Jueces 15:1-20
15 Rü ñuxre ga tauemacü nawena ga yema guxchaxü̃, rü Chanchóü̃ rü wenaxarü naxma̱xca̱x nataegu ga yexguma tríguarü buxguwa nanguxgu. Rü wüxi ga chíbuxacü ngĩxü̃́ tüxü̃ yéma naga. Rü yexguma yéma nanguxgu rü na̱xtüxü̃ ñanagürü: —Ngĩrü ucapugu tá chaxücu nax ngĩxü̃ íchayadauxü̃ca̱x i cho̱xma̱x —ñanagürü. Natürü ga guxema na̱xtü rü tama tayaxücuxẽxẽ.
2 Rü ñatarügü nüxü̃: —Choma nagu charüxĩnügu rü marü tama cungĩ́xwa̱xe rü ngẽmaca̱x wüxi i cumücüna ngĩxü̃ chamu. Natürü ingẽxma i ngĩeya̱x i rübumaecü i cuxma̱xü̃ rümemaecü. ¡Rü ngĩmaxã naxãxma̱x! —ñatagürü.
3 Natürü ga nüma ga Chanchóü̃ rü nanu. Rü na̱xtüxü̃ nangãxü̃ rü ñanagürü tüxü̃: —Ñu̱xma rü taxũtáma chaugagu nixĩ i ngẽma guxchaxü̃ i cutanüxü̃ i Firitéugümaxã chaxüxü̃ —ñanagürü.
4 Rü yema ñaxguwena rü ñu̱xũchi 300 ga ngowagü ínayauxü̃ rü taxrechigü nügürexü̃wa nayana̱i̱xgü. Rü yemagürexü̃wa nayangacuchigü ga üxü ga iya̱u̱xrane.
5 Rü ñu̱xũchi Firitéugüarü triguchitaü̃wa nayange̱xgü ga yema ngowagü. Rü yemaacü nixae ga yema trigu ga marü yexma nutaque̱xexü̃ rü yema taxũta ibuxgüxü̃. Rü ñu̱xmata norü úbanecügü rü oribunecügü rü ta nixae.
6 Rü nüma ga Firitéutanüxü̃ rü naxca̱x ínicaetanü nax texé tixĩxü̃ ga guxema yexü̃ wagüxe. Rü düxwa nüxü̃ nacua̱xgü ga Chanchóü̃ nax yixĩxü̃ ga norü numaxã yexü̃ wagüxü̃ na̱xtü ga Tinácüã̱xgagu, yerü ga naxma̱x ga Chanchóü̃ rü wüxi ga namücüna ngĩxü̃ tamu. Rü yemaca̱x ga nüma ga Firitéutanüxü̃ rü tüxü̃ ínagu ga guxema na̱xtü ngĩmaxã ga yema Chanchóü̃ naxma̱x.
7 Rü yexguma ga nüma ga Chanchóü̃ rü Firitéugüxü̃ ñanagürü: —Ñu̱xma nax ngexü̃ pewagüxü̃ ngĩmaxã i cho̱xma̱x rü taxũtáma pemaxã icharüngüxmü. Rü yexeraãcü tá pemaxã chanu rü pexü̃ chadai naxca̱x i ngẽma cho̱xma̱xmaxã pexüxü̃ —ñanagürü.
8 Rü yexgumatama norü numaxã nanadai. Rü muxü̃ma ga yema Firitéugü rü nayue. Rü yemawena ga Chanchóü̃ rü nixũ, rü ma̱xpǘne ga Etáü̃arü ãxmaxü̃wa nayamaxü̃.
Chanchóü̃ rü búruchicüramaxã Firitéugüxü̃ nadai
9 Rü nüma ga Firitéugü rü nanamu ga ñuxre ga norü churaragü nax Chanchóü̃xü̃ yanayauxgüxü̃ca̱x. Rü Yudáarü naanegu nayapexgü rü yexma nügü ninu ñu̱xmata máxpü̱xanexü̃ ga Leíwa nangugü.
10 Rü yema Yudátanüxü̃ rü nüxna nacagüe rü ñanagürügü: —¿Ta̱xacüwa nua pexĩ? —ñanagürügü. Rü nüma ga Firitéugü rü nanangãxü̃gagü rü ñanagürügü: —Chanchóü̃we tangẽgü nax tayayaxuxü̃ca̱x nax naxütanüãxü̃ca̱x ga yema tomaxã naxüxü̃ —ñanagürügü.
