San Juan 9:1-41
9 Rü yexguma namagu yaxũxgu ga Ngechuchu, rü yéma nüxü̃ nadau ga wüxi ga yatü ga woetama norü bucüma ngexetücü.
2 Rü norü ngúexü̃gü rü nüxna nacagü, rü ñanagürügü: —Pa Ngúexẽẽruxü̃x, ¿Tü̱xcüü̃ ngexetüãcüma nabu ya daa yatü? ¿Ẽ̱xna nanatü rü naéarü pecadugagu rü ẽ̱xna noxrütama pecadugagu? —ñanagürügü.
3 Rü Ngechuchu nüxü̃ nangãxü̃, rü ñanagürü nüxü̃: —Tama norü pecadugagu rü tama i nanatü rü naéarü pecadugagu nixĩ i ngẽmaãcü nabuxü̃. Natürü ngẽmaãcü nabu nax nawa nüxü̃ pedauxü̃ca̱x nax Tupana nüxü̃́ nangẽxmaxü̃ i pora nax namexẽẽãxü̃.
4 Rü ñoma rü ta nangune rü name nixĩ nax naxüxü̃ i norü puracü ya yimá núma choxü̃ mucü. Erü paxa tá nachüta rü ngẽxguma rü taxucürüwama texé tapuracü.
5 Rü ñu̱xma nax ñoma i naanewa changexmaxü̃ rü ñoma i naanearü nangóonexẽẽruxü̃ chixĩ —ñanagürü.
6 Rü yexguma yema ñaxguwena rü Ngechuchu waixü̃müanewa nacuaxi. Rü yema waixü̃mü ga iwaixü̃maxã nanachaxetü ga gumá yatü ga ngexetücü.
7 Rü yexguma gumá ngexetücüxü̃ ñanagürü: —¡Chiloéarü puchuwa naxũ rü ngéma dexámaxã cugü yayauxetü! —ñanagürü. (Rü ngẽma naéga i Chiloé rü “Tüxü̃ muxü̃”, ñaxü̃chiga nixĩ.) Rü yéma naxũ ga gumá ngexetücü rü dexámaxã nügü naya̱u̱xetü. Rü yexguma nataeguxgu rü marü nidauuchixetü.
8 Rü yexguma ga yema duü̃xü̃gü ga gumá ngexetücüpataarü ngaicamagu pegüxü̃ rü yema duü̃xü̃gü ga ü̃paacü nüxü̃ daugüxü̃ ga nax nangexetüxü̃, rü ñanagürügü: —¿Taux ẽ̱xna i ñaa yixĩxü̃ i ngẽma yatü i ngexetüchiréxü̃ i duü̃xü̃güxü̃ diẽruca̱x ca̱a̱xü̃xü̃? —ñanagürügü.
9 Rü nümaxü̃ rü ñanagürügü: —Ngẽmáacü nüma nixĩ —ñanagürügü. Rü togü rü ñanagürügü: —Tama nixĩ i ngẽma yixĩxü̃, natürü nanangẽxgumaraü̃xü̃chi —ñanagürügü. Natürü nümatama ga gumá yatü ga ngexetüchire̱xcü, rü ñanagürü: —Ngẽmáacü choma chixĩ —ñanagürü.
10 Rü yexguma ga yema duü̃xü̃gü rü nüxna nacagü rü ñanagürügü: —¿Rü ñuxãcü nixĩ i marü quidauuchixü̃ i ñu̱xmax? —ñanagürügü.
11 Rü nüma nanangãxü̃ rü ñanagürü: —Yimá yatü ya Ngechuchugu ãégacü rü yimá waixü̃müanewa nacuaxi. Rü yema waixü̃mü ga iwaixü̃maxã choxü̃ nachaxetü. Rü ñanagürü choxü̃: “¡Yéa Chiloéarü puchuwa naxũ rü ngéma dexámaxã cugü yayauxetü!” ñanagürü choxü̃. Rü yéma chaxũ, rü yexguma dexámaxã chaugü chayauxetügu rü chidauuchi —ñanagürü ga gumá yatü.
