa̱xegü nax curuchagüwa nayexmagüxü̃ ga yema naxü̃negü. Yerü moxü̃ãcü rü ngü̃xchigaarü ngunexü̃ nixĩ. Rü yema Yudíugüca̱x rü yema nixĩ ga guxü̃ ga ngü̃xchigaarü ngunexü̃arü yexera ga üünexü̃, yerü norü peta ga Üpetüchigaarü ügü nixĩ. Rü yemaca̱x Pirátuna naxca̱x nacagü nax churaragü yéma namugüxü̃ca̱x nax yapoyeparagüãxü̃ca̱x nax paxa nayuexü̃ca̱x ga yema curuchawa ipotagüxü̃, rü paxa nax nadeaxü̃ca̱x ga curuchawa naxü̃pa ga ngü̃xchigaarü ngunexü̃.
32 Rü yéma naxĩ ga churaragü rü inanapoeparagü ga yema taxre ga yatügü ga Ngechuchurüxü̃ yéma curuchawa ipotagüxü̃.
33 Rü Ngechuchuca̱x naxĩ ga churaragü, natürü nüxü̃ nadaugü nax marü nayuxü̃. Rü yemaca̱x tama nayapoyeparagü.
34 Natürü wüxi ga churara rü Ngechuchuxü̃ nacanapacütüxü̃. Rü yexgumatama ínayaxüchi ga nagü rü dexá.
35 Rü choma i Cuáü̃ rü nüxü̃ chadau i guxü̃ma i ngẽma pemaxã nüxü̃ chixuxü̃. Rü aixcüma nixĩ i ñaa chorü ore. Rü chomatama nüxü̃ chacua̱x nax aixcüma yixĩxü̃, rü ngẽmaca̱x pemaxã nüxü̃ chixu nax pema rü ta peyaxõgüxü̃ca̱x.
36 Rü yema nangupetü nax yanguxü̃ca̱x i Tupanaarü ore i ümatüxü̃ i ñaxü̃:“Rü taxunetáma ya naxchina̱xã nipoyegü”,
ñaxü̃.
37 Rü tóxnamana i Tupanaarü ore i ümatüxü̃wa rü ñanagürü:“Tá nüxü̃ narüdaunü ya yimá nacanapacütüxü̃güãcü”,
ñanagürü.
Ngechuchuxü̃ nutaarü ãxmaxü̃gu narüxǘcuchigü
38 Rü nayexma ga wüxi ga yatü ga Arimatéacüã̱x ga Yúchegu ãégacü. Rü nüma rü ta Ngechuchuaxü̃́ nayaxõ, natürü cúãcü nayaxõ yerü natanüxü̃ ga Yudíugüarü ãẽ̱xgacügüxü̃ namuü̃. Rü gumá nixĩ ga Pirátuna yacacü nax naya̱u̱xãxü̃ca̱x ga Ngechuchuxü̃ne. Rü Pirátu rü: —Ngü̃ —ñanagürü. Rü yexguma ga Yúche rü yéma naxũ ga curuchawa íyapotaxü̃wa, rü curuchawa nayayaxu ga naxü̃ne ga Ngechuchu.
39 Rü yexgumarüxü̃ ta yéma nangu ga Nicodému ga ü̃paacü chütacü Ngechuchuxü̃tagu naxũanecü. Rü yéma nanange ga 30 quíru naguxü̃ ga pumara ga yixichixü̃ nax Ngechuchuxü̃ namaxã nachaxü̃negüxü̃ca̱x.
40 Rü yemaacü ga Yúche rü Nicodému rü curuchawa nanayauxgü ga naxü̃ne ga Ngechuchu. Rü naxchápenüxü̃ ga marü pumaracharaxü̃maxã nananuquegü. Yerü yema nixĩ ga nacüma ga Yudíugü ga yexguma wüxi ga yueta tüxü̃ inata̱xgügu.
41 Rü yema nachica ga Ngechuchu curuchawa ípotaxü̃wa nayexma ga wüxi ga nanetünecü. Rü yema nanetünecüwa nayexma ga wüxi ga naxma̱xü̃ ga yexwaca̱xüxü̃ ga taguma texéxü̃ nagu yaxǘcuchigüxü̃.
42 Rü yema naxmaxü̃gu nixĩ ga yaxǘcuchigüãxü̃ ga Ngechuchuxü̃ne, yerü nangaicama ga yema naxma̱xü̃, rü naétü paxa tá ningune ga Yudíugüarü ngü̃xchigaarü ngunexü̃.
