Jueces 14:1-20
14 Rü wüxi ga ngunexü̃gu ga Chanchóü̃ rü ĩane ga Tináwa naxũ rü yéma ngĩxü̃ nadau ga wüxi ga nge ga Firitéu ixĩcü.
2 Rü yexguma nachiü̃ca̱x nataegu̱xgu rü nanatümaxã rü naémaxã nüxü̃ nixu rü ñanagürü: —Wüxi i nge i Firitéu ya ĩane ya Tináwa ngĩxü̃ chada̱u̱xcümaxã chingĩxchaü̃. Rü chanaxwa̱xe i ngĩnatümaxã penamexẽxẽ nax ngĩmaxã chaxãmaxü̃ca̱x —ñanagürü.
3 Natürü tüma ga nanatü rü naé rü ñatagürügü: —¿Tü̱xcüü̃ cuxma̱x ngĩxne cuyadau natanügu i ngẽma Firitéugü i tama Tupanaxü̃ cua̱xgüxü̃? ¿Ẽ̱xna itaxuma i nge i nua tatanüwa rü natanüwa i guxü̃ma i ñaa Iraétanüxü̃ nax ngĩmaxã cuxãmaxü̃ca̱x? —ñatagürügü. Natürü ga nüma ga Chanchóü̃ rü tüxü̃ nangãxü̃ga rü ñanagürü: —Natürü ngẽma pacü iyixĩ i choxü̃́ ngúchaü̃cü rü changĩxwa̱xecü nax cho̱xma̱x yixĩxü̃ca̱x —ñanagürü.
4 Rü tüma ga nanatü rü naé rü tama nüxü̃ tacua̱xgü nax Cori ya Tupana rü woetama yemaacü naxueguãxü̃, yerü naxca̱x nadau ga ñuxãcü Firitéugüna guxchaxü̃ nax naxãxü̃. Rü yexgumaü̃cüxü nixĩ ga Iraétanüxü̃ ga Firitéugüme̱xẽwa nayexmagüxü̃.
5 Rü yemaacü ga Chanchóü̃ rü nanatü rü naé rü ĩane ga Tináwa taxĩ. Rü yexguma Chanchóü̃ guma ĩanearü úbanecüwa nanguxgu ga guma ĩanepemawa, rü wüxi ga ai ga yexwacax yaxü̃ rü yéma nüxna nayuxu.
6 Rü yexgumatama ga Cori ya Tupanaãxẽ rü Chanchóü̃xü̃ naporaxẽxẽ. Rü ñoma wüxi ga chíbuxacüxü̃ yamáxü̃rüxü̃ rü ngexneãcüma yema aixü̃ nima̱x. Natürü ga yema nüxü̃ ngupetüxü̃ rü tama nanatümaxã rü naémaxã nüxü̃ nixu.
7 Rü ñu̱xũchi ga Chanchóü̃ rü yema pacü ga nüxü̃́ ngúchaü̃cüxü̃tawa naxũ rü ngĩmaxã nayarüdexa.
8 Rü marü ñuxre ga ngunexü̃ ngupetüguwena, rü Chanchóü̃ rü wena nataegu nax ngĩmaxã yangĩxü̃ca̱x ga yema pacü. Rü ínidau ga yema ai íyamáxü̃wa. Rü yexma nüxü̃ nayangau ga yema aixü̃ne ga berure nagu üxchiaü̃xü̃.
9 Rü nanayauxcuchixü ga guma berure, rü nayawechigü. Rü yexguma tüxü̃ iyangauxgu ga nanatü rü naé rü tümamaxã nangau rü tanawégü. Natürü tama tümamaxã nüxü̃ nixu ga yema ai ga yamáxü̃xü̃newa nax naya̱u̱xãxü̃.
10 Rü tüma ga nanatü ga Chanchóü̃ rü ngĩxü̃ ítayadau ga yema pacü nax ngĩmaxã tayamexẽẽgüxü̃ca̱x ga ngĩrü ngĩchiga. Rü nüma ga Chanchóü̃ rü nügü naxüchíü naxca̱x ga ñuxre ga ngextü̱xücü ga Firitéugü yerü woetama yema nixĩ ga nacümagü.
11 Natürü nüma ga Firitéugü rü Chanchóü̃xü̃ namuü̃e rü yemaca̱x yéma nanagagü ga 30 ga namücügü.
12 Rü yexguma ga nüma ga Chanchóü̃ rü yema 30 ga ngextü̱xücügüxü̃ ñanagürü: —Wüxi i dexa i ẽxü̃guxü̃ tá pexna chaxã nax pema chomaxã nüxü̃ pixuxü̃ca̱x nax ta̱xacüchiga yixĩxü̃. Rü 7 i ngunexü̃ tá natai i ñaa peta. Rü ngẽxguma ñaa 7 i ngunexü̃gu chomaxã nüxü̃ pixuxgu i ta̱xacüchiga yixĩxü̃ i ngẽma ore i ẽxü̃guxü̃, rü wüxichigü i pema rü tá pexna chanaxã i wüxi i naxchiru i mexü̃ i línuchinaxca̱x, rü naétü wüxi i perü petachiru i mexü̃.