12 Rü yexguma nüxna nacagüe, rü ñanagürügü: —¿Ngextá nangẽxma i ñu̱xma ya yimá yatü ya cuxü̃ rümexẽxẽcü? —ñanagürügü. Rü nüma ga gumá yatü ga ngexetüchire̱xcü rü ñanagürü: —Tama nüxü̃ chacua̱x —ñanagürü.
Parichéugü rü gumá ngexetücü ga Ngechuchu namexẽxẽcüna nacagüe
13 9:13-14 Natürü yema ngunexü̃ ga Ngechuchu nagu namexẽẽxü̃ ga gumá ngexetücü, rü ngü̃xchigaarü ngunexü̃ nixĩ. Rü yemaca̱x ga duü̃xü̃gü rü Parichéugüxü̃tawa nanagagü ga gumá yatü ga ngexetüchire̱xcü.
14 Nüü̃ nadau 9:13
15 Rü yexguma ga yema Parichéugü rü nüxna nacagüe ga gumá yatü, rü ñanagürügü: —¿Ñuxãcü i marü curümexetüxü̃ i ñu̱xmax? —ñanagürügü. Rü nüma nanangãxü̃ rü ñanagürü: —Waixü̃mü ga naxbü̱xágümaxã yawaixẽẽxü̃maxã choxü̃ nachaxetü, rü ñu̱xũchi dexámaxã chaugü chayayauxetü, rü ngẽmaca̱x marü chidauuchi —ñanagürü.
16 Rü yexguma ga ñuxre ga Parichéugü rü ñanagürügü: —Yema yatü ga cuxü̃ rümexẽẽxü̃ rü tama Tupanaarü duü̃xü̃ nixĩ, erü tama nanaxaure i ngü̃xchigaarü ngunexü̃ —ñanagürügü. Natürü togü ga Parichéugü rü ñanagürügü: —¿Ñuxãcü nanaxü i ngẽma cua̱xruxü̃ i mexü̃ ega wüxi i pecaduã́xü̃ yixĩxgux? —ñanagürügü. Rü yemaacü nügü nitoye ga nagu naxĩnüexü̃wa ga yema Parichéugü.
17 Rü wena nüxna nacagüe ga gumá yatü ga ngexetüchire̱xcü, rü ñanagürügü: —¿Natürü cuma rü ñuxũ ñacuxü̃ nachiga i ngẽma yatü ga cuxü̃ rümexẽẽxü̃? —ñanagürügü. Rü nüma nanangãxü̃, rü ñanagürü: —Cha̱u̱xca̱x rü wüxi i Tupanaarü orearü uruxü̃ nixĩ —ñanagürü.
18 Natürü ga yema Yudíugü rü tama nüxü̃́ nayaxõgüchaü̃ ga nüma nax yixĩxü̃ nax nangexetüchiréxü̃, rü ñu̱xma rü marü nax yadauuchixü̃. Rü yemaca̱x ga yema Yudíugü rü tümaca̱x nangemagü ga nanatü rü naé ga gumá yatü ga rümexetücü.
19 Rü tüxna nacagü, rü ñanagürügü: —¿Daa yixĩxü̃ ga gumá pene ga nüxü̃ pixucü ga woetama ngexetüãcü bucü? ¿Ñuxãcü i ñu̱xma i yadauuchixü̃? —ñanagürügü.
20 Rü nanatü rü naé tanangãxü̃gü rü ñatarügügü: —Ngẽmáacü nüxü̃ tacua̱x rü daa nixĩ ya tone ga ngexetüãcüma bucü.
21 Natürü tama nüxü̃ tacua̱x ga ñuxãcü nax yadauuchixü̃ i ñu̱xmax. Rü tama nüxü̃ tacua̱x nax texé namexetüxẽẽxü̃. ¡Ẽcü nüxnatama pecagü! Erü nüma rü marü naya, rü nümatama pemaxã nüxü̃ nax yaxuxü̃ca̱x —ñatarügügü.
