Jueces 11:1-40
11 11:1-2 Yeté rü Garaáxanewa rü wüxi ga churara ga daiwa poracü nixĩ. Rü nüma rü wüxi ga nge ga naxü̃nemaxã taxexü̃ ngĩne nixĩ, rü nanatü rü Garaáx nixĩ ga tümaéga. Rü nüma ga Garaáx rü naxma̱xwaxüchi nüxü̃́ nayexma ga to ga nanegü. Rü yexguma nayaegu ga yema nanegü, rü Yetéxü̃ nanatüpatawa ínata̱xüchigü rü ñanagürügü nüxü̃: —Taxuxü̃táma cuxna naxǘ i ngẽma tanatüarü ngẽmaxü̃gü, erü to i ngexü̃xacümare quixĩ —ñanagürügü.
2 Nüü̃ nadau 11:1
3 Rü yemaca̱x ga Yeté rü naenexẽgüna nixũ rü Tóxanegu nayaxãchiü̃. Rü yéma nananutaque̱xe ga wüxitücumü ga duü̃xü̃gü ga chixexü̃gu maxẽxü̃. Rü yema duü̃xü̃gü ga ngĩ́xta̱xagüxü̃maxã duü̃xẽgü tüxü̃ nibuxmüxẽxẽ rü nangĩ́xẽ.
4 11:4-5 Rü yexgumaxü̃cüü nixĩ ga Amóü̃tanüxü̃ ga Iraétanüxü̃ca̱x íyaxüãchixü̃. Rü yemaca̱x ga Garaáxanearü ãẽ̱xgacügü rü Tóxarü naanewa naxĩ nax Yetéxü̃ yagagüxü̃ca̱x.
5 Nüü̃ nadau 11:4
6 Rü Yetéxü̃ ñanagürügü: —¡Nua toxü̃tawa naxũ! Rü tanaxwa̱xe nax torü ãẽ̱xgacü quixĩxü̃ rü tomaxã icucuáxü̃ i ngẽxguma Amóü̃tanüxü̃xü̃ idaixgu —ñanagürügü.
7 Yeté rü nanangãxü̃ rü ñanagürü: —¿Tama ẽ̱xna i pema yixĩxü̃ ga chauxchi pexaiexü̃, rü choxü̃ ípemuxũchixü̃ ga chaunatüpatawa? ¿Rü ta̱xacüca̱x i ñu̱xma nax guxchaü̃wa pengẽxmagüxü̃gu i cha̱u̱xca̱x pedauxü̃ nax pexü̃ charüngü̃xẽxẽxü̃ca̱x? —ñanagürü.
8 Rü nümagü rü nanangãxü̃gü rü ñanagürügü: —Aixcüma nixĩ i guxchaxü̃wa tangexmagüxü̃ rü ngẽmaca̱x nixĩ i cuxca̱x tadaugüxü̃. Rü tanaxwa̱xe nax towe curüxũxü̃ nax Amóü̃tanüxü̃xü̃ ida̱i̱xü̃ca̱x rü torü ãẽ̱xgacü quixĩxü̃ca̱x i nua Garaáxanewa i ítaxãchiü̃güxü̃wa —ñanagürügü.
9 Rü nüma ga Yeté nanangãxü̃ rü ñanagürü —Ega pema penaxwa̱xegu nax chataeguxü̃ nax Amóü̃tanüxü̃xü̃ chayada̱i̱xü̃ca̱x, rü ngẽxguma tá Cori ya Tupana choxü̃ rüporamaexẽẽgu, rü ngẽxguma tá nixĩ i perü ãẽ̱xgacü chixĩxü̃ —ñanagürü ga Yeté.
10 Rü nüma ga yema ãẽ̱xgacügü rü Yetémaxã nüxü̃ nixugüe rü ñanagürügü: —Nümatama ya Cori ya Tupana nixĩ ya nüxü̃ cuácü nax aixcüma toma tá tayanguxẽẽxü̃ i ngẽma cunaxwa̱xexü̃ —ñanagürügü.
