San Juan 20:1-31

20  Rü yüxüarü pa̱xmamaxü̃chi ga tauta mea yangóonegu, rü María ga Madarénacüã̱x rü Ngechuchuxü̃ íyaxǘcuchigüxü̃wa ixũ. Rü nüxü̃ idau ga gumá nuta ga Ngechuchumaxü̃ namaxã rünguxtaü̃cü, rü marü nax ínaxügachixü̃.  Rü yexgumatama iñaãchi, rü Chimóü̃ ga Pedruxü̃tawa rü yema to ga ngúexü̃ ga Ngechuchu poraãcü nüxü̃ ngechaxü̃xü̃xü̃tawa iña. Rü ngĩgürügü nüxü̃: —Marü nanayauxgü ya Cori ya Ngechuchu i naxmaxü̃wa. Rü tama nüxü̃ tacua̱x nax ngextá nangegüãxü̃ rü naxügüãxü̃ —ngĩgürügü.  Rü yexguma ga Pedru rü yema to ga ngúexü̃ rü Ngechuchuxü̃ íyaxǘcuchigüxü̃wa naxĩ.  Rü wüxigu inaxü̃ãchi, natürü ga yema to ga ngúexü̃ rü poraãcü Pedruarü yexera inañaãchi. Rü nüxíra Ngechuchuxü̃ íyaxǘcuchigüxü̃wa nangu.  Rü inayarümaxãchi nax nagu yadaucuchixü̃ca̱x. Rü nüxü̃ nadau ga yema naxchápenüxü̃ ga namaxã nanúquegüaxü̃ nax yexma naxüxü̃. Natürü tama aixepegu naxücu.  Rü naweama ínangu ga Chimóü̃ ga Pedru. Rü nüma rü yema naxmaxü̃gu naxücu. Rü nüma rü ta nüxü̃ nadau ga yema naxchápenüxü̃gü ga yexma nuxü̃.  Rü nüxü̃ nadau ta ga yema naxchápenüxü̃ ga Ngechuchuxü̃ namaxã nanúquegüxü̃ ga meama dixcumüxü̃ ga nüxrüguma üxü̃. Rü tama wüxigu namaxã nanu ga yema naxchápenüxü̃ ga namaxã nanúquegüaxü̃.  Rü yexguma ga yema to ga ngúexü̃ ga nüxíra yéma nguxü̃, rü nüma rü ta nixücu. Rü nüxü̃ nadau ga guxü̃ma, rü nayaxõ nax marü wena namaxü̃xü̃ ga Ngechuchu.  Yerü yexguma rü ta rü tama nüxü̃ nacua̱xgü ga yema Tupanaarü ore nüxü̃ ixuxü̃ nax Ngechuchu rü wena tá namaxü̃xü̃. 10  Rü yexguma ga yema ngúexü̃gü rü napataca̱x nawoegu. Ngechuchu rü ngĩxca̱x nango̱x ga María ga Madarénacüã̱x 11  Natürü ga María ga Madarénacüã̱x rü yéma ixaxu naxü̃tawa ga yema naxma̱xü̃ ga Ngechuchuxü̃ nagu yaxǘcuchigüxü̃. Rü naxauxãcüma iyarümaxãchi, rü nagu iyadaucuchi ga naxma̱xü̃. 12  Rü nüxü̃ idau ga taxre ga daxũcüã̱x ga Tupanaarü orearü ngeruü̃gü ga icómüchiruxü̃. Rü Ngechuchuxü̃ne ixǘchiréxü̃wa narütogü, rü wüxi ga naeru ixüxü̃waama rü to ga nacütawaama. 13  Rü yema daxũcüã̱x rü ngĩxna nacagüe, rü ñanagürügü: —Pa Ngecüx, ¿ta̱xacüca̱x cuxaxu? —ñanagürügü. Rü ngĩma rü inangãxü̃, rü ngĩgürügü: —Chaxaxu erü nayangegü i naxü̃ne ya Cori ya Ngechuchu, rü tama nüxü̃ chacua̱x nax ngexta naxügüãxü̃ —ngĩgürügü. 