22 Rü yema ñatarügügü ga nanatü rü naé, yerü tamuü̃e. Yerü ga Yudíugü rü marü nügümaxã nanamexẽxẽgü nax tüxü̃ ínata̱xüchigüxü̃ca̱x ga ngutaque̱xepataü̃wa ga texé ga Ngechuchuaxü̃́ yaxṍxe nax Cristu yixĩxü̃.
23 Rü yemaca̱x nixĩ ga nanatü rü naé ga ñatagügüxü̃: “¡Ẽcü, nüxnatama pecagü! Erü nüma rü marü naya rü nümatama pemaxã nüxü̃ nax yaxuxü̃ca̱x”, ñatagügüxü̃.
24 Rü yexguma ga yema Yudíugü rü wenaxarü naxca̱x nacagü ga gumá ngexetüchire̱xcü. Rü ñanagürügü nüxü̃: —Rü ñu̱xma tanaxwa̱xe i Tupanape̱xewa rü aixcüma tomaxã nüxü̃ quixu nax texé cuxü̃ rümexẽẽxü̃. Erü toma rü meama nüxü̃ tacua̱x i ngẽma Ngechuchu rü wüxi i pecaduã́xü̃ nax yixĩxü̃ —ñanagürügü.
25 Rü nüma nanangãxü̃ rü ñanagürü nüxü̃: —Choma rü tama nüxü̃ chacua̱x ega wüxi i pecaduã́xü̃ yixĩxgu rü ẽ̱xna tama. Rü ngẽma nüxü̃ chacuáxü̃ nixĩ nax changexetüxü̃ ga noxrix rü ñu̱xma rü nax chidauuchixü̃ —ñanagürü.
26 Rü wenaxarü nüxna nacagüe, rü ñanagürügü: —¿Rü ta̱xacü nixĩ ga cumaxã naxüxü̃? ¿Rü ñuxãcü ga naxüaxü̃ ga cuxü̃ nax yadauuchixetüxẽẽxü̃ca̱x? —ñanagürügü.
27 Rü nanangãxü̃ rü ñanagürü nüxü̃: —Marü pemaxã nüxü̃ chixu, rü tama choxü̃́ iperüxĩnüechaü̃. ¿Tü̱xcüü̃ penaxwa̱xe nax wena pemaxã nüxü̃ chixuxü̃? ¿Ẽ̱xna pema rü ta nüxü̃́ peyaxõgüchaü̃? —ñanagürü.
28 Rü yexguma ga yema Yudíugü gumá yatümaxã chixexü̃ nixugüe, rü ñanagürügü: —Cuma erü nixĩ i nüxü̃́ cuyaxõxü̃ i ngẽma yatü, natürü i toma rü Moichéaxü̃́ nixĩ i tayaxõgüxü̃.
29 Toma rü nüxü̃ tacua̱x ga Tupana rü aixcüma Moichémaxã nax yadexaxü̃, natürü ngẽma Ngechuchu rü tama nüxü̃ tacua̱x nax ngextá ne naxũxü̃ —ñanagürügü.
30 Rü gumá yatü nanangãxü̃, rü ñanagürü nüxü̃: —¿Ñuxãcü nixĩ i ngẽma? Nüma rü marü choxü̃ narümexetüxẽxẽ, natürü ¿ñuxãcü i pema i tama nüxü̃ pecuáxü̃ nax ngextá ne naxũxü̃?
