Jueces 13:1-25
13 Natürü nüma ga Iraétanüxü̃ rü Cori ya Tupanape̱xewa wena chixexü̃ naxüe, rü yemaca̱x ga Cori ya Tupana rü Firitéugüme̱xẽgu nanayixẽxẽ ga 40 ga taunecü.
2 Rü Choráarü ĩanewa nayexma ga wüxi ga yatü ga Dáü̃tanüxü̃ ixĩcü ga Manóagu ãégacü. Rü guxema naxma̱x rü taguma taxãxacü yerü woetama tangexacüecha.
3 Natürü Cori ya Tupanaarü orearü ngeruxü̃ i daxũcüã̱x rü ngĩxca̱x nango̱x rü ñanagürü ngĩxü̃: —Cuma rü cungexacüecha, natürü i ñu̱xma rü tá cuxãxacü rü tá cuyatüxacü.
4 ¡Natürü taxũtáma bínu quixaxü rüe̱xna to i axchiü i ngúchi̱xáxü̃, rü taxũtáma ta̱xacü i Tupanape̱xewa ãũãchixü̃ cungõ̱x!
5 Erü cuxü̃́ tá nangẽxma i wüxi i cune i tagutáma texé iyoeruxü̃, erü ngẽma õxchana i naxü̃pa nax nabuxü̃ rü woetátama Tupanaca̱x ínaxüxüchi. Erü yimá cune tá nixĩ i inaxügücü nax Iraétanüxü̃xü̃ ínanguxü̃xẽẽxü̃ naxme̱xwa i ngẽma Firitéugü —ñanagürü.
6 Rü ngĩma ga yema nge rü ngĩtemaxã nüxü̃ iyarüxu rü ngĩgürügü: —Wüxi i Tupanaarü orearü ngeruxü̃ cha̱u̱xca̱x nango̱x. Choma nagu charüxĩnügu rü Tupanaarü orearü ngeruxü̃ i daxũcüã̱x nixĩ erü nanaTupanaarü orearü ngeruü̃raxü̃xü̃chi. Rü tama nüxna chaca nax ngextá ne naxũxü̃, rü woo i nüma rü tama chomaxã nüxü̃ nixu i ta̱xacü nax yixixü̃ i naéga.
7 Natürü ñanagürü choxü̃: “Cuxü̃́ tá nangẽxma i wüxi i cune. ¡Rü ñu̱xmacürüwa rü marü taxũtáma bínu quixaxü rüe̱xna axchiü i ngúchi̱xáxü̃, rü taxũtáma ta̱xacü i Tupanape̱xewa ãũãchixü̃ cungõ̱x! Erü ngẽma õxchana rü woetátama Tupanaca̱x íxüxüchixü̃ nixĩ i naxü̃pa nax nabuxü̃ rü ñu̱xmatáta nayu̱x”, ñanagürü choxü̃ —ngĩgürügü.
8 Rü yexguma ga Manóa rü nayumüxẽ rü Cori ya Tupanaxü̃ ñanagürü: —Cuxü̃ chaca̱a̱xü̃, Pa Corix, nax wena nua toxca̱x cunamuxü̃ca̱x i ngẽma curü orearü ngeruxü̃ i daxũcüã̱x nax tomaxã nüxü̃ yaxuxü̃ca̱x i ta̱xacü tá namaxã taxü i ngẽma õxchana ixírachaü̃xü̃ —ñanagürü.
9 Rü nüma ga Tupana rü Manóaxü̃ nangãxü̃, rü wenaxarü naxma̱xca̱x nango̱x ga yema Tupanaarü orearü ngeruxü̃ i daxũcüã̱x ga yexguma tümaanewa tayexmayane. Rü nüma ga Manóa rü nataxuma ga yéma.
10 Rü yemaca̱x ga tüma rü itañaãchi, rü tümateca̱x tayadau rü ñatagürü nüxü̃: —Yema to ga ngunexü̃gu nüxü̃ chadauxü̃ ga Tupanaarü orearü ngeruxü̃ i daxũcüã̱x rü wenaxarü cha̱u̱xca̱x nango̱x —ñatagürü.
11 Rü nüma ga Manóa rü inachi rü naxma̱xmaxã yema daxũcüã̱x i Tupanaarü orearü ngeruxü̃ íyexmaxü̃wa nabuxmü. Rü nüxna naca rü ñanagürü: —¿Cuma quixĩxü̃ ga to ga ngunexü̃gu cho̱xma̱xca̱x cungóxü̃? —ñanagürü. Rü nüma ga yema daxũcüã̱x rü nanangãxü̃ rü ñanagürü: —Ngü̃, choma chixĩ —ñanagürü.
12 Rü yexguma ga Manóa rü ñanagürü: —Ngẽxguma yanguxgu i ngẽma tomaxã nüxü̃ quixuxü̃ ¿rü ñuxãcü tá itanayaxẽxẽxü̃ i ngẽma buxü̃? ¿Rü ta̱xacü tá namaxã taxüxü̃? —ñanagürü.