14  Rü yexguma yema ngĩxgu, rü ngĩgüweama idau. Rü nüxü̃ idau ga Ngechuchu ga ngĩxü̃tagu nax nachixü̃. Natürü tama nüxü̃ icua̱x nax Ngechuchu yixĩxü̃ ga gumá. 15  Rü yexguma ga Ngechuchu rü ngĩxna naca, rü ñanagürü: —Pa Ngecüx, ¿ta̱xacüca̱x cuxaxu? ¿Rü texéca̱x nixĩ i cudauxü̃? —ñanagürü. Rü ngĩma nüxü̃ nacua̱xgu rü yema nixĩ ga yema nanetünecüarü dauruxü̃. Rü yemaca̱x ngĩgürügü nüxü̃: —Pa Corix, ega cuma cuyange̱xgu i naxü̃ne ya Ngechuchu, rü ¡chomaxã nüxü̃ ixu nax ngexta cunaxüxü̃ nax choma íchayadauxü̃ca̱x! —ngĩgürügü. 16  Rü yexguma ga Ngechuchu rü ñanagürü ngĩxü̃: —Pa Maríax —ñanagürü. Rü ngĩma rü naxca̱x idaueguãchi, rü Yudíugügawa ngĩgürügü nüxü̃: —Pa Rabúnix —ngĩgürügü. Rü ngẽma rü “Pa Ngúexẽẽruxü̃”, ñaxü̃chiga nixĩ. 17  Rü Ngechuchu rü ñanagürü ngĩxü̃: —¡Taxṹ i choxü̃ quingõgüxü̃, erü tauta Chaunatüxü̃tawa chaxũ! ¡Natürü ngéma chauenexẽgütanüwa naxũ rü namaxã nüxü̃ yarüxu nax choma rü tá Chaunatü ya Tupana ya Penatü ya Tupanaxü̃tawa chaxũxü̃! —ñanagürü. 18  Rü yexguma ga María ga Madarénacüã̱x rü yema ngúexügümaxã nüxü̃ iyarüxu nax marü nüxü̃ nadauxü̃ ga Cori ga Ngechuchu. Rü ñu̱xũchi namaxã nüxü̃ iyaxu ga yema ore ga Ngechuchu ngĩmaxã nüxü̃ ixuxü̃. Norü ngúexü̃güca̱x nango̱x ga Ngechuchu 19  Rü yema yüxüarü ngunexü̃arü chütacü, rü nangutaque̱xegü ga Ngechuchuarü ngúexü̃gü. Rü nügü narüwãxtaü̃gü, yerü yema Yudíugüarü ãẽ̱xgacügüxü̃ namuü̃e. Rü Ngechuchu rü ngürüãchi yéma nango̱x, rü norü ngãxü̃tanügu nachi. Rü nüxü̃ narümoxẽ, rü ñanagürü: —¡Petaãẽgü! —ñanagürü. 20  Rü yema ñaxguwena rü nügü nawéme̱x, rü nügü nawépacütüxü̃. Rü nüma ga norü ngúexü̃gü rü nataãẽgü, yerü nüxü̃ nadaugü ga gumá norü Cori. 21  Rü yexguma rü wenaxarü ñanagürü nüxü̃: —¡Petaãẽgü! Rü yema Chaunatü núma choxü̃ nax muxü̃rüxü̃ tátama nixĩ i pexü̃ chamuxü̃ i chomax —ñanagürü. 22  Rü yexguma rü naétü “cue”, ñanagürü ga Ngechuchu. Rü ñu̱xũchi ñanagürü nüxü̃: —¡Penayauxgü i Tupanaãxẽ ya Üünecü! 