San Juan 3:1-36
3 Nayexma ga wüxi ga Parichéu ga Nicodémugu ãégacü. Rü nüma rü wüxi ga ãẽ̱xgacü ga tachigacü nixĩ ga Yudíugütanüwa.
2 Rü gumá Nicodému rü Ngechuchuxü̃tagu nanaxũane ga chütacü. Rü ñanagürü nüxü̃: —Pa Ngúexẽxẽruxü̃, toma nüxü̃ tacua̱x nax aixcüma Tupana núma cuxü̃ muxü̃ nax toxü̃ cungúexẽẽxü̃ca̱x. Erü taxucürüwa texé cuxrüxü̃ tanaxü i ngẽma taxü̃ i mexü̃gü i Tupanaarü poramaxã üxü̃, ega tama Tupana tümaxü̃tawa ngẽxmagu —ñanagürü.
3 Rü Ngechuchu nanangãxü̃ rü ñanagürü nüxü̃: —Aixcüma cumaxã nüxü̃ chixu, rü yíxema tama wenaxarü buxe rü taxucürüwama Tupana ãẽ̱xgacü ixĩxü̃wa tangu —ñanagürü.
4 Rü Nicodému rü Ngechuchuna naca, rü ñanagürü nüxü̃: —¿Natürü ñuxãcü i wüxi i yatü i marü yáxü̃ i wena nabuxü̃? ¿Ẽ̱xna wena naéanügu naxücuxü̃ rü ngẽmaãcü wena nabuxü̃? —ñanagürü.
5 Rü Ngechuchu nanangãxü̃ rü ñanagürü: —Rü aixcüma cumaxã nüxü̃ chixu rü yíxema tama nüxü̃ rüxoxe i tümaarü pecadu rü íbaie rü tama Tupanaãxẽ i Üünexü̃wa nayaxúxe i maxü̃ i ngexwaca̱xü̃xü̃, rü taxucürüwama Tupana ãẽ̱xgacü ixĩxü̃wa tixücu.
6 Yíxema duü̃xü̃wa buxe rü duü̃xü̃tama tixĩ. Natürü yíxema Naãxẽ ya Üünexü̃wa nayaxúxe i maxü̃ i ngexwaca̱xü̃xü̃, rü Tupanaxacü tixĩ.
7 ¡Taxṹ i cubaixãchixü̃ nax cumaxã nüxü̃ chixuxü̃ nax Tupana naxwa̱xexü̃ nax wena nabuexü̃ i duü̃xü̃gü nax nüma ãẽ̱xgacü íyaxĩxü̃wa yachocuxü̃ca̱x!
8 Yimá buanecü rü ínanaxwa̱xexü̃wa nabu. Rü nüxü̃ cuxĩnü i naga, natürü tama nüxü̃ cucua̱x nax ngextáama ne naxũxü̃ rü ngextáama nax naxũxü̃. Rü ngẽxgumarüxü̃ ta tixĩgü ya guxãma ya yíxema Naãxẽ ya Üünexü̃wa nayaxúxe i maxü̃ i ngexwaca̱xü̃xü̃ —ñanagürü.
9 Rü Nicodému wenaxarü Ngechuchuna naca, rü ñanagürü: —¿Natürü ñuxãcü nixĩ i ngẽma? —ñanagürü.
10 Rü Ngechuchu nanangãxü̃, rü ñanagürü nüxü̃: —Cuma rü Iraétanüxü̃arü ngúexẽẽruxü̃ quixĩ. ¿Rü ñuxãcü i cuma i tama nüxü̃ cucuáxü̃ i ngẽma cumaxã nüxü̃ chixuxü̃?
11 Aixcüma cumaxã nüxü̃ chixu rü toma rü namaxã tidexagü i ngẽma nüxü̃ tacuáxü̃. Rü norü uruxü̃ tixĩgü i ngẽma nüxü̃ tadaugüxü̃. Natürü i pema rü tama toxü̃́ peyaxõgü i ngẽma pemaxã nüxü̃ tixuxü̃.
12 Rü ñu̱xma nax tama choxü̃́ peyaxõgüxü̃ i ngẽxguma pemaxã nüxü̃ chixuxgu i ngẽma ñoma i naanewa ngẽmaxü̃chiga, rü ¿ñuxãcü tá peyaxõgüxü̃ ega pemaxã nüxü̃ chixuxgu i ngẽma daxũguxü̃ i naanewa ngẽmaxü̃chiga?