13 Rü nüma ga Tupanaarü orearü ngeruxü̃ i daxũcüã̱x rü Manóaxü̃ nangãxü̃ rü ñanagürü: —Ngẽma cuxma̱xmaxã nüxü̃ chixuxü̃ ¡rü naxü i guxü̃ma!
14 Rü taxũtáma bínu tixaxü rü ñu̱xũchi taxuxü̃táma i to i úbawa üxü̃ i axchiü tixaxü rü woo taxuxü̃táma to i axexü̃ i ngúchi̱xáxü̃ rü taxũtáma ya Tupana chu̱xuxü̃ i õna tangõ̱x. Rü ngẽma tümamaxã nüxü̃ chixuxü̃ tá nixĩ i ngẽma taxüxü̃ —ñanagürü.
15 Manóa rü tama nüxü̃ nacua̱x nax yema duü̃xü̃ rü Tupanaarü orearü ngeruxü̃ i daxũcüã̱x nax yixĩxü̃. Rü nüxü̃ ñanagürü: —¡Cuxna taxu rü nuxã rüxã̱ũ̱x rü tomaxã nachibü! Erü wüxi i carnéruxacü tá tima̱x —ñanagürü.
16 Natürü yema Tupanaarü orearü ngeruxü̃ i daxũcüã̱x rü nanangãxü̃ rü ñanagürü: —Woo chi nuxã charüxã̱ũ̱xgu rü taxucürüwa chi chanangõ̱x i ngẽma õna i pexüxü̃. Ega penaxwa̱xegu rü Cori ya Tupanana penaxuaxü̃ norü ãmareruxü̃ —ñanagürü.
17 Rü yexguma ga Manóa rü Tupanaarü orearü ngeruxü̃ i daxũcüã̱xna naca rü ñanagürü: —¿Ta̱xacü nixĩ i cuéga? ¡Tomaxã nüxü̃ ixu nax ngẽmaãcü moxẽ cuxna taxãxü̃ca̱x i ngẽxguma yanguxgu i ngẽma tomaxã nüxü̃ quixuxü̃! —ñanagürü.
18 Natürü yema Tupanaarü orearü ngeruxü̃ i daxũcüã̱x rü nanangãxü̃ rü ñanagürü: —¿Ta̱xacüca̱x nüxü̃ cucuáxchaxü̃ i chauéga? Chauéga rü wüxi i ẽxü̃guxü̃ nixĩ —ñanagürü.
19 Rü nüma ga Manóa rü wüxi ga chíbuxacü niyaxu rü ñuxre ga trigu nayaxu, rü ñu̱xũchi wüxi ga nutaétügu nananugü nax Tupanana ãmare naxãxü̃ca̱x. Rü yéma Cori ya Tupanaca̱x nayagu. Rü yexguma ga nüma ga Tupana rü Manóape̱xewa rü naxma̱xpe̱xewa nüxü̃ nüxü̃ nadauxẽxẽ ga wüxi ga cua̱xruxü̃ ga mexẽchixü̃.
20 Yerü yexguma yema naxü̃naarü guruü̃wa napu̱xnagüemagu ga üxü, rü Manóa rü naxma̱xmaxã nüxü̃ nadaugü ga yema Tupanaarü orearü ngeruxü̃ i daxũcüã̱x rü guma üxüemagu dauxü̃wa nax naxũxü̃. Rü yexguma yemaxü̃ nadaugügu, rü yexma nanangücuchitanü.
21 Rü yema nixĩ ga nawa iyacuáxü̃ ga nüxü̃ nax nadaugüxü̃. Rü yexgumatama ga nüma ga Manóa rü düxwa nüxü̃ nicua̱xãchi ga Tupanaarü orearü ngeruxü̃ i daxũcüã̱x nax yixĩxü̃.
22 Rü nüma ga Manóa rü naxma̱xü̃ ñanagürü: —Ñu̱xmawaxix rü aixcüma tá tayue erü Tupanaxü̃ tadaugü —ñanagürü.
23 Natürü ga tüma rü tanangãxü̃ga rü ñatarügü: —Ngẽxguma chi Cori ya Tupana tüxü̃ daixchaü̃gu rü taxũchima tüxü̃́ nanayaxu i ngẽma tórü ãmare i naxca̱x iguxü̃, rü taxũchima tüxü̃ nanawe̱x i ngẽma nüxü̃ idaugüxü̃, rü bai chi i tamaxã nüxü̃ yaxuxü̃ i ngẽma ñu̱xma tamaxã naxunagüxü̃ —ñatarügü.
24 Rü yexguma nabuxgu ga yema buxü̃ rü Chanchóü̃gu nanaxüéga. Rü yexguma yayaxchigügu, rü Tupana rü poraãcü nüxü̃ narüngü̃xẽxẽ.
25 Rü wüxi ga ngunexü̃gu ga Chanchóü̃ ga yexguma Dáü̃tanüxü̃arü churaragüarü pegüchicawa naxũxgu ga ĩanegü ga Chorá rü Etaóü̃arü ngãxü̃wa, rü Tupanaãxẽ ya Üünecü inanaxügü nax Chanchóü̃maxã inacuáxü̃.
