Jueces 12:1-15
12 Rü nügü namexẽẽgü ga Efraíü̃tanüxü̃arü churaragü rü nichoü̃ ga natü ga Yudáü̃wa. Rü ĩane ga Chafóü̃wa naxĩ rü Yetéxü̃ ñanagürügü: —¿Tü̱xcüü̃ quixüe i natü i Yudáü̃wa nax Amóü̃tanüxü̃maxã pegü pedaixü̃ca̱x? ¿Rü tü̱xcüü̃ tama torü ngü̃xẽẽca̱x ícuca nax cuxü̃ tarüngü̃xẽxẽgüxü̃ca̱x? Rü ñu̱xma rü tá nagu tanangixi ya cupata nax ngẽxma quixaxü̃ca̱x! —ñanagürügü.
2 Rü yexguma nüma ga Yeté rü nanangãxü̃ rü ñanagürü: —Choma rü chorü duü̃xü̃gü rü Amóü̃tanüxü̃maxã tanue. Rü yexguma pexca̱x changemagu rü pemax rü tama nua pexĩ rü tama toxü̃ ípeyapoxü̃.
3 Rü yexguma nüxü̃ chada̱u̱xgu nax marü tama nua pexĩxü̃ nax toxü̃ peyarüngü̃xẽẽgüxü̃ca̱x, rü choma rü wüxicana chorü maxü̃ ichaxã rü naxca̱x ichayagoõchi ga Amóü̃tanüxü̃ rü chanadai. Rü nüma ya Cori ya Tupana rü nüxü̃ choxü̃ narüporamaexẽxẽ. ¿Rü ta̱xacüca̱x i ñu̱xma i nua chomaxã peyanuexü̃? —ñanagürü.
4 Natürü nüma ga Efraíü̃tanüxü̃ rü nanangãxü̃gü rü ñanagürügü: —Pema i Garaáxanecüã̱xgü rü torü naanegu yarücu̱xgümarexe pixĩgü. Erü Efraíü̃tanüxü̃arü rü Manachétanüxü̃arü naanegüwa pemaxẽ —ñanagürügü. Rü yexguma nüma ga Yeté rü nananutaque̱xe ga guxü̃ma ga Garaáxanecüã̱x ga iyatüxü̃. Rü yemamaxã Efraíü̃tanüxü̃maxã nügü nadai. Rü nüma ga Yeté rü narüporamaegü.
5 12:5-6 Rü nüma ga Garaáxanecüã̱xgü rü nüxna nadaugü ga yema natü ga Yudáü̃ ínuxtamayexü̃wa nax tama yéma yachoü̃xü̃ca̱x rü yabuxmüxü̃ca̱x ga Efraíü̃tanüxü̃. Rü yexguma nayexmagu ga iñaxü̃ ga Efraíü̃tanüxü̃, rü yaxüechaü̃gu ga natü i Yudáü̃wa, rü nüma ga Garaáxanecüã̱xgü rü nüxna nacagü: —¿Cuma rü Efraíü̃tanüxü̃ quixĩ? —ñanagürügü. Rü yexguma: —Tama —ñaxgu, rü yema yéma dauxü̃taegüxü̃ rü nanamu nax —Chiboléx —ñaxü̃. Rü yexguma Efraíü̃tanüxü̃ yixĩxgu rü —Siboléx —ñanagürü yerü nüxü̃́ naguxcha nax mea naxuaxü̃ ga yema dexa. Rü yexguma: —Siboléx —ñaxgu rü nayayauxgü rü yexmatama nayama̱xgü naxpechinügu ga natü ga Yudáü̃. Rü yema ngunexü̃gügu rü yexma nayue ga 42,000 ga Efraíü̃tanüxü̃ ga iyatüxü̃.
6 Nüü̃ nadau 12:5
7 Rü nüma ga Yeté rü 6 ga taunecü Iraétanüxü̃arü ãẽ̱xgacü nixĩ. Rü yexguma nayu̱xgu, rü norü ĩane ya Garaáx ga nagu nabuxü̃negu nanata̱xgü.
Ixcháü̃chiga
8 Yetéwena rü Ixcháü̃ ga Beréü̃cüã̱x nixĩ ga Iraétanüxü̃arü ãẽ̱xgacü.
9 Rü nüma rü 30 ga nanegü rü 30 ga naxacügü nüxü̃́ nayexma. Rü guxü̃ma ga yema nanegü rü naxacügü rü tomare ga duü̃xü̃gümaxã nixãxma̱xgü rü nixãtegü. Rü nüma ga Ixcháü̃ rü 7 ga taunecü Iraétanüxü̃maxã inacua̱x.
10 Rü yexguma nayu̱xgu rü Beréü̃gu nanata̱xgü.
Eróü̃chiga
11 Ixcháü̃wena rü Eróü̃ rü Iraétanüxü̃arü ãẽ̱xgacü nixĩ. Rü nüma ga Eróü̃ rü Chaburóü̃tanüxü̃ nixĩ. Rü 10 ga taunecü namaxã inacua̱x.
12 Rü yexguma nayu̱xgu ga Eróü̃ rü ĩane ga Ayaróü̃gu nanata̱xgü ga natanüxü̃arü naanegu.
Axdóü̃chiga
13 Eróü̃wena rü Axdóü̃ ga ĩane ga Piratóü̃cüã̱x nixĩ ga Iraétanüxü̃arü ãẽ̱xgacü. Rü nüma ga Axdóü̃ rü Irié nane nixĩ.
14 Rü 8 ga taunecü nixĩ ga namaxã inacuáxü̃. Rü nüma ga Axdóü̃ rü 40 ga nane rü 30 ga nataagü nüxü̃́ nayexma. Rü wüxichigü ga yema rü norü búrutagu narüxĩĩxü̃.
15 Rü yexguma nayu̱xgu ga Axdóü̃ rü norü ĩane ga nagu nabuxü̃ne ga Piratóü̃gu nanata̱xgü. Rü Piratóü̃ rü Efraíü̃tanüxü̃arü naanewa nayexma nawa ga yema máxpü̱xanexü̃ ga noxri Amaréxtanüxü̃ nawa maxẽxü̃.