11 Rü yexguma ga Yeté rü nawe narüxũ. Rü guxü̃ma ga ĩanecüã̱xgü rü norü ãẽ̱xgacüxü̃ rü ñu̱xũchi norü churaragüeruxü̃ nüxü̃ naxunetagü. Rü Mispáwa rü nüma ga Yeté rü Cori ya Tupanape̱xewa wena yema ãẽ̱xgacügümaxã nüxü̃ nixu ga yema ore ga noxri namaxã nüxü̃ yaxuxü̃.
12 Rü yemawena rü nüma ga Yeté rü orearü ngeruü̃gü inamuãchitanü nax Amóü̃tanüxü̃arü ãẽ̱xgacüxü̃tawa naxĩxü̃ca̱x nax nüxü̃ yanaxugüexü̃ca̱x ga ore ga ñaxü̃: —¿Ta̱xacürü chixexü̃ cumaxã chaxü, rü ngẽmaca̱x i ñu̱xma rü chorü naaneca̱x ícuyagoõchixü̃? —ñaxü̃.
13 Rü nüma ga Amóü̃tanüxü̃arü ãẽ̱xgacü rü Yetéarü orearü ngeruxü̃güxü̃ nangãxü̃ rü ñanagürü: —Yexguma pema i Iraétanüxü̃ Equítuanewa ípechoxü̃gu, rü toxna penayaxu ga torü naane ga natü ga Arnóü̃wa ixügüxü̃ rü ñu̱xmata natü ga Yabóxwa rü natü ga Yudáü̃wa nguxü̃. Rü ñu̱xma rü chana̱xwa̱xe i meamare rü tama yigü idaixãcüma choxü̃́ cunatáeguxẽxẽ i ngẽma naane —ñanagürü.
14 11:14-15 Rü nüma ga Yeté rü to ga orearü ngeruü̃gü Amóü̃tanüxü̃arü ãẽ̱xgacüxü̃tawa namugü ñaa ga oremaxã: —Ñaa nixĩ i Yetéarü ngãxü̃: “Tomagü i Iraétanüxü̃ rü taguma nixĩ i Moátanüxü̃na rü Amóü̃tanüxü̃na norü naane tayapugüxü̃.
15 Nüü̃ nadau 11:14
16 Rü yexguma Equítuanewa ítachoxü̃gu, rü naane ga chianexü̃gu taxĩ rü ñu̱xmata Már i Dauchíüxü̃wa tangugü. Rü yéma tachopetü rü ñu̱xmata Cadéwa tangugü.
17 Rü yexguma Edóü̃arü ãẽ̱xgacüxü̃tawa tanamugü ga orearü ngeruü̃gü nax nüxna yacagüxü̃ca̱x nax toxü̃ namupetütanüxü̃ca̱x ga norü naanewa, natürü nüma rü tama toxü̃ namupetütanü. Rü yemaca̱x Moáarü ãẽ̱xgacüna rü ta tacagüe, natürü nüma rü ta tama toxü̃ namupetütanü. Rü yemaca̱x Cadéwatama tayexmagü.
18 Rü yemawena rü chianexü̃gu taxĩ rü Edóü̃tanüxü̃arü rü Moátanüxü̃arü naanexü̃ ítachoegu, rü ñu̱xmata Moátanüxü̃arü éstewaama tangugü. Rü natü i Arnóü̃arü to̱xma̱xtagu tapegü. Natürü tama yema natü tichoü̃ yerü yéma inaxügü ga Moátanüxü̃arü naane.
19 Rü yexguma rü Chióü̃ ga Amoréutanüxü̃arü ãẽ̱xgacü ga Ebóü̃cüã̱xü̃tawa tanamugü ga torü orearü ngeruü̃gü nax nüxna yacagüxü̃ca̱x nax toxü̃ namupetütanüxü̃ca̱x ga norü naanewa nax yemaacü torü naanewa taxĩxü̃ca̱x.
