Jueces 1:1-36
1 Nawena ga nax nayuxü̃ ga Yochué rü nümagü ga Iraétanüxü̃ rü Cori ya Tupanana nacagüe nax nüxü̃ nacua̱xgüxü̃ca̱x rü ngexü̃rüüxü̃ i natücumü tá nixĩ i nüxíra Canaáü̃tanüxü̃maxã nügü daixü̃.
2 Rü nüma ga Cori ya Tupana rü nanangãxü̃ rü ñanagürü: —Yudátanüxü̃ tá nixĩ i nüxíra naxca̱x íyaxüãchixü̃ nax nügü nada̱i̱xü̃ca̱x erü Yudátanüxü̃na tá nixĩ i chanaxãxü̃ i ngẽma naane —ñanagürü.
3 Rü nümagü ga yema Yudátanüxü̃ rü Chimeóü̃tanüxü̃güna naxu nax nüxü̃ nangü̃xẽẽgüxü̃ca̱x, rü ñanagürügü nüxü̃: —¡Toxü̃ perüngü̃xẽxẽgü nax wüxigu nada̱i̱xü̃ca̱x i ngẽma Canaáü̃tanüxü̃ rü nüxna napuxü̃ca̱x i ngẽma naane i toxna üxü̃! Rü ngẽmawena rü toma rü tá toxi pexü̃ taxümücügü nawa i ngẽma naane i pexna üxü̃ —ñanagürügü. Rü nümagü ga Chimeóü̃tanüxü̃ rü nawe narüxĩ.
4 Rü yemaacü wüxigu Canaáü̃tanüxü̃ca̱x rü Ferechéutanüxü̃ca̱x ínayaxüãchi. Rü Tupana nüxü̃ narüngü̃xẽxẽ nax nadaiaxü̃ca̱x ga yema duü̃xü̃gü. Rü ĩane ga Béchexwa nanadai ga 10,000 ga norü uanügü.
5 Rü yexma nüxü̃ nayangau ga guma ĩanearü ãẽ̱xgacü ga Adonichéde rü namaxã nügü nadai. Rü yema Canaáü̃tanüxü̃xü̃ rü Ferechéutanüxü̃xü̃ narüporamaegü.
6 Rü yexguma nügü ínadaiyane rü niña ga Adonichéde. Natürü nawe nangẽgüama rü nanayauxgü. Rü ñu̱xũchi ínanadaü̃ ga norü tatareneme̱xẽ rü norü tatarenecutü.
7 Rü yexguma nüma ga Adonichéde rü ñanagürü: —Tupana rü ñu̱xma chomaxã nanaxü ga yema chaxüxü̃ namaxã ga yema 70 ga ãẽ̱xgacügü ga yexguma íchanadaü̃gu ga guma norü tatareneme̱xẽgü rü guma norü tatarenecutügü. Rü nümagü rü chorü mechatüü̃gu ínawaatanünexü̃ naxca̱x ga yema chorü õnatüchi ga rüyixix —ñanagürü. Rü yemawena rü Adonichédexü̃ Yerucharéü̃wa nagagü. Rü yexma nixĩ ga nayuxü̃.
Yudátanüxü̃ rü Yerucharéü̃ca̱x rü Ebróü̃ca̱x ínayaxüãchi
8 Rü yema Yudátanüxü̃ rü Yerucharéü̃ca̱x ínayaxüãchi rü taramaxã nanadai ga yema Yebútanüxü̃ ga yéma maxẽxü̃. Rü yemawena nayagugü ga guma ĩane.
9 Rü yema Yudátanüxü̃ rü yemawena nayadai ga yema Canaáü̃tanüxü̃ ga máxpü̱xanexü̃gu rü Négueanegu rü ínadoxonexü̃gu ãchiü̃güxü̃.
10 Rü yexgumarüxü̃ ta nanadai ga yema Canaáü̃tanüxü̃ ga Ebróü̃gu ãchiü̃güxü̃. Rü guma ĩane rü noxri rü Quiriáx-abágu naxãéga. Rü yexma nixĩ ga nadaiaxü̃ ga ãẽ̱xgacügü ga Chechái rü Aimáü̃ rü Tarmái.
Otonié rü ĩane ga Derbíxca̱x ínayagoõchi
11 Rü ñu̱xũchi ĩane ga Debíxca̱x ínayagoõchi. Rü guma ĩane rü noxri Quiriáx-chéfegu naxãéga.
12 Rü nüma ga Caréx rü ñanagürü: —Texé ya yíxema Debíx yapuxe rü chauxacü i Áxchamaxã tá tüxü̃ chaxüma̱x —ñanagürü.
13 Rü guma ĩane napuxü̃ rü Otonié ga Quená nane nixĩ. Rü nüma ga Quená rü Caréxenexẽ ga rübumaecü nixĩ. Rü nüma ga Caréx rü Otoniéna ngĩxü̃ namu ga yema naxacü ga Áxcha.
