Jueces 10:1-18
10 Abimeréxwena rü wüxi ga yatü ga Ichacátanüxü̃ ga Torágu ãégaxü̃ rü nüxí Iraétanüxü̃maxã inacua̱x nax norü uanügüme̱xẽwa ínanguxü̃xẽẽxü̃ca̱x. Rü nüma ga Torá rü Puá nane nixĩ rü Dodótaxã nixĩ. Rü nüma ga Torá rü naxãchiü̃ nagu ga guma ĩane ga Chamí ga Efraíü̃arü máxpüxanexü̃wa yexmane.
2 Rü 23 ga taunecü Iraéanemaxã inacua̱x rü ñu̱xmata nayumare. Rü norü ĩane ga Chamígu nanata̱xgü.
Yaí rü Iraétanüxü̃maxã inacua̱x
3 Rü nawena ga Torá rü wüxi ga Garaáxanecüã̱x ga Yaígu ãégaxü̃ nixĩ ga Iraéanemaxã icuáxü̃. Rü nüma rü 22 ga taunecü nixĩ nax ãẽ̱xgacü yixĩxü̃.
4 Yaí rü 30 ga nanegü nüxü̃́ nayexma rü wüxichigü ga yema nanegü rü wüxi ga ĩanemaxã inacua̱x ga Garaáxarü naanewa. Rü yimá 30 ya ĩanegü rü ñu̱xma rü ta i duü̃xü̃gü rü nüxü̃ nacua̱xgü nax Yaíarü ĩanegü yaxĩgüxü̃.
5 Rü yexguma nayu̱xgu ga Yaí rü wüxi ga nachica ga Camóü̃gu ãégaxü̃gu nanata̱xgü.
Amóü̃tanüxü̃ rü chixri Iraétanüxü̃maxã inacua̱x
6 Natürü nüma ga Iraétanüxü̃ rü wenaxarü Cori ya Tupanape̱xewa chixexü̃ naxügü rü guxü̃raü̃xü̃ ga Baáchicüna̱xãxü̃ rü Ataréchicüna̱xãxü̃ nicua̱xüü̃gü. Rü yexgumarüxü̃ tá nüxü̃ nicua̱xüü̃gü ga Chíriacüã̱xgüarü tupanachicüna̱xãgü, rü Chidóü̃cüã̱xgüarü tupanachicüna̱xãgü, rü Moátanüxü̃arü tupanachicüna̱xãgü rü Amóü̃tanüxü̃arü tupanachicüna̱xãgü, rü Firitéugüarü tupanachicüna̱xãgü. Rü Cori ya Tupanaxü̃ narüngümae rü nüxü̃ narüxoe nax naxca̱x nangutaque̱xegüxü̃.
7 Rü yemaca̱x nüma ga Cori ya Tupana rü namaxã nanu rü Firitéugüme̱xẽwa rü Amóü̃tanüxü̃me̱xẽwa nanayexmagüxẽxẽ nax namaxã inacua̱xgüxü̃ca̱x.
8 Rü 18 ga taunecü nixĩ ga Firitéugü rü Amóü̃tanüxü̃ poraãcü chixri namaxã inacua̱xgüxü̃ ga yema Iraétanüxü̃ ga Garaáxanewa maxẽxü̃ ga natü ga Yudáü̃arü tocutüwa ga Amoréutanüxü̃arü naanewa.
9 Rü nüma ga Amóü̃tanüxü̃ rü natü ga Yudáü̃ nichoü̃ nax Yudátanüxü̃maxã rü Bẽyamíü̃tanüxü̃maxã rü Efraíü̃tanüxü̃maxã nügü yadaixü̃ca̱x. Rü yexeraxü̃ ga guxchawa nayexmagü ga yema Iraétanüxü̃.
10 Rü yexguma ga Iraétanüxü̃ rü Cori ya Tupanana ngü̃xẽẽca̱x nacagüe rü ñanagürügü: —Pa Tórü Tupanax, cupe̱xewa chixexü̃ taxügü rü cuxna tixĩgachi nax nüxü̃ ticua̱xüü̃güxü̃ca̱x i ngẽma tupananetagümare —ñanagürügü.
11 10:11-12 Rü nüma ga Cori ya Tupana rü nanangãxü̃ rü ñanagürü: —Pemax rü Equítuanecüã̱xgüme̱xẽwa peyexmagü, rü Amoréugüme̱xẽwa peyexmagü, rü Amóü̃tanüxü̃me̱xẽwa peyexmagü, rü Firitéugüme̱xẽwa peyexmagü rü Chidóü̃cüã̱xgüme̱xẽwa peyexmagü rü Amaréxtanüxü̃me̱xẽwa peyexmagü, rü Madiáü̃tanüxü̃me̱xẽwa peyexmagü, natürü yexguma pema choxna pecagu rü choma rü naxme̱xwa pexü̃ íchanguxü̃xẽxẽ.
12 Nüü̃ nadau 10:11
13 Rü naétüwa nax yemaacü pexü̃ charüngü̃xẽẽxü̃ rü pemax rü choxna pixĩgachiama naxca̱x nax tupananetaxü̃ picua̱xüü̃güxü̃. Rü ngẽmaca̱x i ñu̱xma rü taxũtáma wena pexü̃ íchanguxü̃xẽxẽ.
14 ¡Rü ñu̱xmax rü ngéma naxü̃tawa pexĩ rü nüxna ngü̃xẽxẽca̱x peyaca̱x i ngẽma tupananetagü i pema peyauxgüxü̃! ¡Rü ẽcü i ñu̱xma rü nümagü pexü̃ ínanguxü̃xẽxẽ i ngẽxguma guxchaxü̃wa pengẽxmagügu! —ñanagürü.
15 Rü yexguma ga Iraétanüxü̃ rü Corixü̃ nangãxü̃gü rü ñanagürügü: —Aixcüma nixĩ i chixexü̃ taxügüxü̃. ¡Rü tomaxã naxü i ngẽma yexera cuxca̱x rümemaexü̃, natürü tanaxwa̱xe i curü ngü̃xẽxẽ. ¡Rü toxü̃ ínanguxü̃xẽxẽ i ñu̱xmax! —ñanagürügü.
16 Rü nüma ga Iraétanüxü̃ rü nüxna nixĩgachi ga yema togü ga nachixü̃anegüarü tupananetagü rü wenaxarü Cori ga Tupanaxü̃ nicua̱xüü̃gü. Rü nüma ga Cori ya Tupana rü marü tama yáxna namaxã naxĩnü nax poraãcü ngúxü̃ yangegüxü̃ ga Iraétanüxü̃, rü wenaxarü nüxü̃ narüngü̃xẽxẽ.
17 Rü nüma ga Amóü̃tanüxü̃ rü nügü nanutaque̱xe rü ĩane ga Garaáxgu nayapexgü. Rü yexgumarüxü̃ ta ga Iraétanüxü̃ rü nügü nanutaque̱xe rü Mispágu nayapexgü.
18 Rü yema Iraétanüxü̃ ga Garaáxanewa maxẽxü̃ rü ñu̱xũchi norü ãẽ̱xgacügü ga namaxã icua̱xgüxü̃ rü nügümaxã ñanagürügü: —Yíxema tamaxã icuáxe nax Amóü̃tanüxü̃ca̱x ixĩãchixü̃ rü yíxema tá tixĩ ya tórü ãẽ̱xgacü ixĩxẽ i Garaáxanewa —ñanagürügü.