20 Natürü ga Chióü̃ rü tama toxü̃́ nayaxõ rü yemaca̱x tama norü naanewa toxü̃ namupetütanüchaü̃. Rü yemaca̱x ga nüma rü paxa nananutaque̱xe ga guxü̃ma ga norü churaragü rü ñu̱xũchi Yaáchawa nanamugü. Rü yexma toxü̃ nadai.
21 Natürü nüma ga Cori ya Iraétanüxü̃arü Tupana rü pora nüxna naxã ga yema Iraétanüxü̃, rü yemaca̱x Chióü̃xü̃ rü guxü̃ma ga norü churaragüxü̃ narüporamaegü rü nanadai. Rü yemaca̱x ga yema torü o̱xigü ga Iraétanüxü̃ rü nügüxü̃́ nanayaugü ga guxü̃ma ga yema naane ga Amoréutanüxü̃ nawa maxẽxü̃.
22 Rü nanayauxgü ga guxü̃ma ga yema Amoréutanüxü̃arü naane ga natü ga Arnóü̃wa íxügüxü̃ rü ñu̱xmata natü ga Yabóxwa nangu rü ñu̱xũchi yema chianexü̃ rü ñu̱xmata natü ga Yudáü̃wa nangu.
23 ¿Rü ñu̱xma i cumax rü toxü̃ ícuwoxü̃chaü̃ nawa i ngẽma naane ga Cori ya Tupana Amoréutanüxü̃na yaxuxü̃ nax toxna naxããxü̃ca̱x?
24 Rü ngẽxguma chi Quemó, ya curü tupana ta̱xacü cuxna ãxgu, rü chi cuxrü nixĩ rü cuxü̃́ nachu̱xu. ¿Tama ẽ̱xna aixcüma yixĩxü̃ i ngẽma? Rü ngẽxgumarüxü̃ ta nixĩ i toma nax toxrü yixĩxü̃ i ngẽma naane i torü Cori ya Tupana toxna ãxü̃.
25 ¿Ẽ̱xna cuma rü nüxü̃ curüyexera ga Baláx ga Chipóx nane ga Moátanüxü̃arü ãẽ̱xgacü? Dücax, nüma rü taguma tomaxã nügü nadai.
26 Rü marü 300 ya taunecü marü nua ĩanegü ga Ebóü̃wa rü Aroéwa rü norü ĩanexacügüwa tamaxẽ. Rü naétü guxü̃nema ga ĩanegü ga natü ga Arnóü̃cutüwa yexmagünewa tamaxẽ. ¿Rü tü̱xcüü̃ tama yema ngunexü̃gügu tomaxã nüxü̃ pixu nax pexü̃́ nachu̱xuxü̃ ga yema naane?
27 Choma rü taxuxü̃ma i chixexü̃ cumaxã chaxü. Rü cumawaxi nixĩ i chixexü̃ tomaxã cuxüxü̃ erü toxca̱x ícuyagoõchi. Natürü nüma ya Cori ya Tupana ya guxchaxü̃arü mexẽẽruxü̃ tá nixĩ i Iraétanüxü̃maxã rü Amóü̃tanüxü̃maxã namexẽxẽxü̃ i ngẽma guxchaxü̃” —ñanagürü.
28 Natürü woo yemaacü nax yadexaxü̃ ga Yeté rü nüma ga Amóü̃tanüxü̃arü ãẽ̱xgacü rü tama inaxĩnüchaü̃ ga yema Yeté namaxã nüxü̃ ixuxü̃.
Yetéarü uneta
29 Rü Yeténa nangu ga Tupanaãxẽ. Rü nüma ga Yeté rü Garaáxanegu rü Manachétanüxü̃anegu ínayaxüegu, rü Garaáxarü ĩane ga Mispáwa naxüpetü nax Amóü̃tanüxü̃arü naanegu naxücuxü̃ca̱x.