31 Rü guxãma rü meama nüxü̃ tacua̱x rü Tupana tama nüxü̃ naxĩnü i pecaduã̱xgüxü̃arü yumüxẽ. Natürü Tupana rü tüxü̃́ nüxü̃ naxĩnü i tümaarü yumüxẽ ya yíxema nüxü̃ icua̱xüxü̃güxe rü naxǘxe i Tupanaarü ngúchaü̃.
32 Taguma ñuxgu nüxü̃ taxĩnüchiga i wüxi i yatü nax yadauuchixẽẽãxü̃ i wüxi i duü̃xü̃ i norü bucüma ngexetüxü̃.
33 Rü ngẽxguma chi tama Tupana núma namuxgu ya daa yatü ya choxü̃ rümexẽẽcü, rü taxuacü chi mexü̃ naxü —ñanagürü ga gumá yatü ga ngexetüchire̱xcü.
34 Rü yexguma ga yema Yudíugüarü ãẽ̱xgacügü, rü ñanagürügü nüxü̃: —Cuma nax pecadugu cubuxü̃, ¿rü ñuxãcü cunaxwa̱xe nax toxü̃ cungúexẽẽchaü̃xü̃? —ñanagürügü. Rü ñu̱xũchi ínanata̱xüchigü ga ngutaque̱xepataü̃wa.
Duü̃xü̃gü i tama yaxõgüxü̃ rü ngexetüxü̃rüxü̃ nixĩgü
35 Rü Ngechuchu rü nüxü̃ nacuáchiga nax ínata̱xüchigüãxü̃ ga gumá ngexetüchire̱xcü. Rü yexguma nüxü̃ nada̱u̱xgu, rü ñanagürü nüxü̃: —¿Nüxü̃́ cuyaxõxü̃ ya Tupana Nane ya duü̃xü̃xü̃ ixĩcü? —ñanagürü.
36 Rü yexguma ga nüma rü Ngechuchuxü̃ nangãxü̃ rü ñanagürü: —Pa Corix, ¡chomaxã nüxü̃ ixu nax texe yixĩxü̃ nax nüxü̃́ chayaxõxü̃ca̱x! —ñanagürü.
37 Rü Ngechuchu nanangãxü̃, rü ñanagürü: —Marü nüxü̃ cudau ya Tupana Nane. Rü nüma nixĩ i cumaxã íyadexaxü̃ —ñanagürü.
38 Rü yexguma ga gumá yatü ga ngexetüchire̱xcü rü Ngechuchupe̱xegu nacaxã́pü̱xü, rü nüxü̃ nicua̱xüxü̃, rü ñanagürü nüxü̃: —Ngẽmáacü cuxü̃́ chayaxõ, Pa Corix —ñanagürü.
39 Rü yexguma ga Ngechuchu rü ñanagürü: —Ñoma i naanewa chaxũ nax chayadexechixü̃ca̱x i chorü duü̃xü̃gü nüxna i ngẽma tama choxrü ixĩgüxü̃. Rü nua chaxũ nax ngẽma ngexetügüxü̃ nayadauuchigüxü̃ rü ngẽma idauuchixetügüxü̃ rü ngexetügüxü̃rüxü̃ nax yixĩgüxü̃ —ñanagürü.
40 Rü ñuxre ga Parichéugü ga yéma Ngechuchumaxã yexmagüxü̃, rü yexguma yema orexü̃ naxĩnüegu, rü Ngechuchuna nacagü, rü ñanagürügü: —¿Ẽ̱xna toma rü ta tama Tupanaxü̃ tacua̱xgü ñacuxü̃? —ñanagürügü.
41 Rü Ngechuchu nanangãxü̃ rü ñanagürü nüxü̃: —Ngẽxguma chi ngexetügüxü̃ pixĩgügu rü taxũchima pegagu nixĩ nax pepecaduã̱xgüxü̃. Natürü ngẽma nax pegü pixuxü̃ nax pidauuchixü̃ rü ngẽmaca̱x pegagutama nixĩ nax pepecaduã̱xgüxü̃ —ñanagürü.