13 Natürü ngẽxguma tama mea chomaxã nüxü̃ pixuxgu nax ta̱xacüchiga yixĩxü̃ i ngẽma dexa i ẽxü̃guxü̃ rü wüxíechigü i pema rü choxna tá penaxã i wüxi i naxchiru i mexü̃ i línuchinaxca̱x, rü naétü wüxi i petachiru i mexü̃ —ñanagürü. Rü nümagü rü Chanchóü̃xü̃ nangãxü̃gagü rü ñanagürügü: —¡Ẽcü tomaxã nüxü̃ ixu i ngẽma dexa i ẽxü̃guxü̃! Rü toma rü tá mea itarüxĩnüe —ñanagürügü.
14 Rü Chanchóü̃ rü nüxü̃ nixu ga yema dexa ga ẽxü̃guxü̃ rü ñanagürü: —Yema chibüxü̃wa ínaxũxũ ga õna, rü yema poraxü̃wa ínaxũxũ i maixcuraxü̃ —ñanagürü. Rü tomaepü̱x ga ngunexü̃guwena rü nümagü rü tama nüxü̃ nacua̱xgü ga ta̱xacüchiga nax yixĩxü̃ ga yema dexa ga ẽxü̃guxü̃.
15 Rü yexguma ãgümücü ga ngunexü̃wa nanguxgu, rü Chanchóü̃ma̱xü̃ ñanagürügü: —¡Pora naxü nax yimá cute toxü̃́ natauxchaxẽxẽxü̃ca̱x i ngẽma dexa i ẽxü̃guxü̃ i tomaxã nüxü̃ yaxuxü̃! Rü ngẽxguma taxũtáma tomaxã nüxü̃ quixuxgu i ta̱xacüchiga nax yixĩxü̃, rü tá cuxü̃ tigu rü ítanagu i cunatü rü guxü̃ma i cutanüxü̃. Pema rü perü petawa toxna pexu nax toxna penapuxü̃xü̃ca̱x i torü ngẽmaxü̃gü —ñanagürügü.
16 Rü yemaacü ga ngĩma rü Chanchóü̃xü̃tawa ixũ rü auxãcüma ngĩgürügü nüxü̃: —Cuma rü tama cuchoxwa̱xe rü chauxchi cuxai. Rü chautanüxü̃na cunaxã i wüxi i dexa i ẽxü̃guxü̃, natürü tama chomaxã nüxü̃ quixu nax ñuxũ ñaxü̃ i ngẽma orearü ngãxü̃ga —ngĩgürügü. Rü nüma ga Chanchóü̃ rü ngĩxü̃ nangãxü̃ga rü ñanagürü: —Woo chaunatümaxã rü chauémaxã rü tama nüxü̃ chixu, rü yexera i cumaxã rü taxũtáma nüxü̃ chixu —ñanagürü.
17 Natürü ga ngĩma rü yema 7 ga ngunexü̃ ga nagu napetaexü̃ rü naxü̃tawa ixauxecha, rü nüxü̃ ica̱a̱xü̃. Rü yexguma norü 7 ga ngunexü̃wa nanguxgu, rü düxwa ngĩmaxã nüxü̃ nixu ga yema dexa ga ẽxü̃guxü̃arü ngãxü̃ga. Rü yexguma ga ngĩma rü ngĩtanüxü̃maxã nüxü̃ iyarüxu.
18 Rü yema norü 7 ga ngunexü̃gu ga tauta yanaxücu̱xgu ga üa̱xcü, rü nüma ga Firitéugü rü Chanchóü̃maxã nüxü̃ nayarüxugü, rü ñanagürügü: —Curü ore i ẽxü̃guxü̃ rü ñaxü̃chiga nixĩ, “Rü ngẽma maixcuraxü̃ rü berurechiga nixĩ. Rü ngẽma poraxü̃ rü aichiga nixĩ” —ñanagürügü. Rü nüma ga Chanchóü̃ rü nanangãxü̃ rü ñanagürü: —Cho̱xma̱x pemaxã nüxü̃ iyaxu, rü ngẽmaca̱x nixĩ i nüxü̃ pecuáxü̃ i norü ngãxü̃ga —ñanagürü.
19 Rü yexgumatama ga Cori ya Tupanaãxẽ ya Üünexü̃ rü Chanchóü̃maxã inacua̱x. Rü nüma ga Chanchóü̃ rü ĩane ga Acharóü̃wa naxũ rü 30 ga yatü yexma nayadai. Rü yema napuxü̃xü̃ ga naxchirumaxã nüxü̃́ nanaxütanü ga yema yatügü ga dexa ga ẽxü̃guxü̃arü ngãxü̃gaxü̃ cua̱xgüxü̃. Rü yemawena ga Chanchóü̃ rü nuãcüma nanatüchiü̃ca̱x nataegu.
20 Rü yema naxma̱x ga ngĩmaxã iyangĩcü rü ngĩnatü rü wüxi ga Chanchóü̃mücüna ngĩxü̃ namu.