13 Taguma texé daxũguxü̃ i naanewa taxũ. Natürü Tupana Nane nax duü̃xü̃xü̃ ixĩcüxicatama nixĩ ya ngéma ne ũcü rü ngéma tá ũcü.
14 3:14-15 Rü yexgumarüxü̃ ga Moiché chianexü̃wa wüxi ga naigu naxǘnagüãxü̃ ga yema ãxtape ga bróũchenaxca̱x, rü ngẽxgumarüxü̃ tá ta ya Tupana Nane i duü̃xü̃xü̃ ixĩcü. Rü wüxi i naigu tá nanaxünagügü i duü̃xü̃gü nax guxãma ya texé ya nüxü̃́ yaxõgüxe rü tüxü̃́ nangẽxmaxü̃ca̱x i maxü̃ i taguma gúxü̃.
15 Nüü̃ nadau 3:14
Tupana rü poraãcü nüxü̃ nangechaü̃ i ñoma i naanecüã̱x
16 Rü Tupana rü poraãcü nüxü̃ nangechaü̃ i ñoma i naanecüã̱x i duü̃xü̃gü. Rü yemaca̱x inanamu ga Nane ga nügümaxã wüxicacü nax guxãma ya texé ya nüxü̃́ yaxõgüxe rü tama itarütauxexü̃ca̱x rü tüxü̃́ nangẽxmaxü̃ca̱x i maxü̃ i taguma gúxü̃.
17 Yerü ga Tupana rü tama ñoma ga naanewa nanamu ga Nane nax poxcu duü̃xü̃gümaxã naxueguxü̃ca̱x. Natürü núma nanamu ga Nane nax duü̃xü̃güxü̃ namaxẽxẽẽxü̃ca̱x.
18 Rü yíxema Tupana Naneaxü̃́ yaxṍxe, rü Tupana rü tama poxcu tümamaxã naxuegu. Natürü yíxema tama nüxü̃́ yaxṍxe, rü marü poxcu tümamaxã naxuegu, erü tama nüxü̃́ tayaxõ ya yimá Tupana Nane ya nügümaxã wüxicacü.
19 Rü yíxema tama nüxü̃́ yaxõgüxe, rü Tupana rü marü poxcu tümamaxã naxuegu, yerü yexguma ñoma ga naanewa nanguxgu ga Nane ya duü̃xü̃güarü nangóonexẽẽruxü̃, rü tama nüxü̃́ tayaxõgüchaxü̃. Natürü yexera tümaarü me nixĩ nax ẽanexü̃wa tayexmagüxü̃ rü chixexü̃ taxügüxü̃.
20 Guxãma ya yíxema chixexü̃ ügüxe rü naxchi taxaixe i ngóonexü̃. Rü tama nüxna tangaicamagüchaü̃ erü tama tanaxwa̱xe nax nangóxü̃ i ngẽma chixexü̃ i ítaxügüxü̃.
21 Natürü yíxema aixcüma Tupanaarü ore nüxü̃ ixuxü̃ãcüma mea maxẽxe rü nüxna tangaicama i ngẽma ngóonexü̃ nax mea nangóxü̃ca̱x nax Tupanaarü ngúchaü̃ãcüma nax yixĩxü̃ i guxü̃ma i ngẽma taxügüxü̃ —ñanagürü.
Cuáü̃ ga báiü̃xẽẽruxü̃ rü wenaxarü nüxü̃ nixu ga Ngechuchuchiga
22 Rü yemawena rü norü ngúexü̃gümaxã Yudéaanewa naxũ ga Ngechuchu. Rü ñuxre ga ngunexü̃ namaxã yéma nayexma rü duü̃xü̃güxü̃ ínabaiü̃xẽẽgü.
23 Rü Cuáü̃ ga baiü̃ẽẽruxü̃ rü Enóü̃arü ĩanewa ga Charíü̃arü ngaicamana rü ínanabaiü̃ẽxẽ ta ga duü̃xü̃gü, yerü yéma nayexma ga taxü̃ ga dexá. Rü yema yéma íngugüetanüxü̃ ga duü̃xü̃gü, rü Cuáü̃ ínayabaiü̃xẽẽtanü.