23  Rü ngẽxguma duü̃xü̃gü nüxü̃ rüxoegu i norü pecadugü, rü pema rü pexü̃́ nangẽxma i pora nax namaxã nüxü̃ pixuxü̃ nax Tupana marü nüxü̃́ nüxü̃ rüngü̃maxü̃ i norü pecadugü. Natürü ngẽxguma duü̃xü̃gü tama nüxü̃ rüxoegu i norü pecadugü, rü pema rü pexü̃́ nangẽxma i pora nax namaxã nüxü̃ pixuxü̃ nax norü pecadugüwatama nangẽxmagüxü̃ —ñanagürü ga Ngechuchu. Tumáchi nüxü̃ nadau ga Cori ga wena maxü̃cü 24  Natürü Tumáchi ga wüxi ga yema 12 ga Ngechuchuarü ngúexü̃tanüxü̃ ga Wüxigu Buexü̃maxã naxugüxü̃, rü nataxuma natanüwa ga yema togü ga ngúexü̃gü ga yexguma Ngechuchu naxca̱x ngo̱xgu. 25  Rü yixcama ga yema togü ga ngúexü̃gü rü Tumachimaxã nüxü̃ nixugüe, rü ñanarügügü: —Marü nüxü̃ tadau ya Cori ya Ngechuchu —ñanarügügü. Natürü ga Tumáchi rü nanangãxü̃ rü ñanagürü: —Ngẽxguma tama nüxü̃ chada̱u̱xgu i norü itapuamaxü̃ i naxme̱xwa ngẽxmaxü̃ rü tama nagu chixuxgu i ngẽma itapuamaxü̃ rü ngẽma norü canapacütüxü̃, rü taxũtáma chayaxõ i ngẽma ore i chomaxã nüxü̃ pixuxü̃ —ñanagürü. 26  Rü 8 ga ngunexü̃guwena rü wenaxarü nangutaque̱xegü ga yema ngúexü̃gü ga wüxi ga ĩpatawa. Rü natanüwa nayexma ga Tumáchi ga yexguma. Rü woo nax nawãxtaxü̃ ga ĩã̱x, rü ngürüãchi yéma nango̱x ga Ngechuchu, rü norü ngãxü̃tanügu nachi. Rü nüxü̃ narümoxẽ, rü ñanagürü: —¡Petaãẽgü! —ñanagürü. 27  Rü yexguma Tumáchixü̃ ñanagürü ga Ngechuchu: —¡Nagu ixu i ñaa chorü itapuamaxü̃ i cho̱xme̱xwa ngẽxmaxü̃, rü nüxü̃ nadau ya daa cho̱xme̱x! ¡Rü nagu ixu i chorü canapacütüxü̃! ¡Rü tama name nax tama cuyaxõxü̃! ¡Rü yaxõ! —ñanagürü. 28  Rü yexguma ga Tumáchi rü Ngechuchuxü̃ nangãxü̃, rü ñanagürü: —Pa Chorü Corix, cuma nixĩ i chorü Tupana quixĩxü̃ —ñanagürü. 29  Rü Ngechuchu rü ñanagürü nüxü̃: —Pa Tumáchix, cuma cuyaxõ erü choxü̃ cudau. Natürü tataãẽgü ya yíxema tama choxü̃ daugüãcüma yaxõgüxe —ñanagürü. Ta̱xacüca̱x naxümatü i ñaa popera 30  Rü Ngechuchu rü norü ngúexü̃güpe̱xewa nanaxü ga muxü̃ma ga to ga cua̱xruü̃gü i Tupanaarü poramaxã naxüxü̃ i tama ñaa poperagu ümatüxü̃. 31  Natürü guxü̃ma ga yema Ngechuchu üxü̃ rü ñaa poperagu naxümatü nax peyaxõgüxü̃ca̱x nax Ngechuchu rü Tupana Nane ya Cristu nax yixĩxü̃ rü ngẽxguma nüxü̃́ peyaxõgügu pexü̃́ nangẽxmaxü̃ca̱x i maxü̃ i taguma gúxü̃.

Notas