14 Rü yema ngunexü̃ ga nagu yangĩgüxü̃gu rü nüma ga Otonié ngĩxü̃ ñanagürü: —¡Namaxã nüxü̃ ixu ya cunatü nax tüxna naxããxü̃ca̱x i wüxi i naane! —ñanagürü. Rü yexguma ga ngĩma rü irüxüe ga ngĩrü búruétüwa. Rü nüma ga Caréx rü ngĩxna naca rü ñanagürü: —¿Ta̱xacü cunaxwa̱xe? —ñanagürü.
15 Rü ngĩma rü inangãxü̃ rü ngĩgürügü: —Chanaxwa̱xe i choxü̃ curüngü̃xẽxẽ. Ngẽma naane i choxna cuxãxü̃ i Néguewa rü nangearü dexáã̱x. Rü ngẽmaca̱x chanaxwa̱xe i choxna cunaxã ta i naane i dexáã́xü̃ —ngĩgürügü. Rü nümax ga Caréx rü ngĩxna nanaxã ga naane ga natüxacüáxü̃ ga ínamáxpü̱xanexü̃wa rü ínadoxonexü̃wa.
Yudátanüxü̃ rü ñu̱xũchi Bẽyamíü̃tanüxü̃ yapugüne
16 Yema Quenéutanüxü̃ ga Moiché na̱xtütanüxü̃ ixĩgüxü̃ rü Yericúwa ínachoxü̃ wüxigu namaxã ga Yudátanüxü̃. Rü Yudáanearü naxnücüanewa naxĩ ga Aráxarü súrwaama. Rü yexma nayaxãchiü̃gü natanügu ga yémacüã̱xgü.
17 Yemawena ga Yudátanüxü̃ rü ñu̱xũchi Chimeóü̃tanüxü̃ rü wüxigu naxca̱x ínayaxüãchi ga yema Canaáü̃tanüxü̃ ga Chefáxwa maxẽxü̃. Rü wüxicana inayanaxoxẽẽgü ga guma ĩane, rü yemaca̱x Ormágu nanaxüégagü.
18 Rü nanapugü ga guma ĩanegü ga Gácha rü Acharóü̃ rü Ecróü̃ namaxã ga norü naanegü.
19 Rü Cori ya Tupanaarü ngü̃xẽẽmaxã nüma ga Yudátanüxü̃ nayapugü ga yema máxpü̱xanexü̃. Natürü taxucürüwa nayapugü ga yema doxonexü̃, yerü yema duü̃xü̃gü ga yéma maxẽxü̃ rü nüxü̃́ nayexmagü ga carugü ga fierunaxca̱x ixĩgüne.
20 Rü Caréxna naxǘ ga guma ĩane ga Ebróü̃, yema Moiché nüxü̃ ixuxü̃rüxü̃. Rü nüma ga Caréx rü guma ĩanewa ínanawoxü̃ ga nataagü ga yema tomaepü̱x ga Anáx nanegü.
21 Natürü yema Bẽyamíü̃tanüxü̃ rü taxucürüwa ínanawoxü̃ ga yema Yebútanüxü̃ ga Yerucharéü̃gu ãchiü̃güxü̃. Rü ngẽmaca̱x woo ñu̱xma rü ta i ngẽma Yebútanüxü̃ rü Bẽyamíü̃tanüxü̃ rü wüxigu Yerucharéü̃wa namaxẽ.
Efraíü̃tanüxü̃ rü Manachétanüxü̃ rü ĩane ga Betéxü̃ nayapugü
22 Rü Efraíü̃tanüxü̃ rü ñu̱xũchi Manachétanüxü̃ rü inaxĩãchi nax ĩane ya Betéxü̃ yapugüxü̃. Rü nüma ga Cori ya Tupana rü nüxü̃ narüngü̃xẽxẽ.
23 Rü guma ĩane rü noxri rü Lúx nixĩ ga naéga. Rü guma ĩanewa nanamugü ga ngugütaeruü̃gü rü Cori ya Tupana nüxü̃ narüngü̃xẽxẽ.
24 Rü yexguma yema ngugütaeruü̃gü nüxü̃ daugügu ga wüxi ga yatü ga guma ĩanewa ixũxũxü̃ rü ñanagürügü nüxü̃: —Ngẽxguma tá tomaxã nüxü̃ quixuxgu nax ñuxãcü tichoxcuxü̃ nawa ya daa ĩane rü toma rü taxũtáma cuxü̃ tima̱x —ñanagürügü.