24 Rü yemaacü nangupetü naxü̃pa nax poxcupataü̃gu yata̱xcuchixü̃ ga Cuáü̃.
25 Rü ñuxre ga Cuáü̃arü ngúexü̃gü rü wüxi ga Yudíumaxã niporagatanücüü nachiga ga ñuxãcü tá Tupanaca̱x nügü yamexẽẽgüxü̃ ga duü̃xü̃gü.
26 Rü Cuáü̃maxã nüxü̃ nayarüxugüe, rü ñanagürügü: —Pa Ngúexẽẽruxü̃, gumá yatü ga tomaxã nüxü̃ quixucü rü cumaxã yexmacü ga natü ga Yudáü̃arü tocutüwa, rü yimá rü ñu̱xma rü duü̃xü̃güxü̃ ínabaiü̃ẽxẽ, rü guxü̃ma i duü̃xü̃gü rü nawe narüxĩ —ñanagürügü.
27 Rü Cuáü̃ nanangãxü̃ rü ñanagürü nüxü̃: —Taxúema ta̱xacü tüxü̃́ nangẽxma ega Tupana tama tüxna naxãxgu.
28 Pematama rü marü choxü̃ pexĩnüe ga yexguma ñachagu: “Choma rü tama Cristu chixĩ. Natürü choma chixĩ ya Tupana yimá Cristupe̱xegu choxü̃ imuxü̃ nax nüxü̃ chixuxü̃ca̱x i nachiga”, ñachagu.
29 Rü wüxi i ngĩgüwa rü yimá yatü ya ingĩcü rü naxma̱xarü yora nixĩ. Rü yimá yatümücü i naxü̃tawa ngẽxmaxü̃ rü nüxü̃́ inarüxĩnü i norü ore. Rü nataãxẽ i ngẽxguma nüxü̃ naxĩnügu nax yadexaxü̃. Rü ngẽxgumarüxü̃ ta i choma rü aixcüma Cristumaxã chataãẽxü̃chi i ñu̱xmax.
30 Nüma rü tá yexeraãcü nitachigachigü, natürü i choma rü tá ínarüxĩchigü i chauchiga.
Yimá daxũwa ne ũxcüchiga
31 Rü yimá Cristu ya daxũwa ne ũcü rü guxãétüwa nangẽxma. Natürü i choma rü ñoma i naanewa changexma, rü ñoma i naanecüã̱x chixĩ, rü ngẽma ñoma i naanewa ngẽxmaxü̃chigaxü̃ chixu. Natürü i nüma ya Cristu ya daxũwa ne ũcü, rü guxãétüwa nangẽxma.
32 Rü nüma rü tamaxã nüxü̃ nixuchiga ga yema nüxü̃ nadauxü̃ rü nüxü̃ naxĩnüxü̃. Natürü noxretama nüxü̃́ nayaxõgü i ngẽma nüxü̃ yaxuxü̃.
33 Natürü ngẽxguma texé nüxü̃́ yaxõxgu i norü ore, rü tanango̱xẽxẽ nax aixcüma yixĩxü̃ i ngẽma Tupana nüxü̃ ixuxü̃.
34 Rü yimá Tupana núma namucü, rü Tupanaarü orexü̃ nixu. Erü Tupana rü nüxna nanamu i Naãxẽ ya Üünexü̃ nax guxü̃guma naxü̃tawa nangẽxmaxü̃ca̱x.
35 Rü Tanatü ya Tupana rü Nanexü̃ nangechaü̃, rü marü naxme̱xwa nanangẽxmaxẽxẽ i guxü̃ma.
36 Rü yíxema Tupana Naneaxü̃́ yaxṍxe rü tüxü̃́ nangẽxma i maxü̃ i taguma gúxü̃. Natürü yíxema tama nüxü̃́ yaxõxchaü̃xẽ ya Tupana Nane, rü taxũtáma tüxü̃́ nangẽxma i ngẽma maxü̃ i taguma gúxü̃. Natürü tá tanayaxu i ngẽma ãũcümaxü̃ i poxcu ya Tupana tá namaxã tüxü̃ poxcuxü̃ —ñanagürü ga Cuáü̃ ga baiü̃ẽẽruxü̃.