30 11:30-31 Rü ñu̱xũchi nüma ga Yeté rü Cori ya Tupanaxü̃ ñanagürü: —Ega ngẽxguma tá choxna cunaxãxgu i pora nax chanadaixü̃ca̱x i ngẽma Amóü̃tanüxü̃, rü cumaxã ichaxuneta rü ngẽxguma ngẽma daiwena chopatawa changuxgu rü yíxema tüxíra choxü̃ yatüxãchixe rü tá chorü ãmarexü̃ cuxca̱x tüxü̃ chigu —ñanagürü.
31 Nüü̃ nadau 11:30
32 Yeté rü norü churaragümaxã Amóü̃tanüxü̃arü naanegu naxücu, rü nanadai. Rü Cori ya Tupana rü pora nüxna taxã rü yemaca̱x Amóü̃tanüxü̃xü̃ narüporamae.
33 Rü muxü̃ma ga norü uanügüxü̃ nadai. Rü 20 ga ĩanegü napuxü̃. Rü yima ĩanegütanüwa rü Arué nixĩ ga wüxi, rü Miníx nixĩ ga nai, rü Abé-queremíü̃ nixĩ ga nai. Rü yemaacü Iraétanüxü̃me̱xẽwa nayexma ga yema Amóü̃tanüxü̃.
34 Rü yexguma ga Yeté rü napata ga Mispáwa yexmaneca̱x nataegu. Rü yexguma napatawa nanguxgu rü naxacü ga ngĩgümaxã wüxica̱xcü nüxü̃ iyatüxãchi. Rü ngĩrü taãẽmaxã paü̃déru napaxãcü nape̱xewa ne iyayüxãchichigü. Rü yexicatama nixĩ ga naxacü, rü nataxuma ga to ga naxacügü.
35 Rü nüma ga Yeté rü yexguma ngĩxü̃ nada̱u̱xgu rü nügü narügáutechiru norü ngechaü̃maxã rü ñanagürü ngĩxü̃: —¡Acha̱xa Pa Chauxacüx, taxüchixü̃ i ngúxü̃ choxna cuxã! Rü cuma nixĩ i ñaa ngúxü̃ choxü̃ quingexẽẽxü̃. Erü choma rü wüxi i uneta Cori ya Tupanamaxã chaxü, rü taxucürüwama chanawomüxẽxẽ —ñanagürü.
36 Rü ngĩma ga naxacü rü inangãxü̃ rü ngĩgürügü: —Pa Chaunatüx, ¡chomaxã naxü i ngẽma Cori ya Tupanamaxã icuxunetaxü̃! Nüma rü marü cuxü̃ narüporamaexẽxẽ nüxü̃ i ngẽma curü uanügü i Amóü̃tanüxü̃.
37 Natürü naxü̃pa i ngẽma rü cuxna naxca̱x chaca nax choxna cunaxãxü̃ ya taxre ya tauemacü nax ma̱xpǘneanegu chomücügümaxã chanaxũanexü̃ca̱x rü ngẽxma chanaxaxuneanexü̃ca̱x, erü taguma chaxãteãcüma tá chayu —ngĩgürügü.
38 Rü Yeté rü taxre ga tauemacü naxacüna naxã nax ngĩmücügümaxã ma̱xpǘneanegu naxũaneãxü̃ca̱x. Rü yexma inaxaxuneane yerü nagu irüxĩnü nax taguma naxãteãcüma tá nayuxü̃.
39 Rü yexguma nangupetügu ga taxre ga tauemacü rü ngĩnatüca̱x itaegu. Rü ngĩnatü rü ngĩmaxã nayanguxẽxẽ ga yema Cori ya Tupanamaxã nüxü̃ yaxuxü̃. Rü Yetéacü rü iyu taxuxü̃ma ga yatüxü̃ ngĩxü̃ne cuáãcüma.
40 Rü yemaca̱x ga Iraétanüxü̃arü pacügü rü guxcü ya taunecügu ãgümücü i ngunexü̃ Yetéxacüca̱x ixauxe.