25 Rü yema yatü namaxã nüxü̃ nixu nax ñuxãcü íxücuxü̃ nawa ga guma ĩane. Rü nüma ga Efraíü̃tanüxü̃ rü Manachétanüxü̃ rü taramaxã nanadai ga guxü̃ma ga yema duü̃xü̃gü ga guma ĩanewa maxẽxü̃. Natürü tama nayama̱xgü ga yema yatü ga namaxã nüxü̃ ixuxü̃ nax ñuxãcü nachocuxü̃ ga guma ĩanewa, rü woo guxü̃ma ga natanüxü̃ rü ta tama nanadai.
26 Yexguma ga yema yatü rü Itítanüxü̃arü naanewa naxũ rü yexma nanaxü ga wüxi ga yexwaca̱xü̃ne ga ĩane rü ñu̱xũchi Lúxgu nanaxüéga. Rü ngẽma naéga rü ñu̱xma rü ta ngẽmatama nixĩ.
Naanegü ga tama napugüxü̃
27 Yema Manachétanüxü̃ rü taxucürüwa guma ĩanegü ga Bex-cheáü̃wa rü Taanáxwa rü Dóxwa rü Ibeáü̃wa rü ñu̱xũchi Meguíduwa ínanawoxü̃ ga yema duü̃xü̃gü ga guma ĩanegüwa maxẽxü̃. Rü woo ga guma ĩanegüarü ngaicamawa yexmagüxü̃ ga ĩanexacügüarü duü̃xü̃gü rü taxucürüwa ínanawoxü̃. Rü yemaacü ga yema Canaáü̃tanüxü̃ rü yématama namaxẽ.
28 Nüma ga Iraétanüxü̃ rü yexguma yexeraãcü naporamaegu rü yema Canaáü̃tanüxü̃xü̃ namu nax nüxü̃́ napuracüexü̃ca̱x, natürü taxucürüwa norü naanewa ínanawoxü̃.
29 Rü yema Efraíü̃tanüxü̃ rü ta taxucürüwa ínanawoxü̃ ga yema Canaáü̃tanüxü̃ ga ĩane ga Guéchegu ãchiü̃güxü̃. Rü yemaca̱x ga yema Canaáü̃tanüxü̃ rü yématama Efraíü̃tanüxü̃tanüwa namaxẽ.
Iraétanüxü̃ rü totücumü ga duü̃xü̃güxü̃ narüporamaegü
30 Rü yexgumarüxü̃ ta ga Chaburóü̃tanüxü̃ rü taxucürüwa ínanawoxü̃ ga yema Canaáü̃tanüxü̃ ga Quitóü̃gu rü Naarágu ãchiü̃güxü̃. Rü yemaca̱x ga yema Canaáü̃tanüxü̃ rü yexmatama Chaburóü̃tanüxü̃tanügu naxãchiü̃gü rü norü puracütanüxü̃ nixĩgü.
31 1:31-32 Rü yexgumarüxü̃ ta ga Achétanüxü̃ rü taxucürüwa Canaáü̃tanüxü̃xü̃ ínawoxü̃ ga Acówa rü Chidóü̃wa rü Aráxwa rü Achíxwa rü Erebáwa rü Aféxwa rü ñu̱xũchi Reóxwa. Rü yemaca̱x ga nüma ga Achétanüxü̃ rü yema Canaáü̃tanüxü̃tanügu naxãchiü̃gü.
32 Nüü̃ nadau 1:31
33 Yexgumarüxü̃ ta ga Netarítanüxü̃ rü taxucürüwa Canaáü̃tanüxü̃xü̃ ínawoxü̃ ga Bex-cheméwa rü Bex-anáxwa. Rü ñu̱xũchi nüma ga Netarítanüxü̃ rü yema Canaáü̃tanüxü̃tanügu naxãchiü̃gü rü norü puracütanüxü̃ nayaxĩgüxẽxẽ
34 Yema Dáü̃tanüxü̃ rü taxucürüwa doxonexü̃wa nangugü, yerü yema Amoréutanüxü̃ rü naporae rü máxpü̱xaneca̱x nanawoeguxẽxẽ.
35 Rü yemaacü ga yema Amoréutanüxü̃ rü Yérewatama rü Ayaróü̃watama rü ñu̱xũchi Chaabíü̃watama nayexmagü. Natürü yexguma yema Efraíü̃tanüxü̃ rü ñu̱xũchi Manachétanüxü̃ yexeraãcü naporamaegügu rü yema Amoréutanüxü̃xü̃ namu nax nüxü̃́ napuracüexü̃ca̱x.
36 Rü yema Amoréutanüxü̃arü üyeane rü inaxügü ga Acabíü̃arü tuãchiwa rü ñu̱xmata Cheráwa nangu rü yéma ínadaãchi ga máxpü̱xanexü̃wa.