11 Rü yemaxü̃ naxĩnüegu rü 3,000 ga yatügü ga Yudátanüxü̃ rü Chanchóü̃ca̱x nayadaugü nagu ga yema ãxmaxü̃ ga guma ma̱xpǘne ga Etáü̃wa yexmaxü̃. Rü Chanchóü̃xü̃ ñanagürügü: —¿Tama ẽ̱xna nüxü̃ cucua̱x i ngẽma Firitéugü rü toxü̃ nax naporamaegüxü̃? ¿Rü tü̱xcüü̃ guxchaxü̃wa toxü̃ cungẽxmagüxẽxẽ? —ñanagürügü. Rü Chanchóü̃ nanangãxü̃ga rü ñanagürü: —Choma rü chaxütanü naxca̱x ga yema chomaxã naxügüxü̃ —ñanagürü.
12 15:12-13 Rü nümagü ga Yudátanüxü̃ rü nanangãxü̃gagü rü Chanchóü̃xü̃ ñanagürügü: —Toma nua taxĩ nax cuxü̃ tarüyauxgüxü̃ca̱x, rü Firitéugüna cuxü̃ tamugüxü̃ca̱x —ñanagürügü. Rü nüma ga Chanchóü̃ rü nanangãxü̃ga rü ñanagürü: —Marü name. ¡Natürü Tupanaégagu chomaxã nüxü̃ pixu nax taxũtáma pematama choxü̃ pima̱xgüxü̃! —ñanagürü. Rü taxre ga napana̱xãmaxã nayana̱i̱xgü rü yemaacü nayagagü.
13 Nüü̃ nadau 15:12
14 Rü yexguma Leíwa nangugügu ga yema Chanchóü̃xü̃ iyauxgüxü̃, rü nüma ga Firitéugü rü taãẽmaxã aita naxüe. Natürü Cori ya Tupanaãxẽ rü Chanchóü̃maxã inacua̱x, rü yema napana̱xã ga namaxã yana̱i̱xgüãxü̃ rü ñoma tünütarüxü̃ inacaũgü rü napü̱xme̱xẽwa ínayi.
15 Rü yexguma ga Chanchóü̃ rü nanayaxu ga wüxi ga búruchicüra ga yexma üxü̃ ga taxũta mea ipaxü̃. Rü yemamaxã tüxü̃ nadai ga 1,000 ga Firitéugü.
16 Rü yemawena rü ñanagürü: —Wüxi i búruchicüramaxã chanadai i 1,000 i yatügü rü chananutaque̱xe rü taxrechita nawa ínanguxuchi —ñanagürü.
17 Rü yema ñaxguwena rü yéma nanange̱x ga yema búruchicüra. Rü yemaca̱x ga yema nachica rü “Ramáx-léigu”, naxãéga.*
18 Rü nüma ga Chanchóü̃ rü poraãcüma nita̱xawa rü yemaca̱x Tupanamaxã nidexa rü ñanagürü: —Ñu̱xma nax poraãcü choxü̃ nüxü̃ curüporamaexẽẽxü̃ i chorü uanügü rü ¿Tü̱xcüü̃ ta̱xawamaxã tá choxü̃ cuyuxẽxẽxü̃? ¿Ẽ̱xna naxme̱xgu tá choxü̃ cunguxẽxẽ i ñaa Firitéugü i tama cuxü̃́ yaxõgüxü̃? —ñanagürü.
19 Rü yexgumatama ga Tupana rü wüxi ga ãxmaxü̃wa nayagoxü̃chíüxẽxẽ ga dexá. Rü yemawa naxaxe ga Chanchóü̃ rü wenaxarü nayaporaãchi. Rü yemaca̱x ga yema dexá i ñu̱xma rü ta Leíwa ngẽxmaxü̃ rü En-acoré ñaxü̃gu naxãéga.
20 Rü nüma ga Chanchóü̃ rü 20 ga taunecü Iraétanüxü̃maxã inacua̱x. Rü yexgumaü̃cüxü rü Firitéugü nixĩ ga rüporamaegüxü̃ ga yema naanewa.
Notas
^ 15:17 “Ramáx-léi”, ñaxü̃ rü “búruchicüraarü ma̱xpǘne”, ñaxü̃chiga nixĩ.
